Jesús âpemaarãpa irude ijãada–e padap'edaa
7
1 Ma t'êepai Jesús nipaji Galilea eujãde. Judea eujãde ba k'inia–e paji, judiorã poro waibùarãpa iru jùrù p'anadap'edaa perã peepit'aadait'ee.—Nama beenaapáde ajida. Wãpáde ajida, Judea eujãdee, arapemaarã pùde ijãapataarãpa ichiaba pùa ne–inaa oo bù ak'ùdamerã. 4 Eperãpa ichia oo bù merak'aa ma oo bù k'awapi k'inia bù pùrã. Mapa pùa ne–inaa oo bù nama jõmaarãmaa ak'ùpinapáde aji.
5 Mãga jarajida chi âpemaarãpa pida ijãada–e p'anadap'edaa perã iru Tachi Ak'õrepa pëida. 6 Mãpai Jesupa mãgaji:
—Ewari Tachi Ak'õrepa awara bùda ma–it'ee waide pa–e bùda aji. Mamîda parã wã k'inia p'anadak'ãri, wãdaipia bù. 7 Na p'ek'au eujãdepemaarãpa parã k'îra unuamaa iru p'anadak'aada aji. Mamîda mù k'îra unuamaa iru p'anapata, mùa jarapari perã ãchia k'achia oopata. 8 Wåtù fiestadee. Mù wã–eda aji, waide mù ewari pa–e perã.
9 Mãga jarap'eda, beeji Galilea eujãde.
Jesús fiesta Rancho Oopatade bada
10 Mamîda chi âpemaarã wãdap'edaa t'êepai, Jesús ichiaba wãji ma fiestadee. Mamîda awaraarã ome wã–e paji. Ituaba miru wãji, chi k'õp'ãyoorã ome. 11 Mãùmisa judiorã fiestade p'anadap'edaarãpa Jesús jùrùpachida mãik'aapa mãgapachida:
—¿Sãma bùma apachida, jã eperã?
12 Eperãarã chok'ara ãchi pitapai osausawaa pedeepachida iru ãpùte. Ûk'uruurãpa mãgapachida:
—Jã eperã t'ãri pia bapari.
Mamîda awaraarãpa mãgapachida:
—Jã eperãpa eperãarã k'ûramaa nipapari.
13 Mamîda judiorã poroorã waidoopa, jõmaarã taide apidaapa mãga jarada–e paji.
14 Ma fiesta tomia esa–auk'a wãyaa wãde Jesús t'îuji Tachi Ak'õre tede mãik'aapa jarateemaa beeji. 15 Arii p'anadap'edaa judiorã ak'ùtrua para beeji mãik'aapa iidijida:
—¿Sãgapù na eperãpa Tachi Ak'õre Ûraa audú k'awa bùma ajida, estudia–e padata awaraarãk'a?
16 Jesupa p'anauji:
—Mùchi k'îsiadoopa jaratee–e bùda aji. Mùa jaratee bù mù pëidapa jarateepi bùk'a. 17 Eperãpa oo k'inia bù pùrã Tachi Ak'õrepa oopi bùk'a, ma eperãpa k'awaait'ee mùa wãara jarateemaa bù Ak'õre Ûraa, maa–e pùrã wãara jarateemaa bù mùchi k'îsiadoopa. 18 Eperãpa ichi k'îsiadoopa jarateek'ãri, mãga oopari awaraarãpa ichi t'o p'anadamerã. Mamîda eperãpa jarateek'ãri awaraarãpa Tachi Ak'õre Ûraa pia ak'ù p'anapataadamerã, mãgùpa wãarata jarateepari. Seewa jarak'aa mãik'aapa eperãarã k'ûrak'aa.
19 +Moisepa parã chonaarãmaa Ak'õre Ûraa p'ã teeji. ¿Wãara–ek'ã? Mamîda apidaapa ichita oodak'aa ma ûraade jara bùk'a. ¿Sãap'eda parãpa mù peet'aa k'inia p'anùma? aji.
20 Arii p'anadap'edaarãpa mãgajida:
—¿Netuara pù k'ap'ùade merãtùa bù–ek'ã? ajida. ¿K'aipa pù jùrù bùma ajida, peet'aait'ee?
21 Jesupa mãgaji:
—Parãpa ijãa p'anù âipata ewate mimiadaik'araa bùda aji, Moisepa p'ãdade mãga jara bairã. Mapa parã jõmaweda p'era pùk'a para baji, âipata ewate mùa ook'ãri ne–inaa eperãarãpa p'oyaa oodak'aa ãchi juadoopa. 22 Mamîda âipata ewate parãpa paara ne–inaa oopata. Pãchi ùmùk'îra warrarã k'ap'ùade tauchaa bùpata. Mãga oopata Moisepa jarada perã mãga oodamerã. (Wãara Moisepa naapùara mãga oopi–e paji. Iru t'oi naaweda, parã chonaarãpa mãga oopachida.) 23 Âipata ewate parãpa mãga oopata, oo k'inia p'anadairã Moisepa p'ãdade jara bùk'a. Mãga bùta, ¿sãap'eda k'îrau p'anùma aji, âipata ewate mùa eperã jùpada perã? 24 Mùa oo bù ârùpai ak'ùnáatù jaradait'ee pia wa k'achia. Ak'àtù Tachi Ak'õrepa mù ak'ùparik'a, iruapai jarapii perã chisãgà pia mãik'aapa chisãgà k'achia.
Jesús ùt'ariipa pëida
25 Maapai Jerusalén p'uurudepemaarãpa iidi para beeji:
—¿Nãgà eperã–ek'ã ajida, tachi poroorãpa jùrùmaa p'anù peet'aadait'ee? 26 Jãma jõmaarã taide pedeemaa bù. Mamîda apidaapa jarada–e p'anù iru pedeenaamerã. ¿Tachi poroorãpa ijãa p'anùk'ã na eperã Mesías, Tachi Ak'õrepa pëida tachi k'aripamerã? 27 Tachia k'awa p'anù sãmapema na eperã. Mamîda Mesías chek'ãri, apidaapa k'awada–e pait'ee iru sãmapema.
28 Mãùmisa Tachi Ak'õre tede Jesupa jarateemaa baji. Mãùrã pedee ûrik'ãri, Jesupa golpe mãgaji:
—Wãara parãpa mù k'awa p'anù mãik'aapa k'awa p'anù mù sãmapema. Mamîda mùchi k'îradoopa che–e bùda aji. Abaapa mù pëiji. Mãgà wãara bapari. Mamîda parãpa iru k'awada–e p'anù. 29 Jõdee mùa iru k'awa bù, iru baparimãiipa cheda perã. Iruata mù pëijida aji.
30 Mãga ûridak'ãri, Jesús jita atadait'ee paji. Mamîda p'oyaada–e paji, at'ãri iru ewarimaa pa–e bada perã. 31 Mãga baji mîda judiorã poroorã ome, eperãarã chok'ara Jesude ijãajida mãik'aapa mãgapachida:
—Mesías chek'ãri, ¿ne–inaa piara ooik'ã ajida, na eperãpa oo bù k'ãyaara?
Fariseorãpa Jesús jita ata k'inia p'anadap'edaa
32 Fariseorãpa ûrijida eperãarã mãgá pedee p'anù. Mapa ma fariseorãpa p'aareerã poroorã ome pëijida Tachi Ak'õre te jâapataarã Jesús jita atadamerã. 33 Mamîda Jesupa mãgaji:
—Mù parã ome mak'ùara taarã–eda aji. Ma t'êepai mù waya wãit'ee mù pëida baparimaa. 34 Parãpa mù jùrùdayada aji. Mamîda mù unuda–e pait'ee, p'oyaa wãdak'aa perã mù wãit'ee bùmaa.
35 Mãpai judiorã poroorã pedee para beeji:
—¿Sãmapù wãit'eema ajida na eperã, tachia p'oyaa unuda–e pait'ee? ¿Tok'esaa wãit'ee–epaa jarateede judiorãmaa, k'îra tewaraarã p'uurudepemaarãmaa, maa–e pùrã judio–eerãmaa? 36 ¿K'ãata jara k'inia bùma ajida, irua jarak'ãri: “Parãpa mù jùrùdait'ee. Mamîda mù unuda–e pait'ee, p'oyaa wãdak'aa perã mù wãit'ee bùmaa”?
Ak'õre Jaurepa eperãarã chok'ai p'anapipari
37 Fiesta Rancho Oopata jõ wãda ewate, ma ewari waibùara paji. Ma ewate Jesús bainâ beeji mãik'aapa golpe pedeeji:
—Apida opisia bù pùrã, mùmaa chepáde aji, tode. 38 Chi mùde ijãa bù bait'ee Tachi Ak'õre Ûraa p'ãdade jara bùk'a:
‘Eperã t'ãrideepa to chak'ek'a jîchooyada aji, paniapa eperãarã chok'ai p'anapiparik'a.’ (Isaías 55.1)
39 Ma pedee “paniapa eperãarã chok'ai p'anapiparida” ak'ãri, Jesupa jara k'inia baji Tachi Ak'õre Jaure, mãgà pëiit'ee bada perã irude ijãapataarãmaa. Mamîda Jesupa mãga jarak'ãri, waide Ak'õre Jaure pëi–e paji, ichi waide ùt'aa wã–e bada perã.
Eperãarã k'îsia awara–awaraadaidap'edaa
40 Ma pedee ûridak'ãri, eperãarã ûk'uruurãpa mãgapachida:
—Wãara, na eperã Ak'õre pedee jarapari.
41 Awaraarãpa mãgapachida:
—Na Mesías, Tachi Ak'õrepa pëida eperãarã rey pamerã.
Mamîda awaraarãpa mãgapachida:
—Mãga–epù. ¿Sãga Mesías adaima? Iru Galilea eujãdepema. Galilea eujãdeepa Mesías uchia–e pait'ee. 42 ¿Tachi Ak'õre Ûraa p'ãdade jara bù–ek'ã ajida, Mesías uchiait'ee Rey David ëreerãdeepa mãik'aapa t'oit'ee Belén p'uurudea Rey David t'odamãi?
43 Mapa eperãarã k'îsia awara–awaraadachida. Ûk'uruurãpa ijãajida Jesús Tachi Ak'õrepa pëida; ûk'uru ijãadak'aa paji. 44 Mãùrãpa Jesús jita ata k'inia p'anajida. Mamîda apidaapa p'oyaa ooda–e paji.
Judiorã poroorãpa Jesude ijãada–e p'anadap'edaa
45 Mãpai Tachi Ak'õre te jâapataarã ãchi pëidap'edaarãmaa chejida. Pachedak'ãri, fariseorãpa mãik'aapa p'aareerã poroorãpa iidijida:
—¿Sãap'eda Jesús aneeda–e pajima? ajida.
46 Ma te jâapataarãpa p'anaujida:
—¡Eperã apida pedeeda–eda ajida, mãgà eperãk'a!
47 Mãpai fariseorãpa mãgajida:
—¿Parãpa pida irumaa k'ûrapijidak'ã? ajida. 48 ¿Sãma tachi poroorãpa maa–e pùrã tai fariseorãpa irude ijãa p'anùma? ajida. ¡Mãga oodak'aa! 49 Jã eperãarãpa k'awadak'aa Tachi Ak'õrepa Moisemaa ûraa p'ãpida, irude ijãadak'aa perã. Mapa Ak'õrepa ãra k'achia ooit'ee.
50 Mãpai fariseo Jesumaa naaweda wã bada, Nicodemopa mãgaji:
51 —¿Tachi Ak'õre Ûraa p'ãdade nãga jara bù–ek'ã? aji. Ûridaipia bù eperãpa jara bù mãik'aapa k'awaadaipia bù irua oo bù, jaradai naaweda ma eperã pia wa k'achia.
52 Ãchia p'anaujida:
—¿Pù jida ichiaba Galilea eujãdepemak'ã? ajida. Tachi Ak'õre Ûraa p'ãda pia léeji. Mãga ooru pùrã, k'awaait'ee Tachi Ak'õre pedee jarapataarã Galilea eujãdeepa uchiadak'aa.
53 [Mãpai jõmaweda wãjida ãchi te chaa.