Saulopa ijãapataarã miapiit'ee jùrùda
8
1-2 Esteban peedak'ãri, Saulo mama baji ak'ùit'ee, ichi judiorã poroorã eere bada perã. Esteban piup'eda, ûk'uru Tachi Ak'õrede ijãapataarãpa ùajida; ichiaba audú jêejida iru–it'ee.Ma ewatedeepa Jerusalende Cristode ijãadak'aa beerãpa irude ijãapataarã jùrùjida peedait'ee. Mapa jõmaweda miruk'oodachida Judea eujãdee mãik'aapa Samaria eujãdee. Cristopa jùrùt'eradaarã aupai miruda–e paji. 3 Mãgá jùrù p'anù misa, Saulopa Cristode ijãapataarã auk'a jùrùpachi. Te chaa t'îu wãpachi wêraarã ùmùk'îraarã ome jita p'eit'ee. Maap'eda carcelde t'ùpik'oopachi.
Samariade jarateedap'edaa Cristopa ooda eperãarã k'aripait'ee
4 Saulopa mãga oo baji mîda, chi Jerusalendeepa mirudap'edaarãpa jaratee wãpachida Cristopa ooda eperãarã k'aripait'ee ãchi wãrutamaa. 5 Felipe wãji Samaria eujãdee mãik'aapa Cristopa ooda jarateepachi. 6 Arii p'anadap'edaarãpa mãga ûridak'ãri mãik'aapa unudak'ãri irua ooda eperãarãpa p'oyaa oodak'aa ãchi juadoopa, waapùara k'awa k'inia p'anajida. 7 Mama Felipepa uchiapik'oopachi netuaraarã merãtùa bee eperãarã chok'ara k'ap'ùadeepa. Mãgà netuaraarã ãra k'ap'ùadeepa bia uchia wãpachida. Ma awara Felipepa jùpak'oopachi eperãarã chok'ara chiwa beerã mãik'aapa p'oyaa ãchi bùùrùpa pia nipadak'aarã. 8 Maperã ma p'uurudepemaarã o–îa p'anapachida.
9 Mamîda mama bapachi eperã t'âjarapatap'edaa Simón. Mãgùpa petau tau k'awaa baji mãik'aapa ma eujãdepemaarã k'ûra p'e iru bapachi ichia oo bù k'aurepa. Mapa ãchi t'ãide eperã waibùak'a bapachi. 10 Waibùara beerã, ek'ariara beerãpa paara iru pedee ûri k'inia p'anapachida mãik'aapa mãgapachida:
—Tachi Ak'õrépata irumaa nãga oopi bù.
11 Irua jararu ijãapachida, ichi petau taupa k'ûrap'e iru bada perã. Taarãji ma k'apùte bù. 12 Mama bùde Felipepa jarateeji: Jesucristo Tachi Ak'õrepa pëida mãik'aapa iru k'aurepa Tachi Ak'õrepa eperãarã p'ek'au k'achia wêpapik'oopari. Mãga ijãadak'ãri, mãpema ùmùk'îraarã mãik'aapa wêraarã poro choopijida. 13 Simonpa pida ijãaji. Maap'eda poro choopiji mãik'aapa nipaji Felipe ome. Unuk'ãri Felipepa ne–inaa oo bù eperãarãpa p'oyaa oodak'aa ãchi juadoopa, ichia k'awa–e bapachi sãga k'îsiai.
14 Cristopa jùrùt'eradaarã Jerusalende p'anadap'edaarãpa ûridak'ãri Samaria pidaarãpa ijãaruta Ak'õrepa ooda Cristo piuda k'aurepa, mamaa pëijida Pedro Juan ome. 15 Arii panadak'ãri, ùt'aa t'âjida Samaria pidaarã Cristode ijãapataarã pari, Tachi Ak'õre Jaure ãra ome ba chemerã, 16 waide Ak'õre Jaure ãra k'ap'ùade ba che–e bada perã. Jîp'a poro choopijida Tachi Waibùa Jesús t'âde, ak'ùpidait'ee irude ijãadap'edaa. 17 Mãpai Pedropa mãik'aapa Juanpa jua bùdak'ãri ãra ârù, mãgá Ak'õre Jaure ba cheji ãra ome.
18 Simonpa unuk'ãri Ak'õre Jaure che bù Cristopa jùrùt'eradaarãpa jua bùrutade eperãarã ârù, p'arat'a teeit'ee paji, ichia auk'a mãga ooit'ee. 19 Mãgaji:
—Mùmaa k'awaapidapáde aji, ichiaba mùa jua bùk'ãri eperã ârù, Ak'õre Jaure iru ome ba chemerã.
20 Mãpai Pedropa p'anauji:
—¡Pùchi p'arat'a ome atua baibeepáde aji, k'îsia bairã neto atai Tachi Ak'õrepa oopipari ichi jùrùt'eradaarãmaa! 21 Pùa na mimia p'oyaa oo–e, Ak'õre k'îrapite k'îra jîp'a k'îsia–e bairã. 22 Mãgá k'îsia amáaji mãik'aapa Tachi Ak'õremaa chupùria iidíji. Mãga oorura, Tachi Ak'õrepa perdonaaipù pùa k'achia oo k'inia bù. 23 Mùa mãga jara bù k'awa bairã pù t'ãride tai ome k'îrau bù, waibùara paruta perã pù k'ãyaara nãpemaarã k'îrapite. Wãara pù at'ãri p'ek'au k'achia jua ek'ari bù.
24 Mãpai Simonpa p'anauji:
—Parãpa Ak'õremaa chupùria iididapáde aji mù pari, mù baainaamerã parãpa mùmaa jaradap'edaade.
25 Maap'eda Pedropa Juan ome ma p'uurudepemaarãmaa jarajida ãchia unudap'edaa Jesús ome nipadak'ãri. Ichiaba Tachi Ak'õrepa jara pëida jarateejida. Ma t'êepai chejida Jerusalendee. Mamîda ode Samariade p'uuru bee chaa jaratee chewãpachida Tachi Ak'õrepa pedee pia jara pëida Cristode.
Felipe Etiopía eujãdepema poro ome unuda
26 Ma t'êepai, Tachi Ak'õrepa ichi ángel pëiji Felipemaa jaramerã:
—Wåji barree, Jerusalendeepa chonaarãwedapema Gaza p'uurudee wãpari ode. Mãgà o wãyaapari eujã pania wêe bùde.
27 Mãpai Felipe wãji mãik'aapa ode unuji eperã Etiopía eujãdepema. Mãgà Etiopiadepemaarã poro waibùara paji. Ãchi reina p'arat'a jâapari paji. Ichi wã baji Jerusalendee Tachi Ak'õremaa ùt'aa t'âde. 28 Mata waya chewãji ichi eujãdee. Su–ak'ù baji ichi caballopa jidiupata carrode mãik'aapa lee wãji chonaarãwedapema Ak'õre pedee jarapari Isaiapa p'ãda.
29 Mãgá wãde, Ak'õre Jaurepa mãgaji Felipemaa:
—Wåji jã carro k'ait'a.
30 Felipe ma carro ik'aawa pak'ãri, ûriji Etiopiadepemapa Isaiapa p'ãda leemaa bù. Mãpai iidiji:
—¿K'awa bùk'ã aji, k'ãata jara k'inia bù pùa leemaa bù?
31 Etiopiadepemapa p'anauji:
—¿Sãga mùa k'awaayama aji, apidaapa mùmaa jarateeda–eeta?
Mãpai Felipemaa chupùria iidiji bataumerã mãik'aapa ichi ik'aawa su–ak'ù beemerã. 32 Isaiapa p'ãdadepema ichia leemaa badade nãga p'ã baji:
‘Iru ateejida oveja ateepatak'a chi peepatamaa. Ara oveja k'îup'ee baparik'a chi k'ara t'ùùmaa p'anadak'ãri, mãga pùk'a iru k'îup'ee baji. 33 Iru k'îra nejasiapijida mãik'aapa maarepida chupùria k'awada–e paji. Ãchi audú t'ãri k'achia–idaa p'anadap'edaa perã, pee atapëijida. Maperã irudeepa warra apida uchiada–e paji. Mãgá iru peedak'ãri, uchiapijida na p'ek'au eujãdeepa.’ (Isaías 53.7-8)
34 Mãpai Etiopiadepemapa Felipemaa iidiji:
—Mù chupùria k'awáaji. ¿K'aideta pedeemaa bùma aji, na Ak'õre pedee jaraparipa; ichide wa awaraa eperãde?
35 Mãpai Felipepa ma Etiopiadepemamaa mãgaji:
—Pùa leemaa bù Tachi Ak'õre Warradé; Jesús p'asada.
Mãpai Felipepa jarateemaa beeji jõma Jesupa ooda eperãarã k'aripait'ee. 36 Maap'eda waawipai ode wãyaadak'ãri pania paraamãi, mãgà eperãpa mãgaji:
—Nama pania paraa. ¿Sãap'eda mù poro choo–ema? aji.
37 [Felipepa p'anauji:
—Pùa wãara Jesucristode ijãa bù pùrã, pia bùda aji.
Ma eperãpa mãgaji:
—Mùa ijãa bùda aji, Jesucristo Tachi Ak'õre Warra.]
38 Ma carro t'ùbaipip'eda, ãchi omeeweda ùrabaijida mãik'aapa wãjida pania paraamaa. Mama Felipepa poro chooji. 39 Paniadeepa uchiadak'ãri, Felipe wêpadachi Tachi Ak'õre Jaurepa ateeda perã. Ma Etiopiadepemapa waa unu–e paji. Mamîda ichi o–îa wãji ichi eujãdee. 40 Mãùmisa Ak'õre Jaurepa Felipe uchiapiji Azoto p'uurude. Mamãik'aapa p'uuru bee chaa Cristopa ooda eperãarã k'aripait'ee jaratee wãpachi Cesarea p'uurude panarumaa.