Saulopa Cristode ijãada
(Hechos 22.6-16; 26.12-18)
9
1 Felipepa mãga oo bù misa, Saulopa Cristode ijãapataarã peek'ooit'eeda apachi. Mapa wãji judiorã p'aareerã poro waibùamaa 2 mãik'aapa iidiji k'art'a p'ã teedamerã. K'îsia iru baji wãit'ee Damasco p'uurudee Tachi Ak'õre Ode P'anùùrãda apata jùrùde, ùmùk'îraarã wêraarã ome, mãgùùrã jita p'e ateeit'ee Jerusalendee. Ma k'art'a p'ãdap'edaade jaraji Saulopa oo k'inia bù, judiorã poroorãpa Tachi Ak'õre Ûraa jarateepata te bee chaa k'awaadamerã mãik'aapa k'aripadamerã. 3 Ma k'art'a p'ãdap'edaa atap'eda, Saulo wãji. Damasco k'ait'a pa wãk'ãri, ùt'ariipa ichi ârù âdaa jêra t'îudachi. 4 Mãga unuk'ãri, Saulo eujãde baainaji. Maap'eda pedee ûriji:—Saulo, Saulo ¿sãap'eda mùchideerã jùrù nima? aji.
5 Saulopa iidiji:
—¿Pù, k'aima? aji.
Chi pedee badapa p'anauji:
—Mù Jesupù, pùa jùrù ni eperãarã poro waibùa. 6 P'irabáiji mãik'aapa wåji p'uurudee. Mama jaradai pùa k'ãata ooit'ee.
7 Saulo ome wã nipadap'edaarã pedee wêe ak'ùnâ p'aneejida p'era jõnùpa, ãrapa pedee ûridap'edaa perã. Mamîda unuda–e paji k'áipata pedee bù. 8 Ma t'êepai Saulo p'irabaidachi. Mamîda tau êek'ãri, maarepida unuk'aa paji. Mãgá juade jitadap'eda, ateejida Damascodee. 9 K'ãima õpee mama baji tau p'ãriu; maarepida ne–inaa to–ee mãik'aapa nek'o–ee.
10 Ma p'uurude bapachi eperã Cristode ijãapari, t'âjarapatap'edaa Ananías. Saulo mãga bù misa, Ak'õrepa k'ãimok'araa pùk'a bùde Ananías t'âjaraji. Ichia p'anauji:
—Tachi Waibùa, mù nama bùda aji.
11 Ak'õrepa mãgaji:
—Wåji calle t'âjarapata Derechamaa mãik'aapa Judas tede iidíji Tarso pida, t'âjarapata Saulo. Mãgùpa mùmaa ùt'aa t'âmaa bùda aji. 12 Mãgùmaa k'ãimok'araa pùk'a bùde mùa unupijida aji, eperã t'âjarapata Ananías wãru irumaa mãik'aapa jua bùru iru ârù, waya pia unumerã.
13 Mãga ûrik'ãri, Ananiapa mãgaji:
—Tachi Waibùa, mùa ûridooda aji, jã eperãpa pùde ijãapataarã miapida Jerusalende. 14 Ârá nama che bù p'aareerã poroorãpa k'aripa k'inia p'anadairã. Maperã pëijidada aji, pùde ijãapataarã jita p'e atade.
15 Mamîda Ak'õrepa p'anauji:
—Wãpáde aji, mùa iru jùrùt'erada perã mù ûraa jarateenamerã awaraa eujãdepemaarãmaa mãik'aapa ãchi reyrãmaa, ichiaba israelitaarãmaa. 16 Mùa irumaa k'awapiit'eeda aji, sãgapù iru mia iru p'anapataadait'ee, mùa ooda jaratee k'inia bù k'aurepa.
17 Maap'eda Ananías wãji Saulo badamaa. Teeda panap'eda, jua bùji iru ârù mãik'aapa mãgaji:
—K'õp'ãyo Saulo, pùa unuda ode chewãk'ãri, Tachi Waibùa Jesúpata mù pëijida aji, pùa waya unumerã mãik'aapa Tachi Ak'õre Jaure ome beemerã.
18 Aramata Saulo taudeepa chik'o escamak'a baaijida mãik'aapa waya pia unu beeji. Maap'eda poro choopiji Ananiamaa. 19 T'êepai nek'oji waya juatau paraait'ee. Ewari chok'ara–ee beeji Damascodepemaarã Cristode ijãapataarã ome.
Saulopa Damasco p'uurude jarateeda
20 Saulopa jarateenapachi Ak'õre Ûraa jarateepata tede. Jarapachi Jesuta Tachi Ak'õre Warra. 21 Mãga ûridak'ãri, jõmaarãpa ak'ùtrua para beepachi mãik'aapa mãgapachida:
—¿Nãgà paji–ek'ã ajida, Jerusalende jùrù nipapata peeit'ee jõmaweda Jesude ijãapataarã? ¿Ichiaba nama cheji–ek'ã ajida, ijãapataarã jita p'e ateede p'aareerã poroorãmaa?
22 Mãga jarapachida mîda, Saulopa ewari chaa waapùara jarateepachi Jesuta Tachi Ak'õrepa pëida eperãarã k'aripamerã. Mapa judiorã Damascode p'anapatap'edaarãpa k'awadak'aa paji k'ãata k'îsiadai.
Saulo judiorã juadeepa uchiada
23 Ma t'êepai taarã pak'ãri, judiorãpa pedeeteejida Saulo peet'aadait'ee. 24 Mamîda ichia k'awaa ataji. Ãstaawa mãik'aapa p'ãrik'ua p'uuru t'îupata chaa ot'ewa p'anapachida uchiak'ãri jita atadait'ee. 25 Mamîda ijãapataarãpa k'oraa choma bùde t'ù atajida mãik'aapa chi p'uuru ik'aawa t'ùak'au jêra bù ârùùpa ùrabai pëijida. Mãgá mirudachi.
Saulo Jerusalende
26 Mamãik'aapa Saulo Jerusalendee wãji. Mama ijãapataarã ome k'õp'ãyo meraa k'inia baji. Mamîda jõmaarãpa iru waawee p'anapachida. Ijãadak'aa paji wãara irua Cristode ijãa bù. 27 Awaraa ijãapataarã mãga p'anajida mîda, Bernabepa ateeji Cristopa jùrùt'eradaarãmaa. Nepùrùji Saulopa Tachi Waibùa unuda Damasco ode mãik'aapa Jesupa irumaa pedeeda. Maap'eda nepùrùji Saulo Damascode bak'ãri, waawee–ee jarateemaa bada Jesupa ooda. 28 Mãgá Saulo beeji Jerusalende mãik'aapa nipapachi Cristode ijãapataarã ome. Mama bùde Cristopa ooda waawee–ee jarateepachi judiorãmaa. 29 Ichiaba aupedeepachi judiorã griego pedee pedeepataarã ome. Mapa ãrapa iru peet'aa k'inia p'anapachida. 30 Cristode ijãapataarãpa mãga k'awaadak'ãri, ateejida Cesarea p'uurudee. Mamãik'aapa pëijida Tarso p'uurudee.
31 Maapai ijãapataarã Judeadepemaarã, Galileadepemaarã mãik'aapa Samariadepemaarã k'ãiwee p'anapachida. Ak'õre Jaurepa ãchi k'aripapachi perã, waapùara oo k'awaa wãpachida Tachi Ak'õrepa oopi k'inia bù mãik'aapa chok'araara îwa wãpachida.
Pedropa eperã t'âjarapatap'edaa Eneas jùpada
32 Maapai Pedropa Cristode ijãapataarãmaa p'asia nipak'ãri, panaji Lida p'uurude. 33 Mama ununaji eperã t'âjarapatap'edaa Eneas. Mãgà ocho año iru baji chiwa bù. 34 Ma eperã unuk'ãri, Pedropa irumaa mãgaji:
—Eneas, Jesucristopa pù jùparupù. P'irabaipáde aji, mãik'aapa pùchi p'aru bedáji.
Aramata Eneas p'irabaidachi. 35 Chok'ara Lida p'uurude p'anapatap'edaarãpa mãik'aapa Sarón eujãde p'anapatap'edaarãpa Eneas jùpa bù unudak'ãri, Jesucristode ijãajida.
Dorcas piup'eda, chok'ai p'irabaida
36 Maapai Jope p'uurude baji wêra Cristode ijãapari, t'âjarapachida Tabita; griego pedeede Dorcasa apata. Mãgà wêrapa awaraarã k'aripapachi mãik'aapa chupùria beerãmaa ne–inaa teepachi. 37 Ma wêra k'ayaadachi mãik'aapa jai–idaaji. Judiorãpa oopatap'edaak'a iru k'ap'ùa k'uit'aadap'eda, te ùt'ùpema pisode bùnajida. 38 Maapai Pedro Lida p'uurude baji. Lida Jope p'uuru k'ait'a bada perã, ijãapataarãpa eperãarã omé irumaa pëijida. Mãganajida:
—Jopedee isapai chepáde ajida.
39 Pedro wãji ãchi ome mãik'aapa panadak'ãri, ateejida piuda bùmaa. Jõmaweda p'êtrãarã jêe para baji iru ik'aawa mãik'aapa Pedromaa ak'ùpijida Dorcapa p'aru k'aat'ùda chok'ai bak'ãri. 40 Pedropa jõmaweda taawaa uchiapik'ooji. Mãpai bedabaip'eda, ùt'aa t'âji. T'êepai jai–idaa badamaa ak'ùji mãik'aapa mãgaji:
—¡Tabita, p'irabáiji!
Iru tau êeji mãik'aapa Pedro unuk'ãri, su–ak'ù beeji. 41 Pedropa juadeepa p'irabai ataji mãik'aapa t'â p'eji chi p'êtrãarã mãik'aapa awaraa ijãapataarã, ãchimaa ak'ùpiit'ee chok'ai bù. 42 Jopedepemaarãpa mãga k'awaadak'ãri, chok'ara Cristode ijãajida. 43 Maperã Pedro k'ãima chok'ara beeji ma p'uurude, ne–e p'oopari t'âjarapatap'edaa Simón tede.