COL 2

1 Ma awara mùa nãga k'awapi k'inia bù parãmaa. Mùa ichiaba jùrùpari parã pipùara ijãadamerã Cristode. Mùa mãgá parã k'aripa k'inia bù. Ichiaba mãgá k'aripa k'inia bù Laodicea p'uurudepema ijãapataarã mãik'aapa jõma ijãapataarã, mù k'îra waide k'awada–e p'anùùrã paara. 2 K'inia bù parã jõmaweda t'ãri o–îa Cristode ijãadamerã mãik'aapa t'ãri a–ba, chik'inia p'anapataadamerã. Mãga p'anadak'ãri, wãara k'awaa wãdait'ee jõmaweda Tachi Ak'õrepa eperãarãmaa k'awapi k'inia bù Cristode. Naawedapemaarãmaa mãga k'awapi–e paji. Mamîda ârapemaarãmaa Cristo k'awapiji. 3 Iru k'ãyaara ne–inaa pipùara wê–e k'awadait'ee, iruta jõmaarã k'ãyaara k'îsia k'awaara bapari perã. Mapa irua aupaita k'îsia k'awaapii parãmaa. 4 Mùa mãga jara bù parãpa k'ûrapinaadamerã apidaamaa, ne–inaa awara iwarraa jaratee p'anù mîda. 5 Mù parã ome bù–e mîda, mù k'îsia parã ome bù. O–îa bù k'awa bairã parã k'îra jîp'a p'anapata mãik'aapa wãara Cristode ijãapata.

Cristodeerãk'a p'anapatáatù

6 Ijãadak'ãriipa parãpa wãara ijãapata perã Jesucristo Tachi Waibùa, t'ãri a–ba p'anapatáatù iru ome. 7 Parãmaa jarateedap'edaak'a naa ijãadak'ãri, waapùara ijãapatáatù Cristode mãik'aapa k'awaa wãk'ãtù wåtù oodait'ee irua k'inia bùk'a. Ma jarateedap'edaa k'îra atuanáatù. Ma k'ãyaara ichita gracias jarapatáatù Tachi Ak'õremaa, irua mãgá Cristo k'awapida perã parãmaa.

8 K'îrak'aupai ijãadai seewa jarateepataarãpa jara p'anù. Ãchia jarateeda–e Cristopa ooda mãik'aapa jarada. Ma k'ãyaara ãchi k'îsiadeepa seewa jarateepata, chonaarãweda k'îsia k'awaa beerãda apatap'edaarãpa jarateedap'edaak'a. Mãùrãpa jarateepachida eperãarã ne–inaa oo p'anùùpa Tachi Ak'õre k'awadai.

9 Mamîda mãga–e. Cristo k'ap'ùadeta Tachi Ak'õre bapari. 10 Mapa nãgaweda parãpa Tachi Ak'õre k'awa p'anù, araa p'anapata perã Cristo ome. ¡Iruta jõmaarã k'ãyaara waibùara bù! Na p'ek'au eujãdepema poro waibùarã, ùt'aripema poro waibùarã, netuaraarã poro waibùarã paara iru jua ek'ari p'anù. 11 Parã mãgá araa p'anapata perã Cristo ome, jaradai irua tauchaa pùk'a bùji parã t'ãride. Mùa jara k'inia–e tauchaa bùji parã k'ap'ùade eperãarãpa oopatak'a. Ma k'ãyaara pipùara ooji parã ome. Uchiapiji parã p'ek'au k'achia ooyaa bù k'ap'ùa jua ek'ariipa, t'ãripa oodamerã irua k'inia bùk'a. 12 Ma awara parã araa p'anapata perã Cristo ome, jaradai Cristo k'ap'ùa piuda ùadak'ãri, parã auk'a ùa pùk'ajida. Ichiaba iru chok'ai p'irabaik'ãri, parã auk'a p'irabai pùk'ajida, ijãapata perã Tachi Ak'õre, chi jõmaarã k'ãyaara waibùara bùpa, Cristo p'irabaipiji. Ak'ùpijida Cristo ome araa p'anapata poro choopidak'ãri. 13 Ma awara parã araa p'anapata perã Cristo ome, jaradai Tachi Ak'õrepa Cristo chok'ai bapik'ãri, parã auk'a chok'ai p'anapiji. Cristode ijãadai naaweda, Tachi Ak'õre–it'ee parã piu pùk'a p'anajida parãpa p'ek'au k'achia oopata k'aurepa. Ichiaba piu pùk'a p'anajida, Tachi Ak'õre Ûraa k'awada–e p'anadap'edaa perã. ¡Mamîda ârá mãga p'anù–e! Tachi Ak'õrepa tachi ijãapataarã chok'ai p'anapik'ãri Cristo ome, tachia p'ek'au k'achia oopata jõmaweda wêpapiji. 14 Ma p'ek'au k'achia oopata k'aurepa tachi tewe paraa pùk'a p'anapachida Tachi Ak'õre ome. Ooda–e p'anapachida irua jaradak'a iru ley p'ãdade. Mapa atuadait'ee paji. Mamîda Tachi Ak'õrepa tachi chok'ai p'anapik'ãri Cristo ome, ma tewe paraa pùk'a bada jõpiji. Mãga ooji Cristo kurusode piuk'ãri tachi pari. 15 Ma awara ma tewek'a bù kurusode jõpik'ãri Cristo ome, Tachi Ak'õrepa ichiaba netuaraarã poro waibùarã jõmaweda p'oyaaji mãik'aapa jõmaarã taide ãchi Cristo jua ek'ari bùji.

K'îrak'aupai ûridai seewa jarateepataarãpa jara p'anù

16 Tachi Ak'õrepa ma jõma ooda perã tachi k'aripait'ee, k'îsianáatù awaraarãpa parã ãpùte pedee k'achia jararuta pùrã ne–inaa k'opata k'aurepa maa–e pùrã topata k'aurepa. Ichiaba k'îsianáatù mãga ooruta pùrã, parãpa ùada–e p'anadairã ewari, atane mãik'aapa año, ãrapa ma âipata ewate mãik'aapa fiesta ewate ùapatak'a. 17 Mãgee fiesta ewate, âipata ewate, awaraa chonaarãwedapema ûraa ome Cristopa ooit'ee bada tauchaa pùk'a baji. Mamîda ârá Cristo bapari tachi ome. 18 Mapa k'îsianáatù awaraarãpa jara p'anù mîda parã atuadait'ee ùt'aa t'âdak'aa perã angeleerãmaa ãchia oopatak'a. ¿Ãchia jara p'anù–ek'ã tachia jîp'a ùt'aa t'âdaik'araa bù Tachi Ak'õremaa, mãga ooruta pùrã audua p'anùda a p'anadairã? Angeleerãmaata ùt'aa t'âdaipia bùda a p'anù, mãùrãpa pedeedamerã Tachi Ak'õremaa tachi pari. Ichiaba nepùrù p'anù ãchia unupatada a p'anù; ne–inaa k'ãimok'araa pùk'a bùde. Mamîda ijãanáatù ãchi audua pedee, ãchi k'îsiadeepapai mãga jara p'anadairã. 19 Mãgee ne–inaade audú k'îsiapata perã, k'îsiadak'aa Cristopa ãchimaa oopi k'inia bùde. Iruta tachi ijãapataarã poro waibùa. Jõdee tachi iru k'ap'ùa apai pùk'a. Maperã oo k'awaa wãpataadaipia bù Tachi Ak'õrepa k'inia bùk'a.

20 Parã Cristo ome araa p'anapata perã, iru piuk'ãri, parã jida piu pùk'ajida. Mãgá uchiajida eperãarãpa ne–inaa k'îra t'ãdoo oopipata jua ek'ariipa. Mãga bùta, parãpa ¿sãap'eda at'ãri ma ne–inaa oo k'inia p'anùma? 21 Eperãarãpa jarapata:* “Jãgà t'õbaináatù; jãgà k'onáatù; jãgà jitanáatù.” 22 Jõma “jãgà” jarada taarã–ee iru bap'eda jõdait'ee, na p'ek'au eujãdepema perã. Ichiaba jõma ma jarada tachia oonaadamerã jõit'ee, jîp'a eperãarãpa jarateepata perã. 23 Ûk'uruurãpa jaratee p'anù jîp'a ùt'aa t'âdaik'araa bù Tachi Ak'õremaa, tachi audú k'achia p'anadairã. Ichiaba jaratee p'anù tachi k'ap'ùa pia ak'ùdaik'araa bù, mak'ùara pia–e bairã. Wãara eperãarã ûk'uruurãpa mãgee ne–inaa jaratee p'anù pia ak'ùpata, pia pùk'a ûripata perã. Mamîda tachia jõma ooruta pùjida mãùrãpa jaratee p'anùk'a, at'ãri uchiada–e pai tachi p'ek'au k'achia ooyaa bù k'ap'ùa jua ek'ariipa. Cristopapai tachi mãgùdeepa uchiapii.