Jesús Samaria eujãdepema wêra ome pedeeda
4
1 Fariseorãpa ûrijida Jesupa Juan k'ãyaara k'õp'ãyoorãra p'e wã mãik'aapa eperãarã chok'araara poro choopachi. 2 (Mãga ûrijida Jesupa poro chook'aa paji mîda. Chi k'õp'ãyooråpata poro choopachida.) 3 Jesupa mãga k'awaa atak'ãri, waya uchiaji Judea eujãdeepa Galilea eujãdee wãit'ee.4 Ma wãdade wãyaaji Samaria eujãde. 5 Mãgá Jesús pacheji Sicar p'uurude. Mãgà p'uuru Samaria eujãde bù. Chonaarãweda ma p'uuru Jacobpa ichi warra Josemaa eujã teeda k'ait'a baji. 6 Ma eujãde Jacob pozo baji. Ma chewãdade ode cherupa Jesús îyapaa cheda perã, ma pozo ik'aawa su–ak'ù beeji. Imat'ùpa pa wã nipaji. 7-8 (Chi k'õp'ãyoorã p'uurudee wã p'anajida chik'o netode.) Mãga nùde Samariadepema wêra cheji ma pozodee pania joide. Mãpai Jesupa mãgaji irumaa:
—Mùmaa pania teepáde aji.
9 Mamîda judiorã, Samariadepemaarã ome pedeedak'aa pada perã, mãgà wêrapa mãgaji:
—Mù Samaria eujãdepemapù. ¿Sãap'eda pù, judío bùta mùmaa pania iidi cheruma? aji.
10 Jesupa p'anauji:
—Pùa k'awada paara jõma Tachi Ak'õrepa oo k'inia bù eperãarã k'aripait'ee mãik'aapa k'awada paara k'áipata pùmaa pania iidimaa bù, mùmaa iidik'aji teemerã pania eperãarã ichita chok'ai p'anapipari.
11 Mãpai mãgà wêrapa mãgaji:
—Señor, na pozo nãpùa bùda aji. Pùa ne–inaa wêe bù pania joi atait'ee. ¿Sãma mãgee pania atayama? aji. 12 Na pozo tachi chonaarãwedapema Jacobpa bëida. Irua na pozodepemata pania topachi, ichi warrarã ome mãik'aapa chi ne–animalaarã ome. ¿Pù iru k'ãyaara waibùara k'îsia bùk'ã? aji.
13 Jesupa p'anauji:
—Eperãarãpa na pozodepema pania toruta waya opisiadaridait'eeda aji. 14 Mamîda mùa pania teerudepema todak'ãri, waa opisiada–e pait'ee. Ma k'ãyaara ara pania poátrù uchiaparik'a eujãdeepa, mãga pùk'a mùa pania teeru uchiait'ee ãra t'ãrideepa mãik'aapa ma k'aurepa k'awaadait'ee ichita p'anapataadait'ee Tachi Ak'õre ome.
15 Mãpai mãgà wêrapa mãgaji:
—Señor, mù–it'ee teepáde aji, mãgà pania, mù waa opisia–e pait'ee, ichiaba waa che–e pait'ee pania joide na pozode.
16 Jesupa p'anauji:
—Wãpáde aji, pùchi ùmùk'îra atade mãik'aapa waya namaa chepáde aji.
17 Mãgà wêrapa p'anauji:
—Mù ùmùk'îra wêe bùda aji.
Jesupa mãgaji:
—Wãarata jaraji ùmùk'îra wêe bùda ak'ãri. 18 Ùmùk'îraarã joisomaa iru badoo mãik'aapa chi ârá iru bù përe–e. Mapa wãarada aji, pùa jara bù.
19 Mãga ûrik'ãri, ma wêrapa mãgaji:
—Señor, pùa pedee jarada k'aurepa mùa k'awaa wãda aji, pù Tachi Ak'õre pedee jarapari. 20 Tai chonaarã nãgà eede ùt'aa t'âpachidada aji. Mamîda parã judiorãpa jarapata Jerusalende eperãarãpa ùt'aa t'âpataadaipia bù.
21 Mãpai Jesupa mãgaji:
—Wêra, mùa jararu ijåaji. Ewari paruda aji, parãpa wãara ùt'aa t'âpataadait'ee Tachi Ak'õremaa. Mamîda mãga ooda–e pait'ee nãgà eede wa Jerusalende. 22 Parãpa ùt'aa t'âpata Tachi Ak'õremaa. Mamîda iru pia k'awada–e p'anù. Jõdee táipata iru pia k'awa p'anù, tai judiorã k'ap'ùa pari irua jara pëida perã sãga eperãarã o k'achiadeepa k'aripa atait'ee. 23 Mamîda ewari pait'ee mãik'aapa âraweda paru wãarata ùt'aa t'âpataarã Tachi Ak'õremaa ùt'aa t'âpataadait'ee iru Jaure k'ap'ùa pari, Tachi Ak'õre wãara k'awapata perã. Tachi Ak'õrepa mãgeerã jùrùpari mãgá ichimaa ùt'aa t'âpataadamerã. 24 Tachi Ak'õreta, Jaure. P'aareerã irumaa ùt'aa t'âpataadaipia bùda aji, iru Jaure k'ap'ùa pari, iru wãarata k'awapata perã.
25 Mãpai mãgà wêrapa mãgaji:
—Mùa k'awa bù Mesías (ichiaba t'âjarapata Cristo) cheit'eeda aji. Iru chek'ãri, tachimaa ne–inaa jõmaata jarateeit'ee.
26 Jesupa mãgaji:
—Mãgà mùda aji, pù ome pedeemaa bù.
27 Mãgá pedeemaa bùde chi k'õp'ãyoorã pachejida. Ãchi t'ãridepai k'îsiajida: “¿Sãap'eda Jesús pedeemaa bù jã wêra ome?” Mamîda apidaapa iidida–e paji ma wêrapa k'ãata k'inia baji, maa–e pùrã k'ãare–it'ee iru pedeemaa baji ma wêra ome. 28 Mãpai mãgà wêrapa ichi chok'o atabëip'eda, wãji p'uurudee mãik'aapa jaranaji eperãarãmaa:
29 —¡Ak'ù chétù! Eperãpa mùmaa nepùrùji ne–inaa jõma mùa oopari. ¿Mãgà Mesia–epaama? aji.
—Tachi Jarateepari, nek'óji, ma–ãri pùjida.
32 Mamîda irua mãgaji:
—Parãpa k'awada–e p'anùda aji, chik'o mùa iru bù k'oit'ee.
33 Chi k'õp'ãyoorã ãchi pitapai pedeepachida:
—¿Apidaapa chik'o aneejida–epaama? ajida.
34 Mamîda Jesupa mãgaji:
—Mù–it'ee chik'o nãga pùk'a bù: ooit'ee mù pëidapa k'inia bùk'a mãik'aapa aupait'ee mimia irua k'îsia iru bù mù–it'ee. 35 ¿Parãpa *nãga jarapata–ek'ã? “Atane k'îmari falta bù ne–uuda ewadait'ee.” ¡Ak'àtù parã ik'aawa! Unudait'ee ne–uuda chiwari nâbù. Mapa ewadaipia bù. 36 Ne–uuda ewaparipa ma ne–uuda ewak'ãri, o–îadaipari p'arat'a jitait'ee perã ichi mimia pari. Mãga pùk'a mù, Tachi Ak'õre Ûraa jarateepari, o–îadaipari parãpa eperãarã p'e atadak'ãri mùde ijãapataadamerã, ma k'aurepa ichita p'anapataadait'ee perã Tachi Ak'õre ome. Maperã chi ne–uupari chi ne–uu ewapari ome o–îa para beepari. 37 Nãgà pedee eperãarãpa jarapata wãara bù. “Abaapa uupari mãik'aapa awaraapa ewapari.” 38 Mùa parã pëiji ne–uu ewanadamerã, parãpa uuda–e paji mîda. Awaraarã parã naa mimiajida eperãarãpa mùde ijãadamerã. Maap'eda parãpa ãra mimia aupajida.
39 Samariadepemaarã chok'ara Jesude ijãajida mãgà Samariadepema wêrapa jarada perã:
—Jõma mùa ne–inaa ooda jarajida aji.
40 Maperãpù ma Samariadepemaarã Jesumãi @pachedak'ãri, chupùria iidijida iru ãchi ome beemerã. Mapa iru mama k'ãima omé beeji. 41 Mama bùde chok'araarãpa irua jarateeda ûridak'ãri, ijãajida. 42 Mãpai mãùrãpa mãgà Samariadepema wêramaa mãgajida:
—Ârá pùa taimaa nepùrùda k'aurepapai ijãada–e p'anùda ajida. Ichiaba ijãapata irua jarateeda ûridap'edaa perã. Maperãpù k'awa p'anù wãara nãgà eperã cheji na p'ek'au eujãdepemaarã o k'achiadeepa k'aripa atade.
Jesupa rey mimiapataarã poro waibùa warra jùpada
(Mateo 8.5-13; Lucas 7.1-10)
43 K'ãima omé wãyaap'eda, Jesús uchiaji Samaria eujãdeepa mãik'aapa wãji Galilea eujãdee. 44 Ichi ome nipapatap'edaarãpa k'îsiajida mãpemaarãpa ãchi auteebaida–e pai, ichia jarada perã Tachi Ak'õre pedee jarapari p'uurudepemaarãpa iru waaweedak'aa. 45 Mamîda Galileade panadak'ãri, ma eujãdepemaarãpa iru auteebaijida. Mãùrãpa irua ooda Jerusalende unujida, mama p'anadap'edaa perã Pascua fiesta oodait'ee.
46 Jesús waya cheji Caná p'uurudee, ichia pania vino papidamãi. Maapai Capernaum p'uurude bapachi rey mimiapataarã poro waibùa. Mãgà warra k'ayaa baji. 47 Mãgùpa k'awaa atak'ãri Jesús cheda Judea eujãdeepa Galileadee, wãji iru ak'ùde mãik'aapa chupùria iidiji wãmerã ichi temaa ichi warra jùpade, chi warra juak'aya bada perã. 48 Mãga ûrik'ãri, Jesupa mãgaji:
—Parãpa unuda–e pùrã mùa ooru ne–inaa eperãarãpa p'oyaa oodak'aa ãchi juadoopa, mùde ijãadak'aa pait'eeda aji.
49 Mamîda mãgà poro waibùapa mãgaji:
—Tachi Waibùa, chepáde aji, mù warra jai–idaai naaweda.
50 Mãpai Jesupa mãgaji:
—Wãpáde aji, pùchi temaa. Pù warra jùpa beeit'eeda aji.
Ma eperãpa Jesupa jarada ijãaji mãik'aapa wãji. 51 Ichi temaa wãrude, ichi mimiapataarãpa unu chejida mãik'aapa mãgajida:
—Pù warra jùpa beejida ajida.
52 Ichia iidik'ãri chisãgà horade jùpa beeji, p'anaujida:
—Nuweda la una k'ùamia tuu beejida ajida.
53 Chi ak'õrepa k'awaji mãgà hora paji Jesupa jarak'ãri: “Pù warra jùpa beeit'ee.” Mapa ichia mãik'aapa ichi te pidaarãpa Jesude ijãajida.
54 Ma cheda omeede Judea eujãdeepa Galilea eujãdee, Jesupa ichiaba ooji ne–inaa eperãarãpa p'oyaa oodak'aa ãchi juadoopa.