Jesús Pilato k'îrapite
(Mateo 27.1-2, 11-14; Marcos 15.1-5; Juan 18.28-38)
23
1 Ma judiorã poro waibùarã p'irabaik'oodaidap'eda, Jesús ateejida Pilato k'îrapite. 2 Mama iru k'îrapite ùmùateemaadachida:—Taipa na eperã unujidada ajida, tai p'uuru pidaarãmaa k'îsia awara–awaraa papimaa bù. Jara bù taipa Cesarmaa impuesto p'aadaik'araa bù. Ma awara jara bù ichi Mesías, Tachi Ak'õrepa pëida rey pamerã.
3 Mãpai Pilatopa iidiji:
—¿Pùk'ã aji, Judiorã Rey?
Jesupa p'anauji:
—Mùda aji, pùa jara bùk'a.
4 Mãpai Pilatopa mãgaji ma p'aareerã poroorãmaa mãik'aapa arii p'anadap'edaarãmaa:
—Mùa unu–e bùda aji, na eperãpa ne–inaa k'achia ooda.
5 Mamîda audupùara golpe pedeejida:
—Ichia jaratee bù k'aurepa tai p'uuru pidaarã jõmaweda chõo pùk'a para bù. Naa Galilea eujãde jaratee nipa beeji. Ârá nama Judea eujãde auk'a oomaa bù.
Jesús Herodes k'îrapite
6 Mãga ûrik'ãri, Pilatopa iidiji:
—¿Na eperã Galilea eujãdepemak'ã? aji.
7 Ichida adak'ãri, Pilatopa pëiji Herodemaa. Mãgà Galilea eujã ak'ùpari paji. Auk'a baji Jerusalende. 8 Herodepa Jesús unuk'ãri, o–îadachi aù naaweda iru k'îra unu k'inia bada perã mãik'aapa ûrida perã nepùrù p'anù irua oopari ne–inaa eperãarãpa p'oyaa oodak'aa ãchi juadoopa. Mapa unu k'inia baji ichi taide irua mãgee ne–inaa oomerã. 9 Ma–it'ee iidida chok'ara iidiji Jesumaa. Mamîda Jesupa maarepida p'anauk'aa paji. 10 Mama ichiaba p'aareerã poroorã mãik'aapa Moisepa p'ãda jarateepataarã p'anajida. Ãchiata audú Jesús ùmùateepachida. 11 Mapa Herodes ichi soldaorã ome Jesumaa ik'achia pedee jarajida mãik'aapa reypa jâpari p'aru pi–iara bùta jâ bùjida iru oo iru p'anadait'ee. Maap'eda Herodepa waya ãpùtee pëit'aaji Pilatomaa. 12 Ma ewate Pilato k'õp'ãyo meraaji Herodes ome, aù naaweda chik'îra unuamaa p'anapachida mîda.
Pilatopa Jesús peepida
(Mateo 27.15-26; Marcos 15.6-15; Juan 18.39--19.16)
13 Pilatomãi panadak'ãri, irua waya t'â p'eji p'aareerã poroorã, judiorã poro waibùarã mãik'aapa p'uuru pidaarã. 14 Maap'eda mãgaji:
—Parãpa mùmaa jara chejida na eperãpa p'uuru pidaarã k'îsia awara–awaraa papik'oomaa bù. Mamîda parã k'îrapite irumaa mùa iidida chok'ara iidiji mãik'aapa unu–e ne–inaa k'achia apida ichia oo bùda a p'anù. 15 ¿Ichiaba Herodepa iru mãga unu bù–ek'ã? aji. Maa–e pùrã waya namaa pëi–e pak'aji. Parãpa k'awa p'anù irua ne–inaa k'achia oo–e bù ma k'aurepa iru peepimerã. 16 Mapa wùpip'eda, ichiak'au wãpiit'eeda aji.
17 [Mãgà fiestade Pilatopa k'ena pëipachi carceldepema preso; chi iidirutata p'uuru pidaarãpa.] 18 Mamîda arii p'anadap'edaarã jõmaweda biuk'adachida:
—¡Jãgà ãyaa atáji! ¡Barrabata k'ena pïiji!
19 Ma Barrabás carcelde baji ooamaa bada perã Romadepemaarãpa oopipatak'a ma p'uurude; ma awara chîara peet'aada perã. 20 Mãpai Pilatopa Jesús uchia pëi k'inia bada perã, waya pedeeji. 21 Mamîda ãchi waapùara biuk'a nâbeeji:
—¡Kurusode peepit'áaji! ¡Kurusode peepit'áaji!
22 Mãpai waya jarada õpee Pilatopa mãgaji:
—¿K'ãare k'achiata oojima aji, irua? Mùa unu–e bù ne–inaa k'achia ooda ma k'aurepa peepiit'ee. Wùpip'eda, ichiak'au k'ena pëiit'eeda aji.
23 Mamîda audupùara biapachida Jesús kurusode baijira bùpimerã. Mãgá bia jõnùpa ãchia k'inia p'anadap'edaak'a oopijida. 24 Pilatopa ooji ãchia iidi p'anadap'edaak'a. 25 K'ena pëiji Barrabás, ãchia k'inia p'anadap'edaa, ma ooamaa bada Romadepemaarãpa oopidap'edaak'a mãik'aapa chîara peeda. Jõdee Jesús ateepiji kurusode baijira bùnadamerã, ãchia k'inia p'anadap'edaak'a.
Jesús kurusode baijira bùdap'edaa
(Mateo 27.32-44; Marcos 15.21-32; Juan 19.17-27)
26 Jesús ateedak'ãri kurusode baijira bùdait'ee, jita atajida eperã aba p'uurudee chewã nipada, Cirene p'uurudepema t'âjarapatap'edaa Simón. Mãgùmaa kuruso ateepijida Jesús t'êe.
27 Ma wãdade eperãarã chok'ara ichi t'êe wã nipapachida. Mãùrã ome wãdap'edaarã wêraarã chok'ara jêe wãpachida mãik'aapa biuk'a wãpachida t'ãri p'uapa, Jesús mãgá atee wãdap'edaa perã. 28 Mamîda Jesupa ãchimaa ak'ùji mãik'aapa mãgaji:
—Jerusalendepema wêraarã, jêenáatù mù pari. Jèetù pãchi pari mãik'aapa pãchi warrarã pari, ewari cherude audú chupùria chitoonadait'ee perã. 29 Tachi Ak'õrepa na eujãdepemaarã k'achia ook'ãri, mãgadait'ee: “O–îa p'anù chi ju tawadak'aa beerã warra t'odak'aa perã.” 30 Ma ewate eperãarãpa eemaa jaradait'ee:
‘¡Tai ârù ùrak'oodarítù!’ mãik'aapa: ‘¡Tai t'ap'a atátù!’(Oseas 10.8)
31 Eperãarãpa pak'uru õdoo bù t'ùpùtaude bat'at'aapata pùrã, ¿audupùara pak'uru p'ûasaa bù bat'at'aada–e paik'ã, taarã–ee paa jõdaipari perã?
Eperãarã Jesús ik'aawa kurusode baijira bùdap'edaa
32 Ichiaba Jesús ome atee wã nipajida k'achia beerã omé auk'a kurusode baijira bùdait'ee. 33 Panadak'ãri eujã “Tachi Poro Bùùrù”a apatap'edaamãi, Jesús ma k'achia beerã ome kurusode baijira bùjida; aba juaraare, chi apema juabi eere. 34 [Mãpai Jesupa mãgaji:
—Ak'õre, mù nãgá oo p'anùùrã perdonáaji, k'awada–e p'anadairã ne–inaa k'achiata oomaa p'anù.]
Mãpai soldaorãpa suerte jemenejida k'awaadait'ee k'áipata iru p'aru atait'ee. 35 Mãùmisa arii p'anadap'edaarãpa Jesumaa ak'ù para bapachi mãik'aapa judiorã poroorãpa iru nãga oo iru p'anapachida:
—Awaraarã k'aripadak'a, pùchi k'ap'ùa jida k'aripa atáji, wãara Tachi Ak'õrepa pù pëida pùrã, maa–e pùrã irua jùrùt'erada pùrã.
36 Soldaorãpa ichiaba Jesús oo iru p'anapachida. Iru k'ait'a wãdap'eda, vino achuchua teepachida 37 mãik'aapa mãgapachida:
—¡Pù wãara Judiorã Rey pùrã, jãmãik'aapa uchiadaríji!
38 Ichiaba Jesús poro ùt'aik'a eere letrero bùjida: Nãgà Judiorã Rey.
39 Ma awara iru ik'aawa baijira badapa ik'achia jarapachi:
—¡Pù wãara Tachi Ak'õrepa pëida pùrã, jãmãik'aapa uchiadaipáde apachi, mãik'aapa tai jida auk'a k'aripapáde! apachi.
40 Mamîda chi apemapa mãgà pedee bada ùtrùat'aaji:
—¿Pùa Tachi Ak'õre waawee–e bùk'ã aji, nama auk'a baijira bùta? 41 Tachi nama chupùria chitoonù ne–inaa k'achia oodap'edaa perã. Mamîda na eperãpa ne–inaa k'achia ook'aa pajida aji.
42 Maap'eda, mãgaji:
—Jesús, pù Ak'õre Waibùa truade rey beek'ãri, mù k'irãpáji.
43 Jesupa p'anauji:
—Mùa wãarata jararu. Idi pù mù ome bapariit'eeda aji, Ak'õre Waibùa eujãde.
Jesús jai–idaada
(Mateo 27.45-56; Marcos 15.33-41; Juan 19.28-30)
44 Imat'ùpa ak'õrejîru k'iat'ùdachi. Na eujã jõma p'ãriudachi las tres parumaa. 45 Ak'õrejîru k'iat'ùdachi mãik'aapa Tachi Ak'õre tedepema cuarto edupùara t'îupatamãi p'aru eebai jira bada esajîak'a jêdachi. 46 Mãpai Jesús golpe biaji:
—‘¡Ak'õre, mùchi jaure pù juade bùru!’(Salmos 31.5)
Mãga jarap'eda, jai–idaaji.
47 Romadepema soldaorã poropa ma jõma unuk'ãri, pedee pia jaraji Tachi Ak'õremaa mãik'aapa mãgaji:
—Wãara na eperãpa ne–inaa k'achia ook'aa pajida aji.
48 Eperãarã jõmaweda mama see nâbadaarãpa mãga unudak'ãri, ãchi t'ûa t'aap'e erreudachida t'ãri p'uapa. 49 Mamîda Jesús ome nipapatap'edaarã, ùmùk'îraarã mãik'aapa wêraarã iru ome chedap'edaa Galilea eujãdeepa, ma ne–inaa p'asada t'ùmùùpa ak'ùmaa p'aneejida.
Jesús ùadap'edaa
(Mateo 27.57-61; Marcos 15.42-47; Juan 19.38-42)
50 Ma eujãde eperã t'ãri pia bapachi. Ne–inaa k'achia ook'aa paji. Mãgà t'âjarapachida José. Iru Arimatea p'uurudepema paji. Mãgà p'uuru Judea eujãde bù. 51 Nù baji Tachi Ak'õrepa pëida eperãarã rey pamerã. Junta Supremadepema paji. Mamîda ijãa–e paji mãùrãpa oodap'edaade Jesús ome. 52 Mapa wãji Pilatomaa Jesús k'ap'ùa piuda iidide ùait'ee. 53 T'êepai Jesús k'ap'ùa kurusodeepa ùrabai atap'eda, pùrat'aaji lienzode mãik'aapa bùnaji mãu te uria k'oro iru p'anadap'edaade. Made piuda apida waide ùada–e p'anajida. 54 Ma ewate judiorã âipata noreweda paji. P'ãriupodopa pada perã, ne–inaa waa ooik'araa baji, âipata ewate wãyaaru misa.
55 Ma wêraarã Jesús ome Galilea eujãdeepa chedap'edaa ichiaba wãjida ma mãu te uriade iru bùdap'edaamaa mãik'aapa ak'ùjida sãga Jesús k'ap'ùa ata bùjida. 56 Maap'eda teedaa chedak'ãri, k'era oojida ne–inaa awaraa t'ûa bee ome Jesús k'ap'ùa ârù bùdait'ee, judiorãpa oopatak'a ãchi auk'aarã piudak'ãri. Âipata ewate ma wêraarã âijida Tachi Ak'õre Ûraa p'ãdade jara bùk'a.