Betzatá pozode Jesupa chiwa bù jùpada
5
1 Ma t'êepai Jesús cheji Jerusalendee judiorã fiesta oode. 2 Jerusalén p'uurua murallade t'îupata aba Ovejaarã T'îupata apachida. Mãgà k'ait'a baji eperãarã k'uipatamãi, hebreo pedeede t'âjarapata Betzatá. Mãgà pozo wap'ùra baji joisomaa tarimbak'a bùpa. Mãgà wãk'a beeji te k'irupa. 3 Mama eujãde k'ayaa beerã chok'ara p'aneejida: tau p'ãriu beerã, nùk'anùk'aa t'ùa beerã mãik'aapa chiwa beerã. [Nùpachida pania p'ërebai jira beerumaa. 4 Mãga oopachida edaare angelpa pania p'ërebai jira beepik'ãri, chi naa t'îuru aùde jùpa beepachi perã.] 5 Mama baji eperã treinta y ocho año k'ayaa bada. 6 Jesupa iru mama jêra bù unuk'ãri mãik'aapa k'awaa atak'ãri taarãweda ichi mãgá che bapachi, irumaa iidiji:—¿Jùpa bee k'inia bùk'ã? aji.
7 Chi k'ayaa bùpa p'anauji:
—Eperã wê–eda aji, mù toida ata bùmerã jã pozode pania p'ërebai jira beek'ãri. Mù t'îudariit'ee pak'ãri, awaraata mù naa t'îudaiparida aji.
8 Mãpai Jesupa mãgaji:
—¡P'irabáiji! Pùchi p'aru atáji mãik'aapa wåji pùchi temaa.
9 Aramata ma eperã jùpa beeji. Bainâ beep'eda mãik'aapa ichi p'aru atap'eda, t'ùa wãji. Mamîda âipata ewate pada perã, 10 arii p'anadap'edaa judiorã poro waibùarãpa chi jùpa beedamaa mãgajida:
—Idi tachi âipata ewate. Tachi Ak'õre Ûraa p'ãdade jara bù âipata ewate mimia oodaik'araa bù. Jã p'aru pùa ateeik'araa bùda ajida.
11 Mãpai mãgà eperãpa p'anauji:
—Mù jùpadapa jarajida aji: “Pùchi p'aru atáji mãik'aapa wåji.”
12 Ãchia iidijida:
—¿K'áipata pùmaa mãga jarajima? ajida.
13 Mamîda ma k'ayaa badapa k'awa–e paji k'áipata ichi jùpat'aada, Jesús tau atuat'aada perã t'îuk'ãri eperãarã chok'ara see nâbùde.
14 Ma t'êepai, Tachi Ak'õre tede Jesupa ma eperã unuk'ãri, irumaa mãgaji:
—¡Ûríji! Ârá pù jùpa bùda aji. P'ek'au k'achia oo amáaji ne–inaa k'achiara p'asanaamerã.
15 Maap'eda mãgà eperãpa judiorã poroorãmaa nepùrùnaji Jesupa ichi jùpada. 16 Âipata ewate Jesupa mãgá jùpapachi perã, judiorã poro waibùarãpa iru jùrùpachida peedait'ee. 17 Mamîda Jesupa p'anaupachi ichi ùmùatee p'anadap'edaarãmaa:
—Mù Ak'õre ichita mimiapari mãik'aapa âraweda mimiamaa bù. Mù jida mãgá mimiaparida aji.
18 Mãga ûridak'ãri, ma judiorãpa audupùara peet'aa k'inia p'anapachida, âipata ewate mimiapachi perã mãik'aapa Tachi Ak'õre ome auk'a bùda ada perã. Mãga jaraji Tachi Ak'õre ichi Ak'õreda ak'ãri.
Tachi Ak'õre Warrapa oopari Tachi Ak'õrepa ooparik'a
19 Ãchia ùmùateeda ûrik'ãri, Jesupa mãgaji:
—Mùa wãarata jararu. Tachi Ak'õre Warrapa ne–inaa p'oyaa oo–eda aji, ichi k'îradoopa. Ma k'ãyaara irua unupari chi Ak'õrepa oo bù mãik'aapa auk'a oopari. Jõmaweda chi Ak'õrepa oo bù ichiaba oopari chi Warrapa. 20 Mãga bù chi Ak'õrepa ichi Warra k'inia iru bapari perã. Mapa jõma ichia oo bù ak'ùpipari chi Warramaa. Wãara na ewari ne–inaa pi–iara ak'ùpiit'ee chi Warramaa. Mãga unudak'ãri, parã p'era pùk'a para beeit'ee. 21 Chi Ak'õrepa piu beerã p'irabaipiparik'a ichita chok'ai p'anapataadamerã, chi Warrapa auk'a ichia k'inia bùùrã p'irabaipiparida aji, ichita chok'ai p'anapataadamerã. 22 Chi Ak'õrepa jara–e chisãgà na p'ek'au eujãdepemaarã ichita chok'ai p'anapataadait'ee mãik'aapa chisãgà atuadait'ee. Ma–it'ee chi Warra pëiji. 23 K'inia baji jõmaarãpa ichi Warra waaweedamerã iru waaweepatak'a. Eperã iru Warra waawee–ee bùpa ichiaba waawee–e Tachi Ak'õre, chi Warra pëida.
24 +Mùa wãarata jararu. Tachi Ak'õre Waibùapa mù pëiji. @Mù pedee ûri bùpa mãik'aapa irude ijãa bùpa ùt'aa wãit'eeda aji. Mãgà eperã atua–e pait'ee. Irua ijãadak'ãriipa ichita Tachi Ak'õre ome bapariit'ee. 25 Mùa wãarata jararu. Ewari pait'ee mãik'aapa âraweda paru piu pùk'a beerãpa ûridait'ee Tachi Ak'õre Warra pedee. Chi ma pedee ijãarutaarã ichita p'anapataadait'ee Tachi Ak'õre ome. 26 Tachi Ak'õrepa eperãarã ichita chok'ai p'anapiparik'a, ichi Warra bùji auk'a oomerã. 27 Ma awara ichi Warra bùji ichik'a jõmaarã k'ãyaara waibùara bamerã. Mãgá irua jarai chisãgà eperãarã ichita chok'ai p'anapataadait'ee mãik'aapa chisãgà atuadait'ee. Tachi Ak'õrepa iru mãga bùji iru Eperã Ak'õre Truadepema perã. 28 P'era pùk'a p'ananáatù mùa jararu ûridak'ãri. Ewari cherude jõmaweda jãùrade p'anùùrãpa mù pedee ûridait'ee. 29 Chok'ai p'irabaidait'ee mãik'aapa jãùradeepa uchiadait'ee. Ne–inaa pia oopatap'edaarã ichita p'anapataadait'ee Tachi Ak'õre ome. Mamîda chi ne–inaa k'achia oopatap'edaarã atuadait'ee.
Jesús jõmaarã k'ãyaara waibùara bù
30 —Mùa ne–inaa p'oyaa oo–eda aji, mùchi k'îradoopa. Mùa ûripari mù Ak'õrepa jara bù mãik'aapa irua jara bùk'a oopari. Mapa mùa eperãarãpa oopata ak'ùpari jarait'ee pia wa k'achia. Mùa mãga jarak'ãri, wãarata jarapari, mùchia oo k'iniata oo k'iniak'aa perã. Jîp'a oo k'inia bù mù pëidapa k'inia bùk'a. 31 Mùchi k'îsiadoopapai na pedee jarada paara, mãgara eperãarãpa wãarata jara–e bùda ak'ajida. 32 Mamîda awaraapa jara bù mù ichi Warra. Mùa k'awa bù irua ichita wãarata jarapari. 33 Parãpa eperãarã pëidak'ãri Juan Bautistamaa iidide, irua p'anauda wãarata paji. 34 Mùa p'ua–e bùda aji, eperãpa jarada. Mamîda mãga jaraji parãpa k'irãpadamerã Juanpa jarada mãik'aapa mùde ijãadamerã. Mãgá mùa parã o k'achiadeepa k'aripa atai. 35 Juan urua pùk'a bapachi lamparak'a na p'ek'au eujã p'ãriu pùk'a bùde. Maapai parã o–îa p'anapachida iru ome ma urua pùk'a bùde. 36 Mamîda ne–inaa piara paraa Juanpa jarada k'ãyaara. Mùa ne–inaa jõma oopari mù Ak'õrepa k'îsia iru bùk'a. Mãga ook'ãri, ak'ùpipari wãara irua mù pëiji. 37 Irua pida ak'ùpidoo mù pëiji, parãpa jara p'anù mîda waide iru pedee ûridak'aa mãik'aapa iru k'îra unudak'aa. 38 Ma awara parãpa ak'ùpipata iru pedee jara pëida wãara ijãadak'aa, irua pëidade ijãada–e p'anadairã. 39 Parãpa Tachi Ak'õre Ûraa p'ãda pi–ia ak'ùpata, ijãapata perã ma k'aurepa ùt'aa wãdait'ee. Mãgà ûraade mùdeta jara bù. 40 Mamîda parãpa mùde ijãa k'iniada–e p'anù, mùa parã ùt'aa wãpimerã.
41 +Mùa mãga jara–e paji k'inia bairã eperãarãpa mù ak'ùdamerã eperã t'ãri piak'a. 42 Ma awara mùa parã k'awa bùda aji. Wãara Tachi Ak'õre k'inia iru p'anada–e. 43 Mù chejida aji, mù Ak'õre pari. Mamîda parãpa mù auteebaida–e paji. Jõdee awaraa eperã ichi k'inia cheru pùrã, mata parãpa auteebaipata. 44 ¿Sãga mùde ijãadayama? aji. Jùrùpata eperãarãpa parã ak'ùdamerã judiorã pia beerãk'a, jùrùdai k'ãyaara Tachi Ak'õrepa parã ak'ùmerã ichideerãk'a. ¡Iru aupaita Ak'õre Waibùa! 45 K'îsianáatù mùa parã ùmùateeit'ee mù Ak'õre k'îrapite. Ma k'ãyaara Moisepa p'ãdapa parã ùmùateepari, ma ûraade ijãa p'anù mîda. 46 Parãpa wãara Moisepa p'ãda ijãadap'edaa paara, ichiaba mùde ijãak'ajida, irua mùde p'ãda perã. 47 Mamîda wãara irua p'ãda ijãada–e p'anadairã, audupùara mù pedee ijãada–e pai.