Lázaro jai–idaada
11
1 Eperã, t'âjarapatap'edaa Lázaro k'ayaa baji. Ma eperã chi âpewêraarã María, Marta ome Betania p'uurudepema paji. 2 (T'êepai mãgà Mariapa k'era weeji Jesús bùùrù ârù mãik'aapa Jesús bùùrù p'ooji ichi pudapa.) 3 Lázaro k'ayaa bada perã, chi âpewêraarãpa jara pëijida Jesumaa:—Tachi Waibùa, pù k'õp'ãyo k'inia Lázaro k'ayaa bù.
4 Jesupa mãga ûrik'ãri, mãgaji chi k'õp'ãyoorãmaa:
—Ma k'ayaapa jai–idaaru pùjida, chok'ai p'irabaiit'ee. Iru k'ayaa bù eperãarãpa k'awaadamerã Tachi Ak'õre jõmaarã k'ãyaara waibùara bù mãik'aapa k'awaadamerã Tachi Ak'õre Warrapa ne–inaa jõma ooi ichi Ak'õrepa oopi bùk'a. Mãga ook'ãri, jarapataadait'ee Tachi Ak'õre t'ãri pia bapari eperãarã ome; chi Warra jida auk'a.
5 Jesupa k'inia p'e iru bapachi Marta, María mãik'aapa Lázaro. 6 Jesumaa jara pëijida mîda, ichi badamãi k'ãima omé beeji. 7 Maap'eda mãgaji chi k'õp'ãyoorãmaa:
—Waya wãdáma aji, Judea eujãdee.
8 P'anaujida:
—Mamîda Tachi Jarateepari, mak'ùara taarã–e bùda ajida, judiorã poro waibùarãpa pù mãupa peedait'ee p'anadap'edaa. ¿Waya jãmaa wã k'inia bùk'ã? ajida.
9 Jesupa p'anauji:
—¿Ewari doce hora âdaa nâbapari–ek'ã? aji. Eperã ãstaawa nipak'ãri, t'îutùk'aa, âdaa nâbairã.a 10 Mamîda eperã p'ãrik'ua ni pùrã, t'îutùpari âdaa–e bairã.b
11 Mãga jarap'eda, Jesupa mãgaji:
—Tachi k'õp'ãyo Lázaro k'ãi bù. Mamîda mùa ârùmat'aanait'ee.
12 Chi k'õp'ãyoorãpa p'anaujida:
—Tachi Waibùa, iru k'ãi bù pùrã, jùpait'eeda ajida.
13 Jesupa jara k'inia baji Lázaro jai–idaa bù. Mamîda ãrapa k'awada–e p'anajida. K'îsiajida jîp'a k'ãi bù. 14 Mãpai Jesupa jîp'a mãgaji:
—Lázaro jai–idaajida aji. 15 Pia bù mù naaweda wã–e paji, ma k'aurepa ârá parãpa waapùara ijãadait'ee perã Tachi Ak'õrede. Ârá wãdáma aji, Lazaromaa.
16 Mãpai Tomapa (ichiaba t'âjarapatap'edaa Me–iso) apemaarãmaa mãgaji:
—Wãdáma aji, iru ome, tachi peek'ooruta pùjida.
Jesude ijãapataarã chok'ai p'irabaidait'ee jai–idaaruta pùjida
17 Jesús pachek'ãri Lázaro bapatamãi, k'ãima k'îmari baji ùadap'edaa. 18 Jerusalendeepa Betania p'uuru perá kilometros õpee baji. 19 Mamãik'aapa judiorã chok'ara cheepuru p'anajida Marta mãik'aapa María k'õp'ãyaadait'ee, ãra âpema jai–idaa bada perã. 20 Martapa k'awaak'ãri Jesús cheru, wãji iru k'îrachuude. Mamîda María teeda beeji. 21 Jesús unuk'ãri, Martapa mãgaji:
—Tachi Waibùa, pù cheda paara, mù âpema jai–idaa–e pak'ajida aji. 22 Mamîda mùa k'awa bù at'ãri pùa iidiruta Tachi Ak'õrepa ooit'ee.
23 Jesupa mãgaji:
—Pù âpema p'irabaiit'eeda aji.
24 Martapa p'anauji:
—Mùa k'awa bù na p'ek'au eujã jõdaik'ãri, iru chok'ai p'irabaiit'ee mãik'aapa ùt'aa wãit'ee.
25 Mãpai Jesupa mãgaji:
—Mùa piu beerã waya chok'ai p'anapiparida aji. Chi jai–idaada Ak'õre eujãde @ichita chok'ai bapariit'eeda aji, mùde ijãa bapachi perã. 26 Ma awara chi chok'ai bù jida atua–e. Ichita ùt'ari banait'eeda aji, ijãa bapari perã. ¿Pùa mãga ijãa bùk'ã? aji.
27 Martapa mãgaji:
—Ijãa bùpù. Pùta Mesías, chi na p'ek'au eujãdee cheit'ee bada eperãarã k'aripade. Pùta Tachi Ak'õre Warra.
Jesús Lázaro ùadap'edaamãi jêeda
28 Mãga jarap'eda, Marta wãji ichi âpewêra Mariamaa mãik'aapa k'ùùrù ik'aawa mãganaji:
—Tachi Waibùa nama bù. Pù t'â bùda aji.
29 Mariapa mãga ûrik'ãri, isapai Jesumaa wãji. 30 Jesús waide pana–e baji p'uurude; at'ãri Marta ome unudamãi baji. 31 Judiorã María ome p'anadap'edaarãpa ichi isapai uchiaru unudak'ãri, iru t'êe wãjida, wãit'ee jîak'aapa jêede Lázaro ùadap'edaamãi.
32 Mamîda Mariapa Jesús unuk'ãri, bedabaidachi mãik'aapa mãgaji:
—Tachi Waibùa, pù nama bada paara, mù âpema jai–idaa–e pak'ajida aji.
33 Jesupa unuk'ãri María chi che p'anadap'edaarã ome jêe para nâbù, t'ãri p'ua nâbeeji. 34 Mãpai iidiji:
—¿Sãma ùajidama? aji.
P'anaujida:
—Chepáde ajida, ak'ùde.
—¡Ak'àtù! ¡Mãgara Lázaro k'inia iru baji!
37 Mamîda mãùrã ûk'uruurãpa mãgajida:
—Na Jesupa tau p'ãriu beerã pia unupipari. Maperã ¿Lázaro jùpak'aji–ek'ã ajida, jai–idaanaamerã?
Lázaro chok'ai p'irabaida
38 Lázaro piuda k'aurepa Jesús at'ãri t'ãri p'ua nâbùde, panaji Lázaro ùadap'edaamãi. Mãu te uria baji mãik'aapa chi t'ai jâa nâbaji mãu choma bùpa. 39 Mapa Jesupa mãgaji:
—Jã mãu ãyaa ata bùnadapáde aji.
Mãpai Marta, chi piuda âpewêrapa mãgaji:
—Tachi Waibùa, ârá iru k'ap'ùa mik'ia jo @nâbùda aji, ùadap'edaa k'ãima k'îmari bairã.
40 Mãpai Jesupa mãgaji:
—¿Mùa pùmaa jaraji–ek'ã? aji. Ijãa bù pùrã, Ak'õrepa ne–inaa pia ooit'ee eperãarãpa p'oyaa oodak'aa @ãchi juadoopa.
41 Mãpai chi mãu ãyaa ata bùjida. Maap'eda Jesús@ ùt'aa ak'ùji mãik'aapa mãgaji:
—Ak'õre, gracias mùa chupùria iidida ûrida perã. 42 K'awa bù mùa iidipari chaa pùa ûripari. Mamîda na pedee jararu na eperãarãpa ûridamerã mãik'aapa ijãadamerã pùa mù pëiji.
43 Mãga jarap'eda, Jesupa golpe biaji:
—¡Lázaro, jãmãik'aapa uchíaji!
44 Mãpai chi jai–idaa bada uchiaji. Ichi k'ap'ùa jõma at'ãri p'arupa pùra baji; chi jua, jîru paara. Ichiaba ichi poro p'arupa pùra baji. Mapa Jesupa mãgaji:
—Iru ùa bada p'aru êrat'aadapáde aji.
Jesús jita atadait'ee pedeeteedap'edaa
(Mateo 26.1-5; Marcos 14.1-2; Lucas 22.1-2)
45 Jesupa ooda unudak'ãri, judiorã chok'ara María ome wã p'anadap'edaarãpa irude ijãajida. 46 Mamîda mãùrãdepema ûk'uru fariseorãmaa wãjida Jesupa ooda nepùrùde. 47 Mapa ma fariseorã p'aareerã poroorã ome t'â pëijida Junta Supremadepemaarã mãik'aapa mãgajida:
—¿K'ãata oodait'eema? ajida. Jã eperãpa oomaa bù ne–inaa chok'ara eperãarãpa p'oyaa oodak'aa ãchi juadoopa. 48 Ita–aria bùrutara, jõmaarãpa irude ijãadai. Mãgara Romadepemaarã chedayada ajida, Tachi Ak'õre te t'eet'aade mãik'aapa tachi auk'aarã jõt'aade.
49 Judío t'âjarapatap'edaa Caifás p'aareerã poro waibùa paji ma añode. Ichia mãgaji:
—Parãpa maarepida k'awada–e p'anùda aji. 50 Piara bù eperã aba piumerã tachi p'uuru pidaarã pari, tachi p'uuru pidaarã jõmaweda piudai k'ãyaara.
51 Mamîda Caifapa mãga jara–e paji ichi k'îsiadoopa. Ma añode p'aareerã poro waibùa pada perã, Tachi Ak'õrepa ne–inaa p'asait'ee bada ichimaa jarapiji. Maperãpù ichia jaraji Jesús piuit'ee ãchi p'uuru pidaarã pari. 52 Mamîda wãara ma eujãdepemaarã–it'ee aupai piu–e pait'ee paji. Ichiaba piuit'ee paji eperãarã jõmaarã pari, chi Tachi Ak'õrede ijãapataadait'eerã awara–awaraa eujãde p'anapataarã pari. 53 Caifapa mãga jarada ewatedeepa judiorã poroorãpa pedeeteepachida Jesús peedait'ee.
54 Maperã Jesús judiorã t'ãide tau taawa nipak'aa paji naawedapemak'a. Mamãik'aapa wãji eujã pania wêe bù k'ait'a, eperãarã mak'ùara p'anadak'aa p'uurude. Mãgà p'uuru t'âjarapachida Efraín. Mama beeji chi k'õp'ãyoorã ome.
55 Ma t'êepai judiorã Pascua fiesta ârù pak'ãri, eperãarã chok'ara awara ãiipa chejida Jerusalendee Tachi Ak'õre Ûraa p'ãdade jara bùk'a oodait'ee mãik'aapa pia p'anadait'ee iru k'îrapite. 56 Mama p'anùde ma eperãarã Jesús jùrù nipapachida mãik'aapa Tachi Ak'õre tede pedee para baji ãchi k'õp'ãyoorã ome:
—¿K'ãata k'îsia p'anùma? ajida. ¿Iru cheipaa na fiestade wa mãga–e?
57 Mamîda fariseorãpa mãik'aapa p'aareerã poroorãpa Jesús jita atapi k'inia p'anapachida. Mapa jarajida apidaapa Jesús unuruta pùrã, ãchimaa jara chedamerã.