4
1 Esclavoorã chipariirã, pãchi esclavoorã pia ak'ù p'anapatáatù, Cristopa k'inia bùk'a. K'irãpátù ùt'ariipa pãchi chiparipa parã ak'ùmaa bù.2 Ârá parã jõmaarãmaa mùa ûraait'ee: Ichita ùt'aa t'âpatáatù. K'îrak'aupai k'îra atuadai ùt'aa t'âdait'ee. Parã ùt'aa t'â p'anùde ichita gracias jarapatáatù Tachi Ak'õremaa. 3 Mãgá ùt'aa t'âdak'ãri, ichiaba ùt'aa t'çtù tai pari. Iidipatáatù Tachi Ak'õrepa taimaa waapùara jarateepimerã irua eperãarãmaa naaweda k'awapi–e pada: Cristopa ooda eperãarã k'aripait'ee, irude ijãadak'ãri atuanaadamerã. Mãgà jaratee bù k'aurépata mù nama carcelde bù. 4 Ùt'aa iidipatáatù mùa mãgà pi–ia jarateemerã Tachi Ak'õrepa jarapi bùk'a, mãgá jarateeipia bairã.
5 K'îsia k'awaa p'anapatáatù ijãadak'aa beerã ome. Unuruta chaa ne–inaa jõma óotù ãchimaa Cristode ijãapidait'ee. 6 Ichita t'ãri pia pedeepatáatù, ãchia o–îa ûri k'inia p'anadamerã parãpa jara p'anù. Mãga ooruta pùrã, parãpa k'awaa wãdai pia p'anaudait'ee ãchia ne–inaa iidiruta chaa.
Salude tee pëida na k'art'a p'ã aupa wãk'ãri
7 Mùa na k'art'a pëiru tachi âpema Cristo k'aurepa Tíquico ome. Mùa iru k'inia iru bù, k'õp'ãyo pia perã. Irua mù ichita k'aripapari, Tachi Ak'õrepa oopi bùk'a oo k'inia bairã. Parãmaa nepùrùnait'ee mùa k'îsia bù mãik'aapa oomaa bù, ma jõma k'awaadamerã. 8 Ma–it'ee mùa iru pëiru; pia k'awaadamerã tai p'anapata mãik'aapa t'ãri o–îa p'aneedamerã irua jararu ûridak'ãri. 9 Tíquico ome parã p'uurudepema Onésimo auk'a wãru. Taipa iru auk'a k'inia iru p'anù âpema pia perã mãik'aapa oo k'inia bairã Tachi Ak'õrepa oopi bùk'a. Mapa ãra wãruta parã ak'ùde mãik'aapa nãpema ijãapataarãpa oopata nepùrùde.
10 Tachi k'õp'ãyo Aristarco ichiaba nama carcelde bù mù ome Jesucristo k'aurepa. Irua salude pëiru ichiaba. Bernabé primo Marcopa ichiaba salude pëiru. Mùa naaweda jara pëidak'a, Marcos wãru pùrã parãmaa, pia auteebáitù. 11 Ichiaba salude pëiru Jesupa; mãgà ichiaba t'âjarapata Justo. Ma judiorã õpeerãpapai mù k'aripamaa p'anù na mimia ome. Ãrapa ichiaba k'inia p'anù eperãarãpa Tachi Waibùa Cristode ijãadamerã, Tachi Ak'õrepa k'inia bùk'a. Ãrapa mù mãgá k'aripa p'anadairã, mù t'ãri o–îa bapari.
12 Parã p'uurudepema Epafrapa ichiaba salude pëiru. Irua pia oopari Jesucristopa oopi bùk'a. T'ãripa ùt'aa t'âpari parã pari, Tachi Ak'õrepa k'aripamerã. K'inia bù parãpa wãara ijãadamerã jõma Tachi Ak'õrepa jara pëida parãmaa mãik'aapa t'ãripa oo k'inia p'anadamerã irua oopi bùk'a, ma awara choodamerã mãgá ijãa p'anùde, pariatua awaraa ne–inaa ijãada–ee. 13 Mùchi taupa unudoo sãga Epafrapa jùrùpari k'aripait'ee parã jõmaweda; chi ijãapataarã Colosas p'uurudepemaarã, Laodicea p'uurudepemaarã mãik'aapa Hierápolis p'uurudepemaarã. 14 Ichiaba Doctor Lucapa salude pëiru. Taipa iru k'inia iru p'anù, ichiaba k'õp'ãyo pia perã. Tachi k'õp'ãyo Demapa ichiaba salude pëiru.
15 Mùa parãmaa chupùria iidi bù, mù pari saludaadamerã tachi âpemaarã Cristo k'aurepa, Laodicea p'uurude p'anù. Ichiaba salude pëiru Ninfamaa mãik'aapa jõma Cristode ijãapataarãmaa iru tede ùt'aa t'â chepata. 16 Parãpa na k'art'a leedap'eda, Laodiceadepema ijãapataarãmaa pïitù auk'a leedamerã. Jõdee parãpa atadak'ãri chi apema k'art'a ãramaa p'ã pëida, mãgà leedaipia bù. 17 Arquipomaa nãga jarátù: “K'îra jîp'a aupáji mimia Tachi Ak'õrepa awara bùda pù–it'ee, Cristo ome araa bapari perã.”
18 Mù, Pablopa nãgà p'ãru mùchi juadoopa. Ùt'aa t'âdak'ãri, k'irãpátù iididait'ee mù pari nama carcelde nâbairã. Mùa pida ùt'aa t'âpariit'ee parã pari, Tachi Ak'õrepa parã pia ak'ù bapariimerã.
Mãgapai paji.