Tachi Ak'õrepa Cristo jõmaarã k'ãyaara waibùara papida
2
1 Wãara parã mãgá choo p'anù pùrã Cristodeerã perã, mãik'aapa t'ãri o–îa p'anù pùrã irua parã k'inia iru bapari perã, mãik'aapa parã t'ãri auk'a bapari pùrã Tachi Ak'õre Jaure ome, mãik'aapa parã k'õp'ãyoorã chupùria k'awaa p'anù pùrã t'ãripa k'inia iru p'anadairã; 2 mãgara mù audupùara o–îapítù nãga oo p'anùùpa. T'ãri auk'a p'anapatáatù oodait'ee Cristopa oopi bùk'a. Chik'inia p'anapatáatù mãik'aapa t'ãri a–ba p'anapatáatù. Mãgá p'anadai Tachi Ak'õre Jaurepa parã k'aripapari perã. 3 K'îsianáatù pãchia oo k'iniata oodait'ee, audua p'anadairã. Ma k'ãyaara, audua–ee awaraarã pipùara ak'àtù. 4 Jùrùnáatù ne–inaa oodait'ee awaraarãpa parã piara ak'ùdamerã. Ma k'ãyaara jùràtù awaraarã k'aripadait'ee, ãchita jõmaarãpa pipùara ak'ùdamerã.5 K'îsia p'anapatáatù Jesucristopa k'îsia badak'a na eujãde nipak'ãri. Irua oo k'inia baji chi Ak'õrepa oopidak'a. 6 Bapachi Tachi Ak'õre Ûraa p'ãdade jara bùk'a:
Iru Tachi Ak'õrek'a bapachi mîda, Tachi Ak'õrek'a ba k'inia–e paji.
7 Mãga ooji jõma ichia iru bada ùt'ari atabëik'ãri, t'o cheit'ee na p'ek'au eujãde. Jùrùt'eraji t'oit'ee na eujãdepema k'ap'ùade, eperã jîp'aak'a. Mimiaparipa eperã k'aripaparik'a, irua eperãarã k'aripapachi Tachi Ak'õrepa oopidak'a.
8 Mãpai eperãarã t'ãide ma k'ap'ùade chupùria nâbap'eda, audupùara chupùria nâbaji kurusode piu k'achia piuk'ãri, eperã k'achia piuparik'a. Mãgá piuji oo k'inia bada perã Tachi Ak'õrepa oopidak'a.
9 Ichi itu mãgá chupùria papida perã, Tachi Ak'õrepa iru jõmaarã k'ãyaara waibùara papiji mãik'aapa irumaa t'â pipùara bùji, jõmaarã t'â k'ãyaara.
10 Tachi Ak'õrepa ma jõma ooji Jesús t'â ûridak'ãri, eperãarã jõmaweda bedabaidaidamerã iru k'îrapite ak'ùpidait'ee iru waawee p'anù. Mãga oodait'ee ùt'aripemaarã, na p'ek'au eujãdepemaarã mãik'aapa piudap'edaarã eujã ek'ari p'anù paara.
11 Ma jõmaarãpa jaradait'ee: ‘Jesucristota jõmaarã poro waibùa.’ Mãga jaradak'ãri, ak'ùpidait'ee wãara Tachi Ak'õre waawee p'anù.
Cristode ijãapataarã âdaa pùk'a<R>p'anù na p'ek'au eujãde
12 Âpemaarã k'iniarã, mùa parã t'ãide jaratee nipak'ãri, parãpa ichita oopachida mùa ûraadak'a, ijãadap'edaa perã Tachi Ak'õrepa mù pëida. Mãga oodap'edaak'a ârá audupùara mãgá oodaipia bù, mù t'ùmà bù mîda. Cristo piuda k'aurepa Tachi Ak'õrepa parã chaachaa k'aripaji atuanaadamerã. Maperã jùràtù oodait'ee Cristopa oopi bùk'a, iru cheru misa. K'îra jîp'a mãga óotù, Tachi Ak'õre waawee p'anadairã. 13 Mãga oodai, Tachi Ak'õre parã ome bapari perã. Iruata parã k'aripait'ee oo k'inia p'anadamerã mãik'aapa oodamerã Cristopa oopi bùk'a. Mãgá k'aripait'ee, t'ãripa tachi ijãapataarã k'aripa k'inia bapari perã.
14 Mamîda mãga oo p'anù misa, nejõmaata óotù aupedeeda–ee mãik'aapa pedee k'achia pedeeda–ee Tachi Ak'õre ãpùte maa–e pùrã awaraarã ãpùte. 15 Mãga ooruta pùrã, t'ãri pia mãik'aapa k'achia wêe p'anadait'ee, Tachi Ak'õre warrarã p'anadaipia bùk'a. Mãgá p'anapataadai ârapema k'achia beerã t'ãide p'anù mîda. Mãgùùrã chîara k'ûrayaa; t'ãri k'achia–idaa p'anapata. Jõdee parã pia p'anapata Ak'õrepa k'inia bùk'a. Lucero âdaa pùk'a p'anù na p'ek'au eujã p'ãriu pùk'a nâbùde. 16 Mãga p'anù parãpa awaraarãmaa jarapata perã Tachi Ak'õrepa eperãarã k'aripait'ee ùt'aa wãdamerã ãchia Cristode ijãadak'ãri. Mãga p'anapata perã Cristo cheru ewate parã k'aurepa mùa o–îa jarai wãara na mimia ichi k'inia oo–e paji.
17 Nãgaweda mù o–îa bù parã ome, Cristode ijãapata perã. Maperãpù parãpa ne–inaa pia oomaa p'anù Tachi Ak'õre–it'ee. Mapa ijãadak'aa beerãpa mù peeruta pùjida mùa jarateeda k'aurepa parãmaa mãik'aapa awaraarãmaa, mãgá ichita o–îa bait'ee. 18 Parã jida o–îa p'anadaipia bù mù ome.
Timoteo Epafrodito ome
19 Mamîda mùa ijãa bù Tachi Waibùa Jesupa mù k'aripait'ee taarã–ee Timoteo pëimerã parã ak'ùde. Mãgá irua mù o–îapii ichiaba, nepùrù chek'ãri parãpa oopata mãik'aapa p'anapata. 20 Nama awaraa eperã iruk'a wê–e pëiit'ee. Iru mù ome t'ãri auk'a bapari. Auk'a parã k'inia iru bapari mãik'aapa ne–inaa jõmaade parã k'aripa k'inia bapari. 21 Apemaarãpa jùrùmaa p'anù oodait'ee ne–inaa ãchia oo k'inia p'anù, oodai k'ãyaara Jesucristopa oopi k'inia bùk'a. 22 Mamîda mãga–e Timoteo ome. Parãpa pia k'awa p'anù irua oo k'inia bapari Cristopa oopi bùk'a, mãga unupata perã. Warra chok'ek'ee baparik'a chi ak'õre ome, mãgá bù Timoteo mù ome. Taipa auk'a jùrùpata jarateedait'ee Cristopa ooda eperãarã k'aripait'ee. 23 Mãpai mùa k'awaa atak'ãri mù jâapataarãpa k'îsia iru p'anù oodait'ee mù ome, aramata Timoteo pëiit'ee parãmaa. 24 Mamîda mùa at'ãri ijãa bù Tachi Waibùapa mù k'aripait'ee ichiaba taarã–ee wãmerã.
25 Mãgá nùmaa bù misa, mùa k'îsia iru bù tachi âpema Epafrodito pëiit'ee parãmaa. K'îsia bù iru wãipia bù parã ak'ùde. Iru mù ome auk'a mimiapari Cristo–it'ee mãik'aapa soldao chooparik'a chõo nâbùde, mãga pùk'a iru mù ome choopari, ijãadak'aa beerãpa tai ùmùatee jõnùde Cristo k'aurepa. Wãara parãpa iru namaa pëijida mù k'aripamerã. 26 Mamîda iru parãmaa audú wã k'inia nâbeeji mãik'aapa k'îsia p'ua nâbeeji, ûrik'ãri parãpa iru k'ayaa bada k'awaadap'edaa. 27 Wãara iru perá jai–idaaji mãgà k'ayaapa. Mamîda Tachi Ak'õrepa iru chupùria k'awaap'eda, jùpa beeji. Ak'õrepa mãga ook'ãri, mù jida ichiaba chupùria k'awaaji, mù waapùara chupùria nâbeepiamaapa. 28 Ârá Epafrodito mãgá jùpa beeji perã, mùa parãmaa isapai pëiit'ee, parã waya o–îa p'aneedamerã iru unudak'ãri. Mãgá mù jida mak'ùara waa k'îsia nâba–e pait'ee ma k'aurepa. 29 Iru o–îa auteebáitù Cristodeerãpa ãchi âpemaarã auteebaidaipia bùk'a. Iru mãik'aapa iru jîak'aarã pia ak'ù p'anátù. 30 Iru perá piuji Cristo mimia oo k'iniapa nama mù ome. K'ayaadachi oomaa bada perã parãpa p'oyaa ooda–e p'anadap'edaa mù k'aripadait'ee. Parã pari iru mãgá chupùriadaida perã, parãpa iru pia ak'ù p'anadaipia bù.