Ijãapataarã Jerusalende chip'edaidap'edaa
15
1 Maapai eperãarã Judeadeepa chejida Antioquiadee. Mãgùùrãpa Jesude ijãapataarãmaa jarateemaa p'aneejida. Mãgajida:—Pãchi ùmùk'îraarã k'ap'ùade tauchaa bùda–e pùrã Moisepa p'ãdade jara bùk'a, ùt'aa wãda–e pait'eeda ajida.
2 Mãpai Pablo Bernabé ome ijâatù pedeejida ãchi ome. Maap'eda Jesude ijãapataarãpa Pablo, Bernabé mãik'aapa awaraarã pëijida Jerusalendee mãgà jarateeda iidinadamerã Cristopa jùrùt'eradaarãmaa mãik'aapa Jerusalendepema ijãapataarã ak'ùpataarãmaa.
3 Antioquiadepema ijãapataarãpa ãchi pëidap'eda, Fenicia eujãde mãik'aapa Samaria eujãde wãyaajida. Nepùrùjida judio–eerãpa Cristode ijãa p'anadap'edaa. Mãga ûridak'ãri, mãpema Cristode ijãapataarã o–îadachida.
4 Pablo Bernabé ome Jerusalende pachedak'ãri, awaraa ijãapataarãpa ãra auteebaijida Cristopa jùrùt'eradaarã ijãapataarã ak'ùpataarã ome. Chip'edaidap'eda ãra ome, Pablo mãik'aapa Bernabé nepùrùjida jõma Tachi Ak'õrepa ooda ãchi pari. 5 Mamîda ûk'uru fariseorã Cristode ijãapataarã, p'irabaijida mãik'aapa mãgajida:
—Judio–eerã ijãa p'anùùrãmaa tauchaa bùpidaipia bù ãchi ùmùk'îraarã k'ap'ùade mãik'aapa oopidaipia bùda ajida, Moisepa p'ãdade jara bùk'a.
6 Mãpai seedachida Cristopa jùrùt'eradaarã mãik'aapa ijãapataarã ak'ùpataarã k'îsiadait'ee ma pedee jaradade. 7 Taarã aupedee jõnùde, Pedro p'irabaiji mãik'aapa mãgaji:
—Âpemaarã Cristo k'aurepa, parãpa k'awa p'anùda aji, taarãru Tachi Ak'õrepa mù jùrùt'eraji Jesucristopa ooda eperãarã k'aripait'ee jaranamerã judio–eerãmaa, ãchia auk'a Jesude ijãadamerã. 8 Tachi Ak'õrepa ãchi t'ãride iru p'anadap'edaa k'awa bada perã, ak'ùpiji ichia ãchi jida k'inia iru bù, tachi k'inia iru bùk'a. Mãga ak'ùpiji ãchimaa pëik'ãri ichi Jaure, tachimaa pëidak'a. 9 Tachi Ak'õrepa ãchi auk'a ak'ùpari tachik'a. Mãga k'awa p'anù ãchia p'ek'au k'achia oopata auk'a wêpapik'ooda perã Cristode ijãadak'ãri, tachi ome oodak'a. 10 Ârá, ¿tachia sãga oodaima? ¿Oodaipia bùk'ã Tachi Ak'õrepa jara–e padata? ¿Jõma ijãapataarãmaa oopidaik'ã mãgee ne–inaa chaaree Moisepa p'ãdade jara bùk'a? Tachia mãik'aapa tachi chonaarãpa mãgee ne–inaa jõmaweda p'oyaa ooda–e paji. 11 Maperã mãga oodaik'araa bù. Tachia ijãa p'anù Tachi Waibùa Jesucristo tachi ome t'ãri pia bairã, tachi o k'achiadeepa k'aripa atait'ee ùt'aa wãdamerã. Ãchia auk'a mãga ijãa p'anùda aji.
12 Maap'eda jõma k'îup'ee para beeji Bernabé Pablo ome nepùrùmaa p'aneedak'ãri Tachi Ak'õrepa oopida ãchimaa judio–eerã t'ãide, eperãarãpa p'oyaa oodak'aa ãchi juadoopa. 13 Pedee aupadak'ãri, Santiagopa mãgaji:
—Âpemaarã, mù pedee ûrítù. 14 Simón Pedropa et'ewa nepùrùjida aji, Tachi Ak'õrepa judio–eerã k'aripada. Tachi Ak'õrepa ãchi jida jùrùpari ichideerã p'aneedamerã. 15 Mãga bù iru pedee jarapataarãpa p'ãdap'edaade jara bùk'a:
16 ‘Nãga bap'eda, mùa Rey David trua waya papiit'ee irudeepa uchiada jua ek'ari. Mùa ooit'ee israelitaarã t'ãidepema te k'arawapataarãpa oopatak'a. Te t'eedaik'ãri, ãrapa t'eedeechoo jêra bada araa p'epata te chiwidik'a bainâ bùdait'ee. 17 Mãga pùk'a Rey Daviddeepa uchiadap'edaarã mùde ijãa p'anù mùa araa p'eit'ee apemaarã mùde ijãa p'anùùrã ome. Maap'eda ma jõmaweda mùchideerã papiit'ee mù Warra k'aurepa. Mãga ooit'ee chi mùde ijãa p'anùùrã, Daviddeepa uchiada–e paji mîda. 18 Chonaarãweda mùa k'awapidak'a eperãarãmaa, mãga ooit'ee. Mù, Tachi Ak'õre Waibùapa mãga jara bù.’ (Amos 9.11-12)
19 Mãpai Santiagopa mãgaji:
—Tachi Ak'õrepa mãga jara bairã, mùa nãga k'îsia bùda aji. Tachia Moisepa p'ãdade jara bùk'a oopidaik'araa bù judio–eerãmaa, mãgùùrã Tachi Ak'õrede ijãadak'ãri. 20 Ma k'ãyaara k'art'a p'ã pëidáma jaradait'ee k'onaadamerã nechiara ata bùdap'edaa ne–inaa juapa ooda k'îrapite, aù k'îrapite ùt'aa t'âpata; wêra apai ome p'anadamerã; ne–animal âyapa jâa piuda chiara k'onaadamerã, aùde waa paraa perã mãik'aapa ne–animal waa k'onaadamerã. 21 Mãgà ûraa aupai pëidaipia bù. Awaraa ûraa k'awa k'inia p'anù pùrã, âipata ewari chaa ûridai Tachi Ak'õre Ûraa jarateepata tede. Chonaarãweda Moisepa p'ãda jarateepachidada aji, mãgee tede mãik'aapa ârá at'ãri mãga oopata.
Judio–eerãmaa k'art'a p'ãdap'edaa
22 Mãpai Cristopa jùrùt'eradaarã, ijãapataarã ak'ùpataarã mãik'aapa jõmaweda Jerusalendepema ijãapataarãpa pedeeteejida ûk'uru jùrùt'eradait'ee mãik'aapa pëidait'ee Antioquiadee Pablo ome mãik'aapa Bernabé ome. Nãgà eperãarã jùrùt'erajida: Judas, ichiaba t'âpatap'edaa Barsabás mãik'aapa Silas.a Apemaarã ijãapataarãpa mãgà omé pia ak'ù p'anapachida ãchi poroorãk'a. 23 K'art'a p'ãdap'edaade nãga jara pëijida:
Tai, Cristopa jùrùt'eradaarãpa, ijãapataarã ak'ùpataarã ome na k'art'ade salude pëiruta parã judio–eerãmaa Cristode ijãa p'anùùrã Antioquía p'uurudepema, Siria eujãdepema mãik'aapa Cilicia eujãdepemaarã–it'ee.
24 Taipa ûrijida nãpemaarã ûk'uru parãmaa wãdap'edaa, mamîda taipa pëida–eeta. Mãgùùrãpa pariatua ãchi k'îradoopa jaratee nipajida. Maperã parãpa k'awada–e paji ijãadait'ee Moisepa p'ãdade wa Pablopa jarateedade. 25 Mapa taipa pedeeteejida taidepemaarã ûk'uru jùrùt'eradait'ee mãik'aapa pëidait'ee parãmaa tachi k'õp'ãyoorã k'iniarã Bernabé Pablo ome. 26 Taipa k'awa p'anù Pablo Bernabé ome waaweedak'aa piudait'ee Tachi Waibùa Jesucristode ijãa p'anù k'aurepa. 27 Mapa ãchi ome parãmaa pëiruta Judas Silas ome. Ãchia parãmaa jõma taipa k'îsiadap'edaa na p'ãdade jara bùk'a nepùrùdait'ee. 28 Tachi Ak'õre Jaurepa tai k'aripaji parãmaa ne–inaa audú chaaree oopinaadamerã. Nãgapai jara k'inia p'anù parãpa oodamerã. 29 K'onáatù nechiara ata bùdap'edaa ne–inaa juapa ooda k'îrapite, aù k'îrapite ùt'aa t'âpata. Ne–animal âyapa jâa piuda chiara k'onáatù mãik'aapa ne–animal waa k'onáatù. Ma awara p'ek'au oonáatù. Taipa jara p'anùk'a ooruta pùrã, pia oodait'ee.
Mãgapai paji.
30 Mãpai ma k'art'a p'ãdap'eda, pëijida Antioquiadee wãdap'edaarã ome. Mama panadap'eda, ijãapataarã jõmaweda t'â p'ejida mãik'aapa ma k'art'a ãchimaa teejida. 31 Ijãapataarãpa ma k'art'a leedak'ãri, o–îadachida, ãchi–it'ee ûraa pia bada perã. 32 Judas Silas ome Tachi Ak'õre Jaurepa jarapiru jarapataarã pada perã, ichiaba ma ijãapataarãmaa ûraajida t'ãri o–îa p'aneedamerã. 33 Mama p'anadap'eda, ijãapataarãpa ãchi despediijida k'ãiwee wãdamerã. 34 [Mamîda Silas arii beeji.] 35 Pablo Bernabé ome ichiaba p'aneejida awaraa ijãapataarã ome Antioquiade, Tachi Ak'õrepa pedee pia jara pëida Cristode jarateedait'ee.
Pablo waya wãda ichi naaweda wãda ode
36 Mãga p'anadap'eda, ewari aba Pablopa mãgaji Bernabemaa:
—Waya wãdáma aji, ijãapataarã ak'ùde, Tachi Ak'õrepa jara pëida Cristode jaratee nipadap'edaa p'uuru chaa. Ak'ùdait'eeda aji, at'ãri ijãa p'anù wa mãga–e.
37 Bernabepa ichiaba atee k'inia baji Juan; mãgà Juan ichiaba t'âjarapatap'edaa Marcos. 38 Mamîda Pablopa atee k'inia–e paji, ãchi ik'aawaapa uchiada perã Panfilia eujãde, ãchi mimia at'ãri aupada–eeta. 39 Ijâatù pedeedap'eda, ãchi o chaachaa jitak'oodachida. Bernabé wãji Chipre isladee Marcos ome. 40 Jõdee Pablopa jùrùt'eraji Silas ichi k'õp'ãyo pamerã. Ijãapataarãpa ãchi omé Ak'õre juade bùjida irua ãchi pia ak'ù bapariimerã. Mãpai Pablo ichi k'õp'ãyo ome wãji. 41 Wãyaajida Siria eujãde mãik'aapa Cilicia eujãde. Ijãapataarã ûraa wãjida ãchi para bee chaa.