Tesalónica p'uuru pidaarã<R>k'îrauk'oodaidap'edaa Pablo Silas ome
17
1 Mamãik'aapa ãchi wãdade Pablo Silas ome wãyaajida Anfípolis p'uurude mãik'aapa Apolonia p'uurude. Maap'eda Tesalónica p'uurude panajida. Mãgà p'uurude baji Tachi Ak'õre Ûraa jarateepata te. 2 Maperã Pablo ichia oopatak'a p'uurude panak'ãri, jãmaa wãji. Mama beeji tomia õpee mãik'aapa âipata ewari chaa aupedeeji arii p'anadap'edaarã ome. 3 Ak'õre Ûraa p'ãdade ak'ùpipachi sãga Cristo chupùria nâbait'ee mãik'aapa piup'eda, p'irabaiit'ee. Jarapachi:—Nãgà Jesús parãmaa mùa jaratee bù Cristota, Tachi Ak'õrepa pëida eperãarã k'aripamerã.
4 Mãga ûridak'ãri, judiorã ûk'uru Cristode ijãajida mãik'aapa araa nipapachida Pablo mãik'aapa Silas ome. Ichiaba ijãajida judio–eerã; Tachi Ak'õrede ijãa p'anadap'edaarã chok'ara mãik'aapa wêraarã p'arat'ara beerã. 5 Judiorã Cristode ijãada–ee p'anadap'edaarãpa mãga unudak'ãri, k'îraudachida. Mapa jùrùjida eperãarã mimiadak'aa p'anadap'edaarã, p'uuru pidaarã k'îraupit'aadamerã Pablo mãik'aapa Silas ome, pedee jõnùpa ãra ãpùte. Mãgá p'uuru pidaarã jõma k'îraupit'aadap'eda, Jasón tede t'îudachida, Pablo Silas ome uchia atadap'eda, p'uuru pidaarãmaa teedait'ee. 6 Mamîda mãgà tede ãra unuda–e pak'ãri, uchia atajida Jasonta mãik'aapa awaraa ijãapataarã. Maap'eda ãchi p'uurudepema poroorãmaa ateejida. Mama panadak'ãri, biapachida:
—¡Ârá eperãarã Roma jua ek'ari p'anùùrã k'îsia awarapipataarã nama che p'anùda! ajida. 7 Ma awara mãgùùrã Jasonpa ichi tede auteebaiji. Mãùrãpa oodak'aa Cesarpa oopi bùk'a. Jîp'a jara p'anù ichi k'ãyaara rey aba waibùara bùda ajida, t'âjarapata Jesús.
8 Mãga ûridak'ãri, ma p'uuru pidaarã mãik'aapa ãchi poroorã k'îraupik'a para beeji. 9 Mamîda Jasonpa apemaarã ijãapataarã ome p'aajida ãchi uchia pëidamerã. Mãpai k'ena pëijida.
Pablo Silas ome Berea p'uurude
10 Ma p'ãrik'uaweda ijãapataarãpa Pablo Silas ome Berea p'uurudee pëijida. Mama panadak'ãri, t'îujida judiorã Ak'õre Ûraa jarateepata temãi. 11 Mãpema judiorã Tesalonicadepema k'ãyaara k'îsia k'awaara p'anajida. Mapa Pablopa jaratee bù ûri k'inia p'anajida. Mãga ûridap'eda, ewari chaa Tachi Ak'õre Ûraa p'ãda ak'ùpachida k'awaadait'ee wãara jara bù Pablopa jara bùk'a maa–e pùrã awara jara bù. 12 K'awaadak'ãri wãarata jara bù, mãgùdepemaarã judiorã chok'ara ijãajida. Ichiaba judio–eerã wêraarã p'arat'ara beerã chok'ara ijãajida, ùmùk'îraarã jida ichiaba. 13 Mamîda Tesalonicadepema judiorãpa ûridak'ãri Pablopa Tachi Ak'õrepa jara pëida jarateemaa bù Bereade, wãjida ma p'uuru pidaarã k'îraupit'aade. 14 Aramata mãpema ijãapataarãpa Pablo pëijida k'õp'ãyoorã ûk'uru ome p'usa idee. Jõdee Silas Timoteo ome Bereade p'aneejida. 15 Chi Pablo ome wãdap'edaarãpa iru ateejida Atenas p'uurudee. Waya ãpùtee uchiadait'ee pak'ãri, Pablopa jara pëiji Silamaa Timoteo ome taarã–ee chedamerã ichimaa.
Pablo Atenas p'uurude
16 Atenas p'uurude Pablopa Silas mãik'aapa Timoteo nùmaa beeji. Mama bùde unuk'ãri chok'ara ne–inaa iru p'anù eperã juapa ooda aù k'îrapite ùt'aa t'âpata, t'ãri ãriidachi. 17 Mapa aupedeepachi judiorã ome mãik'aapa judio–eerã Tachi Ak'õre waaweepataarã ome Ak'õre Ûraa jarateepata temãi. Ichiaba mãga oopachi ewari chaa chi unuru ome ma p'uurude net'aa netopatamãi. 18 Mama ûk'uru poro wêsaa beerã t'âjarapatap'edaa Epicúreo eerepemaarã mãik'aapa Estoico eerepemaarã aupedee p'aneejida Pablo ome. Mãùrã ûk'uruurãpa mãgapachida:
—¿K'ãata jara k'inia bùma apachida, na pedee–idaa bùpa?
Awaraarãpa mãgapachida:
—Awaraa eujãdepemaarã ak'õre waibùapa ooda jaratee bùda apachida.
Mãga jarapachida Pablopa jarateemaa bada perã Tachi Ak'õrepa ooda Jesús piuda k'aurepa mãik'aapa jarateepachi perã tachi piuda t'êepai waya chok'ai p'irabaidait'ee. 19 Mãpai ãchia Pablo ateejida Areopagomaa, ãchi poro wêsaa beerã cheepurupatamaa ûraa ûride. Mama iidijida:
—¿Taipa pùa jaratee bù k'awaadaik'ã? ajida. 20 Taipa waide ûrida–e p'anùda ajida, pedee pùa jaratee bùk'a. Mapa k'awa k'inia p'anùda ajida.
21 Ma Atenas pidaarã mãik'aapa awaraarã arii p'anadap'edaarã mimiada–e p'anadak'ãri, p'anapachida ne–inaa chiwidi pedeemaa mãik'aapa ûrimaa.
22 Mãpai Pablo bainâ beeji ãchi k'îrapite Areopagode mãik'aapa mãgaji:
—Atenas p'uuru pidaarã, mùa unu bù parãpa ak'õre waibùa k'îra t'ãdoo waaweepata. 23 Mù wãyaak'ãri parã ùt'aa t'âpatamãi, unuji net'aa chok'ara iru p'anù aù k'îrapite ùt'aa t'âpata. Mama bùde unuji parã altar bide p'ã bù: Tachi Ak'õre Waibùa k'awada–e p'anù–it'ee. Parãpa k'awada–eda a p'anù Ak'õrepa ooda mùa jaratee bù.
24 +Nãgà Ak'õrépata ooji na eujã mãik'aapa jõma aùde nâbù. Nãgùta, Tachi Ak'õre, jõmaarã Waibùa na p'ek'au eujãde mãik'aapa pajãde. Nãgà Ak'õre eperãarãpa te oodade bak'aa, 25 ichi–it'ee p'ua–e bairã ne–inaa eperãarãpa oopata ichi–it'ee. Ichiata eperãarã chok'ai p'anapipari, îyapaapipari mãik'aapa tachimaa ne–inaa jõmaata teepari pia p'anapataadamerã.
26 +Eperã abaadeepa eperãarã k'îra t'ãdoo uchiapiji, na p'ek'au eujã jõmaade p'anapataadamerã. Aù naaweda k'îsia iru baji sãapai uchiapiit'ee mãik'aapa sãmaata p'anapiit'ee. 27 Tachi Ak'õrepa mãga ooji eperãarãpa iru jùrùdamerã. Tachi taupa nãgà Ak'õre unuda–e p'anù mîda, iru k'awadai, wãara tachimãiipa t'ùmùa–ee bairã. 28 Iru k'aurepa tachi chok'ai p'anù; p'ùrrùapata mãik'aapa na eujãde p'anapata. Pãchi *k'arik'a (poesía) p'ãpataarãpa jaradap'edaak'a mãga bù: “Tachi, Tachi Ak'õre Waibùapa ooda”. 29 Maperã k'îsiadaik'araa bù Tachi Ak'õre santok'a bù, eperãarãpa k'îsiadap'eda oopatak'a nêedee, p'arat'adee maa–e pùrã mãudee. 30 Naaweda Tachi Ak'õrepa miapi–e paji mãgee k'îrapite ùt'aa t'âpatap'edaarã, iru waide k'awada–e p'anadap'edaa perã. Mamîda ârá jõmaarãmaa jara bù p'ek'au k'achia oo amaadamerã mãik'aapa ichide ijãadamerã. 31 Ichia mãga jara bù na ewari na p'ek'au eujãdepemaarãpa oopata jõmaweda ak'ùit'ee perã, k'awaait'ee pia wa k'achia. Mãga ooit'ee ichia pëida Jesucristopa. Cristopa eperãarãpa oopata mãgá ak'ùi, ichia k'achia ook'aa pada perã na eujãde nipak'ãri. Tachia k'awa p'anùda aji, Ak'õrepa iru jùrùt'eraji, iru piup'eda, chok'ai p'irabaipida perã.
32 Arii p'anadap'edaarãpa ûridak'ãri eperã piup'eda chok'ai p'irabaida, ûk'uru ëi para beeji mãik'aapa ûk'uruurãpa mãgajida:
—Na ewari waya ûridayada ajida, pù pedee.
33 Mãpai Pablo uchiaji mamãik'aapa. 34 Mamîda ûk'uruurãpa ijãajida Pablopa jarada mãik'aapa Cristode ijãa p'aneejida. Ma ijãadap'edaarã t'ãide baji ùmùk'îra t'âjarapatap'edaa Dionisio. Mãgà Areópago poro wêsaa beerã cheepurupatadepema paji. Ichiaba baji wêra t'âjarapatap'edaa Dámaris mãik'aapa awaraarã.