Pablo Macedonia eujãdee mãik'aapa Grecia eujãdee wãda
20
1 Eperãarã ãchi te chaa wãdap'edaa t'êepai, Pablopa ijãapataarã t'â p'eji ûraait'ee. Maap'eda wãji Macedonia eujãdee. 2 Mama ijãapataarã ûraa nipap'eda, panaji Grecia eujãde. 3 Atane õpee mama beeji. Mamãik'aapa barcode wãit'ee bùde Siria eujãdee, k'awaaji judiorãpa ichi peedait'ee ot'ewa p'anù. Mapa waya ãpùtee p'ùrrabaidachi. Mata wãyaaji Macedonia eujãde. 4 Ma wãdade iru k'õp'ãyaajida nãgà ijãapataarãpa: Pirro warra Sópater, Berea p'uurudepema; Aristarco mãik'aapa Segundo, Tesalónica p'uurudepema; Gayo, Derbe p'uurudepema; Timoteo, Tíquico mãik'aapa Trófimo, Ásia eujãdepema. 5 Mãùrã tai naa wãjida mãik'aapa nùnajida Troas p'uurude. 6 Ma t'êepai tai wãjida Filipos p'uurudeepa, fiesta pan levadura wêe k'opata wãyaap'eda. Barcode wã nipadap'edaa perã, k'ãima joisomaamaa panajida Troas p'uurude. K'îrachuunadap'eda apemaarã ome, mama k'ãima siete p'aneejida.Pablopa ooda Troas p'uurude
7 Tomia ewate tai chip'ejida apemaarã ijãapataarã ome nek'odait'ee mãik'aapa Cristo piuda k'irãpadait'ee. Pablopa ijãapataarãmaa jarateemaa baji esapùte parumaa, ichi aù norema wãit'ee pada perã. 8 Te piso ùt'ùpema cuartode chip'e p'anajida mãik'aapa lamparara âdaa nâbaji. 9 Pablo jarateemaa bù misa, k'ûtrãa Eutico apatap'edaa su–ak'ù baji ventanade ûrimaa. Mamîda Pablopa taarã jarateeda perã, ma k'ûtrãa k'ãidaip'eda, tudú padachi piso õpeedeepa. Aramata piu jira atanajida. 10 Mãpai Pablo ùrabaip'eda, ma k'ûtrãa k'ap'ùa wëre ataji mãik'aapa mãgaji chi k'õp'ãyoorã arii p'anadap'edaarãmaa:
—¡P'eranáatù! ¡Iru chok'ai bùpù!
11 Mãpai Pablo waya teedaa wãk'ãri, nek'ojida mãik'aapa Cristo piuda k'irãpajida. Mata waya ichi jarateemaa beeji ewarirumaa. Ewarik'ãri, wãji ichi ode. 12 Ma k'ûtrãa piu bada chok'ai ateedap'edaa perã ichi temaa, ijãapataarã o–îa p'aneejida.
Troas p'uurudeepa Mileto p'uurudee wãda
13 Pablo ode wã k'inia baji. Mapa tai naa wãjida barcode Aso p'uurudee. Mama nùjida iru batau atadait'ee. 14 Aso p'uurude unudak'ãri, batauji tai ome mãik'aapa wãjida Mitilene p'uurudee. 15 Mamãik'aapa uchiadap'eda, aù norema Quío isla k'îrapite wãyaajida. Ma norema Samos p'uurude panajida. Mamãik'aapa panajida Mileto p'uurude. 16 Mãgá oojida Pablo waa wã k'inia–e bada perã Ásia eujãdee. Ma awara Éfeso p'uurude wiibai k'inia–e paji, Jerusalende isapai pana k'inia bada perã, Pentecostés fiesta ewate pai naaweda.
Pablopa jarada Éfeso p'uurudepema ijãapataarã ak'ùpataarãmaa
17 Mãgá Éfeso p'uurude wiibai k'inia–e paji taarãi jîak'aapa. Mamîda Mileto p'uurude pachedak'ãri, Pablopa t'â pëiji Efesodepema ijãapataarã ak'ùpataarã. 18 Ãchi pachedak'ãri, ichia mãgaji:
—Parãpa k'awa p'anùda aji, sãgata mù nipapari parã t'ãide, na Ásia eujãde ewaa pachedak'ãriipa. 19 Taarãru parã ome Tachi Ak'õrepa oopi bùk'a oomaa bù, chupùria nâbùde mãik'aapa nepùrade nâbùde judiorã juapa. 20 Mamîda jõmaarã taide waawee–ee jarateeji, parã te chaa paara. Mãga ooji parã ûraait'ee mãik'aapa k'aripait'ee. 21 Auk'a jarateeji judiorãmaa mãik'aapa judio–eerãmaa, ãchia p'ek'au k'achia oopata oodaamaa p'aneedamerã mãik'aapa Tachi Waibùa Jesucristode ijãadamerã. 22 Ârá wãru Jerusalendee, Tachi Ak'õre Jaurepa mãga k'inia bairã. Wãit'ee k'awa–e bù mîda k'ãata mù ome oodait'ee mama. 23 Nãgapai k'awa bù. P'uuru bee chaa wãyaarude Tachi Ak'õre Jaurepa mùmaa k'awapiru mù miait'ee mãik'aapa carcelde chupùria nâbanait'ee. 24 Mamîda mùa p'ua–e bù, piuru pùjida Jesupa oopi bùk'a oo k'inia bairã. Jîp'a jaratee k'inia bù na pedee pia: Tachi Ak'õrepa eperãarã k'inia iru bairã, tachi k'aripaji Jesucristo piuda k'aurepa.
25 +Mãga jarateeji parã t'ãide. Ma awara Tachi Ak'õrepa parãmaa jarateeji ichia oopi k'inia bù Cristode ijãapataarãmaa. Mùa k'awa bù parãpa mù k'îra waa unuda–e pait'ee. 26 Mapa idiweda Tachi Ak'õre k'îrapite mùa jara bù: parãdepema aba piuk'ãri atuaru pùrã, mù k'aurepada ada–e pait'ee. 27 Mãga jara bù mùa jarateeda perã jõmaweda Tachi Ak'õrepa jarapidak'a. 28 Mapa âpemaarã, chik'aripa p'anapatáatù mãik'aapa ijãapataarã pia ak'ù p'anapatáatù, ma–it'ee Tachi Ak'õre Jaurepa parã jùrùt'erada perã. Tachi Waibùapa k'inia bù parãpa ak'ùdamerã ichide ijãapataarã, ichia ãra o k'achiadeepa k'aripa atada perã, ichi waa bat'ada k'aurepa. 29 Mùa k'awa bù ne–animal k'achia beerã atu chepatak'a eperãarã peede, mãga pùk'a mù nãik'aapa wãda t'êepai awaraarã chedait'ee Cristode ijãapataarã ijãa amaapide. 30 Ichiaba pãchi t'ãideepa pida uchiadait'ee seewa jarapataarã. Mãgùùrãpa ijãapataarã ãchi eere atee k'inia p'anadait'ee. 31 Mapa k'îra ùbùa p'anátù mãik'aapa k'irãpátù sãga mù chupùria nâbaji año õpee, parã ûraa bù misa p'ãrik'ua mãik'aapa ãstaawa.
32 +Ârá âpemaarã, mùa parã bùru Tachi Ak'õre juade, ichia parã pia ak'ù bapariimerã ichi ley p'ãdade jara bùk'a. Ichi aupaita parãmaa oopii ichia oopi k'inia bùk'a, mãgá iru–it'ee p'anapataadamerã chi apemaarã awara bùdaarãk'a. 33 Mùa chîara p'arat'a, nêe mãik'aapa p'aru k'âa–e bù. 34 Parãpa pia k'awa p'anù mùchi juadoopa mimiapari mãik'aapa ne–inaa atapari mùchi–it'ee mãik'aapa mù ome p'anùùrã–it'ee. 35 Mùa parãmaa at'apai jarateedoo, auk'a mimiadamerã mãik'aapa chik'aripa para bamerã. K'irãpátù Tachi Waibùa Jesupa jarada: “Pipùara bù teeit'ee, jitai k'ãyaara.”