Mariapa k'era weeda Jesús bùùrù ârù
(Mateo 26.6-13; Marcos 14.3-9)
12
1 Ewari seis falta bak'ãri Pascua fiesta oodait'ee, Jesús wãji Betania p'uurudee, Lázaro bapatamãi. Ma Lázaro paji Jesupa chok'ai p'irabaipida. 2 Mama bùde k'ewara Jesumaa nek'opijida. Martapa jedepachi. Jõdee Lázaro Jesús ome nek'omaa baji. 3 Mãùmisa Mariapa aneeji k'era âpùa nardodee ooda. Litro k'audaa baji. Ma k'era Jesús bùùrù ârù weet'aaji mãik'aapa ichi pudapa p'oot'aaji. Te jã t'ûa jo nâbeeji k'erapa. 4 Mãpai Jesús k'õp'ãyo, Judas Iscariote, Jesús traicionaait'ee badapa mãgaji:5 —Jã k'era ichi k'inia weemaa bùda aji. Netot'aak'aji trescientos denario pari mãik'aapa chupùria beerã k'aripak'aji.
6 Mamîda Judapa mãga jara–e paji chupùria beerã k'aripa k'inia bada perã. Ma k'ãyaara mãga jaraji nechùayaa bada perã. Ichia ãra p'arat'a anipapachi mãik'aapa aùdepema chùa atapachi. 7 Mãpai Jesupa mãgaji:
—Ita–aria bàji. Irua nãgà k'era ùa iru bajida aji, mù ùaruta ewatepema–it'ee. 8 Chupùria beerã ichita paraait'ee parã t'ãide. Mamîda mù parã ome ichita ba–e pait'eeda aji.
Judiorã poroorãpa Lázaro jùrùdap'edaa peet'aadait'ee
9 Ûridak'ãri Jesús Betania p'uurude bù, judiorã chok'ara wãjida iru ak'ùde. Ichiaba wãjida Lázaro ak'ùde, Jesupa iru chok'ai p'irabaipida perã. 10 Maperã p'aareerã poroorãpa pedeeteejida Lázaro ichiaba peet'aadait'ee. 11 K'îsiajida Jesupa iru p'irabaipida k'aurepa judiorã chok'ara ãchi ûraade ijãadaamaa p'aneeruta Jesude ijãadait'ee.
Jesús Jerusalén p'uurudee wãda
(Mateo 21.1-11; Marcos 11.1-11; Lucas 19.28-40)
12 Aù norema eperãarã chok'ara, chi wã p'anadap'edaarãpa k'awaajida Jesús Jerusalendee Pascua fiesta oode cheru. 13 Mapa t'ap'uru k'iru t'ùap'edap'eda, wãjida iru auteebaidait'ee mãik'aapa biapachida:
—‘¡Hosana!a ¡Tachi K'aripapari cheru Tachi Ak'õre k'ap'ùa pari! ¡Tachi Ak'õrepa iru pia ak'ùji mãik'aapa pëiji israelitaarã Rey pamerã!’ (Salmos 118.25-26)
14 Jesupa burro chak'e atapiji mãik'aapa bataudachi aù ârù, Ak'õre Ûraa p'ãdade jara bùk'a:
15 ‘Sión p'uurudepemaarã, waaweenáatù. ¡Ak'àtù! Pãchi Rey cheru burro chak'e ârù.’(Sofonías 9.9)
16 Chi k'õp'ãyoorãpa k'awada–e paji ma pedee p'ãda k'ãata jara k'inia bù. Mamîda Jesús ùt'aa wãda t'êepai k'irãpajida ma pedee mãik'aapa Jesús p'asada. Mãpai k'awaajida ma pedee p'ãda irudé jara baji.
17 Jesupa Lázaro p'irabaipida unudap'edaarãpa irua ooda jõmaarãmaa nepùrùpachida. 18 Mapa eperãarã chok'ara wãjida Jesús ome unudait'ee. Mãgá wã k'inia p'anajida ûridap'edaa perã irua ne–inaa ooda eperãarãpa p'oyaa oodak'aa ãchi juadoopa. 19 Fariseorã ûk'uruurãpa mãga unudak'ãri, ãchi k'õp'ãyoorãmaa mãgajida:
—¿Parãpa unu p'anùk'ã? ajida. ¡Iru maarepida p'oyaada–e pai! ¡Jõmaarãta irude ijãa wãdada! ajida.
Judio–eerãpa Jesús unu k'inia p'anadap'edaa
20 Pascua fiesta pai naaweda, eperãarã wãpachida Jerusalendee ùt'aa t'âde Tachi Ak'õremaa. Ma wãdap'edaarã t'ãide p'anajida judio–eerã, judiorã ûraade ijãadap'edaarã. 21 Mãùrã Felipemaa wãjida. Mãgà Felipe Betsaida p'uurudepema paji. Mãgà p'uuru Galilea eujãde bù. Ma judio–eerãpa mãgajida irumaa:
—Señor, taipa Jesús unu k'inia p'anùda ajida.
22 Mãpai Felipepa nepùrùnaji Andremaa. Maap'eda ãchi omé wãjida Jesumaa nepùrùde.
23 Ûrik'ãri judio–eerãpa iru jùrùmaa p'anù, Jesupa mãgaji:
—Ewari paruda aji, Eperã Ak'õre Truadepema ùt'aa wãit'ee. 24 Mùa wãarata jararu. Eperãpa trigo tau apai iru bùta, mãgà tau uu–e pùrã, tau apai iru bait'ee. Jõdee mãgà tau uuru pùrã, baaip'eda yoorode piu pùk'a bù mîda, madeepa trigo k'arra chiwidi t'onopari mãik'aapa warip'eda, chaupari. Mãgá tau apaideepa chok'ara uchiadait'ee. 25 Na p'ek'au eujãde bù misa, eperãpa jùrùru pùrã ooit'ee ichia oo k'iniata, ichi piuk'ãri atuait'ee. Mamîda na p'ek'au eujãde bù misa, eperãpa jùrùru pùrã ooit'ee Tachi Ak'õrepa k'inia bùk'a, ma k'aurepa ichita chok'ai bapariit'ee Tachi Ak'õre ome. 26 Apidaapa oo k'inia bù pùrã mùa oopi bùk'a, mãgà nipaipia bù mù ome mù wãrumaa. Mãga ooru pùrã, mù Ak'õrepa iru pia ak'ùit'ee.
Jesupa ichi piuit'eeda ada
27 —Ârá mù t'ãri p'ua nâbùda aji. ¿K'ãata jaraima? ¿Nãga jaraik'ã: “Ak'õre, mù k'aripáji nãgá banaamerã”? Ma–it'ee mù cheji, chupùria chait'ee. Mapa mùa jara bù mù Ak'õremaa: 28 “Ak'õre, ak'ùpíji wãara pù jõmaarã k'ãyaara waibùara bù. ¡Óoji pùchia oo k'iniata!”
Mãpai arii p'anadap'edaarãpa ûrijida ùt'ariipa jara bù:
—Mùa mãga ak'ùpidoo pù k'ap'ùa pari mãik'aapa waya mãga ak'ùpiit'ee.
29 Eperãarãpa mãgà pedee ûridak'ãri, k'îsiajida pata k'îrau nâbù. Mamîda mãùrã ûk'uruurãpa mãgajida:
—Ùt'aripema ángel paji. Mãgàpata pedeejida ajida.
30 Mãpai Jesupa mãgaji:
—Jã pedee ûridap'edaa, mù–it'ee–e pajida aji. Parã–it'eeta paji. 31 Ârapù Tachi Ak'õrepa k'awapiit'ee na p'ek'au eujãdepemaarãpa k'achia oopata. Ârapù Tachi Ak'õrepa p'oyaait'ee na p'ek'au eujãdepemaarã poro waibùa Satanás. 32 Mamîda mùchi k'ap'ùa kurusode jira atadak'ãri eujãdeepa, eperãarãpa mùde ijãa p'aneedait'eeda aji.
—Tai ûraade jara bù Mesías ichita bapariit'ee. ¿Sãga pùa jaraima Eperã Ak'õre Truadepema kurusode jiradait'ee? ¿K'aima ma Eperã Ak'õre Truadepema?
35 Jesupa mãgaji:
—Mù, chi âdaa pùk'a bù mak'ùara taarã–e parã ome. Nipapatáatù mù âdaa pùk'a bùde p'ãriu pùk'a bùde t'îunaadamerã. Chi p'ãriu pùk'a bùde nipaparipa k'awa–e bù sãmaa wãru. 36 Mù, chi âdaa pùk'a bù parã ome bù misa, mùde ijãapatáatù. Mùa Tachi Ak'õrepa wãarata jara pëida jarateepari, parãpa ma pedee ijãadap'eda, iru warrarã p'aneedamerã.
Mãga jarap'eda, Jesús ãyaa wãji ichi ununaadamerã.
Judiorãpa Jesude ijãada–e p'anadap'edaa
37 Jesupa ne–inaa eperãarãpa p'oyaa oodak'aa ãchi taide oopachi mîda, judiorã chok'araarãpa irude ijãadak'aa paji. 38 Mãga paji wãara uchiamerã nãgà pedee Ak'õre pedee jarapari Isaiapa p'ãdade jara bùk'a:
‘Tachi Ak'õre, ¿k'aipa ijãajima aji, taipa jarateedap'edaa? ¿K'aimaa pùa ooda ak'ùpijima?’ (Isaías 53.1)
39 Isaiapa p'ãdade ichiaba jara bù ãchia p'oyaa ijãadak'aa paji nãga perã:
40 ‘Tachi Ak'õrepa ãchi tau p'ãriu pùk'apiji irua ooda ak'ù p'anù mîda, ununaadamerã. Ma awara k'ùùrù k'isua pùk'apiji irua jarada ûri p'anù mîda, k'awanaadamerã mãik'aapa irumaa chenaadamerã, irua ãchia p'ek'au k'achia oopata wêpapimerã.’ (Isaías 6.10)
41 Isaiapa mãga jaraji, k'ãimok'araa pùk'a bùde Jesús unuda perã Tachi Ak'õre k'îra wãree eujãde. Maperãpù Jesudé pedee baji.
42 Isaiapa jaradak'a wãara uchiaji mîda chok'araarã ome, judiorã ûk'uruurãpa Jesude ijãajida; ichiaba ãchi poroorã ûk'uruurãpa pida ijãajida. Mamîda fariseorã waidoopa mãùrãpa ijãadap'edaa eperãarã taide jaradak'aa paji. Waawee p'anajida fariseorãpa ãchi t'îupida–e pai jîak'aapa Tachi Ak'õre Ûraa jarateepata tede. 43 Audupùara k'inia p'anapachida ãchi auk'aarãpa ãchi ak'ùdamerã judiorã pia beerãk'a, k'inia p'anadai k'ãyaara Tachi Ak'õrepa ãchi ak'ùmerã ichideerãk'a.
Tachi Ak'õrépata eperãarãpa oopata ak'ùit'ee
44 Maap'eda Jesupa golpe pedeeji judiorã arii p'anadap'edaarãmaa:
—Chi mùde ijãa bù mùdepai ijãa–e bùda aji. Ichiaba mù Ak'õrede ijãa bù, iruata mù na p'ek'au eujãdee pëida perã. 45 Chi mù unu bùpa ichiaba mù pëida unu bù. 46 Mùta@ chi âdaa pùk'a bù. Mù na p'ek'au eujãdee cheji mùde ijãapataarã @p'ananaadamerã p'ek'au oopataarã p'anapatak'a p'ãriu pùk'a bùde. 47 Eperãpa mù ûraa ûrip'eda, made jara bùk'a oo–e pùrã, mùa jara–e ma eperã atuait'ee. Mù che–e paji na p'ek'au eujãdepemaarã atuapiit'ee. Ma k'ãyaara mù cheji eperãarã o k'achiadeepa k'aripa atade. 48 Eperãpa mù yiaraa iru bù pùrã mù ûraa ûri k'inia–e bairã, Tachi Ak'õre ewari waibùa ewate ichia mãgà eperã miapiit'ee. Mùa jarada k'aurepa irua eperãarãpa oopata ak'ùit'ee k'awaait'ee ijãapachida wa ijãadak'aa paji. 49 Mùchi k'îsiadoopa pedee–e bajida aji. Mù Ak'õre, mù na eujãdee pëidapa ma pedee jõma mùmaa jarapiji. Irua jaraji mùa pedeeit'ee mãik'aapa jarateeit'ee. 50 Mùa k'awa bù jõmaweda mù Ak'õrepa mùmaa jarapiru, mãga jara bù eperãarãpa ijãadamerã mãik'aapa ùt'aa wãdamerã.