Pablo Jerusalendee wãda
21
1 Mãgá despediidap'eda, barcode tai bataujida mãik'aapa wãjida Cos isladee. Aù norema wãjida Rodas isladee. Mamãik'aapa panajida Pátara p'uurude. 2 Mama barco Fenicia eujãdee wã nipadade bataujida mãik'aapa wãjida. 3 Ma wãdade Chipre isla unujida tai juabi eere. Mata wãjida Siria eujãde#e Tiro p'uurude panarutamaa, mama net'aa barcode atee wãdap'edaa atabëidait'ee pada perã. 4 Mama ijãapataarã jùrùdak'ãri, unu atajida mãik'aapa ewari siete p'aneejida ãra ome. Mama bùde Tachi Ak'õre Jaurepa ma ijãapataarãmaa k'awapiji Pablo Jerusalende p'asait'ee. Mapa irumaa jarajida wãnaamerã. 5 Mãga jarajida mîda, tomiamaa tai mamãik'aapa uchiajida. Mãpai ijãapataarã ãchi wêra mãik'aapa chi warrarã ome p'uurudeepa taawaa tai k'õp'ãya tee chejida p'usa ide. Ma ipude bedabaidachida mãik'aapa jõmaweda Tachi Ak'õremaa ùt'aa t'âjida. 6 Maap'eda, despediidap'eda, tai wãjida barcode. Jõdee, ma ijãapataarã ãchi te chaa erreujida.7 Tiro p'uurudeepa tai wãjida. Mata panajida Tolemaida p'uurude. Mama ijãapataarã ome ewari aba p'aneejida. 8 Aù norema uchiadak'ãri, panajida Cesarea p'uurude. Mama panadak'ãri, wãjida Tachi Ak'õre Ûraa jarateepari Felipe temaa. Mãgà Felipe Cristopa jùrùt'eradaarã k'aripapataarã sietedepema paji. Mama p'aneejida. 9 Felipepa k'au k'îmari iru baji, at'ãri ùmùk'îra wêe. Mãùrãpa jarapachida Tachi Ak'õre Jaurepa jarapidak'a. 10 Mama taarã p'anùde Judea eujãdeepa cheji Tachi Ak'õre pedee jarapari, t'âjarapatap'edaa Agabo. 11 Taimaa pachek'ãri, Pablo k'ùrrùde jâpari êra ataji. Mãpai Agabopa ichi jua bùùrù ome p'ãrajâ ak'ù beeji mãik'aapa mãgaji:
—Tachi Ak'õre Jaurepa jara bù: “Jerusalende judiorãpa nãgá oodait'ee nãgà k'ùrrùde jâpari chipari ome, iru judio–eerã poroorã jua ek'ari bùdak'ãri.”
12 Taipa mãik'aapa Cesareadepema ijãapataarãpa mãga ûridak'ãri, Pablomaa enenee jõneejida Jerusalendee wãnaamerã. 13 Mamîda irua mãgaji:
—¿K'ãare–it'ee jãk'ùara jêe p'anùma? aji. Mù t'ãri p'uapit'aaruta. Ichita mù wãit'ee Jerusalendee jâ nâbùruta pùjida, ma awara peet'aaruta pùjida, mùa Cristopa ooda jaratee bù k'aurepa.
14 Tai pedee ûri–e pada perã, ichiak'au bùjida. Jîp'a Tachi Ak'õre juade bùjida, Tachi Ak'õrepa ichiak'au oomerã ichia oo k'iniata.
15 Maap'eda, net'aa p'e atadap'eda, wãjida Jerusalendee. 16 Cesareadepema ijãapataarã ûk'uru wãjida tai ome, ateedait'ee Chipre isladepema Mnasón apatap'edaa temaa, Jerusalende bù. Mãgà eperã taarãweda Cristode ijãa bapachi.
Pablo Santiagomaa p'asiade wãda
17 Jerusalende panadak'ãri, ijãapataarãpa o–îa tai auteebaijida. 18 Aù norema Pablo tai ome Santiagomaa wãji. Mama ichiaba ijãapataarã ak'ùpataarã p'anajida. 19 Pablopa saludaap'eda, nepùrùji jõma Tachi Ak'õrepa ooda ichi k'ap'ùa pari judio–eerã t'ãide. 20 Mãga ûridak'ãri, o–îa para beeji mãik'aapa ùt'aa t'âjida Tachi Ak'õremaa jaradait'ee iruta jõmaarã k'ãyaara waibùara bù. Mãpai Pablomaa mãgajida:
—Âpema Pablo, pùa k'awa bùda ajida, nãpema judiorã cho–k'ara Cristode ijãa p'anù. Mamîda at'ãri k'îsia p'anù Moisepa p'ãdade jara bùk'a oodaipia bù. 21 Mãgùùrãpa ûri p'anù pùa judiorã awaraa eujãde p'anùùrãmaa jaratee ni Moisepa p'ãdade jara bùk'a oonaadamerã, mãik'aapa warra k'ap'ùade tauchaa bùnaadamerã, ma awara ne–inaa chonaarãweda oopatap'edaa oonaadamerã. 22 Maperã, ¿taipa sãga oodaima? Ãrapa pù nama che bù k'awaa atadait'ee. 23 Mapa nãga oopáde aji: nama ijãapataarã k'îmariirãpa Tachi Ak'õremaa jaradap'edaak'a ewaa oodait'ee, waya iru tede t'îu pia p'aneedamerã. 24 Pùchi ome p'e ateepáde aji, mãik'aapa p'aapáde aji, ãchimaa p'aapipataarãpa iidi p'anù. Oodapáde aji, Tachi Ak'õre Ûraade jara bùk'a; puda t'ùùpidamerã mãik'aapa Tachi Ak'õre tede t'îu pia p'aneedamerã. Mãgá ooru pùrã, jõmaarãpa k'awaadai pù ãpùte seewa nepùrù p'anù. Ma awara pùa mãgá ãramaa ak'ùpii Moisepa p'ãdade jara bùk'a ichiaba oopari. 25 Jõdee mãga oopi k'iniada–e judio–eerãmaa, ichiaba Cristode ijãadak'ãri. Jîp'a taipa ãramaa p'ã pëi p'anù: k'onaadamerã nechiara ata bùdap'edaa ne–inaa eperãpa ooda k'îrapite, aù k'îrapite ùt'aa t'âpata; k'onaadamerã ne–inaa waa maa–e pùrã ne–animal âyapa jâa piuda chiara mãik'aapa pariatua p'ek'au oonaadamerã.
Pablo Tachi Ak'õre tede jita atadap'edaa
26 Aù norema Pablopa ma eperãarã k'îmari ateeji Tachi Ak'õre temaa. Oojida Moisepa p'ãdade jara bùk'a t'îu pia p'anadamerã Tachi Ak'õre tede. Maap'eda Pablo t'îuji Tachi Ak'õre tede jarait'ee sãapaita Tachi Ak'õremaa ãchia jaradap'edaa jõdait'ee mãik'aapa sãapaita ãchia ne–animalaarã ateedait'ee p'aareerãmaa peedap'eda, paadamerã Tachi Ak'õre–it'ee.
27 Ewari siete jõit'ee nâbùde ma eperã k'îmari jõdait'ee paji ãchia oodait'ee bada t'îu pia p'aneedamerã Tachi Ak'õre tede. Mama p'anùde Ásia eujãdepema judiorãpa Pablo unu atajida Tachi Ak'õre tede. Mapa ãchia arii p'anadap'edaarã k'îraupik'oojida. Pablo jita atadap'eda, biajida:
28 —Israelitaarã, tai k'aripátù. Nãgà eperãpa p'uuru bee chaa ne–inaa k'achia jaratee ni tachi judiorã ãpùte. Jaratee bù Moisepa p'ãdade jara bùk'a oonaadamerã mãik'aapa pedee k'achia jara bù na te ãpùte. Ma awara judio–eerã t'îupiji nama, mãgeerã Tachi Ak'õrepa t'îupiik'araa bùda a bù mîda. Mãgá Tachi Ak'õre te k'achia oomaa bù.
29 Mãga biapachida aù naaweda Pablo unudap'edaa perã p'uuru jãde ni Trófimo ome. Mãgà Éfeso p'uurudepema paji. Ma omé unudap'edaa perã mãgá, judiorãpa k'îsiajida Pablopa ma eperã auk'a t'îupiji Tachi Ak'õre tede.
30 Ma k'aurépata p'uuru pidaarã jõmaweda k'îrau para beeji. Mãpai eperãarã p'îsua cheepuru nâbeeji. Pablo jita atajida mãik'aapa jidibabataa atadachida Tachi Ak'õre temãiipa. Aramata Tachi Ak'õre te jâapataarãpa chi t'îupata jõmaweda jâajida. 31 Mãga nùde taawa Pablo peet'aadait'ee pak'ãri, Romadepema soldaorã poro waibùamaa jaranajida p'uuru pidaarã jõma k'îrau para nâbù. 32 Aramata ichi soldaorã p'e atap'eda, awaraa poroorã ome p'ira chejida see nâbadamaa. Ma soldaorã poro waibùa chi soldaorã ome cheruta unudak'ãri, eperãarãpa Pablo ichiak'au bùjida. 33 Mãpai ma soldaorã poro waibùa chep'eda, Pablo jita ataji mãik'aapa cadena omeepa jâ nâbùpiji. Maap'eda eperãarãmaa iidiji k'asaa t'âjarapata jã eperã mãik'aapa k'ãare k'achiata ooji. 34 Biuk'a nâbeeji; abaapa ne–inaa jarapachi, awaraapa ne–inaa awara. Mapa chi soldaorã poro waibùapa p'oyaa k'awa–e paji k'asaa jara para bù. Maperã jaraji soldaorãmaa ãchi temaa ateedamerã. 35 Soldaorã temãi tomede panadak'ãri, Pablo ùt'à jira ateejida eperãarã waidoopa, 36 eperãarã t'êe bia wãdap'edaa perã:
—¡Peet'áatù!
Pablopa judiorãmaa jarada
37 Mamîda teeda panadai naaweda, griego pedeede Pablopa mãgaji ma soldaorã poro waibùamaa:
—Mù pù ome arak'atùa pedee k'inia bùda aji.
Mãpai mãgà poro waibùapa p'anauji:
—¿Pùa griego pedee k'awa bù–ek'ã? aji. 38 ¿Mãgara pù–ek'ã aji, jã Egipto pidapa mêepemaarã cuatro mil ateeda eujã pania wêe bùmaa?
39 Pablopa p'anauji:
—Mãga–eda aji. Mù judiopù Tarso p'uurudepema. Mãgà p'uuru Cilicia eujãde bù. Mù ma p'uuru pipùara bùdepemapù. Mù chupùria pedeepipáde aji, eperãarãmaa.
40 Mãpai mãgà soldaorã poro waibùapa pedeepiji. Pablo tomede bainâ beep'eda, juapa eperãarãmaa jaraji k'îup'ee p'aneedamerã. Eperãarã k'îup'ee para beek'ãri, Pablo hebreo pedeede pedeeji.