22
1 Mãgaji:—Mùchi auk'aarã mãik'aapa chonaarã, ûrítù mùa jararu.
2 Hebreo pedeede pedeeru ûridak'ãri, eperãarã k'îup'ee para beeji. Mãpai Pablopa mãgaji:
3 —Mù judiopù, Tarso p'uurude t'oda. Mãgà p'uuru Cilicia eujãde bù. Mamîda mù nama Jerusalende estudiaji Tachi Ak'õre Ûraa jarateepari Gamaliel ome. Iru k'aurepa mùa k'awaaji Moisepa p'ãda, tachi chonaarãpa bëidap'edaa. Ma awara mùa oo k'inia bapachi Tachi Ak'õrepa oopi k'inia bùk'a, parãpa idi oo p'anùk'a. 4 Mapa naaweda mùa Tachi Ak'õre Ode P'anùùrã apata miapipachi. Ãchi jita atap'eda, carcelde t'ù nâbùpachi. Wêraarã mãik'aapa ùmùk'îraarã auk'a mãgá oopachi. 5 P'aareerã poro waibùapa mãik'aapa jõma nãpema poro waibùarãpa k'awa p'anù na jara bù wãara. Ãrapa k'art'a p'ãjida mãik'aapa mù ome pëijida judiorãmaa Damascode, mùa ijãapataarã mama p'anù p'e aneemerã nama miapiit'ee. Mamîda mù k'îsia awara k'îsiaji.
Pablopa jarada sãga ichi Cristode ijãada
(Hechos 9.1-19; 26.12-18)
6 —Mù Damasco k'ait'a pa wãde, imat'ùpa ùt'ariipa âdaa jêra t'îudachi mù ârù. 7 Mãpai mù eujãde baainaji mãik'aapa ûriji pedeeru: “Saulo, Saulo, ¿sãap'eda mùchideerã jùrù nima?” aji. 8 Mãpai mùa iidiji: “¿K'aima pù?” P'anauji: “Mù Jesús Nazaretdepema, pùa jùrù ni eperãarã poro waibùa.” 9 Mù ome wãdap'edaarãpa ma âdaa jêra t'îuda unujida. Mamîda ûrida–e paji mù ome pedeemaa bada. 10 Mãpai mùa mãgaji: “Tachi Waibùa, ¿mùa k'ãata ooipia bùma?” aji. Mãpai ichia p'anauji: “P'irabáiji mãik'aapa wåji Damasco p'uurudee. Jãma jaradai pùa k'ãata ooit'ee.” 11 Ma âdaa jêra t'îudapa mù tau p'ãriudachi. Mapa mù k'õp'ãyoorãpa juadeepa jidiu ateejida Damascodee.
12 +Mama baji eperã t'âjarapatap'edaa Ananías. Mãgùpa oopachi Moisepa p'ãdade jara bùk'a. Mapa Damascodepema judiorãpa iru pia unupachida. 13 Irua mù ak'ù chek'ãri, mãgaji: “Âpema Saulo, waya unupáde” aji. Aramãgá tau eratùdachi mãik'aapa mùa iru unuji. 14 Mãpai irua mãgaji: “Tachi chonaarã Ak'õre Waibùapa pù jùrùt'eraji k'awaamerã ichia pùmaa oopi k'inia bù. Ma awara pù jùrùt'eraji unumerã Jesucristo, chi p'ek'au k'achia wêe bù mãik'aapa ûrimerã pedee ichi it'aideepa. 15 Mãga ooji pùta jõmaarã taide irua jararu jarateepari pait'ee perã, jarak'ãri na unuda mãik'aapa ûrida. 16 Mapa âraweda poro choopipáde aji, mãik'aapa Jesumaa ùt'aa t'âpáde aji, irua pùchi p'ek'au k'achia wêpapimerã.”
Tachi Ak'õrepa Pablo jùrùt'erada judio–eerãmaa jarateenamerã
17 —Waya Jerusalendee chek'ãri, wãji Tachi Ak'õre tedee ùt'aa t'âde. Mama k'ãimok'araa pùk'a bùde unuji Jesús. 18 Ichia mùmaa mãgaji: “Isapai uchiapáde aji, Jerusalendeepa, nama pùa jarateek'ãri mùa ooda, ûri k'iniada–e pait'ee perã.” 19 Mãpai mùa p'anauji: “Mamîda jõmaarãpa k'awa p'anù Tachi Ak'õre Ûraa jarateepata te chaa wãk'ãri, mùa ijãapataarã p'e aneepachi carcelde t'ùk'oode mãik'aapa p'u oopide. 20 Ma awara pù mimiapari Esteban peedak'ãri, mù arii baji mãik'aapa iru peedap'edaarã p'aru ak'ù baji. Ârá pùde ijãa bùta, ¿ûridaik'ã mùa ãramaa nepùrùk'ãri mù pù ome unuda?” 21 Mamîda ichia mùmaa mãgaji: “Namãik'aapa uchiapáde aji, mùa pù pëiit'ee perã awaraa eujãdee judio–eerãmaa jarateenamerã.”
22 Mãgapai eperãarãpa Pablo pedee ûrijida. Mãpai ma ûri para badaarãpa biamaa p'aneejida:
—¡Jã eperã chok'ai baik'araa bùda! ajida. ¡Peet'aadapáde! ajida.
23 Eperãarã waapùara biuk'a nâbeeji. Ãchi p'aru jîap'ejida mãik'aapa eujã p'ora ùt'aa #p'o?bat'apachida, k'îrau para bada perã.
Pablo soldaorã poro waibùa juade
24 Mãpai chi soldaorã poro waibùapa jaraji Pablo ateedamerã soldaorã temaa mãik'aapa wùdamerã. Mãga ooji ichia ûri–e pada perã Pablopa jarada judiorã pedeede. K'îsiaji Pablo wùdak'ãri, jarapidai sãap'eda eperãarã jãgá k'îrau para bù iru ome. 25 Mamîda jâmaa p'anùde wùdait'ee, Pablopa iidiji chi wùdait'ee p'anadap'edaarã poromaa:
—Mù Romadepema.a ¿Pùa wùpiipia bùk'ã aji, eperã Romadepema, ateedai naaweda charraarãpa ak'ùdamerã?
26 Mãgà capitanpa mãga ûrik'ãri, isapai wãji ãchi poro waibùamaa mãik'aapa mãgaji:
—¿Pùa, k'ãata ooit'eema aji, jã eperã Romadepema ome?
27 Mãpai ãchi poro waibùa chek'ãri, Pablomaa iidiji:
—¿Wãara pù Romadepemak'ã? aji.
Pablopa p'anauji:
—Wãarada aji.
28 Mãpai soldaorã poro waibùapa mãgaji:
—Mùa p'arat'a waibùa p'aajida aji, eperã Romadepema pait'ee.
Mãpai Pablopa p'anauji:
—Mù Romadepema, mù ak'õre mãga bada perã.
29 Mãpai chi wùdait'ee p'anadap'edaarãpa ichiak'au bùjida. Ãchi soldaorã poro waibùa jida p'eraji Pablo jâpi bada perã wùpiit'ee, Romadepema bùta.
Pablo Junta Suprema k'îrapite
30 Aù norema soldaorã poro waibùapa Pablo cadenapa jâ bada êrapiji mãik'aapa uchia ataji carceldeepa, k'awa k'inia bada perã sãap'edata judiorãpa Pablo perá peejida. Mapa p'aareerã poroorã mãik'aapa Junta Supremadepemaarã jõmaweda t'â p'e atap'eda, Pablo uchiapiji ãchi k'îrapite.