Tachi Ak'õre Jaurepa Bernabé Saulo ome awara bùda
13
1 Antioquiadepema Cristode ijãapataarã t'ãide paraaji Ak'õre pedee jarapataarã mãik'aapa jarateepataarã. Mãgùùrã paji Bernabé, Simón (ichiaba t'âjarapata Nerro), Lucio Cirene p'uurudepema, Menajem (auk'a warida Galilea pidaarã poro Herodes ome) mãik'aapa Saulo. 2 Ewari aba mãùrã ùt'aa t'âmaa p'anùde nek'oda–ee, Ak'õre Jaurepa mãgaji:—Awara bùdapáde aji, Bernabé mãik'aapa Saulo, mùa ãra jùrùt'erada perã oodamerã mimia mùa k'îsia iru bù ãchi–it'ee.
3 Ùt'aa t'âdap'eda nek'oda–ee, mãgùùrã ârù jua bùjida, maap'eda pëijida.
Saulo Bernabé ome Chipre islade
4 Tachi Ak'õre Jaurepa mãgá pëida perã, Bernabé Saulo ome wãjida Seleucia p'uurudee. Mama barcode bataudap'eda, Chipre isladee wãjida. 5 Salamina p'uurude panadak'ãri, Tachi Ak'õrepa ooda Cristo piuda k'aurepa judiorãmaa jarateemaa p'aneejida, Tachi Ak'õre Ûraa jarateepata tede. Ichiaba Juan Marcos mama nipaji ãchi ome k'aripait'ee.
6 Chipre isla jõmaweda bùùrùpa wãyaa wãdapa, jaratee wãjida Pafos p'uurude panarutamaa. Mama ununajida judío t'âjarapatap'edaa Barjesús. Mãgùpa petau tau k'awaa baji. Seewa–idaa bapachi, ichia Tachi Ak'õre pedee jaraparida apachi perã. 7 Mãgà Romadepema poro Sergio Paulo k'õp'ãyo paji. Sergio Paulo k'îsia k'awaa baji. Mapa t'â pëiji Bernabé mãik'aapa Saulo, ûri k'inia bada perã ãchia jarateepata Tachi Ak'õrepa ooda Cristo piuda k'aurepa. 8 Mamîda ãchia jarateemaa p'anù misa, mãgà petau tau k'awaa bùpa, (griego pedeede Elimas apatap'edaa) jarapachi Romadepema poromaa irua ijãanaamerã ãchia jaratee p'anù. 9 Mãpai Saulo, ichiaba Pablo apatap'edaapa, Ak'õre Jaure iru ome bapachi perã, mãgà petau tau k'awaa bù k'îra pia ak'ùji mãik'aapa mãgaji:
10 —¡Seewa–idaa, netuara warra! ¡K'achia ooyaa bù! ¿Chîara k'ûra k'inia bù–ek'ã seewa jara bùpa? ¿Sãap'eda Ak'õrepa jarateepida pùa seewada aparima? 11 Âraweda Ak'õrepa pù k'achia ooit'ee. Pù tau p'ãriu baibeeit'ee. Taarã mãgá nipait'eeda aji, ak'õrejîru unu–ee.
Aramata Elimas tau p'ãriudachi mãik'aapa pariatua jùrù nipapachi ichi juadeepa jidibai ateedamerã. 12 Romadepema poropa mãga unuk'ãri mãik'aapa ãchia jaratee p'anù ûrik'ãri, k'awaaji wãarata pedee p'anù. Mapa Cristode ijãaji.
Pablo Bernabé ome Antioquía p'uurude
13 Pablo mãik'aapa ichi ome nipapatap'edaarã Pafos p'uurudeepa barcode wãjida Perge p'uurudee. Mãgà p'uuru Panfilia eujãde bù. Mama p'anùde Juan Marcopa ãchi atabëiji mãik'aapa ãpùtee wãji Jerusalendee. 14 Mamîda ãchi Pergedeepa wãjida Antioquía p'uurudee. Mãgà p'uuru Pisidia eujãde bù. Mama p'anùde âipata ewate t'îujida judiorã Tachi Ak'õre Ûraa jarateepata tede mãik'aapa su–ak'ù p'aneejida. 15 Mãgà tedepema judiorã poroorãpa Moisepa p'ãda mãik'aapa Ak'õre pedee jarapataarãpa p'ãdap'edaa *leedap'eda, jara pëijida Pablomaa mãik'aapa Bernabemaa:
—Tachi auk'aarã, parãpa eperãarãmaa pedee pia jara k'inia p'anù pùrã, âraweda jaradapáde aji.
16 Mãpai Pablo ùt'a ak'ùnâ beep'eda mãik'aapa juapa jarap'eda k'îup'ee p'aneedamerã, mãgaji:
—Ûrítù israelitaarã mãik'aapa parã awaraa eujãdepemaarã, Tachi Ak'õrede ijãa p'anùùrã. 17 Tai israelitaarãpa ijãa p'anùda aji, chonaarãweda Tachi Ak'õrepa tai chonaarã jùrùt'eraji ichi–it'ee. Ãchi îwapiji Egiptode, at'ãri awaraa eujãdepemaarãk'a p'anajida mîda. Ichi juapa ãchi mamãik'aapa uchiapiji, ichi jõmaarã k'ãyaara waibùara bairã. 18 Ma awara ãchi ak'ùpachi cuarenta año eujã pania wêe bùde wãyaadak'ãri. 19 Canaán eujãde panadak'ãri, ichia Canaandepema awara–awaraa to pidaarã siete k'iniipiji, ãra eujã tai judiorã chonaarãpa atadamerã. 20 Ak'õrepa tai judiorã jùrùt'eradak'ãriipa mãgà eujã Canaande atarutamaa cuatrocientos cincuenta año paji.
+Ma t'êepai Tachi Ak'õrepa eperãarã charraarãk'a bùji aba–abaa, ãchi ak'ùpataadamerã, ichi pedee jarapari Samuel ãchi poro waibùa parumaa. 21 Mãpai ãchia iidijida Samuelmaa rey bùmerã ãchi ak'ùpari. Mapa Tachi Ak'õrepa Saúl ãchi rey papiji cuarenta año. Mãgà Quis warra paji, Benjamindeepa uchiadap'edaarãdepema. 22 Aù t'êepai Saúl uchiapip'eda, Tachi Ak'õrepa Rey David bùji iru pari. Mãgaji:
‘Mùa Isaí warra David unujida aji, mùa k'inia bùk'a. Ichiaba mùa k'awa bùda aji, irua ooit'ee mùa oopi k'inia bùk'a.’ (1 Samuel 13.14)
23 +Rey David ëreerãdeepa uchiaji Tachi K'aripapari. Mãgà Jesús, Tachi Ak'õrepa pëida israelitaarã k'aripamerã, ichia naaweda jaradak'a ichi pedee jarapataarã it'aideepa. 24 Mãgà Jesús chei naaweda, Juan Bautistapa jarateepachi jõmaweda israelitaarãmaa ãchi p'ek'au k'achia oo amaadamerã mãik'aapa poro choopidamerã. 25 Mãpai Juanpa, ichi mimia aupa wãk'ãri, mãgaji:
‘Mù parã poro waibùa–e, parãpa k'îsia p'anùk'a. Mamîda mù t'êepai cheit'eeda aji, eperãarã poro waibùara bù. Mùa iru chancla jida êraik'araa bùda aji, iru mù k'ãyaara waibùara bairã.’ (Marcos 1.7)
26 +Mùchi auk'aarã, Abrahamdeepa uchiadap'edaarã, ichiaba parã judio–eerã, ¡ûrítù! Tachi Ak'õrepa tachi jõmaarãmaa jara pëi bù sãga ichia tachi o k'achiadeepa k'aripa ata k'inia bù. 27 Eperãarã Jerusalende p'anapatap'edaarãpa mãik'aapa ãchi poroorãpa k'awada–e p'anajida Jesús Tachi Ak'õrepa pëida eperãarã k'aripamerã. Ichiaba k'awadak'aa paji Tachi Ak'õrepa jara k'inia bada chonaarãwedapema Ak'õre pedee jarapataarãpa p'ãdap'edaade, âipata ewari chaa judiorãpa mãgà leepata mîda Ak'õre Ûraa jarateepata tede. Maperã ãchiata oojida ma ûraade jaradap'edaak'a Jesús peepidak'ãri. 28 Irua maarepida k'achia oo–e paji. Mamîda ãchia iru pee k'inia p'anajida. Mapa Pilatomaa iidinajida peepit'aamerã. 29 Maap'eda jõma oodap'eda iru ome Tachi Ak'õre Ûraa p'ãdade jara badak'a, awaraarãpa kurusodeepa ùrabai atadap'eda, ùanajida. 30 Mamîda Tachi Ak'õrépata chok'ai p'irabaipiji. 31 Aù t'êepai iru ome chedap'edaarãpa Galileadeepa Jerusalendee unuda chok'ara unupachida, mãik'aapa ârá tai auk'aarãmaa ãchia unudap'edaa jara p'anù.
32 +Mapa taipa parãmaa nãgà pedee pia jara k'inia p'anù. Tai judiorã chonaarãmaa Tachi Ak'õrepa jaraji 33 aba pëiit'ee eperãarã k'aripade. Mamîda ichia mãgà pëi–e paji tai chonaarã chok'ai p'anùweda. Jîp'a pëiji ãchideepa uchiadap'edaarã, tachi ârapemaarã chok'ai p'anùde. Mãgà pëida paji ichi Warra Jesús, ichia chok'ai p'irabaipida. K'awa p'anù ichi Warra pëiji ichi ley p'ãdadepema Salmode jara bairã:
‘Mùa idi jõmaarãmaa jara bù pù mù Warra.’ (Salmos 2.7)
34 Tachi Ak'õrepa jaraji ichi Warra chok'ai p'irabaipiit'ee, waa piu–e pait'ee ichi ley p'ãdade jara bùk'a:
‘Rey Davidmaa jaradak'a mùa ooit'ee, mùa wãarata jarapari perã.’ (Isaías 55.3)
35 Ichiaba jara bù awaraa Salmo p'ãdade:
‘Pùa mù k'ap'ùa beraupi–e pait'ee, mùa oopari perã pùa mùmaa oopi bùk'a.’ (Salmos 16.10)
36 +Wãara na eujãde bak'ãri, Rey Davidpa ooji Tachi Ak'õrepa k'îsia iru badak'a. Maap'eda jai–idaaji. Ùajida chi ak'õreerã ik'aawa mãik'aapa ichi k'ap'ùa beraudachi. 37 Mamîda Tachi Ak'õrepa Jesús chok'ai p'irabaipida k'ap'ùa berau–e paji. 38 Maperãpù, tachi auk'aarã, k'awaadaipia bù Tachi Ak'õrepa tachia p'ek'au k'achia oopata wêpapipari Jesús piuda k'aurepa. 39 Ma k'aurepa ichide ijãapataarã p'ek'au k'achia wêe p'anù Tachi Ak'õre k'îrapite. Moisepa p'ãdak'a oodap'edaa k'aurepa p'ek'au k'achia wêpak'aa paji mîda, Tachi Ak'õrepa Jesude ijãapataarã p'ek'au k'achia wêpapipari, Jesupa ooda k'aurepa. 40 K'îrak'aupai p'anadai Tachi Ak'õre pedee jarapataarãpa p'ãdap'edaade jara bùk'a:
41 ‘Ûrítù parã chi oo iru p'anapataarãpa Tachi Ak'õrepa jara bù. Ak'àtù mãik'aapa ak'ùtrua para bátù. Parã at'ãri chok'ai p'anùde mùa ooit'ee ne–inaa parãpa ijãada–e pai, aù naaweda abaapa parãmaa mãga jararu pùjida.’ (Habacuc 1.5)
42 Pablo Bernabé ome judiorã Ak'õre Ûraa jarateepata tedeepa uchiadak'ãri, chi waa k'awa k'inia p'anadap'edaarãpa chupùria iidijida âipata ewate pak'ãri waya jaratee chedamerã. 43 Judiorã mãik'aapa judio–eerã Tachi Ak'õrede ijãapataarã uchiadap'eda, chok'ara wãjida Pablo mãik'aapa Bernabé t'êe. Maperã ãchia ma Ak'õrede ijãapatap'edaarãmaa ûraajida k'irãpadamerã Tachi Ak'õrepa ãchi k'aripada Cristo piuda k'aurepa.
44 Apema tomiade âipata ewate, perá jõmaweda p'uuru pidaarã cheepurujida Ak'õrepa jarapida ûride. 45 Mamîda judiorãpa unudak'ãri eperãarã chok'ara see nâbù, k'îraudachida mãik'aapa Pablomaa ik'achia jaramaa p'aneejida, Cristo ãpùte paara. 46 Mãpai Pablopa Bernabé ome waawee–ee p'anaujida:
—Tachi Ak'õrepa tai naapùara pëijida ajida, parã judiorãmaa ichia jara pëida Cristode jarateedamerã. Mamîda parãpa ûri k'iniada–e p'anadairã, pãchi k'îradoopa atuadait'ee. Mãga p'anadairã, tai wãdait'ee judio–eerãmaa jarateede. 47 Mãga oodait'ee Tachi Ak'õre Ûraa p'ãdade jara bairã:
‘K'õp'ãyoorã ome lámpara pëipatak'a âdaamerã ode p'ãrik'ua nipadak'ãri, mãga pùk'a mùa pù pëiru mù o ak'ùpimerã na p'ek'au eujãdepemaarãmaa. Mùa mãgá pëiru k'inia bairã pùa chi t'ùmùara beerã paara o k'achiadeepa k'aripa atamerã.’ (Isaías 49.6)
48 Judio–eerãpa mãga ûridak'ãri, o–îa para beeji mãik'aapa Tachi Ak'õrepa jara pëida pia bùda apachida. Mãpai Cristode ijãajida chi Tachi Ak'õrepa k'îsia iru bada ichita chok'ai p'anapataadamerã. 49 Mãgùùrãpa Tachi Ak'õrepa ooda jaratee wãpachida ãchi wãrutamaa. Cristo piuda k'aurepa irua tachi o k'achiadeepa k'aripa ataji. 50 Mamîda judiorãpa pedeejida wêraarã ãchik'a Tachi Ak'õre waaweepataarã ome. Pablo Bernabé ome ãpùte ik'achia pedeejida. Maperã ma p'arat'ara beerãpa mãik'aapa ùmùk'îraarã chi p'uuru pidaarã poroorãpa Pablo Bernabé ome ma eujãdeepa jëret'aajida. 51 Mãùrãpa mãga oodak'ãri, Pablo Bernabé ome ãchi bùùrù p'ora nêep'ejida ak'ùpidait'ee waa jarateeda–e pait'ee ma judiorãmaa, Cristode ijãadak'aa p'anadap'edaa perã. Maap'eda wãjida Iconio p'uurudee. 52 Pablo Bernabé ome mãgá jërek'oojida mîda, chi Cristode ijãapataarã ma eujãde o–îa p'anajida, Tachi Ak'õre Jaure ãchi ome bada perã.