Santiago peedap'edaa mãik'aapa Pedro carcelde t'ù nâbùdap'edaa
12
1 Bernabé Saulo ome Antioquía p'uurude at'ãri p'anù misa, Rey Herodepaa Cristode ijãapataarã ûk'uru jùrùmaa beeji miapiit'ee. 2 Jaraji Juan âpema, Santiago espadapa peet'aadamerã. 3 Herodepa k'awaak'ãri judiorã o–îa p'anù ichia oo bù unudap'eda, ichiaba Pedro jita atapiji. Mãga ooji judiorãpa fiesta pan levadura wêe k'opata oo p'anùde. 4 Pedro jita atadap'eda, Herodepa carcelde t'ù nâbùpiji. Mama Romadepema soldaorã dieciséis p'epachida k'îmarik'îmarii carcel jâadamerã. Herodepa k'îsia iru baji Pedro ùmùateeit'ee eperãarã taide Pascua fiesta t'êepai. 5 Mãgá Pedro baji carcelde jâapari paraa. Mamîda awaraa Cristode ijãapataarãpa ewari chaa ùt'aa t'âpachida iru pari.Tachi Ak'õrepa Pedro uchiapida carceldeepa
6 Herodepa Pedro ùmùateeit'ee pada ewate aù noreweda p'ãrik'ua, Pedro jua cadenapa soldao jua k'îraichaa jâp'eda, k'ãi baji ãchi esajîak'a. Mãùmisa apemaarã soldaorã taawa jâamaa p'anapachida chi t'îupatamãi. 7 Mãga nùde Pedromãi âdaadachi mãik'aapa ùt'aripema ángel bainâ ba cheji. Mãgùpa Pedro orromãi t'õbaiji mãik'aapa mãgaji:
—¡Isapai p'irabáiji!
—P'aru jâ beep'eda, pùchi chancla jâ béeji.
Mãga ooji Pedropa. Maap'eda mãgaji angelpa:
—Pùchi ârùpema p'aru jâ beep'eda, mù ome chéji.
9 Pedro uchiaji iru t'êe, k'awa–ee wãara wa seewa angelpa oo bù. Ichi k'îsia–it'ee k'ãimok'araa pùk'a baji. 10 Mamîda wãyaajida chi jâapari naapema, maap'eda araarepema ichiaba. Carcel puerta hierrodee ooda badamãi pachedak'ãri calle jãdee uchiadait'ee, ma puerta ichi itu ewadachi. Uchiadap'eda, calle jãde wãjida mãik'aapa ma angelpa ituaba atabëiji.
11 Mãpai Pedropa k'awaaji k'ãimok'araa–e bù. Mapa mãgaji:
—Ârá mùa k'awa bùda aji, wãara Tachi Ak'õrepa ichi ángel pëiji mù k'aripait'ee Herodes juadeepa mãik'aapa judiorã poroorã k'achia oodait'ee padadeepa.
12 Mãga k'awaak'ãri, Pedro wãji María temaa. Mãgà Juan nawe paji. Ma Juan ichiaba t'âjarapachida Marcos. Arii ijãapataarã chok'ara ùt'aa t'âmaa p'anajida Pedro pari. 13 Ma te t'îupata taawaik'a eereepa Pedropa t'âji. Mãpai te ak'ùpari awêra Rode apatap'edaapa ak'ù cheji k'awaait'ee k'aita mãga ni. 14 Pedro otau k'awaak'ãri, o–îadachi. O–îapa puerta ewa–ee, edaa p'iradachi jarade Pedro taawa bù. 15 Mãga ûridak'ãri, mãgajida:
—¿K'îra k'awa–ee nâbùk'ã? ajida.
Mamîda ichia wãarada ak'ãri, ãchia mãgapachida:
—Iru–epù, Tachi Ak'õre angelpù; iru ome nipaparida ajida.
16 Mãùmisa Pedropa taawaik'a eereepa t'âmaa bapachi. Mãpai puerta ewadap'eda, unudak'ãri, p'eradachida. 17 Mamîda ichi juapa jaraji k'îup'ee p'aneedamerã mãik'aapa nepùrùji sãga Tachi Ak'õrepa ichi carceldeepa uchia atada. Maap'eda mãgaji:
—Nepùrùde wåtù Santiagomaa mãik'aapa apemaarã Cristode ijãapataarãmaa.
T'êepai Pedro wãji awara ãyaa.
18 Ewarik'ãri, carcelde k'îraupik'a para beeji, k'awada–e pada perã sãmaa wãji Pedro. 19 Herodepa k'awaa atak'ãri, jaraji jùrùnadamerã. Mamîda p'oyaa unuda–e pada perã, chi soldaorã jâa p'anadap'edaarãmaa iidip'eda, jita p'e atapiji mãik'aapa peepik'ooji. Ma t'êepai Herodes uchiaji Judeadeepa mãik'aapa Cesarea p'uurude banaji.
Herodes piuda
20 Maapai Herodes k'îrau baji Tiro p'uurudepemaarã ome mãik'aapa Sidón p'uurudepemaarã ome. Mapa ãchi wãjida iru ome pedeede. Mamîda panadak'ãri, p'aajida Herodes mimiapataarã poro aba, Blastomaa, irua naapùara chupùria iidinamerã ãchi pari, chõoda–e pait'ee. Mãga oojida ãchia ne–inaa k'odait'ee netonapachida perã Herodes jua ek'ari p'anadap'edaarã eujãde. 21 Ma eperãpa iidinak'ãri, Herodepa jaraji ichia jararu ewate chedamerã. Ma ewate pak'ãri, ichi p'aru pia jâ beep'eda, rey su–ak'ù beeparide su–ak'ù banaji mãik'aapa pedeemaa beeji. 22 Ichi pedeemaa ûridak'ãri, eperãarã biuk'a nâbeeji mãik'aapa mãgapachida:
—Nãgà eperã nama pedeemaa bù eperã–eda ajida. Ak'õre waibàak'ata bùda apachida.
23 Aramata, angelpa Herodes k'ayaapit'aaji, irua ùtrùa–e pada perã mãga jaradak'ãri. Mapa mok'it'a k'ida p'uapa piuji.
24 Maapai ijãapataarã chok'araara îwa wãpachida. T'ùmùpùara jaratee wãpachida Tachi Ak'õrepa ooda Cristo piuda k'aurepa.
25 Bernabé Saulo ome Jerusalendepema ijãapataarãmaa tee chejida ma p'arat'a ijãapataarãpa teedap'edaa Antioquiade. Maap'eda waya wãjida Antioquiadee. Ãchi ome ateejida Juan. Mãgà ichiaba t'âjarapachida Marcos.