Ak'õre ewari waibùa ewate<R>p'ek'au k'achia wêe p'anadait'ee
3
1 Mãpai âpemaarã, t'ãri o–îa p'anapatáatù, Tachi Waibùa parã ome bapari perã. Ârá mùa parãmaa waya ûraait'ee naaweda ûraadak'a. Sê–ee mãga ooi, parãpa waya ûridaipia p'anadairã. Nãgá ûraa bùpa mùa parã k'aripa k'inia bù apidaamaa k'ûrapinaadamerã. 2 Tauk'a p'anapatáatù parã t'ãide t'îu k'inia p'anùùrã ome. Tauchaa bùpipataarã ùmùk'îraarã k'ap'ùade jõmaarã t'ãide nipapata, ijãapataarã k'ap'ùa t'ùùpi k'inia p'anadairã. Mãgà jarateepataarã k'achia p'anù, mimia k'achia oomaa p'anadairã. 3 Tachia, jõdee, ne–inaa piara iru p'anù tauchaa iru p'anadai k'ãyaara tachi k'ap'ùade, Tachi Ak'õre Jaure bapari perã tachi t'ãride. Iru k'ap'ùa pari ùt'aa t'âpata Tachi Ak'õremaa mãik'aapa t'ãri o–îa p'anapata Jesucristodeerã perã. K'awa p'anù Tachi Ak'õrepa tachi piara ak'ù–e pait'ee tauchaa bùpiruta pùrã tachi k'ap'ùade. Mapa jùrùpata oodait'ee irua oopi bùk'a, jùrùdai k'ãyaara ne–inaa eperãarãpa jùrùpata pia p'anadait'ee iru k'îrapite.4 Mãùrãk'a mù audua bai, mù k'ap'ùade tauchaa iru bairã mãik'aapa oopari perã Moisepa p'ãdade jara bùk'a. Apidaapa k'îsia bù pùrã ichiata ma ne–inaa unu iru bù, mùa audupùara mãga k'îsiai. 5 Mù t'op'eda, k'ãima ocho parumaa judiorãpa mùchi k'ap'ùade tauchaa bùjida. Mù israelitaarã p'uurudepema; Benjamindeepa uchiadap'edaarãdeepa uchiada. Mù ak'õreerãk'a mãik'aapa ãchi ëreerã naa p'anadap'edaarãk'a mù hebreo pedee pedeepari. Tachi Ak'õrepa Moisemaa Ûraa p'ãpida pia k'awa bù mãik'aapa judiorãpa ijãapata pia k'awa bù, mù fariseo pada perã. 6 Maapai ne–inaa jõma auk'a ooji ma ley p'ãdade jara bùk'a. Mãga ooji p'ek'au k'achia wêe ba k'inia bada perã Tachi Ak'õre k'îrapite. Mãgá audú ijãa bada perã tai judiorãpa ijãapatade, mùa Cristode ijãapataarã jùrùji miapiit'ee. 7 Mamîda ma jõma jùrù bada Tachi Ak'õrepa mù piara ak'ùmerã, ârá mùa maarepida p'ua–e bù, Cristo ome bapari perã. 8 Ma ne–inaa aupai mùa p'ua–e bù. Ârá jõmaweda mùa ooda t'ãri pia beeit'ee Tachi Ak'õre k'îrapite nejarrak'a bù mù–it'ee, ne–inaa piara apida wê–e perã Mùchi Waibùa Jesucristo k'awai k'ãyaara 9 mãik'aapa araa bai k'ãyaara iru ome. Mapa waa jùrù–e bù p'ek'au k'achia wêe pait'ee Moisepa p'ãdade jara bùk'a oo bùpa. Ma k'ãyaara k'awa bù Cristode ijãa bùpapai mù p'ek'au k'achia wêe bapari Tachi Ak'õre k'îrapite. Pia jarait'eera, Tachi Ak'õrépata mù p'ek'au k'achia wêe bapipari, mùa Cristode ijãapari perã. 10 Tachi Ak'õrepa mù mãgá bapii, Cristopa p'ek'au k'achia jõmaweda p'oyaada perã, Ak'õre juapa chok'ai p'irabaik'ãri. Maperã Cristo pipùara k'awa k'inia bù. Mùa ne–inaa jõmaweda oo k'inia bù irua oopi bùk'a, ma k'aurepa mù jùrùruta pùjida miapidait'ee, maa–e pùrã mù piuru pùjida iruk'a. 11 Ma jõma oo k'inia bù iruk'a chok'ai bapariit'ee p'irabaip'eda.
Cristode ijãapataarãpa<R>jùrùdaipia bù iruk'a p'anadait'ee
12 Wãara, waide mùa ne–inaa jõmaweda oo–e Cristopa oopi bùk'a. Mamîda mùa jùrù bù mãga ooit'ee, ma–it'ee Jesucristopa mù jùrùt'erada perã. 13 Âpemaarã, mùa mùchi bapata k'irãpak'ãri, k'awa bù mù waide mãga ba–e. Mamîda nãga oomaa bù. Eperã ãpùtee ak'ù–e bùk'a p'ira wãk'ãri ne–inaa jitait'ee, mãga pùk'a mùa waa k'îsia–e mùa naaweda oopatade. 14 Jîp'a jùrù bù iru k'await'ee iruk'a parumaa, chok'ai p'irabaidak'ãri. Ma–it'ee Tachi Ak'õrepa mù jùrùji, ùt'aa wãmerã Jesucristo k'aurepa.
15 Tachi jõma Cristo pia k'awa p'anùùrãpa auk'a k'îsiadaipia bù et'ewa jara aupadak'a. Parãpa mãgà k'îsia awara k'îsia p'anù pùrã, Tachi Ak'õrepa k'awapiit'ee parãmaa. 16 Mamîda, mùa jarada waide pia k'awada–e p'anù mîda, p'anapatáatù Tachi Ak'õrepa naaweda k'awapidak'a parãmaa.
17 Âpemaarã, ne–inaa jõma oopatáatù mùa ooparik'a. Pia ak'àtù ijãapataarã tai jîak'a p'anapata mãik'aapa auk'a p'anapatáatù. 18 Mùa mãga jara bù parã t'ãide nipapataarã chok'ara mãgá p'anadak'aa perã. At'apai mùa jaradoo mãùrãpa ne–inaa k'achia oopata. Ârá taubade waya auk'a jarait'ee mãùrã p'anadak'aa Cristopa k'inia bùk'a. Oo amaa k'iniadak'aa ãchia p'ek'au k'achia oopata, Cristo kurusode piuji mîda ãchi p'ek'au wêpapiit'ee. Mãga p'anapata perã, Cristo k'îra unuamaa iru p'anùùråk'ata p'anù. 19 Mãùrã atuadait'ee. Ãchi k'ap'ùa ãchi ak'õre waibùak'a iru p'anù. Mùa mãga jara bù oopata perã ãchi p'ek'au k'achia ooyaa bù k'ap'ùapa oopi bùk'a. Mãga oopata k'îra nejasia wêe. Jîp'a k'îsia p'anapata na p'ek'au eujãdepema net'aade. 20 Jõdee tachi ùt'aripema p'uuru pidaarã, ùt'aripema net'aade k'îsia p'anapata perã. Nùmaa p'anù Tachi O K'achiadeepa K'aripa Atapari ùt'ariipa chemerã. Mãgà Tachi Waibùa Jesucristo. 21 Ichi chek'ãripù, tachi chupùria nâbù k'ap'ùa ichi ùt'aripema k'ap'ùa jîak'a papiit'ee; k'ap'ùa k'îra wãree. Ichi jõmaarã k'ãyaara waibùara bairã, mãga ooi. Ma awara ne–inaa jõmaweda ichi jua ek'ari papii.