O–îa p'anapataadaipia bù
4
1 Âpemaarã, mùa parã k'inia iru bù. Mapa parã audú unu k'inia bù. Jõmaarãmaa mùa o–îa jara k'inia bù parãpa wãara Cristode ijãapata. Âpemaarã k'iniarã, mùa oomaa bùk'a chóotù parãpa Tachi Waibùade ijãa p'anùde.2 Ârá mùa enenee nâbù nãgà wêraarã, Evodia Síntique ome, t'ãri auk'a p'anapataadamerã Cristodeerã p'anapataadaipia bùk'a. 3 Ichiaba pùmaa, mùchi k'õp'ãyo k'iniara, chupùria iidi bù mãgà wêraarã k'aripamerã. Pù mù ome auk'a wãara mimiapari Cristo–it'ee. Mapa mùa k'awa bù pùa ãra k'aripait'ee. Mùk'a ãchia jùrùjida jarateedait'ee Tachi Ak'õrepa jara pëida Jesucristode. Ichiaba mãgá oojida Clemente mãik'aapa awaraa mimiapataarã Cristo–it'ee. Tachi Ak'õrepa mãgùùrã t'â p'ã iru bù ùt'ari, Cristopa chok'ai p'anapidaarã t'â p'ã jêra bù librode.
4 O–îa p'anapatáatù parã Tachi Waibùadeerã perã. Waya auk'a jarait'ee; o–îa p'anapatáatù. 5 T'ãri pia p'anapatáatù jõmaarã ome. Mãga p'anapataadaipia bù, iru taarã–e perã cheit'ee.
6 Mak'ùara k'îsianáatù. Ma k'ãyaara ne–inaa jõma p'asarutade ùt'aa t'âpatáatù Tachi Ak'õremaa. Mãgá ùt'aa t'â bùde gracias jarátù irumaa mãik'aapa iidítù irua parã k'aripamerã. 7 Mãga ooruta pùrã, Tachi Ak'õrepa parã k'ãiwee p'anapiit'ee. Tachi k'îradoopa pia k'awada–e pai mîda, irua mãgá ooi Tachi Ak'õre perã. Iruata parã k'îsia mãik'aapa t'ãri jâapari Jesucristo k'ap'ùa pari. Mãgá audú k'îsia jõnada–e pait'ee.
Ne–inaa pia aupai k'îsiadaipia bù
8 Âpemaarã, at'ãri falta bù na ûraa jarait'ee. K'îsiapatáatù nãgà ne–inaade: wãara pedeede; awaraarãde pedee pia jararutade; ne–inaa Tachi Ak'õrepa tachimaa oopi k'inia bùde; ne–inaa p'ek'au k'achia wêe bùde; ne–inaa tachia k'inia iru p'anùde; ne–inaa pia jõmaade; mãgee ne–inaade. Pia jarait'eera, k'îsiadaipia bù ne–inaa piadepai; ne–inaa jõmaarãpa pia ak'ùpata.
9 Parãpa ma ûraa ijãajida mãik'aapa awaraa jarateeda chok'ara ûrijida mùchi it'aideepa. Mù parã t'ãide nipai naaweda, awaraarãpa mù bapata parãmaa nepùrùpachida. Ma awara pãchi taupa unujida mùa oopata jãma nipak'ãri. Mapa oo wãk'ãtù wåtù mùa ooparik'a mãik'aapa p'anapatáatù mù baparik'a. Mãga ooruta pùrã, Tachi Ak'õre parã ome bait'ee mãik'aapa parã k'ãiwee p'anapiit'ee.
Filipos p'uurudepema ijãapataarãpa net'aa <R>tee pëidap'edaa Pablomaa
10 Tachi Ak'õrepa mù t'ãri o–îapi bù parãpa waya mù k'aripa p'aneedap'edaa perã. Gracias jara bù irumaa parãpa k'îsia p'aneedap'edaa perã mù waya k'aripadait'ee. Mùa jara k'inia–e parãpa mù k'îra atua iru p'anajida. K'awa bù mù p'oyaa k'aripada–e p'anajida. 11 Ichiaba jara k'inia–e parãpa mùmaa ne–inaa teedaipia bù, mùa ne–inaa falta bairã. Ne–inaa faltak'ãri, mùa k'îsia–e, k'awaa wãru perã t'ãri o–îa bait'ee mùchia ne–inaa iru bù omepai. Ma awara mãgá bai ne–inaa jõma mùmaa p'asarude. 12 K'awaa wãji mãgá t'ãri o–îa bait'ee chupùria nâbùde mãik'aapa net'aara iru bùde. Jõma mùmaa p'asada k'aurepa mùa nãga k'awaa wãji. Mù auk'a t'ãri o–îa bapari bi jãwaa bak'ãri chik'o paraa perã mãik'aapa jarra ook'ãri chik'o wê–e perã. Mãgá ichiaba mù auk'a t'ãri o–îa bapari, net'aara bak'ãri mãik'aapa net'aa wêe bak'ãri. 13 Mùa ne–inaa jõma ooi Cristo k'ap'ùa pari, irua mù k'aripapari perã. 14 Mãgá choo bù mîda, parãpa piata oojida mù chupùria k'awaadak'ãri mù chupùria nâbùde.
15 Parã Filipodepema ijãapataarãpa nãga pia k'awa p'anù. Mùa parã k'aripaji parã t'ãide jaratee nipak'ãri Cristopa ooda eperãarã k'aripait'ee. Mãgá k'aripap'eda, parã eujã, Macedoniadeepa uchiak'ãri, paråpata jõdee mù k'aripajida. Parãpapai mãga oojida, ewaa ijãa p'aneedap'edaarã paji mîda. Awaraa p'uurudepema ijãapataarãpa Tachi Ak'õre Ûraa auk'a k'awaajida mùa jarateeda k'aurepa. Mamîda mùmaa net'aa tee pëida–e paji, parãpa oodap'edaak'a. 16 Mù Tesalónica p'uurude bak'ãri pida, at'apai parãpa mùmaa tee pëijida ne–inaa falta bada. 17 Mãga jara–e bù k'inia bairã parãpa mùmaa net'aa tee pëipataadamerã. Jîp'a k'inia bù Tachi Ak'õrepa parãmaa waapùara teemerã ne–inaa ichia k'îsiade iru bù teeit'ee Cristodeerãmaa; chi awaraarã k'aripadap'edaarãmaa. 18 Wãara, parãpa net'aa tee pëidap'edaa k'aurepa Epafrodito ome, ârá mùa audú iru bù mùa falta bada k'ãyaara. Ma net'aa tee pëidak'ãri mùmaa, Tachi Ak'õremaa tee pùk'a p'anajida. Ne–inaa t'ûa baparík'ata bù, eperãarãpa paapatap'edaa iru–it'ee. Mãgà âk'ãri, o–îa baji ãra ome. Mãga pùk'a parãpa net'aa teedak'ãri mùmaa, iru auk'a o–îa bapari parã ome. 19 Parãpa mãga oopata perã, mù Ak'õre Waibùapa parãmaa ne–inaa falta p'anù jõmaweda teeit'eepù, ichia ne–inaa k'îra wãree iru bùdepema. Mãgà ne–inaa teeit'ee Jesucristo k'ap'ùa pari. 20 ¡Tachi Ak'õre ichita jõmaarã k'ãyaara waibùara bait'ee! ¡Amén!
Pablopa salude tee pëida
21 Mùa salude tee pëiru jõma Jesucristo k'ap'ùa Tachi Ak'õrede ijãapataarãmaa. Tachi âpemaarã nama mù ome p'anùùrãpa parãmaa auk'a salude tee pëiruta. 22 Na p'uurudepema César palaciode mimiapataarãpa apemaarã ijãapataarã ome ichiaba parãmaa salude pëiruta.
23 Mùa ùt'aa iidi bù Tachi Waibùa Jesucristomaa irua parã pia ak'ù bapariimerã.
Mãgapai paji.