Pablo Bernabé ome Iconio p'uurude
14
1 Iconiode panadak'ãri, oojida Antioquiade oodap'edaak'a. T'îujida judiorã Ak'õre Ûraa jarateepata tede mãik'aapa jarajida Tachi Ak'õre Jaurepa jarapidak'a. Mapa judiorã chok'ara Cristode ijãajida, judio–eerã jida ichiaba. 2 Mamîda judiorã Cristode ijãa k'iniada–ee p'anadap'edaarãpa pedee k'achia jaramaa p'aneejida Pablo mãik'aapa Bernabé ãpùte. Mapa judio–eerã k'îraudachida ãra ome. 3 Mãga p'anajida mîda, ãchi omé arii taarãjida mãik'aapa waawee–ee jarateepachida Tachi Ak'õrepa jarapidak'a, Cristopa ãchi k'aripa bapachi perã. Jarateepachida Tachi Ak'õrepa eperãarã pia ooda Cristo piuda k'aurepa. Maperã Ak'õrepa ãchimaa oopiji ne–inaa eperãarãpa p'oyaa oodak'aa ãchi juadoopa. 4 Mamîda, mãga oo p'anajida mîda, ma p'uuru pidaarã k'îsia awara–awaraa p'anajida. Ûk'uru judiorã eere p'anajida, jõdee chi apemaarã Cristopa jùrùt'eradaarã eere. 5 Maapai ûk'uru judiorã mãik'aapa judio–eerã pedeeteejida ãchi poroorã ome miapidait'ee; mãupa bat'a peedait'ee. 6 Mamîda Pablopa Bernabé ome k'awaadak'ãri, mirudachida Licaonia eujãdee, Listra p'uurude mãik'aapa Derbe p'uurude, ichiaba ma p'uuru ik'aawa. 7 Mama ichiaba Jesupa ooda eperãarã k'aripait'ee jarateepachida.Listrade Pablomaa mãupa bat'adap'edaa
8 Listra p'uurude p'anùde unujida eperã p'oyaa t'ùak'aa bù, ichi t'oruweda chiwa bada perã. Ma eperã su–ak'ù baji 9 ûrimaa Pablopa jarateemaa bù. Pablopa irumaa ak'ùk'ãri mãik'aapa unuk'ãri wãara ijãa bù, k'awaji jùpaipia bù. 10 Mapa ma eperãmaa golpe pedeeji:
—P'irabáiji mãik'aapa jîp'a bainâ béeji.
Aramata ma eperã p'inajâtù bainâ beeji mãik'aapa p'ùrrùa beeji. 11 Pablopa ooda unudak'ãri, arii p'anadap'edaarã biuk'a nâbeeji Licaonia pidaarã pedeede. Mamîda Pablopa Bernabé ome ãrapa jara p'anù k'awada–e paji. Ãrapa mãgajida:
—¡Nãgùùrã ak'õre waibùarã, ùt'ariipa edaa che p'anù tachi t'ãide eperãarãk'a!
12 Mãpai Bernabé t'â bùjida Greciadepemaarã ak'õre waibùa Zeus. Jõdee Pablo t'â bùjida Hermes, ichiata pedee bapachi perã. 13 Ma p'uuru t'îupata k'ait'a Zeumaa ùt'aa t'âpata te iru p'anajida. Maperã atapijida Zeus p'aaremaa aneemerã p'ak'a ùmùk'îra, paadait'ee Pablo mãik'aapa Bernabé k'îrapite; ma awara nep'ono aneemerã teedait'ee Pablomaa mãik'aapa Bernabemaa, ãchi ak'õre waibùarã jîak'aapa. 14 Mamîda Bernabé Pablo ome k'awaadak'ãri mãga oo p'anù ùt'aa t'âdait'ee ãchi k'îrapite, ãchi p'aru jêt'aajida t'ãri p'uapa. Maap'eda nãga bia t'îudachida eperãarã t'ãide:
15 —Eperãarã, ¿sãap'eda nãga oorutama? ajida. Tai ichiaba eperãarãpù parãk'a. Ma–it'eepù tai che p'anù jaradait'ee nãgee net'aa vale–ee baibùde ijãa amaadamerã; ma k'ãyaara Tachi Ak'õrede ijãadamerã, iru ichita bapari perã. Tachi Ak'õrepa ooji pajã, na eujã, p'usa mãik'aapa ne–inaa jõmaweda aùde nâbù. 16 Naaweda Tachi Ak'õrepa na p'ek'au eujãdepemaarãmaa ita–aria ãchia oo k'iniata oopiji. 17 Mamîda ichia ãra ak'ù baji. Mãga oo bùpa ak'ùpiji ichi Tachi Ak'õre. Ichiata parã–it'ee k'oi chepipari ne–uu pia chaumerã. Mãgá iru p'anù nek'odait'ee mãik'aapa o–îa p'anadait'ee.
18 Pablopa Bernabé ome ma jõma jarajida mîda, perá p'oyaada–e paji eperãarã p'ak'a ùmùk'îra peenaadamerã mãik'aapa ùt'aa t'ânaadamerã ãchi k'îrapite.
19 Aù t'êepai pachejida judiorã Antioquía p'uurudeepa mãik'aapa Iconio p'uurudeepa. Eperãarã ãchi eere pa atadap'eda, Pablomaa mãupa bat'ajida peet'aadait'ee. Piu bù jîak'aapa, p'uuru k'idaa jidiu baibùnajida. 20 Mamîda Cristode ijãapataarã Pablomãi seedaidak'ãri, waya p'irabaiji. Maap'eda waya wãji p'uurudee mãik'aapa aù norema wãji Bernabé ome Derbe p'uurudee.
21 Cristopa ooda eperãarã k'aripait'ee jarateedak'ãri Derbede, eperãarã chok'ara ijãajida. Mama bap'eda, ãpùtee chejida Listradee, Iconiodee mãik'aapa Antioquiadee. 22 Ma nipadap'edaa chaa ûraajida Cristode ijãapataarã waapùara ijãa p'aneedamerã mãik'aapa mãgajida:
—Ùt'aa wãdai naaweda, tachi ichita miadait'eeda ajida, Cristode ijãapata perã.
23 Ichiaba ijãapataarã para bee chaa ûk'uru jùrùt'erajida ijãapataarã ak'ù p'anapataadamerã. Mãpai ùt'aa t'âdap'eda nek'oda–ee, ijãapataarã jõmaweda Ak'õre juade bùjida.
Pablo Bernabé ome Antioquía p'uurudee wãdap'edaa
24 Maap'eda Pisidia eujãde wãyaajida Panfilia eujãde panarutamaa. 25 Mama bùde Ak'õrepa jarapidak'a jarateejida Perge p'uurude. Mamãik'aapa wãjida Atalía p'uurudee. 26 Mama barcode bataudap'eda, wãjida Antioquía p'uurudee, chi ijãapataarãpa Ak'õre juade bùdap'edaamãi, irua ãchi pia ak'ù bapariimerã. Mãgá irua k'aripapachi perã, ãchia oojida jõma irua k'inia badak'a oodamerã ma wãdade. 27 Pachedak'ãri Antioquiade, Cristode ijãapataarã t'â p'ejida mãik'aapa nepùrùjida Tachi Ak'õrepa ãchi pari ooda. Ichiaba nepùrùjida Ak'õrepa judio–eerãmaa ijãapida. 28 Maap'eda Pablo Bernabé ome mama taarã p'aneejida Cristode ijãapataarã ome.