Timoteopa Pablo Silas ome k'õp'ãyaada
16
1 Mamãik'aapa Pablo Silas ome panajida Derbe p'uurude mãik'aapa Listra p'uurude. Mama unujida ijãapari t'âjarapatap'edaa Timoteo. Chi nawe judío wêra Cristode ijãapari paji. Jõdee chi ak'õre Greciadepema paji. 2 Ijãapataarã Listradepemaarã mãik'aapa Iconiodepemaarãpa Timoteo pia t'o p'anadap'edaa perã, 3 Pablopa ichi ome ateeji mamãik'aapa. Mamîda uchiadai naaweda, iru k'ap'ùade tauchaa bùji mãpemaarã judiorã k'aurepa. Ma eujãdepema jõmaarãpa k'awajida Timoteo ak'õre Greciadepema paji mãik'aapa ãrapa tauchaa bùdak'aa paji ãchi warrarã k'ap'ùade. 4 P'uuru bee chaa wãyaa wãdak'ãri, jara bëi wãpachida Cristopa jùrùt'eradaarãpa mãik'aapa ijãapataarã ak'ùpataarãpa jara pëidap'edaa Jerusalendeepa. 5 Mãgá ijãapataarãpa pipùara k'awaajida Cristopa oopi k'inia bù ãchimaa mãik'aapa waapùara ijãajida irude. Ma awara ewari chaa ijãapataarã chok'araara îwa wãjida.Pablo k'ãimok'araa pùk'a bada Troas p'uurude
6 Ma wãrutade wãyaajida Frigia eujãde mãik'aapa Galacia eujãde, Tachi Ak'õre Jaurepa jarateepi–e pada perã Ásia eujãde. 7 Misia eujãde panadak'ãri, wãdait'ee paji Bitinia eujãdee. Mamîda Jesús Jaurepa wãpi–e paji. 8 Mapa Misia eujãde wãyaajida Troas p'uurude parutamaa. 9 Panadap'edaa ewate p'ãrik'ua, Pablo k'ãimok'araa pùk'a bùde unuji Macedonia eujãdepema ùmùk'îra bainâ bù. Mãgùpa chupùria iidiji Pablo wãmerã ichi eujãdee. Mãgaji:
—Chéji Macedoniadee tai k'aripade.
10 Pablo mãgá k'ãimok'araa pùk'a bap'eda, aramata net'aa p'e atajida wãdait'ee Macedoniadee, k'îsia p'anadap'edaa perã Tachi Ak'õrepa jarateepi k'inia bù Cristopa ooda eperãarã k'aripait'ee ma eujãde. Ma wãdap'edaade mù jida auk'a wãji.
Pablo Silas ome Filipos p'uurude
11 Troas p'uurudeepa tai barcode bataujida. Mata Samotracia islade panajida. Mamãik'aapa aù norema Neápolis p'uurude panajida. 12 Neapolideepa wãjida Filipodee. Mãgà p'uuru waibùa Macedonia eujãde bù. Ma p'uurude Romadepemaarã chok'ara p'anapachida. Mama k'ãima chok'ara–ee p'anajida. 13 Âipata ewate tai wãjida p'uurudeepa to idee, ma p'uurudepema judiorã ùt'aa t'âpatamãi unudai jîak'aapa. Unu atadak'ãri, su–ak'ù p'aneejida mãik'aapa jarateemaa p'aneejida wêraarã cheepurudap'edaarãmaa. 14 Ma wêraarã t'ãide baji aba t'âjarapatap'edaa Lidia. Ma wêra Tiatira p'uurudepema paji. Mãgùpa netopachi p'aru pia t'ùda p'up'uchia. Mãgà wêrapa Tachi Ak'õremaa ùt'aa t'âpachi. Maperã Ak'õrepa irumaa ûripiji Pablopa jaratee bù. Pia ûrik'ãri, Cristode ijãa beeji. 15 Iru poro choopip'eda ichi te pidaarã ome, taimaa mãgaji:
—Parãpa unu p'anù pùrã mù wãara ijãa bù Jesucristode, mù tede p'ana chétù.
Mãga jara bùpa wãjida ichi temaa.
Filipos p'uurude carcelde p'anadap'edaa
16 Ewari aba tai waya ùt'aa t'âde wãdak'ãri ùt'aa t'âpatap'edaamaa, unujida awêra. Mãgà awêra esclava paji. Mãgùpa ne–inaa p'asait'ee bù jarapachi, ichi k'ap'ùade netuara merãtùa bada perã. Mapa ma awêra chiparipa p'arat'ara jitapachi ichi k'aurepa. 17 Mãgà awêra tai t'êe bia wãpachi:
—Nãgà eperãarã Tachi Ak'õre Waibùapa pëida jarateedamerã sãga eperãarã ùt'aa wãdai.
18 Ewari chok'ara mãga oopachi tai wãrutamaa. Mata ewari aba Pablopa ûriamaadaik'ãri, ãpùtee ak'ùji mãik'aapa mãgaji ma netuara k'ap'ùade merãtùa badamaa:
—Jesucristo jõmaarã poro waibùa perã, ichi t'âde mùa pùmaa jara bù uchiadaimerã jã wêra k'ap'ùadeepa.
Aramata ma netuara uchiadachi.
19 Ma awêra chipariirãpa mãga unudak'ãri, k'awaajida ãchi p'arat'a waa p'oyaa jitada–e iru k'ap'ùa. Mapa Pablo Silas ome jita atadap'eda, ateejida ãchi p'uurudepema poroorãmaa, mãgùùrã chip'edaipatap'edaamãi. 20 Ma Romadepema poroorãmaa ateedap'eda, mãgajida:
—Na judiorãpa tachi p'uuru pidaarã k'îraupirutada ajida, 21 mãik'aapa ne–inaa jarateemaa p'anù tachi Romadepemaarãpa oopata awara. Taipa mãga ûri k'iniada–e p'anùda ajida.
22 Mãpai p'uuru pidaarã chok'ara seedachida. Ãchi poroorãpa Pablo Silas ome p'aru êrapijida mãik'aapa wùpijida pak'urupa. 23 Pia wùpit'aadap'eda, carcelde t'ùt'aajida mãik'aapa carceldepema jâaparimaa jarajida pia jâamerã, carceldeepa uchiapiamaapa. 24 Chi jâaparipa mãga ûrik'ãri, calabozo edupùara badade t'ù nâbùji mãik'aapa ãchi bùùrù t'ùk'ooji cepode.
25 Mãgá iru p'anajida mîda, Pablo Silas ome ùt'aa t'âmaa mãik'aapa k'arimaa p'anajida Tachi Ak'õremaa. Jõdee chi apemaarã carcel pidaarãpa ûrii p'anajida. 26 Esapùte pak'ãri, awêrachai golpe wëre nâbeeji. Ma carcel perá t'eedachi. Aramata chi puerta jõmaweda ewak'oodachida. Presoorã juade nâbada cadena mãik'aapa cepo ichiaba jõma êt'ak'oodachida. 27 Ma carceldepema jâaparipa unuk'ãri chi puerta jõma ewa jêra bù, ichi espada êt'a ataji ichi juadoopa piudariit'ee, carcel pidaarã jõma uchiadai p'anù jîak'aapa. 28 Mamîda Pablopa biaji ichi badamãiipa mãgà jâaparimaa:
—¡Jãga oonáaji! ¡Tai jõma nama p'anùpù!
29 Mãpai carceldepema jâaparipa lámpara aneepip'eda, t'îudachi Pablo mãik'aapa Silas p'anadap'edaamãi. Ãchi k'îrapite wùrrùwùrrùa bedabai nâbanaji p'era nâbùpa. 30 Uchia p'e atap'eda calabozo edupùara bùdeepa, mãgaji:
—Jarateepataarã, ¿k'ãata ooipia bùma aji, mù ùt'aa wãit'ee?
31 Mãpai p'anaujida:
—Jesucristode ijåaji. Mãgara pù, pùchi tedepemaarã ome ùt'aa wãdayada ajida.
32 Mãpai Tachi Ak'õrepa jara pëida Cristode jarateejida ma jâaparimaa mãik'aapa ichi tede p'anadap'edaarãmaa. 33 Aramata ma carceldepema jâaparipa Pablo Silas ome ateeji sùùk'ooit'ee ãchi k'ap'ùade t'udak'a jêra bada. Maap'eda iru ichi tedepemaarã ome poro choopijida. 34 Mãpai teedaa p'e ateep'eda, nek'opiji. Ma carcel jâapari ichi tedepemaarã ome o–îa p'anajida Tachi Ak'õrede ijãadap'edaa perã.
35 Aù norema tap'eda Romadepema poroorãpa ãchi jâapataarã pëijida ma carceldepema jâaparimaa, Pablo Silas ome uchia pëimerã. 36 Maperã carceldepema jâaparipa mãgaji Pablomaa:
—Mù poroorãpa jara pëi p'anùda aji, parã uchia pëimerã. Mapa k'ãiwee wåtù namãik'aapa.
37 Mamîda Pablopa mãgaji Romadepema poroorãpa pëidap'edaarãmaa:
—Tai auk'a Romadepemaarã p'anùta, wùjidada aji, jõmaarã k'îrapite, charramaa ateeda–ee. Maap'eda carcelde t'ùpijida. Ârá jõdee, ¿merã uchiapi k'inia p'anù–ek'ã? ¡Mãga–epù! Namãik'aapa wãda–eda aji, ãchia uchia pëi cheda–emãi ãchi k'îradoopa.
38 Pablopa jarada ãchi poroorãmaa jaranadak'ãri mãik'aapa jã eperãarã auk'a Romadepemaarãda adak'ãri, mãùrã poroorã p'eradachida, ãchia wùpidap'edaa perã mãik'aapa carcelde t'ù nâbùdap'edaa perã. 39 Mapa chedap'eda, chupùria iidijida Pablomaa Silas ome perdonaadamerã ãchia oodap'edaa. Mãpai uchiapijida carceldeepa mãik'aapa p'uurudeepa. 40 Pablo Silas ome ma carceldeepa uchiadap'eda, wãjida Lidia temaa. Mama ijãapataarã jõmaarãmaa ûraajida t'ãri o–îa p'aneedamerã. Maap'eda wãjida ma p'uurudeepa.