Tachi Ak'õrepa Jesús pëida
(Mateo 21.23-27; Marcos 11.27-33)
20
1 Ewari aba Tachi Ak'õre tede Jesupa jarateemaa baji pedee pia Ak'õrepa jara pëida. Mãga nùde pachejida p'aareerã poroorã, Moisepa p'ãda jarateepataarã mãik'aapa judiorã poro waibùarã. 2 Mãùrãpa Jesumaa iidijida:—¿Tachi Ak'õrepa tai bùji–ek'ã ichi te ak'ùdamerã? ¿K'aipa pùmaa nãga oopi bùma? ajida.
3 Jesupa p'anauji:
—Mùa pida parãmaa iidiit'eeda aji. P'anáutù p'oyaa p'anaudai pùrã. 4 ¿K'aipa pëijima aji, Juan Bautistapa poro choo chemerã; Tachi Ak'õrepa maa–e pùrã eperãarãpa?
5 Mãpai ãchi pitapai pedee para beeji:
—Tachi Ak'õrepa pëidada aruta pùrã, irua iidiit'ee: “Mãgara, ¿sãap'eda Juan ûraa ijãada–e pajima?” ait'ee. 6 Ichiaba jaradaik'araa bù: “eperãarãpa Juan pëijida”. Mãga jararuta pùrã, na eperãarã k'îraudaridait'ee tachi ome mãik'aapa tachi mãupa bat'a peedai. Jõmaarãpa ijãa p'anù Juan Tachi Ak'õre pedee jarapari paji.
7 Mapa ãchia p'anaujida:
—K'awada–e p'anùda ajida, k'aipa Juan pëiji poro choo chemerã.
8 Mãpai Jesupa mãgaji:
—Mãgara mùa pida jara–eda aji, k'aipa mùmaa nãga oopi bù.
Mimiapataarã k'achia beerãdé nepùrùda
(Mateo 21.33-44; Marcos 12.1-11)
9 Maap'eda Jesupa nãga nepùrùmaa beeji jarateeit'ee eperãarãmaa:
—Eperãpa uva eujã uuji. Maap'eda ne–uu eujã ak'ùpataarã jùrùji aùde mimiadamerã. Mãpai awara ãyaa t'ùmà wãji. 10 T'êepai uva oropata ewari pak'ãri, ma eujã chiparipa ichi mimiapari pëiji ma ne–uu ak'ùpataarãmaa, ichi eere bee bù chauda tee pëidamerã. Mamîda ãchia ma mimiapari sîk'oojida mãik'aapa pëit'aajida waya chiparimaa, maarepida net'aa wêe. 11 Mãpai ma ne–uu chiparipa awaraa mimiapari pëiji. Mamîda mãgùmaa ichiaba ik'achia jaradap'eda, p'ua oot'aajida mãik'aapa jua arajãgaa pëit'aajida. 12 Ma t'êepai awaraa mimiapari pëiji. Mamîda ma ne–uu ak'ùpataarãpa iru auk'a p'ua oojida mãik'aapa taawaa pëijida.
13 +Mãpai ma ne–uu chiparipa mãgaji: “Ârá, ¿k'ãata ooyama? aji. Pëiit'eeda aji, mù warra k'inia iru bù. Taawa iru waaweedayada” aji. 14 Mamîda ma ne–uu ak'ùpataarãpa iru warra t'ùmà cheru unu atadak'ãri, ãchi pitapai mãgapachida: “Jãgùpa ichi ak'õre net'aa jõmaweda atait'ee chi ak'õre piuk'ãri. Peet'aadáma ajida, tachi–it'ee na ne–uu eujã beemerã.” 15 Mapa ma uva eujãdeepa uchia atajida mãik'aapa peet'aajida.
Mãpai Jesupa mãgaji:
—Parãpa, ¿k'ãata k'îsia p'anùma aji, ma uva eujã chiparipa ooit'ee ma eujã ak'ùpataarã ome? 16 Mùa jarait'ee. Wãk'ãri, ma eujã ak'ùpataarã peek'ooit'eeda aji, mãik'aapa chi eujã teeit'eeda aji, awaraarãmaa ãchia ak'ùpataadamerã.
Mãga ûridak'ãri, eperãarãpa mãgajida:
—¡Mãga p'asa–e pait'eeda! ajida.a
17 Mamîda Jesupa ãramaa ak'ùji mãik'aapa mãgaji:
—Mãgara, ¿k'ãata jara k'inia bùma aji, na pedee Tachi Ak'õre Ûraa p'ãdadepema?
‘Te oopataarãpa mãu k'iniada–e padap'edaa pipùara padachi.’ (Salmos 118.22)
18 Eperã ma mãu pipùara bù ârù t'îutùru pùrã, chupùria nâbeeit'ee. Jõdee ma mãu eperã ârù baairu pùrã, iru peet'aait'ee.
19 P'aareerã poroorãpa Moisepa p'ãda jarateepataarã ome ma nepùrùda ûri aupadak'ãri, k'awaajida Jesupa ãchideta pedee baji. Mapa aramata jita atapi k'inia p'anajida. Mamîda mãga ooda–e paji eperãarã waawee p'anadap'edaa perã.b
Judiorãpa Cesar–it'ee impuesto p'aapatap'edaa
(Mateo 22.15-22; Marcos 12.13-17)
20 Maperã t'êepai ma judiorã poroorãpa pëijida t'ãri jîp'a pùk'a beerã Jesús ome pedeede. K'inia p'anapachida ma eperãarãpa iidi p'anùùpa Jesupa pedee k'achia jarapidai Romadepemaarã poro waibùarã ãpùte. Mãgá ma eujã ak'ùpari, Romadepemaarã poro waibùapa iru atapii. 21 Ma–it'ee ma pëida eperãarãpa Jesumaa iidijida:
—Tachi Jarateepari, taipa k'awa p'anùda ajida, pùa pedee wãara jarapari mãik'aapa jarateepari eperãarãpa ne–inaa pia oo k'awaadamerã. Eperãarã maarepida k'ûrak'aa. Ichita jara bù eperãarã k'îra jîp'a p'anapataadamerã Tachi Ak'õrepa k'inia bùk'a. 22 Mãga bùta, nãga iidi k'inia p'anù: ¿Pia bùk'ã ajida, taipa Cesarmaa impuesto p'aadait'ee wa mãga–e?
23 Jesupa k'awa bada perã mãùrãpa k'îsia k'achia iru p'anù, mãgaji:
24 —Ak'ùpítù denario p'arat'a tau. ¿K'ai k'îrata nade bù mãik'aapa k'ai t'âta p'ã bùma? aji.
P'anaujida:
—César k'îra mãik'aapa ichi t'âta p'ã bùda ajida.
25 Mãpai Jesupa mãgaji:
—Mãgara téetù Cesarmaa irua net'aa iidipari, mãik'aapa auk'a téetù Tachi Ak'õremaa irua iidipari.
26 Mãga ûridak'ãri, k'awaajida Jesumaa pedee k'achia p'oyaa jarapida–e pai eperãarã taide. Mapa ak'ùtrua para beeji mãik'aapa k'îup'eek'oodachida.
Piudap'edaarã chok'ai p'irabaipatade<R>iididap'edaa
(Mateo 22.23-33; Marcos 12.18-27)
27 Maap'eda saduceorã ûk'uru wãjida Jesumaa. Saduceorãpa ijãadak'aa eperã piup'eda waya chok'ai p'irabaii. Maperã iidijida:
28 —Tachi Jarateepari, Moisepa nãga p'ã bëijida ajida. Eperã miak'ãi bù warra wêe piuru pùrã, chi âpemapa iru wêra ataipia bù mãik'aapa aù ome warra ooipia bù chi âpema piuda k'ap'ùa pari.c 29 Mãga jaradap'eda, ma saduceorãpa nãga nepùrùjida. P'anajida âpemaarã siete. Chi naapema miak'ãiji. Mamîda warra wêe piuji. 30 Chi araarepema 31 mãik'aapa araarepema miak'ãijida ma p'êtrãa ome. Mamîda auk'a warra wêe piujida. Ma t'êepai chi apemaarã jida miak'ãijida ma p'êtrãa ome. Mamîda ãchi jõmaweda warra wêe piujida. 32 Maap'eda ma wêra ichiaba piuji. 33 Ârá taipa nãga k'awa k'inia p'anù. Piudap'edaarã waya chok'ai p'irabaidak'ãri, ¿chisãgà âpemata ma wêra ùmùk'îra pait'eema ajida, ãchi jõmaweda iru ome miak'ãi p'anadap'edaa perã?
34 Jesupa p'anauji:
—Na p'ek'au eujãde ùmùk'îraarã mãik'aapa wêraarã miak'ãipata. 35 Mamîda Ak'õrepa jùrùt'eradaarã ichi eujãde p'anadak'ãri, ùmùk'îraarã wêraarã paara waa miak'ãida–e pait'ee, 36 waa piuda–e pait'ee perã. Angeleerãk'a p'anadait'ee mãik'aapa Tachi Ak'õre warrarã padait'ee, chok'ai p'irabaidap'edaa perã. 37 Moisepa paara tachimaa k'awapipari piudap'edaarã chok'ai p'irabaidait'ee. Chonaarãweda Tachi Ak'õrepa irumaa pedeek'ãri pak'uru jep'eda urua jira bùdeepa t'ùpùtauk'a, jaraji ichi Abraham, Isaac, Jacob ijãadap'edaa Ak'õre Waibùa.d 38 ¡Tachi Ak'õre piudap'edaarã Ak'õre Waibùa–e! ¡Chok'ai p'anùùrã Ak'õre Waibùa, iru–it'ee eperãarã jaureerã jõma chok'ai p'anadairã!
39 Mãpai ûk'uru Moisepa p'ãda jarateepataarãpa mãgajida:
—Tachi Jarateepari, pia p'anaujida ajida.
40 Maadamãiipa waawee p'aneejida waa iididait'ee.
Tachi Ak'õrepa pëida eperãarã rey pamerã
(Mateo 22.41-46; Marcos 12.35-37)
41 Mãpai Jesupa iidiji:
—¿Sãap'eda jara p'anùma aji, Mesías chonaarãwedapema Rey Daviddeepa uchiait'ee? 42 Salmo p'ãdade Rey Davidpa paara jara bù:
‘Tachi Ak'õrepa jaraji Tachi Waibùamaa: “Pù mù ome auk'a waibùa bairã, su–ak'ù beepáde aji, mù juaraare, 43 mùa pù k'îra unuamaa iru p'anapataarã p'oyaaru misa.” ’e (Salmos 110.1)
44 Davidpa ichi ëreerãdeepa uchiait'ee bùmaa t'âjaraji “Tachi Waibùa”. ¿Mapa k'awada–ek'ã aji, Mesías waibùara bù chonaarãwedapema Rey David k'ãyaara?
Jesupa Moisepa p'ãda jarateepataarã ùmùateeda
(Mateo 23.1-36; Marcos 12.38-40; Lucas 11.37-54)
45 Eperãarã jõmaarãpa ûrimaa p'anajida, Jesupa chi k'õp'ãyoorãmaa mãgak'ãri:
46 —K'îrak'aupai p'anapataadai Moisepa p'ãda jarateepataarãk'a. Ãchi audua p'anadairã p'aru teesoo jâi awaa p'anapata mãik'aapa k'inia p'anapata jõmaarãpa ãchimaa saludaadamerã plaza bee chaa, tachi poro waibùarã ome oopatak'a. Ichiaba su–ak'ù p'aneepata su–ak'ù beepari pipùara bùde Tachi Ak'õre Ûraa jarateepata tede mãik'aapa nek'odak'ãri, chi su–ak'ù beepari pipùara bùde su–ak'ù p'aneepata. 47 Ma awara p'êtrãarã k'aripadai k'ãyaara, ãra te jãri atapata mãik'aapa taarã ùt'aa t'âpata, eperãarãpa ãchi t'o p'anadamerã. Mãga p'anapata perã, Tachi Ak'õrepa ãra audupùara miapiit'ee, k'achia beerã miapik'ãri ichi ewari waibùa ewate.