Jesupa eperãarã cinco mil nek'opida
(Mateo 14.13-21; Marcos 6.30-44; Lucas 9.10-17)
6
1 Ma t'êepai, Jesús wãji Galilea Lago k'îraik'a eeree. Mãgà lago ichiaba t'âjarapata Tiberíades. 2 Eperãarã chok'ara iru t'êe nipapachida, irua k'ayaa beerã jùpada perã mãik'aapa ãrapa unudap'edaa perã irua oo bù ne–inaa eperãarãpa p'oyaa oodak'aa ãchi juadoopa. 3 Mãpai Jesús wãji ee nok'odee mãik'aapa su–ak'ù banaji chi k'õp'ãyoorã ome. 4 Judiorã Pascua fiesta ârù pa baji. 5 Jesupa unuk'ãri ma eperãarã chok'ara ichi t'êe chewãda, Felipemaa mãgaji:—¿Sãma chik'o netodait'eema aji, na eperãarã jõmaweda nek'odamerã?
6 Jesupa k'awa baji k'ãata ooit'ee. Mapa iidiji k'awaait'ee k'ãata p'anaui Felipepa. 7 Felipepa p'anauji:
—Doscientos denariopaa pida araa–e pak'aji, pan netodait'ee ma–ãri ma–ãria pida k'odamerã.
8 Mãpai Jesús k'õp'ãyo Andrés, Simón Pedro âpemapa mãgaji:
9 —Nama bùda aji, warra aba. Ichia iru bùda aji, pan cebadadee ooda joisomaa mãik'aapa chik'o omé. Mamîda, ¿k'ãata araayama aji, na eperãarã see nâbù–it'ee?
10 Jesupa p'anauji:
—Jarátù jõmaweda su–ak'ù p'aneedamerã.
Mama p'ûajara jep'eda paraaji. Mama su–ak'ù p'aneejida. Ùmùk'îraarã cinco mil paji. 11 Jesupa ma pan jita atap'eda, ùt'aa t'âji gracias jarait'ee mãik'aapa jõmaarãmaa jedepiji. Ichiaba mãga ooji chik'o ome. 12 Jõmaweda bi jãwaa p'aneedak'ãri, Jesupa chi k'õp'ãyoorãmaa mãgaji:
—Chi nâbeeda p'e atadapáde aji, maarepida ãrinaamerã.
13 Ãrapa ipurujida k'oraa docena aba ma pan joisomaadeepa. 14 Eperãarãpa unudak'ãri Jesupa oo bù ma ne–inaa eperãarãpa p'oyaa oodak'aa ãchi juadoopa, jarapachida:
—Wãara nata Ak'õre pedee jarapari tachia nù p'anadap'edaa chemerã na p'ek'au eujãdee. 15 Mamîda Jesupa k'awa bada perã ichi rey papi k'inia p'anù, ee nok'odee waya wãji, ituaba ba k'inia bada perã.
Jesús pania ârù t'ùa nipada
(Mateo 14.22-27; Marcos 6.45-52)
16 P'ãriupodopa Jesús k'õp'ãyoorã lago idee chejida 17 mãik'aapa barcode bataudap'eda, Capernaum p'uurudee wãjida. P'ãriudaik'ãri, waide Jesús pache–e baji. 18 Mãgá ãchi ituaba wãrutade p'usara t'o nâbeeji, nãu golpe p'ua nâbada perã. 19 Tok'esaa wã nidade kilometros joisomaa maa–e pùrã seis, unujida Jesús barco k'ait'a t'ùa cheru pania ârù. Mãpai ãchi p'eradachida. 20 Mãpai irua mãgaji:
—¡P'eranáatù! ¡Mùda! aji.
21 Ãchia mãga ûridak'ãri, o–îa iru batau atajida. Taarã–ee panajida ãchi wã nipadap'edaamaa.
Eperãarãpa Jesús jùrùdap'edaa
22 Aù norema eperãarã lago k'îraik'a eere p'anadap'edaarãpa k'awaajida Jesús k'õp'ãyoorã wãdap'edaa barco mama badade. Ichiaba k'awaajida Jesús ãra ome wã–e pada. 23 Mãga nùde barco pachejida Tiberíades p'uurudeepa, Jesupa Ak'õremaa gracias jarap'eda, eperãarãpa pan k'odap'edaa k'ait'a. 24 Mãgá eperãarãpa Jesús chi k'õp'ãyoorã ome mama unuda–e pak'ãri, ma barcode bataudap'eda, Capernaum p'uurudee wãjida iru jùrùde.
Eperã Jesude ijãa bù ichita chok'ai bapariit'ee
25 Ma eperãarã lago k'îraik'a eere panadak'ãri, Jesús ununajida mãik'aapa iidijida:
—Tachi Jarateepari, ¿sãaweda@ pachejima? ajida.
26 Jesupa mãgaji:
—Mùa wãarata jararu. Parãpa mù jùrù nidada aji, mùa parã bi jãwaa netawada perã, jùrùdai k'ãyaara k'awaadait'ee mùa ne–inaa pi–ia oopari eperãarãpa p'oyaa oodak'aa ãchi juadoopa. 27 Mimianáatù chik'o k'odait'ee aupai, mãgee chik'o jõpari perã. Ma k'ãyaara mimíatù k'awaadamerã mù, chi ne–inaa jõk'aa. Mù, chi Eperã Ak'õre Truadepema k'aurépata parã ichita p'anapataadai Tachi Ak'õre ome. Irua ak'ùpi bù mù pia ak'ù bapari, iru juapa mùa ook'ãri ne–inaa eperãarãpa p'oyaa oodak'aa ãchi juadoopa.
28 Mãpai arii p'anadap'edaarãpa Jesumaa iidijida:
—¿K'ãata oodayama ajida, Tachi Ak'õrepa tai pia @ak'ùpariimerã?
29 Jesupa p'anauji:
—Tachi Ak'õrepa k'inia bùda aji, eperã irua@ichia? na eujãdee pëidade ijãadamerã.
30 Mãpai iidijida:
—¿K'ãata pùa ooit'eema ajida, taipa ijãadamerã pù Tachi Ak'õrepa pëida? ¿K'ãata pùa taimaa ak'ùpiit'eema? 31 Eujã pania wêe bùde tachi chonaarãpa ùt'aripema chik'o maná, k'ojidada ajida, Tachi Ak'õre Ûraa p'ãdade jara bùk'a:
‘Tachi Ak'õrepa ãramaa ùt'aripema chik'o teeji nek'odamerã.’ (Éxodo 16.4)
32 Jesupa p'anauji:
—Mùa wãarata jararu. Moisepa parãmaa mãgà chik'o tee–e paji. Mù Ak'õre ùt'aripemápata chik'o jõmaweda teepari. Mãgà chik'o chi pipùara bù–e paji. 33 Chi pipùara bùta ùt'ariipa cheji na p'ek'au eujãdepemaarã chok'ai p'anapiit'ee ichita p'anapataadamerã.
34 Ãchia mãgajida:
—Tai–it'ee mãgà chik'ota teeparíiji.
35 Mãpai Jesupa mãgaji:
—Mùda aji, chi chik'o eperãarã ichita chok'ai p'anapipari. Eperã ewaa nek'oda jarrapisia–e bùk'a mãik'aapa chi ewaa ne–inaa toda opisia–e bùk'a, mãga pùk'a eperã mùde ijãa bù o–îa bapariit'ee. 36 Mamîda mùa parãmaa et'ewa jaradak'a, parãpa mùde ijãada–e p'anù, mù unupata mîda. 37 Jõmaweda eperãarã mù Ak'õrepa mù jua ek'ari bùda mùmaa chedait'ee. Chi cherutaarãmaa mùa k'inia–eda a–e pait'ee. 38 Mù ùt'ariipa che–e paji ooit'ee mùchia oo k'iniata. Ma k'ãyaara cheji ooit'ee mù Ak'õrepa k'inia bùk'a. 39 Ma–it'ee mù pëiji; jõmaweda mù jua ek'ari bùdaarã ak'ù bamerã apida atuanaamerã. Mãgá Ak'õre ewari waibùa ewate ãra chok'ai p'irabaidait'ee. 40 Mù Ak'õrepa k'inia bù jõmaweda ichi Warra k'awa p'anùùrã mãik'aapa irude ijãa p'anùùrã ùt'aa wãdamerã. Ak'õre ewari waibùa ewate mùata mãgùùrã p'irabaipiit'ee.
41 Mãpai judiorã poro waibùarãpa Jesús ãpùte pedee k'achia pedee p'aneejida irua jarada perã: “Mùda aji, chi chik'o ùt'ariipa cheda”. 42 Maperã mãgajida:
—¿Nãgù–ek'ã Jesús, José warra? Taipa k'awa p'anùda ajida, chi ak'õre mãik'aapa chi nawe. ¿Sãgapù ùt'ariipa chejida a bùma? ajida.
43 Mãpai Jesupa mãgaji:
—¡Pedee k'achia pedee amáatù! 44 Mù Ak'õrepa mù pëiji. Eperã apida mùmaa p'oyaa cheda–eda aji, irua anee–emãi. Ak'õre ewari waibùa ewate irua aneeda eperãarã mùa p'irabai atait'eeda aji. 45 Ak'õre pedee jarapataarãpa p'ãdap'edaade jara bù:
‘Tachi Ak'õrepa eperãarãmaa ichi ûraa jarateeit'ee.’ (Isaías 54.13)
Mapa jõmaarãpa iru ûraa ûri p'anù mãik'aapa k'awaa wãda mùmaa chedait'ee.
46 +Mùa mãga jarak'ãri, jara k'inia–e bù eperãarãpa Tachi Ak'õre unupata. Eperã apidaapa Tachi Ak'õre unuda–e p'anù. Irua ùt'ariipa pëidapapaita iru unupari. 47 Mùa wãarata jararu. Eperãpa mùde ijãa bù ùt'aa wãit'ee. 48 Mùda aji, chi chik'o eperãarã ichita chok'ai p'anapipari. 49 Parã chonaarã eujã pania wêe bùde wãyaadak'ãri, maná k'ojidada aji. Mamîda ma chik'opa ãra ichita chok'ai p'anapi–e paji, aù t'êepai ãchi piudap'edaa perã. 50 Mùa “chik'o” ak'ãri, jara k'inia bù chik'o ùt'ariipa cheda. Eperãpa mãgà chik'o k'oru pùrã, atua–e. 51 Mùda aji, ma chik'o ùt'ariipa cheda eperãarã chok'ai p'anapiit'ee. Chi nãgà chik'o k'o bùpa ichita chok'ai bapariit'ee. Nãgà chik'o mù k'ap'ùa, mùa teeit'eeda aji, piumerã jõmaarã pari, ichita chok'ai p'anapataadamerã.
52 Mãga ûridak'ãri, judiorã aupedee para beeji:
—¿Sãga na eperãpa tachimaa ichi k'ap'ùa k'opiit'eema? ajida.
53 Mãpai Jesupa mãgaji:
—Mùa wãarata jararu. Parãpa Eperã Ak'õre Truadepema k'ap'ùa k'oda–e pùrã mãik'aapa iru waa toda–e pùrã, ùt'aa wãda–e pai. 54 Chi mù k'ap'ùa k'o bùpa mãik'aapa mù waa to bùpa Ak'õre eujãde banait'ee. Ak'õre ewari waibùa ewate mùata iru chok'ai p'irabai atait'ee. 55 Mapa mù k'ap'ùata chi chik'o pipùara bùda aji. Ichiaba mù waata chi ba pipùara bùda aji. 56 Chi mù k'ap'ùa k'o bùpa, ichiaba mù waa to bùpa mù ome araa bapariit'eeda aji. 57 Mù Ak'õre ichita chok'ai bapari; mù jida auk'a. Irua mù pëiji mù k'ap'ùa k'opataarã ichita chok'ai p'anapimerã. 58 Mùa jara bùda aji, chik'o ùt'ariipa chedade. Nãgà chik'o parã chonaarãpa maná k'odap'edaak'a bù–e. Ãrapa maná k'ojida. Mamîda ma chik'opa ãra ichita chok'ai p'anapi–e paji, aù t'êepai piudap'edaa perã. Jõdee chi nãgà chik'o k'o bùpa ichita chok'ai bapariit'ee.
59 Jesupa ma jõma jara aupada jarateeji Tachi Ak'õre Ûraa jarateepata tede Capernaum p'uurude.
Jesupa jarada sãga eperãarã ùt'aa wãdai
60 Jesupa jarateemaa bù ûridak'ãri, iru ome nipapataarãpa mãgajida:
—Pùa jara bù p'oyaa k'awada–eda ajida. ¿K'aipa ijãayama? ajida.
61 Jesupa k'awa bada perã ichi ãpùte mãgá pedeemaa p'anù, iidiji:
—¿Na pedee parãpa k'achia ûri p'anùk'ã? aji. 62 Mãgara audupùara ijãada–e pai, parãpa Eperã Ak'õre Truadepema unuruta pùrã ùt'aa wãru ichi badamaa. 63 Tachi Ak'õre Jaurepa eperãarã ichita chok'ai p'anapipari. Tachi k'îradoopa apida ichita chok'ai p'anada–e pai. Mùa jaradak'a parãpa mù k'ap'ùa k'oruta pùrã, pia jarait'eera, mùde wãara ijãaruta pùrã, Tachi Ak'õre Jaure cheit'ee parã ichita chok'ai p'anapide. 64 Mamîda waide parã ûk'uru ijãada–e p'anù.
Jesupa mãga jaraji aù naaweda k'awa bada perã k'airãpa ijãada–e p'anù mãik'aapa k'aipa ichi traicionaait'ee. 65 Ichiaba mãgaji:
—Mapa mùa parãmaa jaraji eperã apida mùmaa p'oyaa cheda–eda aji, mù Ak'õrepa anee–e pùrã.
66 Maadamãiipa chok'ara Jesús ome nipadap'edaarãpa iru atabaibëijida. 67 Mãpai Jesupa iidiji chi k'õp'ãyoorã docemaa:
—¿Parã jida ichiaba wã k'inia p'anùk'ã? aji.
68 Simón Pedropa p'anauji:
—Tachi Waibùa, pùk'a awaraa wê–e. Pù ûraa k'aurepa k'awa p'anù ùt'aa wãdait'ee. 69 Taipa pùde ijãa p'anùda aji, mãik'aapa k'awa p'anù pù chi k'achia wêe bapari, Tachi Ak'õrepa pëida.
70 Jesupa p'anauji:
—Mùa parã doceweda jùrùt'erajida aji. Mamîda parãdepema aba netuara eere bùda aji.
71 Jesupa mãga jarak'ãri, jara k'inia baji Simón Iscariote warra Judapa ichi traicionaait'ee, chi k'õp'ãyoorã docedepema paji mîda.