Ovejaarã ak'ùpari nepùrùda
10
1 Mãpai Jesupa mãgaji:—Mùa wãarata jararu. Eperãarã oveja k'ãipatamãi t'îudak'ãri, puerta eere t'îupata. Maperã eperã ma puerta eere t'îu–e pùrã, mãgà nechùayaa bù. 2 Mamîda chi eperã puerta eere t'îupari; mãgà chi ovejaarã ak'ùpari. 3 Puerta jâaparipa ewapari mãgà oveja ak'ùpari t'îumerã. Mãpai irua ichi ovejaarã aba–abaa t'âpari. Ma ovejaarãpa iru pedee k'awapata perã, ãchi k'ãipatamãiipa uchiadak'ãri, iru t'êe k'îup'ee wãpata. 4 Ichi ovejaarã jõmaweda uchia atak'ãri, ãra naa wãpari mãik'aapa chi ovejaarã iru t'êe wãpata, chipari pedee k'awapata perã. 5 Mamîda awaraa eperãpa ma ovejaarã atee k'inia bù pùrã, wãdak'aa mãgà ome. Ãyaa wãpata, mãgà pedee k'awadak'aa perã.
6 Jesupa mãga nepùrùji jarateeit'ee ma fariseorãmaa. Mamîda ãchia k'awada–e paji irua k'ãata jara k'inia bada.
Jesupa ichideerã pia ak'ùpari
7 Mapa Jesupa ãchimaa waya mãgaji:
—Mùa wãarata jararu. Mùda aji, ma puertak'a, ovejaarã t'îupatamãi. 8 Jõmaarãpa mù naa jara chedap'edaa ãchita Tachi Ak'õrepa pëida, nechùayaa beerãk'a p'anajidada aji. Mapa mùchi ovejaarã, pia jarait'eera, mùchideerãpa mãùrã pedee ijãada–e paji. 9 Mùda aji, puertak'a bù. Mùa eperãarã o k'achiadeepa k'aripa atapari t'îudamerã mùchi jua ek'ari mùchideerã ome. Oveja ak'ùpari pia bùpa ichi ovejaarã ak'ùparik'a, mãga pùk'a mùa mùchideerã ak'ùpari mãik'aapa k'aripapari pia p'anapataadamerã.
10 +Chi nechùapari jîp'a chepari nechùait'ee mãik'aapa peeit'ee; ichiaba ne–inaa jõma p'e atadariit'ee. Jõdee mù nama cheji eperãarã pia @p'anapiit'ee mãik'aapa ichita @p'anapiit'ee Tachi Ak'õre ome.
11 +Mù chi ovejaarã ak'ùpari t'ãri piara baparik'a Xbù mãik'aapa eperãarã mù ovejaarãk'a. Ovejaarã ak'ùpari t'ãri pia bak'ãri, chi ovejaarã pia ak'ùpari, mãga oo bù k'aurepa piuru pùjida. 12 Mamîda mãga–e mimiapari jîp'aa ome. Chîara ovejaarã ak'ù bùde, mãgùpa ne–animal k'achia cheru unuk'ãri, mirudaipari ma ovejaarã k'iniak'aa perã. Maperãpù ne–animal k'achia bùpa ma ovejaarã ûk'uru ata chepari mãik'aapa apemaarã awara ãyaa jîchoopipari. 13 Ma eperã mirudaipari ma ovejaarã ak'ùpari–e perã mãik'aapa ma ovejaarã ichide–e perã.
14-15 +Ovejaarã ak'ùpari t'ãri piara bùpa ichi ovejaarã pia ak'ùparik'a, mãga pùk'a mùa mùchideerã pia ak'ùpari. Mù Ak'õrepa mù t'ãri k'awa bù; ichiaba mùa pida mù Ak'õre t'ãri k'awa bù. Mãgá ichiaba mùa mùchi ovejaarã t'ãri k'awa bù mãik'aapa ãrapa pida mù t'ãri k'awa p'anù. Mùchi k'ap'ùa peepiit'ee ãra k'aripait'ee. 16 Mùa ichiaba awaraa ovejaarã iru bù. Mãgà ovejaarã nãpemaarã–e, judiorã–e perã. Mamîda mùa ichiaba ãra k'aripa k'inia bù. Ãrapa ichiaba mù pedee ûripataadayada aji. Mapa mùa ãra p'e bùit'ee apemaarã mùchideerã, judiorã mùde ijãapataarã ome, jõmaweda ak'ùpari apai jua ek'ari p'anapataadamerã.
17 +Mù Ak'õrepa mù k'inia iru bapari mùchi k'ap'ùa peepiit'ee perã eperãarã pari. Mamîda waya chok'ai p'irabaiit'ee. 18 Awaraarãpa mù k'ap'ùa peepida–e pai. Ma k'ãyaara mùata ãchimaa mùchi k'ap'ùa peepiit'ee. Mùa mãga ooit'ee mãik'aapa waya chok'ai p'irabaiit'ee, mù Ak'õrepa mãga jara bairã. Iru jõmaarã k'ãyaara waibùara bù.
—¿Sãap'eda parãpa jã eperã pedee ûri p'anùma? ajida. Iru k'ap'ùade netuara merãtùa bù mãik'aapa k'îra k'awa–ee bù.
21 Mamîda awaraarãpa mãgapachida:
—Eperã k'ap'ùade netuara merãtùa bak'ãri, mãga pedeek'aada ajida. ¿Netuarapa tau p'ãriu beerã pia unupiik'ã? ajida.
Judiorãpa Jesús yiaraa iru p'anadap'edaa
22 Ma t'êepai k'oijara pak'ãri,a judiorãpa fiesta oojida Jerusalén p'uurude. Ma fiesta oopachida k'irãpadait'ee chonaarãwedapema ewari Tachi Ak'õre te awara bùdap'edaa iru–it'ee. 23 Jesús mama nipaji Ak'õre te ãuk'idaa, Salomón Pórtico apatap'edaamãi. 24 Maperã judiorã poro waibùarãpa iru wap'ùra ata chejida mãik'aapa iidijida:
—¿At'ãri tai audú k'îsiapimaa iru bait'eek'ã? ajida. Pù Tachi Ak'õrepa pëida, Mesías pùrã, aweda jaráji.
25 Jesupa p'anauji:
—Naaweda mùa parãmaa mãga jarajida aji. Mamîda ijãada–e paji. Mùa oopari mù Ak'õrepa oopi bùk'a. Oopari ne–inaa eperãarãpa p'oyaa oodak'aa ãchi juadoopa. Ma k'aurépata ijãadaipia bù mù Tachi Ak'õrepa pëida. 26 Mamîda parãpa ijãada–e p'anù, mùchideerã–e perã. 27 Mùchideerãpa mù pedee k'awapata mãik'aapa mùa ãchi k'awapari. Mapa ãchi mù t'êe nipapata. 28 Mùa ãchi o k'achiadeepa k'aripa atapari atuanaadamerã; jîp'a ichita chok'ai p'anapataadamerã Tachi Ak'õre ome. Apidaapa ãra mù juadeepa p'oyaa jãri atada–e. 29 Mù Ak'õrepa ãchimaa mùde ijãapiji. Iru jõmaarã k'ãyaara waibùara bù. Maperãpù apidaapa ãchi p'oyaa jãri atada–e pai iru juadeepa. 30 Mù, mù Ak'õre ome abapai.
—Mù Ak'õrepa mùmaa oopiparida aji, ne–inaa pia chok'ara eperãarãpa p'oyaa oodak'aa ãchi juadoopa. ¿Chisãgà k'aurépata mù bat'a pee k'inia p'anùma aji, mãupa?
33 Ma judiorãpa p'anaujida:
—Pùa ne–inaa pia oo bù k'aurepa pù bat'a pee k'iniada–eda ajida. Mãga oodait'ee pùa Tachi Ak'õre ãpùte ik'achia pedeeda perã. Jaraji pù Tachi Ak'õre ome auk'a, pù eperã bù mîda taik'a.
34 Mãpai Jesupa mãgaji:
—¿Parã ley p'ãdade Tachi Ak'õrepa jara bù–ek'ã:
‘Mùa jaraji parã mùk'a; Ak'õre Waibùarãk'a’? (Salmos 82.6)
35 Tachi Ak'õre Ûraa jõk'aa. Maperã p'oyaa merada–e. Ma ley p'ãdade Ak'õrepa t'âjaraji ‘ak'õre waibùarã mùk'a’ iru pedee ûridap'edaarãmaa, parã chonaarãpa mãùrã awara bùdap'edaa perã iru–it'ee. 36 Tachi Ak'õrepa mù auk'a awara bùji mãik'aapa pëiji na p'ek'au eujãdee. Mãga bùta, ¿sãga parãpa jaradai mùa ik'achia pedee baji Tachi Ak'õre ãpùte, jarak'ãri mù Tachi Ak'õre Warra? 37 Oo–e pùrã mù Ak'õrepa oopi bùk'a, mãgara ijãanáatù. 38 Mamîda oo bù pùrã mù Ak'õrepa oopi bùk'a, mùa jara bù ijãada–e p'anù mîda, ijåatù mùa ooda k'aurepa. Mãgá parãpa wãara k'awaadai mù Tachi Ak'õre ome abapai.
39 Mãga ûridak'ãri, waya iru jita atadait'ee paji. Mamîda Jesús mirudachi.
40 Maap'eda Jesús wãji Jordán to k'îraik'a eeree. Mama Juanpa naaweda poro choopatamãi beeji. 41 Mama bùde eperãarã chok'ara irumaa wãjida mãik'aapa ãchi pitapai mãgapachida:
—Juanpa oo–e paji ne–inaa eperãarãpa p'oyaa oodak'aa ãchi juadoopa, na eperãpa ooparik'a. Mamîda irua wãarata jarapachi na eperãde.
42 Maperãpù mama eperãarã chok'ara Jesude ijãajida.