Jesupa tau p'ãriu bada jùpada
9
1 Maap'eda Jesús awara ãi wã nide unuji eperã tau p'ãriu bù ichi t'oruweda. 2 Ma eperã unudak'ãri, Jesús ome nipapataarãpa iidijida:—Tachi Jarateepari, ¿k'ãare k'aurépata na eperã tau p'ãriu t'ojima? ajida. ¿Ichia p'ek'au k'achia oopata k'aurepa pajik'ã ajida, maa–e pùrã chi ak'õreerãpa p'ek'au k'achia oopata k'aurepa?
3 Jesupa p'anauji:
—Ichi k'aurepa–epù; ichiaba ichi ak'õreerã k'aurepa–epù. Tachi Ak'õrepa mãga t'opiji eperãarãpa ak'ùdamerã iruata ne–inaa pia ooi ma eperã k'ap'ùade. 4 Ãstaawa tachia oodaipia bù mù pëidapa oopi bùk'a, p'ãrik'ua pak'ãri, apidaapa mãga p'oyaa oodak'aa perã. 5 Mù na p'ek'au eujãde bù misa, âdaa pùk'a bù na eujãdepemaarã–it'ee.
6 Mãga jarap'eda, Jesupa eujãde idut'aaji mãik'aapa yooro p'ora ome p'oirat'aap'eda, tau p'ãriu bù taude p'urut'aaji. 7 Mãpai mãgaji:
—Wãpáde aji, pùchi tau sùùde pania t'ùpata Siloé apatamaa. (Siloé jara k'inia bù “Pëida”.)
Mãpai tau p'ãriu bù wãji ichi tau sùùde. Ãpùtee chek'ãri, pia unu beeji. 8 T'êepai ma eperã k'ait'a p'anadap'edaarãpa mãik'aapa iru ne–iidimaa unudap'edaarãpa mãgapachida:
—¿Nãgà chi ne–inaa iidimaa su–ak'ù bapariida–ek'ã? apachida.
9 Ûk'uruurãpa mãgapachida:
—Jã ichipù.
Awaraarãpa mãgapachida:
—Jã iru–epù, iru k'îra papaa bù mîda.
Mamîda ichia p'anauji:
—Mùpù.
10 Mãpai iidijida:
—¿Sãga ârá pùa unu bùma? ajida.
11 Ichia p'anauji:
—Eperã t'âjarapata Jesupa yooro ma–ãri p'oirap'eda, mù taude p'urut'aajida aji, mãik'aapa mãgaji: “Wåji pùchi tau sùùde pania t'ùpata Siloé apatamaa.” Aramãgá mù wãjida aji, mãik'aapa mùchi tau sùùt'aak'ãri, unuji.
12 Mãpai ãchia irumaa iidijida:
—¿Sãma bùma ajida, ma eperã?
Ichia p'anauji:
—K'awa–e bùda aji.
Fariseorãpa tau p'ãriu badamaa iididap'edaa
13-14 Jesupa ma yooro ook'ãri p'uruit'ee tau p'ãriu bada taude, âipata ewate paji. Maperã judiorã poro waibùarãpa ma tau p'ãriu bada ateejida fariseorãmaa. 15 Mãpai ãchia iidijida:
—¿Ârá sãga unu bùma? ajida.
Ichia p'anauji:
—Yooro mù taude p'urujida aji. Maap'eda mùa sùùt'aaji. Mapa ârá pia unu bùda aji.
16 Fariseorã ûk'uruurãpa mãgajida:
—Jãgà eperã Tachi Ak'õrepa pëida–eda ajida, âipata ewate mãga ooda perã. ¿Tachi Ak'õre Ûraa p'ãdade jara bù–ek'ã ajida, âipata ewate mimiadaik'araa bù?
Mamîda awaraarãpa mãgapachida:
—¿Sãgá eperã p'ek'au k'achia ooparipa nãgee ne–inaa pia ooyama? ajida.
Mãgá ãchi k'îsia awara–awaraadachida mãik'aapa ãchi k'õp'ãyoorã ome aupedee jõnapachida. 17 Maap'eda waya iidijida naaweda tau p'ãriu badamaa:
—Pùa ¿k'ãata k'îsia bùma ajida, jã eperãpa pù tau jùpadade?
Ichia p'anauji:
—Mù–it'ee iru Ak'õre pedee jaraparida aji.
18 Mamîda ma judiorãpa ijãada–e paji ma eperã wãara naaweda tau p'ãriu baji mãik'aapa ârá pia unu bù. Mapa chi ak'õre chi nawe ome t'â pëijida. 19 Mãpai iidijida:
—¿Na parã warrak'ã? ajida. ¿Parãpa jaradaik'ã ichi tau p'ãriu t'oda? ¿Sãga ârá pia unu bùma? ajida.
20 Chi ak'õreerãpa p'anaujida:
—Taipa k'awa p'anùda ajida, nãgà tai warra mãik'aapa k'awa p'anù ichi tau p'ãriu t'oda. 21 Mamîda k'awada–e ârá sãga ichi taupa unu bù. Ichiaba k'awada–e k'aipa ichi taupa unupiji. Iidítù irumaa. Iru chona bairã, ichi itu jarayada ajida.
22 Chi ak'õreerãpa mãga jarajida judiorã waidoopa. Aù naaweda judiorã poro waibùarãpa pedeeteejida chi eperã Jesús Mesías aru pùrã, waa t'îupida–e pait'ee Tachi Ak'õre Ûraa jarateepata tede. 23 Mapa chi ak'õreerãpa jarajida: “Ichimaa iidítù. Iru chona bùda” ajida.
24 Maperã judiorã poro waibùarãpa waya t'â pëijida ma naaweda tau p'ãriu bada mãik'aapa mãgajida:
—Wãara jarapáde ajida, Tachi Ak'õre k'îrapite. Taipa k'awa p'anùda ajida, jã eperã p'ek'au k'achia ooyaa bapari.
25 Ichia p'anauji:
—Mùa k'awa–e bùda aji, ma eperãpa p'ek'au k'achia oopari wa mãga–e. Nãgapai k'awa bù. Mù tau p'ãriu baji. Mamîda ârá pia unu bùda aji.
26 Waya iidijida:
—¿K'ãata oojima? ajida. ¿Sãga pù tau pia unupijima? ajida.
27 Ichia p'anauji:
—Mùa parãmaa jarajida aji. Mamîda mù pedee ijãada–e p'anù. ¿Waya jarapi k'inia p'anùk'ã? ¿Parãpa ichiaba irude ijãa k'inia p'anùk'ã? aji.
28 Mãga ûridak'ãri, ik'achia pedee p'aneejida ma tau p'ãriu badamaa:
—¡Pùata jã eperãpa jaratee bùde ijãa bùda! ajida. ¡Jõdee taipa Moisepa p'ãdade ijãapata! 29 Taipa k'awa p'anùda ajida, Tachi Ak'õrepa Moisemaa pedeeda. Mamîda k'awada–eda ajida, sãmãik'aapa cheji jã eperã.
30 Ichia p'anauji:
—¿Sãga? ¡Parãpa k'awada–eda a p'anù sãmãik'aapa cheji! ¡Mamîda irua mù tau unupiji! 31 Jõmaarãpa k'awa p'anù Tachi Ak'õrepa p'ek'au k'achia ooyaa beerã pedee ûrik'aa. Mamîda ûripari ichimaa ùt'aa t'âpataarã pedee, mãùrãpa irua k'inia bùk'a oopata perã. 32 Na p'ek'au eujã beedak'ãriipa waide ûridak'aa eperãpa tau p'ãriu bee pia unupida. 33 Ma eperã Tachi Ak'õrepa pëi–e pada paara, nãgee ne–inaa oo–e pak'ajida aji.
34 Mãpai ma fariseorã k'îraudachida mãik'aapa mãgajida:
—Pùchi t'oruweda p'ek'au k'achia ooyaa bapari. Mãga bùta, ¿taimaa jaratee k'inia bùk'ã? ajida.
Maap'eda taawaa jëret'aajida.
Tau p'ãriu pùk'a p'anùùrãpa Tachi Ak'õre k'awada–e
35 Jesupa k'awaaji mãgà tau p'ãriu bada taawaa jëret'aadap'edaa. T'êepai iru ome unuk'ãri, iidiji:
—¿Pùa Eperã Ak'õre Truadepemade ijãa bùk'ã? aji.
36 Ichia p'anauji:
—Mùmaa jarapáde aji, k'aita pùa jara bù. Mùa irude ijãait'ee.
37 Jesupa mãgaji:
—Pùa mãgà @unuda; mùda aji, pù ome pedeemaa bù.
38 Mãpai Jesús k'îrapite bedabaidachi mãik'aapa mãgaji:
—Tachi Waibùa, mùa ijãa bùda aji.
39 Ma t'êepai Jesupa mãgaji:
—Mù na p'ek'au eujãdee chejida aji, eperãarã ak'ùde, k'awaait'ee wãara ijãa p'anù wa ijãada–e p'anù. Chejida aji, Tachi Ak'õre k'awapiit'ee tau p'ãriu pùk'a beerãmaa, ãchia iru k'awaadamerã. Ichiaba cheji ak'ùpiit'ee tau âdaa pùk'a beerãmaa, ãchia Tachi Ak'õre wãara k'awada–e p'anù.
40 Fariseorã ûk'uruurãpa mãga ûridak'ãri, iidijida:
—¿K'ãata jara k'inia bùma? ajida. ¿Tai jida Tachi Ak'õre k'awada–e p'anùk'ã? ajida.
41 Jesupa p'anauji:
—Parã mãga p'anadap'edaa paara, apidaapa parã ùmùateeda–e pak'aji. Mamîda parãpa jarapata Tachi Ak'õre wãara k'awa p'anù. Mãga jaradak'ãri, p'ek'au k'achia oomaa p'anù, seewa jara p'anù perã.