COLOSENSES
San Pablopa K'art'a P'ãda Colosas P'uurudepema Ijãapataarãmaa
Salude pëida
1
1-2 Mù, Pablopa na k'art'a p'ã pëiru Tachi Ak'õredeerãmaa, Colosas p'uurude p'anù. Tachi Ak'õrepa k'inia bada perã, mù jùrùt'eraji Jesucristopa pëimerã ichi ûraa jarateede. Na k'art'ade tachi âpema Cristo k'aurepa Timoteopa ichiaba salude pëiru parãmaa.Âpemaarã Cristo k'aurepa, taipa k'awa p'anù parãpa wãara ijãapata Cristode. Mapa ùt'aa iidipata Tachi Ak'õrepa parã pia ak'ù bapariimerã. Mãgá k'ãiwee p'anapataadait'ee.
Pablopa ùt'aa t'âda ijãapataarã pari
3 Tachi Ak'õre Tachi Waibùa Jesucristo Ak'õre. Irumaa ùt'aa t'âdak'ãri parã pari, taipa ichita gracias jarapata, 4 ûripata perã parãpa wãara Jesucristode ijãapata mãik'aapa jõma Ak'õredeerã k'inia iru p'anapata. 5 Parã mãga p'anapata ijãapata perã ùt'aa wãdait'ee mãik'aapa iru p'anadait'ee ne–inaa jõma Tachi Ak'õrepa k'îsia iru bù teeit'ee ichideerãmaa. Cristopa jùrùt'eradaarãpa irua wãarata jara pëida naa jarateedak'ãriipa parãmaa, mãga ijãapata. 6 Ma jarateedak'a parãmaa at'ãri jarateemaa p'anù to bee chaa. Mapa eperãarã chok'araara ichiaba ijãa p'anù parã ijãa p'anadap'edaak'a naa ijãadak'ãri. Maapai parãpa k'awaajida wãara Tachi Ak'õre jõmaarã k'ãyaara t'ãri piara bapari. 7 Tachi âpema k'inia Epafrapa mãga jarateeji parãmaa. Tai pari irua oopachi Cristopa oopi bùk'a parã t'ãide. 8 Taimaa nepùrùji sãga parãpa mù mãik'aapa awaraa ijãapataarã k'inia iru p'anù, Tachi Ak'õre Jaurepa oopi bùk'a.
9 Maperã taipa mãga ûridap'edaadeepa ùt'aa t'âpata parã pari. Mãga oomaa p'anùde iidipata Tachi Ak'õrepa parãmaa k'awaapimerã jõma ichia oo k'inia bù parã k'ap'ùa pari. Ichiaba iidi p'anù Ak'õrepa ichi Jaure k'ap'ùa pari nejõmaade k'îsia k'awaa papimerã. 10 Taipa mãga iidipata k'inia p'anadairã parã p'anapataadamerã Tachi Waibùadeerãk'a, ne–inaa jõma oomaa p'anù irua k'inia bùk'a. Mãga p'anadak'ãri, ne–inaa pia k'îra t'ãdoo oodait'ee mãik'aapa Tachi Ak'õre pipùara k'awaadait'ee. 11 Mamîda mãga ooda–e pai irua k'aripa–e bù pùrã. Iru jõmaarã k'ãyaara waibùara bapari. Mapa ichiaba iidipata irua parã k'aripamerã. Mãgá t'ãri o–îa choodai, nepùrade baairuta pùjida. 12 Maperã gracias jaradaipia bù irumaa. Iruata parã jùrùt'eraji jõma iru p'anadamerã irua k'îsia iru bù teeit'ee ichideerãmaa, ùt'ari iru âdaade t'îudak'ãri. 13 Ma awara, iruata tachi uchiapiji na p'ek'au eujãdepema p'ãriu pùk'a bùdeepa mãik'aapa bùji ùt'aripema âdaa pùk'a bùde, ichi Warra k'inia iru bù jua ek'ari. 14 Ichi Warra piuda k'aurépata tachi o k'achiadeepa k'aripa ataji atuanaadamerã mãik'aapa tachia p'ek'au k'achia oopata wêpapiji.
Cristo piuda k'aurepa<R>tachi t'ãri auk'a p'anadai Tachi Ak'õre ome
15 Eperãarãpa Tachi Ak'õre p'oyaa unudak'aa. Mamîda irua unupiji ichi Warra k'ap'ùade. Cristo Tachi Ak'õre k'îrak'a bù. Jõmaarã k'ãyaara waibùara bù, ne–inaa jõma ooda perã. 16 Iru k'ap'ùa pari Tachi Ak'õrepa ooji ne–inaa jõmaweda ùt'ari nâbù, mãgà unudak'aa mîda. Ooji jõmaweda angeleerã poro waibùarã, netuaraarã poro waibùarã paara, ma jõmaweda tachi k'ãyaara waibùara bee. Ichiaba ooji ne–inaa jõmaweda na p'ek'au eujãde nâbù tachia unupata. Tachi Ak'õrepa ma jõma ooji Cristo k'ap'ùa pari, iru–it'ee nâbamerã. 17 Cristo ichita bapari. Bapachi ne–inaa jõma ooi naaweda. Iru k'aurépata ne–inaa jõma nâbù. 18 Iru jõmaarã ijãapataarã poro waibùa. Ma ijãapataarã iru k'ap'ùa apai bùk'a p'anù. Jõdee iru ma k'ap'ùa porok'a. Iru k'aurépata ijãapataarã paraa. Jõmaarã ijãapataarã naa iru piup'eda chok'ai p'irabaiji, jõmaarã k'ãyaara waibùara bait'ee. 19 Cristo mãga bù Tachi Ak'õre ba k'inia bada perã ichi k'ap'ùade. 20 Ichi Warra k'ap'ùa pari Tachi Ak'õrepa ne–inaa jõma k'ãiwee bapi k'inia baji ichi jua ek'ari. Eperãarãpa p'ek'au k'achia oopata k'aurepa Tachi Ak'õrepa waa p'oyaa pia ak'ù–e paji ichia ooda; na p'ek'au eujãdepema ne–inaa, ùt'aripema ne–inaa paara. Mamîda kurusode ichi Warra waa bat'ak'ãri, ma piuda k'aurepa ârá ma ne–inaa jõma waya pia ak'ùpari. Ma awara ichi t'ãri auk'a bùpari eperãarã ome Cristode ijãadak'ãri.
21 ¡K'îsíatù nãgùde! Parã ijãadai naaweda, t'ùmà pùk'a p'anapachida Tachi Ak'õre ik'aawaapa. Tachi Ak'õre k'îra unuamaa iru p'anapachida. T'ãri k'achia p'anapachida parãpa p'ek'au k'achia oopata k'aurepa. 22 Mamîda ârá Cristo chupùria piuda k'aurepa parã pari, t'ãri auk'a p'anapata Tachi Ak'õre ome. Irua parã mãgá t'ãri auk'a bùji Ak'õre ome p'ek'au k'achia wêe, maarepida ùmùateeda wêe p'anadamerã Ak'õre k'îrapite, iru waya chek'ãri. 23 Wãara mãga p'anadait'ee, ijãa wãruta pùrã Tachi Ak'õrepa wãarata jara pëida eperãarãmaa. Ma jara pëida naa ijãadak'ãri, k'awaajida parã piudak'ãri, wãara ùt'aa wãdait'ee. Mãga ijãapatáatù. Chok'araarãpa ûrimaa p'anù ma ûraa Tachi Ak'õrepa jara pëida. Ma ûraata mù, Pablopa jarateepari, Cristopa mù pëidak'ãriipa jarateemerã.
Pablo mimiada Cristode ijãapataarã k'aripait'ee
24 Ârá mù chupùria nâbù mîda, o–îa bù k'awa bairã mù nãga bù parã k'aripa k'iniapa. K'awa bù mù, awaraa ijãapataarã ome waapùara chupùria jõnadait'ee Cristo k'aurepa, iru k'ap'ùa, chi irude ijãapataarã, k'aripa p'anù misa. 25 Tachi Ak'õrepa mù na mimiade bùji, parã Cristode ijãapataarã k'aripamerã. Mapa jarateepari jõma Tachi Ak'õrepa wãarata jara pëida Cristode. 26 Tachi Ak'õrepa ma jara pëida k'awapi–e paji naawedapemaarãmaa. Mamîda irua k'inia bairã, ârapema ijãapataarãmaa k'awapiji. 27 K'awapi k'inia baji ichia ne–inaa pi–ia k'îsia iru bada parã judio–eerã–it'ee. K'îsia iru baji Cristo parã t'ãride bapiit'ee. Iru wãara jãma bapari perã, parãpa k'awa p'anù na ewari iru k'îra wãree wãara unudait'ee.
28 Maperã irua oodata mãik'aapa jaradata jarateepata jõmaarãmaa. Ûraapata eperãarã k'îra t'ãdoo, ãchia p'ek'au k'achia oopata oo amaadamerã. Ma awara iididap'eda Tachi Ak'õrepa taimaa k'îsia k'awaapimerã, jarateepata Cristode ijãadamerã mãik'aapa oodamerã irua oopi bùk'a. Taipa mãga oopata ãchi ijãadak'ãri, araa p'anadamerã Cristo ome mãik'aapa p'ek'au k'achia wêe p'anadamerã. Mãgá Tachi Ak'õre k'îrapite panadait'ee tai ome iru ewari waibùa ewate. 29 Ma–it'eeta mù mak'ùara sê–ee mimiapari. Jùrùpari jõmaarãpa ijãadamerã Tachi Ak'õrepa wãarata jara pëida Cristode. Mãga ooi Cristo, chi jõmaarã k'ãyaara waibùara bùpa, mù k'aripapari perã.