Corneliopa Pedro t'â pëida
10
1 Pedro Jope p'uurude bù misa, Cesarea p'uurude baji eperã t'âjarapatap'edaa Cornelio. Mãgà Romadepema soldaorã batallondepema poro paji. Ma batallón t'âjarapachida Italiadepema. 2 Mãgà eperã t'ãri pia bapachi. Ichi tedepemaarã ome Tachi Ak'õrede ijãapachida. Ichiaba p'arat'a teepachi judiorã k'aripait'ee mãik'aapa Tachi Ak'õremaa ùt'aa t'âpachi.3 Ewari aba a las tres, k'ãimok'araa pùk'a bùde taawapemak'a unuji ùt'aripema ángel ichimãi t'îuru mãik'aapa jararu:
—¡Cornelio!
4 Corneliopa waaweede mãgà ángel k'îra ak'ù nâbeep'eda, iidiji:
—¿K'ãata k'inia bùma? aji.
P'anauji:
—Tachi Ak'õrepa ûrijida aji, pùa ùt'aa iidida mãik'aapa unu bù pùa p'arat'a teepari chupùria beerãmaa. Pùa pia oo bù iru k'îrapite. 5 Eperã pïiji Jope p'uurudee aneemerã Simón Pedro apata. 6 Irua pùmaa Ak'õre net'aa jarateeit'ee. Awaraa Simón, ne–e p'oopari tede bù. Mãgà p'usa ide baparida aji.
7 Ma ángel ichi ome pedeemaa bada wãk'ãri, Corneliopa t'â pëiji ichi mimiapataarã omé mãik'aapa Romadepema soldao aba Ak'õrede ijãa bada. 8 Ichia k'ãimok'araa pùk'a bùde unuda nepùrùp'eda, ãchi pëiji Jopedee.
9 Aù norema imat'ùpa ãchi Jope p'uuru k'ait'a wãrutade, Pedro wãji terrazade ùt'aa t'âde. 10 Mama bùde jarrapisia nâbeeji. Nejoomaa p'anù misa, ichia k'ãimok'araa pùk'a bùde 11 unuji pajã ewadaru. Madeepa ùt'ariipa chewãji lienzok'a bù. Ma k'â chaa jâ beeji. 12 Mãgà p'arude ne–animalaarã k'îra t'ãdoo p'anajida: bùùrùpa nîuteepata, bipa nîuteepata mãik'aapa wãabaipata. 13 Pedropa mãga ak'ù bùde pedee ûriji:
—Pedro, p'irabáiji. Péeji mãik'aapa k'opáde aji.
14 Pedropa p'anauji:
—Tachi Waibùa, k'o–eda aji, mùchi t'oruweda waide k'ok'aa perã jãgee ne–animalaarã, pùa k'oik'araa bùda ada.
15 Waya pedee ûriji:
—Ak'õrepa k'oipia papida k'oik'araa bùda anaapáde aji.
16 Jarada õpee mãga jarap'eda, mãgà lienzok'a bù waya ùt'aa wãji. 17 Pedropa k'îsia beeji k'ãata jara k'inia baji ichia unuda mãgà k'ãimok'araa pùk'a badade. Mãga nùde Simón te iidi wãdapa Cornelio mimiapataarã pachejida te t'îupata t'aide. 18 Arii panadak'ãri, iidijida:
—¿Nama bùk'ã ajida, eperã t'âjarapata Simón Pedro?
19 At'ãri Pedro k'îsiamaa bùde ichi k'ãimok'araa pùk'a badade, Ak'õre Jaurepa mãgaji irumaa:
—Eperã õpeerãpa pù jùrù nidada aji. 20 P'irabáiji mãik'aapa ùrabáiji. Wåji ãra ome k'îsia–ee, mùata ãra pëida perã.
21 Pedro ùrabaip'eda, mãgaji ma eperãarãmaa:
—Mùda aji, parãpa jùrù p'anù. ¿K'ãata oo che p'anùma? aji.
22 P'anaujida:
—Tai chejida Cornelio, Romadepema soldaorã poropa pëida perã. Iru Tachi Ak'õrede ijãapari mãik'aapa t'ãri pia bapari. Mapa jõmaweda Cesareadepema judiorãpa iru k'inia iru p'anapata. Ùt'aripema angelpa jaraji irumaa tai pëimerã pù atade, pù iru temaa wãmerã jarateede.
23 Mãpai Pedropa teeda t'îupip'eda, nek'opiji mãik'aapa p'aru teeji k'ãidamerã. Aù norema, Pedro wãji ãchi ome. Jopedepema ijãapataarã ûk'uruurãpa iru k'õp'ãyanajida.
24 Aù norema panajida Cesareade, Corneliopa nùmaa badamãi, ichi te pidaarã ome mãik'aapa ichia t'â pëida k'õp'ãyoorã k'iniarã ome. 25 Pedro aù temaa panak'ãri, Cornelio taawaa cheji mãik'aapa Pedro k'îrapite bedabaidachi, irumaa ùt'aa t'âit'ee. 26 Mamîda Pedropa p'irabaipiji, mãik'aapa mãgaji:
—Mù jida pùk'a, eperã jîp'aada aji.
—Parãpa k'awa p'anùda aji, tai judiorã t'îudaik'araa bù judio–eerã tede mãik'aapa k'õp'ãyo meraadaik'araa bù parã ome. Mamîda Tachi Ak'õrepa mùmaa k'awapijida aji, jõmaarã ome k'õp'ãyo meraaipia bù. 29 Maperã jararutata mù cheji, k'îsia–ee. Ârá k'awa k'inia bùda aji, ¿k'ãare–it'eeta mù t'â pëiji?
30 Corneliopa p'anauji:
—K'ãima k'îmari paruda aji, na horak'a k'ewara, mù ùt'aa t'âmaa bù misa, eperã p'aru uchiterree jâ bù mù k'îrapite bainâ ba cheji. 31 Jaraji ma eperãpa: “Cornelio, Ak'õrepa ûrijida aji, pùa ùt'aa iidida mãik'aapa unu bùda aji, pùa p'arat'a teepari chupùria beerãmaa. Pùa pia oo bù iru k'îrapite. 32 Eperã pëipáde aji, Jope p'uurudee eperã t'âjarapata Simón Pedro atade. Iru baparida aji, awaraa Simón ne–e p'oopari tede p'usa ide.” 33 Maperã mùa isapai pëiji pù jùrùde mãik'aapa pù t'ãri pia bairã, cheji. Ârá nama jõmaweda p'anù misa Ak'õre k'îrapite, taipa ûri k'inia p'anùda aji, jõma Tachi Ak'õrepa pùmaa jarapiru.
Pedropa Cornelio tede jarada
34 Mãpai Pedro pedeemaa beeji:
—Ârá wãara mùa k'awaaruda aji, Tachi Ak'õrepa mù auk'aarã apemaarã k'ãyaara pipùara ak'ù–e bù. 35 Awaraa eujãdepemaarã jida k'inia iru bapari ichide ijãadak'ãri mãik'aapa ne–inaa pia oodak'ãri. 36 Tachi Ak'õrepa k'awapiji Israeldeepa uchiadap'edaarãmaa ichia ãchi k'ãiwee p'anapiit'ee Jesucristo k'aurepa, iru jõmaarã Waibùa perã. 37 Parãpa pia k'awa p'anù Tachi Ak'õrepa ooda Galilea eujãde mãik'aapa Judea eujãde, Juanpa poro chooipia bùda a nipada t'êepai. 38 Ichiaba k'awa p'anù Tachi Ak'õrepa Jesús Nazaretdepema pëida ichia oopi bùk'a oomerã, ichi Jaurepa k'aripap'eda. Mãgà Jesupa ne–inaa eperãarãpa p'oyaa oodak'aa ãchi juadoopa oo nipaji mãik'aapa jùpapachi eperãarã netuara merãtùa beerã. Mãga oopachi Tachi Ak'õre iru ome bada perã. 39 Tai iru ome nipapatap'edaarãpa unujida jõmaweda irua ooda Judea eujãde mãik'aapa Jerusalén p'uurude. Ichiaba p'anajida iru kurusode peedak'ãri. 40 Mamîda Tachi Ak'õrepa iru chok'ai p'irabai ataji k'ãima õpeemaa, maap'eda taimaa unupiji. 41 Judiorã jõmaarãmaa unupi–e paji. Jîp'a taimaapaita unupiji, Tachi Ak'õrepa aù naaweda tai jùrùt'erada perã iru unudamerã. Chok'ai p'irabaida t'êepai iru tai ome nek'oji ak'ùpiit'ee wãara chok'ai bù. 42 Aù t'êepai irua tai pëiji judiorãmaa jaranadamerã taipa unudap'edaa mãik'aapa jarateenadamerã iruta Tachi Ak'õrepa bùda jõmaarã Waibùa. Ak'õre ewari waibùa ewate irua chok'ai p'anùùrãpa oopata mãik'aapa piudap'edaarãpa oopatap'edaa ak'ùit'ee. 43 Jõmaweda Ak'õre pedee jarapataarãpa irua ooit'ee bada k'awa p'anajida mãik'aapa jarapachida Tachi Ak'õrepa iru k'aurepa wêpapipariit'ee irude ijãarutaarãpa p'ek'au k'achia oopata.
Tachi Ak'õre Jaure judio–eerãmaa cheda
44 At'ãri Pedro pedeemaa bùde, Ak'õre Jaure cheji chi ûrimaa p'anadap'edaarãmaa. 45 Judiorã ijãapataarã Pedro ome chedap'edaarã ak'ùtrua para beeji, Tachi Ak'õrepa ichi Jaure ba chepida perã judio–eerã k'ap'ùade. 46 Ûripachida pedee para bù ãchia k'awada–e p'anù pedeede mãik'aapa Ak'õremaa ùt'aa iidi para bù. 47 Mãpai Pedropa mãgaji:
—Tachi Ak'õrepa na eperãarãmaa ichi Jaure pëiru taimaa pëidak'a. Mãga bùta, ¿k'aipa poro choonaapáde adayama? aji.
48 Mãpai Pedropa jaraji Jesucristo t'âde poro choopidamerã. Maap'eda Corneliopa chupùria iidiji Pedromaa ãchi ome taarã beemerã.