Pedropa nepùrùda ijãapataarã Jerusalende p'anadap'edaarãmaa
11
1 Cristopa jùrùt'eradaarã mãik'aapa apemaarã ijãapataarã Judea eujãde p'anùùrãpa ûrijida judio–eerãpa Tachi Ak'õrepa jara pëida ûridap'eda, ichiaba Cristode ijãadap'edaa. 2 Mapa Pedro waya chek'ãri Jerusalendee, ûk'uru judiorã Cristode ijãa p'anadap'edaarã k'îrau p'anajida irua ooda k'aurepa judio–eerã t'ãide. 3 Iidijida:—¿Sãap'eda judio–eerã ak'ùnajima? ajida. ¿Sãap'eda ãra ome nek'ojima? ajida.
4 Mãpai Pedropa nepùrùmaa beeji jõmaweda Tachi Ak'õrepa ichimaa k'awapida:
5 —Mù bajida aji, Jope p'uurude. Ùt'aa t'âmaa bùde k'ãimok'araa pùk'a bùde unuji lienzok'a bù ùt'ariipa mùmaa chewã. Ma k'â chaa jâ beeji. 6 Pi–ia ak'ùji k'awaait'ee k'ãata edajãde paraaji. Unuji ne–animalaarã k'îra t'ãdoo, bùùrùpa nîuteepata, k'achia beepata, bipa nîuteepata mãik'aapa wãabaipata. 7 Maap'eda pedee ûriji: “Pedro, p'irabáiji. Peep'eda, k'óji.” 8 Mãpai mùa p'anauji: “Waide jãgee ne–animalaarã pùa k'oik'araa bùda adadepema k'ok'aada” aji.
9 +Mãpai ùt'ariipa waya pedeeji: “Ak'õrepa k'oipia papida k'oik'araa bùda anáaji.” 10 Jarada õpee mãga jaraji. Maap'eda ma lienzok'a bù waya ùt'aa jidiu ataji. 11 Aramata eperãarã õpee pëidap'edaa Cesareadeepa mù jùrù chejida mù te badamãi. 12 Tachi Ak'õre Jaurepa mùmaa jaraji wãmerã ãra ome, k'îsia–ee. Na k'õp'ãyoorã seis wãjida ichiaba mù ome. Jõmaweda t'îujida ma eperã ichi mimiapataarã pëi bada temãi. 13 Ma eperãpa taimaa nepùrùji ichia ángel unuda mãik'aapa ma angelpa jarada: “Eperã pëipáde aji, Jope p'uurudee eperã t'âjarapata Simón Pedro atanadamerã. 14 Irua jarayada aji, sãga Ak'õrepa pù o k'achiadeepa k'aripa atai pùchi te pidaarã ome.”
15 +Mù pachep'eda, pedeemaa beek'ãri, Ak'õre Jaure ãramaa cheji, naaweda tachi judiorãmaa chedak'a. 16 Mãga pak'ãri, mùa k'irãpaji Tachi Waibùapa jarada: “Wãara Juan Bautistapa poro choopachi paniapa. Mamîda Tachi Ak'õrepa ichi Jaure ba chepiit'ee parã k'ap'ùade.” 17 Mãgá mùa k'awaaji Tachi Ak'õrepa ichi Jaure ba chepi k'inia bù ãra ome tachi ome ba chepidak'a, auk'a ijãapata perã Tachi Waibùa Jesucristode. Mãga bùta ¿sãga mùa Tachi Ak'õrepa ooda k'achia bùda ayama? aji.
18 Jerusalendepema ijãapataarãpa mãga ûridak'ãri, k'îup'ee para beeji. Maap'eda ùt'aa t'âjida Tachi Ak'õremaa. Mãgajida:
—¡Mãgara Tachi Ak'õrepa ichi Jaure judio–eerã k'ap'ùade ichiaba ba chepiit'ee, k'achia oodaamaa p'aneedak'ãri mãik'aapa Jesucristode ijãadak'ãri! ¡Mãgá ichita iru ome chok'ai p'anapataadait'ee!
Ijãapataarã Antioquía p'uurude chip'epatap'edaa
19 Esteban piuda t'êepai, Jesucristode ijãapataarã jùrùmaa p'anadak'ãri peedait'ee, ûk'uru miruk'oodachida Fenicia eujãdee, Chipre isladee mãik'aapa Antioquía p'uurudee. Ãchi wãdap'edaa chaa Cristopa ooda eperãarã k'aripait'ee jarateepachida judiorãmaa aupai. 20 Mamîda Cristode ijãapataarãpa Chipredepemaarã mãik'aapa Cirene p'uurudepemaarã chedap'eda Antioquía p'uurude, Jesupa ooda eperãarã k'aripait'ee jarateepachida judio–eerãmaa. 21 Tachi Ak'õrepa ãra k'aripaji. Mapa judio–eerã chok'ara Jesucristode ijãa p'aneejida.
22 Ijãapataarã Jerusalendepemaarãpa mãga ûridak'ãri, Bernabé pëijida Antioquiadee. 23 Panak'ãri, Bernabepa unuji Tachi Ak'õrepa ãra k'aripada. Mapa o–îadachi. Ûraaji t'ãripa Cristode ijãadamerã mãik'aapa irua oopi bùk'a oodamerã. 24 Bernabé eperã t'ãri pia bapachi. Cristode pia ijãapachi mãik'aapa oopachi Tachi Ak'õre Jaurepa oopi bùk'a. Maperã eperãarã chok'ara Cristode ijãajida iru k'aurepa.
25 Ma t'êepai Bernabé wãji Tarso p'uurudee Saulo jùrùde. 26 Unu atak'ãri, ateeji Antioquiadee. Mama p'aneejida año aba ijãapataarã ome jarateemaa Cristopa ooda eperãarã k'aripait'ee. Eperãarã chok'araarãpa ãchia jarateeda ûripachida. Antioquía p'uurude naapùara Cristode ijãapataarã t'â bùjida Cristodeerã.a
27 Maapai Ak'õre pedee jarapataarã ûk'uru wãjida Jerusalendeepa Antioquiadee. 28 Mama p'anùde mãùrãdepema aba t'âjarapatap'edaa Agabo, ijãapataarã k'îrapite bainâ beep'eda, Tachi Ak'õre Jaurepa jarapiji jarra oodait'ee jõmaweda Roma jua ek'ari p'anùùrã eujãde. Wãara, aù t'êepai mãgùpa jaradak'a p'asaji César Claudio Romadepema reyrã poro waibùa bak'ãri. 29 Antioquiadepema Cristode ijãapataarãpa mãga ûridak'ãri, pedeeteejida Judeadepema ijãapataarã k'aripadait'ee, ãchia p'arat'a teedai pitapai. 30 Mãgà p'arat'a p'edap'eda, Judeadepema ijãapataarã ak'ùpataarãmaa tee pëijida Bernabé ome mãik'aapa Saulo ome.