Jesús jita atapidait'ee pedeeteedap'edaa
(Mateo 26.1-5, 14-16; Marcos 14.1-2, 10-11; Juan 11.45-53)
22
1 K'ait'a baji fiesta pan levadura wêe k'opata t'âjarapatap'edaa Pascua. 2 P'aareerã poroorãpa Moisepa p'ãda jarateepataarã ome eperãarã waawee p'anadap'edaa perã, ãra taide Jesús jita atapida–e paji. Mamîda ichita jùrùpachida sãga iru peepit'aadait'ee.Judapa Jesús traicionaada
3 Mãpai Satanás Judas k'ap'ùade t'îuji. Mãgà Judas Jesús k'õp'ãyoorã docedepema paji. Ichiaba t'âjarapachida Iscariote. 4 Mãgà wãji p'aareerã poroorãmaa mãik'aapa Tachi Ak'õre te jâapataarãmaa. Mama pedeeji ãchi ome sãga Jesús atapii. 5 Mãpai ãchi o–îadachida mãik'aapa pedeejida Judamaa p'arat'a teedait'ee. 6 Ichia ma p'arat'a jitap'eda, jùrùmaa beeji sãga Jesús ãchimaa atapii, eperãarã wê–e misa.
Pascua fiestadepema chik'o k'odap'edaa
(Mateo 26.17-30; Marcos 14.12-25; Juan 13.21-30; 1 Co 11.23-26)
7 Fiesta pan levadura wêe k'opata ewate pak'ãri, oveja chak'e peepata Pascua fiesta–it'ee. 8 Mapa Jesupa jaraji Pedro Juan ome Pascua fiestadepema chik'o jùrùdamerã mãik'aapa awaraa ne–inaa oodamerã, nek'odai naaweda.
9 Mãpai ãchia iidijida:
—¿Sãma mãga oodaipia bùma? ajida.
10 Jesupa p'anauji:
—Parã p'uurude panadak'ãri, unudait'ee eperãpa pania chok'ode ateeru. Iru t'êe wåtù ichi temãi t'îurumaa. 11 Mãpai chi te chiparimaa jarátù: “Tachi Jarateeparipa iidi pëiji: ‘¿Chisãgà cuartode Pascua chik'o k'oit'ee mùchi k'õp'ãyoorã ome?’ ” 12 Ùt'ùpema pisode irua ak'ùpiit'eeda aji, cuarto waibùa ne–inaa jõmaa ome. Mama ne–inaa jõma óotù tachi nek'odait'ee.
13 Ãchi wãdak'ãri, jõmaweda ununajida Jesupa jaradak'a mãik'aapa mama ne–inaa jõma oojida Pascua chik'o k'odait'ee.
14 Nek'odait'ee pak'ãri, Jesús chi k'õp'ãyoorã ome mesade su–ak'ù p'aneejida. 15 Mãpai ichia mãgaji:
—¡Wãara mù piui naaweda, parã ome na Pascua fiestadepema chik'o audú k'o k'inia baji! 16 Mùa jara bù: Parã waa nãgá nek'oda–e pait'ee mù ome, Tachi Ak'õre truade p'anadai naaweda.
17 Mãpai copa jitap'eda, gracias jaraji Tachi Ak'õremaa mãik'aapa mãgaji:
—Jitátù na copa mãik'aapa jedétù pãchi pitapai. 18 Mùa jara bù: Mùa vino waa to–e pait'eeda aji, Tachi Ak'õre truade pai naaweda.
Pan vino ome k'odap'edaa
19 Maap'eda Jesupa pan ataji mãik'aapa ùt'aa t'âji gracias jarait'ee Tachi Ak'õremaa. Ma pan k'õrat'aaji mãik'aapa chi k'õp'ãyoorãmaa teeji. Mãpai mãgaji:
—Nãgà pan mù k'ap'ùa, mù peepiit'ee parã k'aripait'ee. Nãgá pan k'odak'ãri, k'opatáatù k'irãpadait'ee mù piuda parã pari.
20 Nek'odap'edaa t'êepai, ichiaba mãgá ooji ma vino ome. Mãgaji:
—Nãgà vino mù waa, mùchi waa bat'ait'ee perã mù piuk'ãri eperãarã pari. Tachi Ak'õrepa nãgà ûraa chiwidi jara bù. Mùchi waa bat'ada k'aurepa irua wêpapiit'ee parãpa p'ek'au k'achia oopata mãik'aapa mùchideerã papiit'ee. 21 Mamîda chi mù traicionaait'ee bù jua na mesa ârù bù mùchi jua ome. 22 Mù, chi Eperã Ak'õre Truadepema ichita piuit'ee Ak'õrepa oopi bùk'a. Mamîda, ¡aai, Tachi Ak'õrepa k'achiadee pëiit'ee chi mù traicionaait'ee bù!
23 Mãpai ãchi pitapai iidi para beeji k'áipata traicionaait'ee.
K'aita Jesús k'õp'ãyo pipùara bù
24 Mãpai chi k'õp'ãyoorã aupedee para beeji k'awaadait'ee k'aita pipùara bù apemaarã k'ãyaara. 25 Mapa Jesupa mãgaji:
—Ijãadak'aa beerã t'ãide reyrãpa ãchia oo k'iniata oopipata eperãarãmaa mãik'aapa mãùrã poro waibùarãpa ãchi jua ek'ari p'anùùrã pia ak'ù p'anùda apata. 26 Mamîda parã mãgá p'anadaik'araa bù. Ma k'ãyaara parã t'ãidepema waibùara bù warra chok'ek'ee baparik'a baipia bù. Ma awara parã t'ãidepema poro waibùara bù mimiapari jîp'aak'a beeipia bù parã k'aripait'ee. 27 ¿Chisãgà eperã waibùara bù; chi mesade su–ak'ù bù nek'oit'ee maa–e pùrã chi chik'o jedepari? ¿Chi mesade su–ak'ù bù–ek'ã? Jõdee mù nama bù parã t'ãide chi chik'o jedeparik'a.
28 +Parã ichita mù ome p'anù, nepùrade wa ne–inaa k'achiade p'anajida mîda. 29 Mapa mùa parã reyrã papiit'ee mù Ak'õrepa mù rey papidak'a. 30 Parã nek'odait'ee Ak'õre truade mãik'aapa ne–inaa todait'ee mù ome mù ùt'aripema mesade. Ma awara su–ak'ù p'aneedait'ee rey su–ak'ù beeparide. Israeldeepa ëreerã doce uchiadap'edaarã iru p'anadait'ee parã jua ek'ari mãik'aapa jaradait'ee mãùrãpa oopatap'edaa pia wa k'achia.
Jesupa jarada Simón Pedropa ichi k'awa–e bùda ait'ee
(Mateo 26.31-35; Marcos 14.27-31; Juan 13.36-38)
31 Ichiaba Jesupa mãgaji:
—Simón, Simón, Satanapa parã iidipari trigo ome oopatak'a oo k'inia bairã chi tau ãyaa atadait'ee nêesidak'ãri. 32 Mamîda mù ùt'aa t'âpari pù pari mùde ijãa bapariimerã. Waya mù ome nipak'ãri, k'aripáji pùchi âpemaarã mù k'ap'ùa, ichita ijãapataadamerã.
33 Mãpai Simonpa mãgaji:
—Tachi Waibùa, mù pù ome nipa k'inia bùda aji, mù carcelde t'ù nâbùruta pùjida maa–e pùrã piuru pùjida.
34 Jesupa p'anauji:
—Pedro, mùa jara bù: Idi p'ãrik'ua et'erre k'arii naaweda, jarada õpee pùa mù k'awa–e bùda ait'ee.
Jesús chupùria nâbait'ee hora k'ait'a pak'ãri
35 Maap'eda Jesupa iidiji:
—Mùa parã pëik'ãri muchila wêe, p'arat'a te wêe, chancla wêe, ¿net'aa apida faltajidak'ã? aji.
P'anaujida:
—Maarepida faltada–e pajida ajida.
36 Mãpai irua mãgaji:
—Ârá, jõdee, chi muchila iru bùpa ateeipia bù ichi p'arat'a te ome; chi espada wêe bùpa ichi ârùpema p'aru jâ bù netoipia bù mãik'aapa espada aba neto ataipia bù. 37 Mùa mãga jara bù ichita uchiait'ee perã mùde jara bùk'a Ak'õre Ûraa p'ãdade:
‘Eperã t'ãri k'achia–idaak'a iru p'anajida.’(Isaías 53.12)
Jõma ma p'ãdade jara bù mùde ichita p'asait'eeda aji.
38 Mãpai ãchia mãgajida:
—Tachi Waibùa, nama espada omé iru p'anùda ajida.
Mãpai irua p'anauji:
—Jãgapaipù.
Jesús Getsemaní ne–uu k'ãide ùt'aa t'âda
(Mateo 26.36-46; Marcos 14.32-42)
39 Maap'eda Jesús wãji Olivo Eedee ichi wãpatak'a mãik'aapa chi k'õp'ãyoorã t'êe wãjida. 40 Mama panadak'ãri, ichia ãramaa mãgaji:
—Ùt'aa t'çtù p'ek'au k'achiade baaipiamaapa.
41 Maap'eda Jesús waawipai wãji chi k'õp'ãyoorã p'anadap'edaamãiipa. Mama bedabaidachi ùt'aa t'âit'ee. 42 Mãgaji:
—Ak'õre, pùchia k'inia bù pùrã, k'aripáji na miait'ee bùdeepa. Mamîda oonaapáde aji, mùa k'inia bùk'a. Jîp'a pùa k'inia bàk'ata oopáde aji.
43 [Mãga nùde ùt'aripema ángel iru ik'aawa bainâ ba cheji iru k'aripait'ee. 44 Jesús audú t'ãri p'ua nâbada perã, audupùara ùt'aa t'âpachi, ichi jùa eujãde baairumaa waa t'eut'ewaak'a.]
45 Ùt'aa t'â aupak'ãri, chi k'õp'ãyoorã atabëidamaa wãji. Mamîda ununaji k'ãi para bù, audú t'ãri p'ua p'anadap'edaa perã. 46 Mãpai irua mãgaji ãramaa:
—¿Sãap'eda k'ãi jõnùma? aji. P'irabáitù mãik'aapa ùt'aa t'çtù p'ek'au k'achiade baaipiamaapa.
Jesús jita atadap'edaa
(Mateo 26.47-56; Marcos 14.43-50; Juan 18.2-11)
47 Jesús at'ãri pedeemaa bùde, eperãarã chok'ara pachejida. Ma eperãarã chok'ara chedap'edaa naa chewãji Judas, Jesús k'õp'ãyoorã docedepema. Mãgà Jesús k'ait'a chek'ãri k'îra ât'aait'ee, 48 Jesupa mãgaji:
—Judas, ¿mù k'îra ârupa mù, chi Eperã Ak'õre Truadepema traicionaaruk'ã? aji.
49 Jesús ome p'anadap'edaarãpa mãga unudak'ãri, iidijida:
—Tachi Waibùa, ¿espadapa chõodaipia bùk'ã? ajida.
50 Aramata ãradepema abaapa p'aareerã poro waibùa mimiapari juaraarepema k'ùùrù orp'et'aaji espadapa. 51 Mãpai Jesupa mãgaji:
—Ichiak'au bàtù; jãgapaipù.
Mãpai Jesupa ma eperã k'ùùrù orp'et'aadamãi t'õbait'aaruta, anidachi. 52 Mãpai mãgaji ichi ata chedap'edaa p'aareerã poroorãmaa, Tachi Ak'õre te jâapataarãmaa mãik'aapa judiorã poro waibùarãmaa:
—¿Sãap'eda parã espada ome mãik'aapa pak'uru ome chejidama aji, mù jita atade, nechùayaa bù jita atapatak'a? 53 Ewari chaa mù Tachi Ak'õre tede bapari*chi? parã ome. Maapai parãpa mù jita atada–e paji. Mamîda hora pajipù parãpa ne–inaa k'achia oodamerã mùmaa, Netuara Poro Waibùapa k'inia bùk'a.
Pedropa Jesús k'awa–e bùda ada
(Mateo 26.57-58, 69-75; Marcos 14.53-54, 66-72; Juan 18.12-18, 25-27)
54 Jesús mãgá jita atadap'eda, ateejida p'aareerã poro waibùa temaa. Mãùmisa Pedro t'ùmùùpapai t'êe wãk'ãtù wãji. 55 Mama te taawaik'a eere t'ùak'au bùmãi t'ùpù oro iru p'anajida mãik'aapa aù ik'aawa eperãarã su–ak'ù p'anajida. Pedro jida ichiaba su–ak'ù beeji ãra ome. 56 Mãga nùde ariipema mimiapari awêrapa Pedro unuji, t'ùpùtau ik'aawa su–ak'ù bù. Ma mimiaparipa pi–ia ak'ùji mãik'aapa mãgaji:
—Nãgà jida auk'a jã eperã ome bajida aji.
57 Mamîda Pedropa meraji:
—Mùa iru k'awa–e bùda aji.
58 Taarã–e nùde awaraapa Pedro unu atak'ãri, ichiaba mãgaji:
—Pù auk'a jã eperã k'õp'ãyoorãdepemada aji.
Pedropa p'anauji:
—¡Mù iru k'õp'ãyo–eda! aji.
59 Hora abaamaa awaraapa ichiaba mãgaji:
—Wãara na eperã ichiaba jãgà ome bajida aji. Ma awara ichi Galilea eujãdepemada aji.
60 Pedropa p'anauji:
—Mùa k'awa–e bùda aji, k'ãaredeta pedee bù.
Aramata Pedro at'ãri pedeemaa bùde, et'erre k'ariji. 61 Mãpai Jesupa ãpùtee ak'ùji Pedromaa mãik'aapa Pedropa k'irãpaji irua jarada: “Et'erre k'arii naaweda, pùa jarada õpee jarait'ee mù k'awa–e bù.” 62 Mãpai Pedro taawaa uchiap'eda, jêe nâbeeji audú t'ãri p'ua nâbada perã.
Jesús oo iru p'anadap'edaa
(Mateo 26.67-68; Marcos 14.65)
63 Jesús jâa p'anadap'edaarãpa iru oo iru p'aneejida mãik'aapa sîpachida. 64 Iru tau p'ãrajâ atadap'eda, mãgapachida:
—¡Pù wãara Tachi Ak'õre Warra pùrã, jarapáde aji, k'áipata pù sîji!
65 Ichiaba awaraa ik'achia pedee jarapachida.
Jesús Junta Suprema k'îrapite
(Mateo 26.59-66; Marcos 14.55-64; Juan 18.19-24)
66 Tap'edaweda judiorã poro waibùarã, p'aareerã poroorã mãik'aapa Moisepa p'ãda jarateepataarã, pia jarait'eera, chi Junta Supremadepemaarã chip'ejida. Mãpai Jesús aneejida ãra k'îrapite. Irumaa iidijida:
67 —¿Pùk'ã ajida, Mesías, Tachi Ak'õrepa pëida eperãarã rey pamerã?
Ichia p'anauji:
—Mùa mãgada aru pùrã, parãpa ijãada–eda aji. 68 Jõdee mùa parãmaa ne–inaa iidiru pùrã, p'anauda–e. 69 Mamîda mùa jara bù: Âraweda mù, chi Eperã Ak'õre Truadepema Tachi Ak'õre Waibùa juaraare su–ak'ù banait'ee.
70 Mãpai jõmaarãpa iidijida:
—¿Mãgara pù Tachi Ak'õre Warrak'ã? ajida.
Jesupa p'anauji:
—Pãchia jara p'anùk'a, mãgada aji.
71 Mãpai ãchia mãgajida:
—¿K'ãare–it'ee eperãarã waa jùrùdayama ajida, irua ooda jaradamerã? Tachi k'ùùrùpa ûrijidada ajida, ma pedee k'achia ichi it'aideepa jarada Ak'õre Waibùa ãpùte.