P'êtrãa chupùria k'ùrùpa primicia teeda
(Marcos 12.41-44)
21
1 Jesupa ak'ùmaa baji, p'arat'ara beerãpa primicia ata bù p'anù misa p'arat'a p'epatade Tachi Ak'õre tede. 2 Mãpai ichia unuji p'êtrãa chupùria k'ùrùpa ata bù cheru p'arat'a tau omé cobredee. 3 Mãga unuk'ãri, Jesupa mãgaji:—Mùa wãarata jararu. Na p'êtrãa chupùria k'ùrùpa primicia waibùara teejida aji, apemaarã k'ãyaara. 4 Jõmaarãpa tee p'anù ãchi p'arat'a waibùa iru p'anadap'edaadepema beeda. Jõdee na p'êtrãa, chupùria k'ùrù mîda, ichia iru k'erada jõmaweda teeji Tachi Ak'õremaa. Teejida aji, chi p'arat'a iru bada paara chik'o netoit'ee.
Jesupa jarada Tachi Ak'õre te t'eet'aait'ee
(Mateo 24.1-2; Marcos 13.1-2)
5 Eperãarã ûk'uru pedeemaa p'anajida Tachi Ak'õre tede. Jarapachida mãu pi–iadee oo k'obù mãik'aapa k'îra wãree bainâ bù eperãarãpa net'aa tee p'anadap'edaa k'aurepa. Mãga ûrik'ãri, Jesupa mãgaji:
6 —Ewari cherude parãpa na jõma unu p'anù unuda–e pait'ee. Mãu apida bee–e pait'ee awaraa mãu ârù, na jõmaweda t'eek'oo chedait'ee perã.
Ne–inaa p'asait'ee na p'ek'au eujã jõi naaweda
(Mateo 24.3-28; Marcos 13.3-23)
7 Mãpai Jesumaa iidijida:
—Tachi Jarateepari, ¿sãapaita mãga p'asait'eema? ajida. ¿Sãga k'awadayama ajida, ma ewari k'ait'a pak'ãri p'asait'ee pùa jaradak'a?
8 Jesupa p'anauji:
—Tauk'a nipapatáatù apidaamaa k'ûrapiamaapa. Mù jîak'a chok'ara chedait'ee. Seewata jaradait'ee: “Mùta Ak'õre Warra; ârapù paji chi cheit'ee bada.” Mamîda ãchia jara p'anù ijãanáatù. 9 Ûridak'ãri eperãarãpa jura chõo jõnù mãik'aapa oodaamaa p'anù ãchi poro waibùarãpa jara p'anùk'a, p'eranáatù. Ichita mãga p'asait'ee naapùara. Mamîda Tachi Ak'õre ewari waibùa ewate at'ãri pa–e pait'ee.
10 Ichiaba Jesupa mãgaji:
—Eperãarã awaraarã ome chõodait'ee. 11 Awêrachai wëre nâbeeit'ee; jarra oodait'ee mãik'aapa k'ayaa paraait'ee eujã awara–awaraade. Ma awara pajãde ne–inaa waide unudak'aa unupataadait'ee; ne–inaa tachi p'erapipari.
12 +Mamîda mãga p'asai naaweda, ijãadak'aa beerãpa parã jùrùpataadait'ee miapidait'ee mãik'aapa jita atadap'eda, ateedait'ee Tachi Ak'õre Ûraa jarateepata tede. Mama parã ak'ùdait'ee jaradait'ee eperãarã pia wa k'achia. Ichiaba carcelde t'ù nâbùnadait'ee mãik'aapa ateedait'ee reyrã k'îrapite maa–e pùrã eperãarã poro waibùarã k'îrapite. Ma jõma parãmaa oopataadait'ee, mùde ijãapata k'aurepa. 13 Mãga oodak'ãri, ãchi k'îrapite parãpa jarapataadai Tachi Ak'õrepa ooda parã–it'ee mù k'ap'ùa pari. 14 Maapai k'îsianáatù k'ãare pedeeta jaradai. 15 Mùa k'îsia k'awaa pedee jarapiit'ee, parã k'îra unuamaa iru p'anapataarãpa p'anaupiamaapa mãik'aapa jarapiamaapa parãpa seewa jara jõnù. 16 Mamîda pãchi ak'õreerãpa, âpemaarãpa, ëreerãpa mãik'aapa k'õp'ãyoorãpa paara parã traicionaadait'ee. Maapai parã ûk'uru peepidait'ee. 17 Jõmaarãpa parã k'îra unuamaa iru p'anapataadait'ee mùde ijãapata k'aurepa. 18 Mamîda parã puda k'ãu apida atuada–e, mùa parã ak'ù bapariit'ee perã. 19 Mapa ¡t'ãripa choopatáatù! Mãgá parã ùt'aa wãdait'ee.
Jerusalén p'uuru jõdariit'ee
20 —Unudak'ãri soldaorãpa Jerusalén p'uuru wap'ùra iru p'anù, k'awáatù taarã–e jõdariit'ee. 21 Maapai Judea eujãde p'anùùrã mirudaipia bù eera jêra bùdee. Jõdee Jerusalén p'uurude p'anùùrã mamãik'aapa uchiadaipia bù. Ichiaba chi taawa p'anùùrã chedaik'araa bù p'uurudee. 22 Mãga oodaipia bù ma ewate Tachi Ak'õrepa mùde ijãadak'aa beerã k'achia ooit'ee perã. Eperãarã chupùria chitoonadait'ee, Tachi Ak'õrepa ãra k'achia ooit'ee perã ichi ley p'ãdade jara bùk'a. 23 ¡Aai, ma ewate chupùria jõneedait'ee wêraarã biak'oo bee maa–e pùrã warra chak'eerã jude iru bee, isapai p'oyaa wãda–e pait'ee perã! Ma eujãde audú chupùria jõnadait'ee mãik'aapa Tachi Ak'õrepa ne–inaa k'achia ooit'ee na p'uurudepemaarãmaa. 24 Ûk'uru piudait'ee espadapa; awaraarã ateedait'ee awaraa eujãdee esclavoorãk'a p'aneedamerã. Maapai Tachi Ak'õrede ijãadak'aa beerãpa Jerusalén p'uuru iru p'anadait'ee ãchi jua ek'ari, Tachi Ak'õrepa ewari awara bùda parumaa ãra k'achia ooit'ee.
Eperã Ak'õre Truadepema waya chek'ãri
(Mateo 24.29-35, 42-44; Marcos 13.24-37)
25 —Maapai ne–inaa eperãarãpa waide unudak'aa unudait'ee ak'õrejîrude, atanede mãik'aapa lucerode. Na p'ek'au eujãdepemaarãpa mãga unudak'ãri, k'awada–e pait'ee k'ãata k'îsiadai mãik'aapa p'eradait'ee, audú p'usa t'o jîwaa nâbait'ee perã. 26 Eperãarã k'îra k'îdaipataadait'ee p'era jõnùpa, k'îsiadak'ãri na p'ek'au eujã p'asarude, pajã wëre nâbait'ee perã. 27 Mãpai eperãarãpa unudait'ee mù, chi Eperã Ak'õre Truadepema jõmaarã k'ãyaara waibùara bù, k'îra wãree cheru jâararade. 28 Mãga p'asak'ãri, sõcharra p'anapatáatù mãik'aapa t'ãri o–îa para bátù, taarã–e nùde mù cheit'ee perã parã k'aripade atuanaadamerã.
Jesupa higuera bùùrùde jarateeda
29 Ichiaba Jesupa nãga nepùrùji jarateeit'ee ichi waya cheit'ee pak'ãri:
—K'îsíatù higuera bùùrùde maa–e pùrã awaraa nejõ bùùrùde. 30 Unudak'ãri k'iru t'uk'ua uchia nâbeeru, parãpa k'awaapata eujã wãsia wã. 31 Mãga pùk'a unudak'ãri mãgà ne–inaa p'asaruta, k'awaadait'ee Tachi Ak'õre ewari waibùa ewate k'ait'a bù.
32 +Mùa wãarata jararu. Ârapemaarã piudai naaweda, ma ne–inaa jõmaweda p'asait'ee. 33 Ewari cherude pajã na p'ek'au eujã ome jõdait'ee. Mamîda ichita p'asait'ee mùa pedee jaradak'a.
34 +K'îrak'aupai k'ùùrù k'isua p'aneedai pãchi k'inia ne–inaa oo k'iniapa; it'ua to k'iniapa maa–e pùrã audú k'îsia jõnùpa na p'ek'au eujãdepema ne–inaade. Maa–e pùrã atu bùde 35 ne–animal trampade baaiparik'a, mãga pùk'a parã atu p'anùde mù waya cheit'ee. Ma ewate ne–inaa k'achia p'asait'ee jõmaweda na p'ek'au eujãdepemaarãmaa. 36 Mapa tauk'a nipapatáatù mãik'aapa ichita ùt'aa t'âpatáatù. Mãgá baaida–e pait'ee ma ne–inaa k'achia p'asait'ee bù juade mãik'aapa panadait'ee mù, chi Eperã Ak'õre Truadepema k'îrapite.