8
1 Mamîda Jesús wãji Olivo Eedee. 2 Aù norema tap'eda, waya cheji Tachi Ak'õre tedee. Mama pachek'ãri, eperãarã chok'ara chejida irumaa. Mapa iru su–ak'ù beeji mãik'aapa jarateemaa beeji.Wêra chi k'ima–ee ome k'ãida
3 Moisepa p'ãda jarateepataarãpa fariseorã ome aneejida wêra unu atadap'edaa p'ek'au oomaa bù. Eperãarã taide ata bùjida 4 mãik'aapa Jesumaa mãgajida:
—Tachi Jarateepari, taipa na wêra miak'ãi bùta unujidada ajida, awaraa ome nâbù. 5 Ak'õre Ûraa p'ãdade Moisepa jaraji nãgee wêraarã mãupa bat'a peet'aadamerã.a Mamîda taipa k'awaa k'inia p'anù ¿pùa k'ãata jara bù?
6 Ãchia mãga iidijida Jesupa Moisepa p'ãda merai jîak'aapa. Mãgá ùmùateek'ajida. Mamîda Jesupa made t'îupi–e paji. Edaa âjaabaip'eda, p'ãmaa beeji yooro p'orade ichi jua k'âpa. 7 Mãpai ãchia iidi jõnùde Jesús jîp'a su–ak'ù beeji mãik'aapa mãgaji:
—Naapùara ichimaa mãupa bat'apáde aji, parãdepema chi p'ek'au k'achia wêe bùpa.
8 Maap'eda waya edaa âjaabaip'eda, yooro p'orade waya p'ãmaa beeji ichi jua k'âpa. 9 Mãgà pedee ûridak'ãri, jõmaweda aba–abaa uchia wãdapa erreudachida. Naapùara wãjida chonaarã, maap'eda apemaarã. Jesús ituaba beeji mãgà wêra ome. 10 Mapa Jesús jîp'a su–ak'ù beep'eda, irumaa iidiji:
—¿Sãma p'anùma? aji. ¿Apidaapa pù pee k'iniada–e pajik'ã? aji.
11 Ma wêrapa mãgaji:
—Apidaapa, Tachi Waibùa.
Jesupa mãgaji:
—Mùa pida pù pee k'inia–eda aji. Ârá wãpáde aji, mãik'aapa âraweda p'ek'au k'achia oo amáaji.]
Jesús âdaa pùk'a bù na p'ek'au eujãdepemaarã–it'ee
12 Mãpai Jesupa waya jarateemaa beeji eperãarãmaa:
—Mùda aji, âdaa pùk'a bù na p'ek'au eujãdepemaarã–it'ee, mùa ãramaa Tachi Ak'õre o ak'ùpipari perã. Mùde ijãa bù p'ãriu pùk'a bùde nipa–e pait'ee, Tachi Ak'õre k'awa–ee. Ma k'ãyaara ichita chok'ai bapariit'ee, âdaa pùk'a bùde Tachi Ak'õre ode nipapari perã.
13 Mãpai fariseorãpa irumaa mãgajida:
—Pùchi k'îsiadoopa mãgà pedee jaramaa bùda ajida. Awaraa wê–e perã auk'a jarait'ee, pari pù pedeemaa bùda ajida.
14 Jesupa p'anauji:
—Mù pedeek'ãri, wãarata jarapari. Mùa k'awa bùda aji, sãmãik'aapa cheda mãik'aapa sãmaa wãit'ee. Jõdee parãpa mãga k'awada–e p'anù. 15 Awaraarãpa oo p'anù ârùpai ak'ùpata jaradait'ee pia wa k'achia. Jõdee mùa mãgá ak'ù–epù. 16 Mamîda eperãpa oo bù ak'ùk'ãri, mùa jararu pùrã pia wa k'achia, wãarata jarait'ee, mù pëidapa mù k'aripapari perã. Mùchi ituabaapa eperãarãpa oopata mãgá ak'ùk'aa. 17 Pãchi ley p'ãdade jara bù eperã omeerãpa ne–inaa unudap'edaa auk'a jaradak'ãri, ma jarada wãara. Auk'a bù mù ome. 18 Mùchia oo bù jarapari mãik'aapa mù Ak'õre, mù pëidapa, auk'a jarapari.
19 Mãpai ãchia iidijida:
—¿Sãma bùma ajida, pù Ak'õre?
Jesupa p'anauji:
—Parãpa mù wãara k'awada–eda aji. Mù Ak'õre jida wãara k'awada–e. Mù wãara k'awa p'anadap'edaa paara, mù Ak'õre jida wãara k'awa p'anak'ajidada aji.
20 Jesupa mãga jaraji, Tachi Ak'õre tede eperãarãpa ne–inaa iru–it'ee tee chedap'edaa ùapatamãi jaratee bù misa. Eperãarã chok'ara mama wãyaa wãjida mîda, apidaapa iru jitada–e paji irua jarateeda k'aurepa, ewari Tachi Ak'õrepa awara bùda ma–it'ee waide pa–e bada perã.
Jesupa ichi wãit'ee bùmaa p'oyaa wãda–eda ada
21 Mãpai waya Jesupa mãgaji:
—Mù ãyaa wãit'eeda aji. Parãpa mù jùrùdait'ee. Mamîda mù unuda–e pait'ee. Atuadait'ee pãchia p'ek'au k'achia oopata k'aurepa. Mapa mù wãit'ee bùmaa parã p'oyaa wãda–eda aji.
22 Mãga ûridak'ãri, judiorã poroorã pedee para beeji:
—Tachi p'oyaa wãda–eda a bù, iru wãit'ee bùmaa. ¿Ichi juadoopa piuit'ee–epaama? aji.
23 Mãpai Jesupa ãchimaa mãgaji:
—Parã ek'aripemaarãda aji. Mamîda mù ùt'aripema. Parã na p'ek'au eujãdepema. Mamîda mù na p'ek'au eujãdepema–e. 24 Mapa mùa jaraji parã atuadait'ee pãchia p'ek'au k'achia oopata k'aurepa. Wãara mãgá atuadait'eeda aji, ijãada–e p'anù pùrã Mùta jõmaarã Ak'õre Waibùa. Mùa aupaita eperãarãpa p'ek'au k'achia oopata wêpapii.
25 Mãpai irumaa iidijida:
—Pù, ¿k'aima? ajida.
Jesupa p'anauji:
—Mù chedak'ãriipa, parãmaa mãga jaraparida aji. 26 Mùa unupari pãchia ne–inaa k'achia oopata mãik'aapa pedee chok'araapa parã ùmùateek'aji. Mamîda mãga oo–e pait'ee. Jîp'a jarait'ee mù pëidapa jarapi bùk'a na p'ek'au eujãdepemaarãmaa. Irua ichita wãarata jaraparida aji.
—Parãpa Eperã Ak'õre Truadepema kurusode jiradak'ãri peedait'ee, k'awaadait'ee Mùta Tachi Ak'õrepa pëida. Ma awara k'awaadait'ee mùa ne–inaa jõma oopari irua oopi bùk'a mãik'aapa jõma jarapari irua jarapi bùk'a. 29 Mù pëida na p'ek'au eujãdee mù ome baparida aji. Mù ituaba atabëi–epù, irua k'inia bùk'a oopari perã.
30 Jesupa mãga jarak'ãri, eperãarã chok'ara irude ijãajida.
Abrahamdeepa uchiadap'edaada apatap'edaarã
31 Mãpai Jesupa judiorã *ichide ijãadap'edaarãmaa mãgaji:
—Parãpa mùa ûraa bùk'a *oo p'anù pùrã, wãara mù k'õp'ãyoorã. 32 Mãga ooruta pùrã, k'awaadait'ee Tachi Ak'õrepa wãarata jara pëida mãik'aapa ma k'aurepa waa esclavoorã p'anada–e pait'eeda aji.
33 Ãchia p'anaujida:
—Tai Abrahamdeepa uchiadap'edaarã. Mapa tai esclavoorã–epù. Apidaa jua ek'ari p'anadak'aa. Tachi Ak'õre juadepai p'anapata. ¿Sãap'eda taimaa jara cheruma ajida, waa esclavoorã p'anada–e pait'ee?
34 Jesupa p'anauji:
—Mùa wãarata jararu. Jõmaweda p'ek'au k'achia oopataarã esclavoorãk'a p'anùda aji, p'ek'au k'achia jua ek'ari p'anapata perã. 35 K'îsiadáma nãgùde. Esclavo ichita ba–e chipari tede. Jõdee ma te chipari warra ichita bapari ma tede, ichi ak'õrede perã. 36 Mapa Tachi Ak'õre Warrapa parã p'ek'au k'achia jua ek'ariipa uchia ataru pùrã, wãara uchiadait'ee. 37 Mùa k'awa bù parã Abrahamdeepa uchiadap'edaarã. Mamîda mù peet'aa k'inia p'anù, mù ûraa wãara ijãa k'iniada–e p'anadairã. 38 Mùa jaraparida aji, mù Ak'õrepa mùmaa ak'ùpida. Jõdee parãpa oopata pãchi ak'õrepa jarateedak'a.
39 Mãpai ãchia mãgajida:
—¡Tai ak'õre Abrahamda! ajida.
Mamîda Jesupa p'anauji:
—Parã wãara Abraham warrarã pada paara, irua oodak'a ook'ajidada aji. 40 Mamîda mãga ooda–e p'anù. Mùa parãmaa Tachi Ak'õre wãarata jaraji, irua mùmaa mãga jarada perã. Mamîda ârá parãpa mù peet'aa k'inia p'anù. Abrahampa mãga oo–e paji Ak'õre pedee jarapataarã ome. 41 Parãpa ne–inaa k'achia oomaa p'anùda aji, pãchi ak'õrepa ooparik'a.
Ãchia mãgajida:
—¡Tai awaraa ak'õredeepa uchiada–e pajida! ajida. ¡Ak'õre abapaita iru p'anùda! ajida. ¡Mãgà Tachi Ak'õre!
42 Jesupa p'anauji:
—Tachi Ak'õre wãara parã ak'õre pada paara, mù k'inia iru p'anak'ajidada aji, mù Tachi Ak'õremãiipa cheda perã. Mapa mù nama bù. Mùchi k'îradoopa nama che–e paji. Tachi Ak'õrépata mù pëiji. 43 ¿Parãpa mùa jaratee bù at'ãri k'awada–e p'anùk'ã? Parãpa mù ûraa ûri k'iniada–e p'anù. Maperãpù mùa jara bù k'awada–e p'anù. 44 Parã ak'õre Netuara Poro Waibùa. Ichideerã perã ichia oopi k'iniata oo k'inia p'anù. Na eujã beedak'ãriipa ichia eperãarã peeyaa bapari. Ma awara ne–inaa wãara unuamaa iru bapari, wãarata k'awak'aa perã. Seewa jarapari wãarak'a; mãga bapari. Ichi seewa–idaa beerã ak'õre, seewa–idaa bapari perã. 45 Mamîda mùa Tachi Ak'õre wãarata jarak'ãri, parãpa mù pedee ijãadak'aa. 46 ¿K'aipa ak'ùpii mùa p'ek'au k'achia aba pida ooda? ¡Mãga p'oyaa ooda–e! Mãga bùta, mùa wãarata jarak'ãri, ¿parãpa sãap'eda mù pedee ijãada–ema? 47 Tachi Ak'õredeerãpa iru Ûraa ûri k'inia p'anapata. Mamîda parã Ak'õredeerã–e *perã, iru ûraa ûri k'iniadak'aada aji.
Abraham t'oi naaweda, Jesús bapachi
48 Mãpai judiorã poroorãpa Jesumaa mãgajida:
—¿Pù Samariadepema–ek'ã?b ajida. Ma awara pùchi k'ap'ùade netuara merãtùa bùda ajida.
49 Jesupa p'anauji:
—Mù k'ap'ùade netuara wêe bùda aji. Ma k'ãyaara mùa mù Ak'õre waawee bapari. Mamîda parãpa mù waaweedak'aa. 50 Mùa jùrù–e bù eperãarãpa mù t'o p'anadamerã, mù Ak'õrepa mãga k'inia bù mîda. Iruata ak'ù bù parãpa oopata mãik'aapa jarait'ee pia wa k'achia. 51 Mùa wãarata jararu. Eperãpa mù ûraa ûrip'eda, ooru pùrã ma ûraade jara bùk'a, piu–e pait'eeda aji.
52 Mãpai ma judiorãpa mãgajida:
—¡Ârapù k'awa p'anù wãara pù k'ap'ùade netuara merãtùa bù! Abraham mãik'aapa Tachi Ak'õre pedee jarapataarã jõmaweda piujida. Mamîda pùa jara bù pù ûraa jara bùk'a oopari piu–e pait'ee. 53 Mãgara, ¿pù waibùara bùk'ã tai chonaarãwedapema piuda Abraham k'ãyaara? ¿Waibùara bùk'ã Tachi Ak'õre pedee jarapataarã piudap'edaa k'ãyaara? ¿K'ãata k'inia bùma ajida, taipa k'îsiadamerã pùde?
54 Jesupa p'anauji:
—Mùa jarada paara mù waibùara bù awaraarã k'ãyaara, pari mãga jarak'aji. Mamîda mù Ak'õrépata mãga jarapari. Mãgà Ak'õre parãpa “Tachi Ak'õre” apata. 55 Mamîda parãpa Tachi Ak'õre k'awada–e p'anù. Jõdee mùa iru wãara k'awa bù. Mùa iru k'awa–e bùda ada paara, seewa–idaa bak'aji parã jîak'a. Mamîda mãga–e. Mùa wãara iru k'awa bù mãik'aapa oopari irua jara bùk'a. 56 Pãchi chonaarãwedapema Abraham o–îadachi mù na eujãdee cheda unuit'ee bada perã. Wãara mãga unuji mãik'aapa o–îa beejida aji.
57 Mãpai ãchia mãgajida Jesumaa:
—Pù waide cincuenta año wêe bù. Mãga bùta, ¿Abraham unujida a bùk'ã? ajida.
58 Jesupa p'anauji:
—Mùa wãarata jararu. Abraham t'oi naaweda, Mùta bapachida aji.
59 Mãga ûridak'ãri, ãchia mãu p'e atajida bat'adait'ee Jesumaa, ichi Tachi Ak'õreda ada perã. Mamîda Jesús mirudachi mãik'aapa Tachi Ak'õre tedeepa uchiadachi.