Pablo Éfeso p'uurude
19
1 Apolo Corinto p'uurude bù misa, Pablo wãyaaji Galacia mãik'aapa Frigia eujãde Éfeso p'uurude parumaa. Mama Cristode ijãapataarã ununaji. 2 Mãpai Pablopa iidiji:—Parãpa Cristode ijãadak'ãri, ¿Tachi Ak'õre Jaure parã k'ap'ùade ba chejik'ã? aji.
P'anaujida:
—Taipa k'awada–eda ajida, Tachi Ak'õre Jaure ba chepari ijãapataarã k'ap'ùade.
3 Mãpai Pablopa iidiji:
—Parãpa poro choopidak'ãri, ¿k'ãare–it'ee poro choopijidama? aji.
P'anaujida:
—Juanpa jaradak'a poro choopijida ak'ùpidait'ee p'ek'au k'achia oo amaa k'inia p'anù.
4 Mãpai Pablopa mãgaji:
—Juanpa wãara poro choojida aji, waa p'ek'au k'achia oo k'iniada–e p'anadap'edaarã. Mamîda Juanpa ichiaba jarapachi ijãadamerã ichi t'êe cheru eperãde. Mãgà eperã Jesucristo.
5 Ma eperãarãpa mãga ûridak'ãri, aramata ãchi poro choopijida Tachi Waibùa Jesús t'âde ak'ùpidait'ee irude ijãa p'anù. 6 Maap'eda Pablopa jua bùji ma poro choodap'edaarã ârù. Mãgá bùk'ãri, Tachi Ak'õrepa ichi Jaure ãra k'ap'ùade ba chepiji. Mãgùpa ãramaa pedeepipachi k'awada–e p'anù pedeede. Mãgá jarajida Tachi Ak'õrepa jarapidak'a. 7 Chi mãgá poro choodap'edaa eperãarã doce paji.
8 Maap'eda Pablo wãji Tachi Ak'õre Ûraa jarateepata tedee. Mama âipata ewari chaa atane õpee Tachi Ak'õre Ûraa waawee–ee jarateeji. Jaraji Tachi Ak'õrepa pia ooda Jesucristo pëik'ãri, judiorãpa irude ijãadamerã. 9 Mamîda ûk'uruurãpa ijãa k'iniada–e paji Pablopa jaratee bada mãik'aapa waapùara pedee k'achia jarajida Tachi Ak'õre Ode P'anùùrã ãpùte. Maperã Pablo mamãik'aapa ãyaa wãji ijãapataarã ome. Jaratee banaji eperã t'âjarapatap'edaa Tirano escuelade. Mama ewari chaa jarateepachi. 10 Irua Tachi Ak'õre Ûraa jarateeji año omé. Mãgá judiorã mãik'aapa judio–eerã Ásia eujãde p'anapatap'edaarãpa ûrijida Tachi Ak'õrepa jara pëida Jesudé. 11 Ichiaba Tachi Ak'õrepa Pablomaa oopipachi ne–inaa eperãarãpa p'oyaa oodak'aa ãchi juadoopa. 12 Pablo k'ap'ùade p'aru t'õbaidapapai, k'ayaa beerã jùpapachida. Ichiaba netuara eperãarã k'ap'ùade merãtùa bee uchiapachida.
Netuarapa Esceva warrarãmaa ooda
13-14 Mãpema judiorã ûk'uru Cristode ijãada–e p'anadap'edaarãpa netuara merãtùa bee eperãarã k'ap'ùadeepa uchiapik'oopachida. Mãga oo nipajida judiorã p'aareerã poro Esceva warrarã. Ãra siete paji. Mãùrãpa k'awaadak'ãri netuaraarã uchia p'anù Pablo k'aurepa ichia Tachi Waibùa Jesús t'â jarak'ãri, auk'a oo k'inia p'aneejida. Mapa jarajida netuara merãtùa bùmaa:
—¡Pablopa jara bù Jesús t'âde uchíatù!
15 Mamîda mãga oodak'ãri, ma netuara eperã k'ap'ùade merãtùa badapa mãgaji:
—Mùa k'awa bùda aji, Jesús. Ichiaba k'awa bù k'aita Pablo. Mamîda parã ¿k'airåma? aji.
16 Mãpai ma netuara k'ap'ùade merãtùa bada eperãpa ãchi ârù cheji mãik'aapa ãchi jõmaweda sîk'ooji. Mãgá p'u oop'eda, chi netuara uchiapi chedap'edaarã mamãik'aapa ãk'adaa p'ira uchiak'oodachida. 17 Éfeso p'uurude p'anapataarã, judiorã mãik'aapa judio–eerãpa mãga ûridak'ãri, jõmaarãta p'erajida mãik'aapa Tachi Waibùa Jesús t'â pia t'o p'anajida.
18 Mãpemaarã ûk'uru Cristode ijãa p'aneejida. Maap'eda Pablomaa jara chepachida ãchia k'achia oopatap'edaa, aù naaweda ijãa p'anadap'edaa perã petau tau k'awaa beerãpa oo p'anadap'edaade. 19 Ichiaba ûk'uru petau tau k'awaa beerãpa aneepachida ãchi libro jõmaarã taide paak'oodait'ee. Mãgà libro valor p'arat'ade juasiadak'ãri, uchiaji p'arat'a tau cincuenta mil. 20 Ma jõma oo p'anadap'edaa k'aurepa ma eujãdepemaarãpa waapùara ijãapachida Tachi Ak'õrepa jarapidade.
21 Ma t'êepai, Tachi Ak'õre Jaurepa Pablomaa k'îsiapiji wãit'ee Jerusalendee, wãyaap'eda Macedonia eujãde mãik'aapa Acaya eujãde. Ichiaba Jerusalendeepa Pablo wã k'inia baji Romadee. 22 Mãga k'îsiap'eda, Pablopa chi k'õp'ãyoorã Timoteo Erasto ome naa pëiji Macedonia eujãdee. Jõdee ichi Ásia eujãde jarateemaa beeji. Maap'eda wãji ãra t'êe.
Éfeso p'uurudepemaarã k'îraudaidap'edaa
23 Maapai Tachi Ak'õre Ode P'anùùrã k'aurepa, Éfeso p'uurudepemaarã jõma k'îraupik'a para baji 24 ne–inaa p'arat'adee oopari Demetrio apatap'edaapa ãra ãpùte pedee k'achia jarada perã. Mãgà eperãpa ne–inaa ma–ãri santok'a p'arat'adee oopachi, ãchi ùt'aa t'âpata nawe Artemisa te k'irãpapataadamerã. Mãga oo bùpa ichia mãik'aapa apemaarã ne–inaa oo k'awaa beerãpa p'arat'a waibùa jitapachida. 25 Maperãpù Demetriopa mãgùùrã mãik'aapa awaraa ne–inaa oo k'awaa beerã t'â p'e atap'eda, mãgaji:
—K'õp'ãyoorã, parãpa k'awa p'anùda aji, nãgà mimia oo p'anùùpa tachi p'arat'a jitapata. 26 Ma awara parãpa unu p'anù mãik'aapa ûri p'anù Pablopa jaratee bù, ne–inaa ooda eperãarãpa aù k'îrapite ùt'aa t'âpata ak'õre waibùarã–e. Mãga jara bùpa eperãarã chok'ara ichi eere ûraa p'e iru bù. Mãga jara–e bù nama Éfeso p'uurudepai. Ichiaba mãga jara bù jõma Ásia eujãde. 27 Iru pedee ijãaruta pùrã, tachia ooda neto amaadai mãik'aapa tachia p'arat'a waa jitada–e pai. Ma awara tachi nawe Artemisade ijãada–e pai mãik'aapa ichiaba waa iru îgreste ak'ùda–e pai. Mãgà tede na Ásia eujãdepemaarã mãik'aapa jõmaweda Roma jua ek'ari p'anùùrã irumaa ùt'aa t'âpata. ¿Wãara–ek'ã aji, mùa jara bù?
28 Arii p'anadap'edaarãpa mãga ûridak'ãri, k'îraudachida mãik'aapa biuk'a nâbeeji:
—¡Artemisa Waibùa; tachi Éfeso pidaarã nawe!
29 Mãpai eperãarã waapùara cheepuru nâbeeji mãik'aapa p'uuru pidaarã jõma k'îraupik'a para beeji. Mãpai Gayo, Aristarco ome jita atajida mãik'aapa atadachida ãchi chip'edaipatamaa. Ma eperãarã omé Macedonia eujãdepemaarã paji. Ichiaba Pablo ome nipapachida. 30 Pablo wãit'ee paji ma p'uuru pidaarã k'îrapite pedeede. Mamîda ijãapataarãpa wãpida–e paji. 31 Ichiaba Asiadepema poroorã ûk'uru Pablo ome k'õp'ãyo meraadap'edaa perã, jara pëijida wãnaamerã ma eperãarã k'îraupik'a para bùmaa. 32 Mãùmisa, chi cheepurudap'edaarã waapùara k'îraupik'a para beeji. Ûk'uruurãpa ne–inaa jarapachida; awaraarãpa biapachida. Mapa biuk'a nâbaji. Ûk'uruurãpa k'awada–e p'anajida sãap'eda cheepurudap'edaa. 33 Judiorã arii p'anadap'edaarãpa Alejandromaa nepùrùdap'eda, jõmaarã taide ateejida. Mãpai Alejandropa juapa jaraji k'îup'ee p'aneedamerã, ãchi k'ap'ùa pedeeit'ee perã. 34 Mamîda eperãarã k'îraupik'a para badaarãpa ichi judío k'awaadak'ãri, perá hora omé waapùara biuk'a nâbeeji. Mãgapachida:
—¡Artemisa Waibùa; tachi Éfeso pidaarã nawe!
35 Mãpai aù p'uurudepema secretariopa eperãarã k'îup'ee p'anapiji mãik'aapa mãgaji:
—Éfeso pidaarã, jõmaarãpa k'awa p'anùda aji, na p'uuru pidaaråpata tachi nawe Artemisa jîak'a ùt'ariipa baaida ichi îgrestede jâapata. 36 Apidaapa nãgà p'oyaa merada–e perã, k'îra jîp'a p'anéetù, ne–inaa k'achia pariatua ooda–ee. 37 Na eperãarã parãpa anee p'anù tachi îgrestedepema net'aa maarepida chùada–e p'anù mãik'aapa tachi nawe ãpùte pedee k'achia jarada–e p'anù. 38 Demetrio wa chi k'õp'ãyoorã nepùra iru p'anù pùrã awaraa ome, Romadepema charraarãmaa wåtù. Ãrapa ak'ùdaipù, ma–it'ee p'anadairã. 39 Mamîda jõmaarãpa awaraa nepùra iru p'anù pùrã, k'îra jîp'a cheepurudak'ãri, ma nepùra jõ pëidai. 40 Idipema oodap'edaa k'aurepa Romadepemaarãpa k'îsiadait'ee tachi chõoyaa p'anù. Nãga bùde ãchia iidi p'anù pùrã sãap'eda idi nãga oojida, ¿sãga p'anaudayama? aji.
41 Mãga jarap'eda, eperãarã jõmaweda ãchi te chaa pëik'ooji.