Jesupa chi k'õp'ãyoorã bùùrù sùùda
13
1 Pascua fiesta ewate pai naaweda, Jesupa k'awa baji ewari awara bùda ichi na p'ek'au eujãdeepa uchiait'ee mãik'aapa ichi Ak'õremaa wãit'ee; mãgà ewari paru. Ichia chi k'õp'ãyoorã na p'ek'au eujãde p'anù k'inia iru bapachi. Mãgá ãchi k'inia iru bapachi ichi piurumaa.2 Aù k'ewara Pascuadepema chik'o jedei naaweda, Netuara Poro Waibùapa k'îsia k'achia k'îsiapiji Judas, Simón Iscariote warramaa, ichia Jesús traicionaamerã. 3 Mamîda Jesupa k'awa baji ichi Tachi Ak'õredeepa cheda mãik'aapa Ak'õremaa wãit'ee. Ichiaba k'awa baji Tachi Ak'õrepa ne–inaa jõmaweda bùji ichi jua ek'ari. 4 Mapa nek'omaa p'anùde Jesús bainâ beeji mãik'aapa ichi ârùpema p'aru jâ bada êrat'aap'eda, ãyaa bùji. Maap'eda toalla jâ nâbùji ichi k'ùrrùde, mimiapataarãpa oopatak'a chîara bùùrù sùùdait'ee pak'ãri. 5 Mãpai jarrade pania wee atap'eda, chi k'õp'ãyoorã bùùrù sùùmaa beeji. Maap'eda ma toallapa p'ook'ooji.
6 Mamîda Simón Pedro bùùrù sùùnait'ee pak'ãri, irua mãgaji:
—Tachi Waibùa, ¿mù bùùrù paara sùùit'eek'ã? aji.
7 Jesupa p'anauji:
—Ârá pùa k'awa–e bùda aji, mùa oomaa bù. Mamîda t'êepai k'awayada aji.
8 Mãpai Pedropa mãgaji:
—¡Mù bùùrù sùùpi–eda! aji.
Jesupa p'anauji:
—Pù bùùrù sùùpi k'inia–e bù pùrã, mãgara waa nipanaapáde aji, mù ome.
9 Mãpai Simón Pedropa mãgaji:
—¡Tachi Waibùa, mãgara mù bùùrù aupai sùùnaapáde aji. Ichiaba mù jua mãik'aapa poro paara sùùpáde! aji.
10 Mamîda Jesupa p'anauji:
—Eperã ewaa k'uip'eda mãik'aapa taawaa uchiap'eda, waya k'ui–eda aji. Chi bùùrù aupaita sùùpari, k'ap'ùa jõma t'ãu–ee bairã. Mãga pùk'a parã t'ãu–ee pùk'a p'anù p'ek'au k'achiapa. Mamîda parã jõmaweda mãga p'anù–eda aji.
11 Jesupa mãga jaraji k'awa bada perã k'aipa ichi traicionaait'ee bù.
12 Chi k'õp'ãyoorã bùùrù sùùp'eda, waya ichi ârùpema p'aru jâ beeji. Maap'eda mesade su–ak'ù beeji mãik'aapa mãgaji:
—¿Parãpa k'awa p'anùk'ã aji, k'ãata jara k'inia bù mùa et'ewa ooda? 13 Parãpa mùmaa “Jarateepari” mãik'aapa “Tachi Waibùa” apata. Mãga jaradak'ãri, wãarata jara p'anù. 14 Mù parã Waibùa mãik'aapa parã Jarateepari bù mîda, parã bùùrù sùùji. Mapa parãpa pida pãchi k'õp'ãyoorã bùùrù sùùdaipia bù. 15 Mùa mãga ooji parãpa auk'a oodamerã. 16 Mùa wãarata jararu. Mimiapari ichi poro waibùa k'ãyaara waibùara bù–e. Ichiaba chok'a pëida iru pëida k'ãyaara waibùara bù–eda aji. 17 Parãpa mùa et'ewa jarada ûrijida. Ma jaradak'a ooruta pùrã, t'ãri o–îa p'anadait'ee.
18 +Mamîda mãga–e pait'ee parã jõmaarã ome. Mùa k'awa bù mù k'õp'ãyoorã jùrùt'erada. Mapa ichiaba k'awa bù wãara p'asait'ee Tachi Ak'õre Ûraa p'ãdade jara bùk'a:
‘Mù ome nek'orupa mù peepit'aait'ee.’(Salmos 41.9)
19 Ârá mùa mãga jara bù mãga p'asak'ãri, parãpa wãara ijãadamerã Mùta, Tachi Ak'õrepa pëida eperãarã k'aripamerã. 20 Mùa wãarata jararu. Chi mùa pëida auteebairupa mù jida auteebai bù. Mãga pùk'a chi mù auteebairupa mù Ak'õre, mù pëida, auk'a auteebai bù.
Jesupa jarada k'aipa ichi traicionaait'ee
(Mateo 26.20-25; Marcos 14.17-21; Lucas 22.21-23)
21 Mãga jarap'eda, Jesús t'ãri p'ua nâbeeji. Mãpai mãgaji:
—Mùa wãarata jararu. Parãdepema abaapa mù traicionaait'eeda aji.
22 Jesupa mãga jarak'ãri, chi k'õp'ãyoorã ak'ù trua para beeji, k'awada–e p'anadap'edaa perã k'aita jara bù. 23 Mãùrãdepema aba, Jesupa audú k'inia iru bada, iru ik'aawa sîu–ak'ù baji. 24 Mapa Simón Pedropa taupa jarapachi mãgùmaa iidimerã k'áipata Jesús traicionaait'ee.
25 Mãpai mãgà k'õp'ãyopa k'ùùrù ik'aawa iidiji Jesumaa:
—Tachi Waibùa, ¿k'aima? aji.
26 Jesupa p'anauji:
—Nãgà pan pite sã atak'ãri, mùa teeit'eeda aji, mãgùmaa.
Aramata Jesupa ma pan pite sã ataji mãik'aapa teeji Judamaa. Mãgà Judas Simón Iscariote warra paji. 27 Judapa mãgà pan jitak'ãri, Satanás iru t'ãride t'îudachi. Mãpai Jesupa mãgaji:
—Pùchia ooit'ee bù isapai oopáde aji.
28 Mamîda Jesús ome nek'omaa p'anadap'edaarãpa k'awada–e paji sãap'eda mãga jaraji. 29 Judapa ãchi p'arat'a anipapachi perã, ûk'uruurãpa k'îsiajida Jesupa jara baji ne–inaa netonamerã fiesta–it'ee, maa–e pùrã chupùria beerãmaa ne–inaa teenamerã.
30 Judapa ma pan jitap'eda, uchiadachi taawaa. P'ãrik'ua paji.
Ûraa chiwidi eperãarã–it'ee
31 Judas taawaa uchiada t'êepai, Jesupa mãgaji:
—Ârá Tachi Ak'õrepa ichi k'îra wãree unupiit'ee, mù chi Eperã Ak'õre Truadepema k'ap'ùa pari. Mù k'aurepa jõmaarãpa wãara k'awaadait'ee Tachi Ak'õre jõmaarã k'ãyaara waibùara bù. 32 Mùa mãga ak'ùpik'ãri, taarã–e nùde Tachi Ak'õrepa ichiaba ak'ùpiit'ee mù wãara irua pëida.
33 +Warrarã, naapai mù taarã–e parã ome. Parãpa mù jùrùdayada aji. Mamîda unuda–e pait'ee. Mùa judiorã poro waibùarãmaa jaradak'a parãmaa auk'a jarait'ee; p'oyaa wãda–e mù wãrumaa. 34 Parãmaa ûraa chiwidi jararu. Chik'inia p'anapatáatù. Mùa parã k'inia iru baparik'a, mãgá parã jida chik'inia p'anapatáatù. 35 Mãgá chik'inia p'anaruta pùrã, jõmaarãpa k'awadayada aji, parã mù k'õp'ãyoorã.
Jesupa jarada Pedropa ichi k'awa–e bùda ait'ee
(Mateo 26.31-35; Marcos 14.27-31; Lucas 22.31-34)
36 Mãpai Simón Pedropa Jesumaa iidiji:
—Tachi Waibùa, ¿sãmaa wãit'eema? aji.
Jesupa p'anauji:
—Mù wãrumaa waide pù p'oyaa wã–eda aji. Mamîda t'êepai wãit'eeda aji.
37 Pedropa mãgaji:
—Tachi Waibùa, ¿sãap'eda mù pù t'êe wã–e payama? aji. ¡Pù ome wã k'inia bù, pù k'aurepa piuru pùjida!
38 Mãpai Jesupa p'anauji:
—¿Wãara pùchi k'ap'ùa peepit'aaik'ã aji, mù k'aurepa? Mùa wãarata jararu. Et'erre k'arii naaweda, jarada õpee pùa mù k'awa–e bùda ait'ee.