Pablo Corinto p'uurude
18
1 Ma t'êepai Pablo wãji Atenas p'uurudeepa Corinto p'uurudee. 2 Mama ununaji judío t'âjarapatap'edaa Áquila. Mãgà Ponto eujãdepema paji. Ewaa pache baji chi wêra Priscila ome Italia eujãdeepa, César Claudiopa judiorã jõmaweda jërek'ooda perã Roma p'uurudeepa. 3 Pablo p'asiade wãk'ãri ma judío badamaa, k'awaa ataji ichi jîak'a Aquilapa carpa oopari. Mapa Pablo ãra ome beeji ma mimia oomaa. 4 Mama bùde âipata ewari chaa wãpachi Ak'õre Ûraa jarateepata temaa jarateede judiorãmaa mãik'aapa judio–eerãmaa Cristode ijãadamerã.5 Silas Timoteo ome pachedak'ãri Macedoniadeepa, Pablopa ewari chaa Tachi Ak'õrepa jara pëida Cristode jarateemaa bapachi, judiorãpa ijãadamerã Jesuta Cristo, Tachi Ak'õrepa pëida. 6 Mamîda judiorã, ichi pedee ijãa k'iniada–ee p'anadap'edaarãpa ik'achia jaramaa p'aneejida. Mapa Pablopa ichi p'aru jâ bada jîap'eji ak'ùpiit'ee ãchimaa waa jaratee–e. Maap'eda mãgaji:
—Pãchi k'îradoopa atuadait'eeda aji, piudak'ãri. Idideepa mù wãit'eeda aji, judio–eerãmaa Tachi Ak'õrepa jarapi bù jarateede.
7 Mãga jarap'eda, Pablo wãji Ticio Justo apatap'edaa temaa jarateede. Mãgà eperãpa Tachi Ak'õremaa ùt'aa t'âpachi. Ichi te baji Tachi Ak'õre Ûraa jarateepata te ik'aawa. 8 Pablopa mama jarateemaa bùde, Cristode ijãaji ma Ak'õre Ûraa jarateepata tedepema poro, t'âjarapatap'edaa Crispo. Chi te pidaarã jida auk'a ijãajida mãik'aapa apemaarã Corinto pidaarã chok'ara Pablopa jarateeda ûridap'edaarã ichiaba ijãajida. Mapa mãùrã jõma poro choopijida. 9 At'ãri Corinto p'uurude p'anùde ewari aba p'ãrik'ua k'ãimok'araa pùk'a bùde Tachi Ak'õrepa mãgaji Pablomaa:
—Waawee–ee jaratéeji na p'uurude 10 mùchideerã nama chok'ara nâbairã. Mù pù ome bairã, apidaapa pù k'achia ooda–e.
11 Tachi Ak'õrepa mãga jarada perã, Pablo mama beeji año aba ap'eda esa–auk'a, Tachi Ak'õrepa jara pëida Cristode jarateemaa.
12 Mamîda, mama bùde, Romadepema Galión apatap'edaa Acaya eujãdepema poro waibùa bak'ãri, judiorã chok'ara pedeeteejida mãik'aapa Pablo jita ateejida iru k'îrapite. 13 Mama mãgajida:
—Na eperãpa jaratee bù Tachi Ak'õrede ijãadamerã mãik'aapa irumaa ùt'aa t'âpataadamerã. Mamîda jaratee–eda ajida, Moisepa p'ãdade jara bùk'a oodamerã.
14 Mãpai Pablo pedeeit'ee arude, Galionpa mãgaji ma judiorãmaa:
—Na eperãpa ne–inaa k'achia oo bada paara maa–e pùrã chîara pee bada paara, mùa ak'ùk'ajida aji. 15 Mamîda jara p'anadairã chîara t'â mãik'aapa parãpa ley p'ãdade, pãchi pitapai ma nepùra ak'ùdapáde aji. Mùa parã nepùra ak'ù k'inia–eda aji.
16 Aramata jërek'ooji ichimãiipa. 17 Mãpai arii ak'ù p'anadap'edaarãpa Tachi Ak'õre Ûraa jarateepata tedepema poro Sóstenes jita atadap'eda, wùjida Galión k'îrapite. Mamîda iru–it'ee maarepida p'ua–e paji.
Pablo waya Antioquía p'uurudee wãda
18 Aù t'êepai Pablo taarã beeji Corinto p'uurude. Mãpai ijãapataarãmaa despediip'eda, Siria eujãdee wãji Priscila mãik'aapa Áquila ome. Cencrea p'uurude barcode batau naaweda, Pablopa ichi poro bi–si wêt'aaji. Mãga ooji ak'ùpiit'ee ichia Tachi Ak'õremaa ooit'eeda ada ooda. 19 Ma wãrutade Éfeso p'uurude panadak'ãri, Pablo t'îunaji Tachi Ak'õre Ûraa jarateepata tede judiorã ome pedeeit'ee. 20 Ichia jarateeda ûridak'ãri, chupùria iidijida ãchi ome taarã beemerã. Mamîda Pablopa k'inia–e paji. 21 Mãgaji:
—Ârá wãit'eeda aji. Mamîda waya cheit'eeda aji, Tachi Ak'õrepa k'inia bù pùrã.
Mãpai Pablo batauji mãik'aapa wãji. Jõdee Priscila Áquila ome mama p'aneejida. 22 Pablo Cesarea p'uurude panak'ãri, mamãik'aapa wãji Jerusalendee ijãapataarã ak'ùde. Maap'eda wãji Antioquía p'uurudee. Mãgà p'uuru Siria eujãde bù.
23 Antioquiade bap'eda, wãji ijãapataarã para bee chaa ãchi ak'ùde mãik'aapa ûraade. Mãga oo wãji Galacia eujãde mãik'aapa Frigia eujãde.
Apolopa Éfeso p'uurude jarateeda
24 Maapai judío t'âjarapatap'edaa Apolo pacheji. Mãgà Alejandría p'uurudepema paji. Mãgà p'uuru Egipto eujãde bù. Mãgà judiopa Tachi Ak'õre Ûraa p'ãda pia k'awa baji. Ma awara pia jarateepachi. 25 Mãgùpa o–î–îa jarateepachi Juan Bautistapa jarateedak'a, eperãarãpa ãchia p'ek'au k'achia oopata oo amaadamerã mãik'aapa poro choopidamerã ak'ùpidait'ee Tachi Ak'õrede ijãa p'anù. Ichiaba jarateepachi Jesucristo Tachi Ak'õrepa pëida. 26 Apolo Éfeso p'uurude pachek'ãri, waawee–ee jarateemaa beeji judiorã Ak'õre Ûraa jarateepata temãi. Mãga ûridak'ãri, Priscila Áquila ome ãchi temaa ateejida. Mãpai Apolomaa jarateejida jõma ãchia k'awadap'edaa, Tachi Ak'õrepa ooda Jesucristo k'aurepa. 27 Maap'eda, Apolo Acaya eujãdee wã k'inia bak'ãri, Efesodepema ijãapataarãpa k'art'a p'ãjida jãpemaarãmaa iru auteebaidamerã. Mãgá mama panak'ãri, irua k'aripai Cristode ijãapataarã waapùara ijãadamerã. Tachi Ak'õre t'ãri pia bapari perã, ãchimaa Cristode ijãapiji, Apolo mamaa wãi naaweda. 28 Apolo mama bùde jõmaarã taide Tachi Ak'õre Ûraa p'ãda ak'ùpachi mãik'aapa jarateepachi Jesucristo Tachi Ak'õrepa pëida eperãarã k'aripamerã. Mapa judiorãpa maarepida p'oyaa p'anauda–e paji.