Jesupa p'êtrãade mãik'aapa charrade nepùrùda
18
1 Jesupa chi k'õp'ãyoorãmaa nãga nepùrùji jarateeit'ee ichita sêda–ee ùt'aa t'âpataadamerã. 2 Mãgaji:—P'uuru abaade charra bapachi. Mãgùpa Tachi Ak'õre, eperãarã paara waaweek'aa paji. 3 Ma p'uurude ichiaba bapachi p'êtrãa. Mãgà nepùra iru baji awaraa eperã ome. Mapa wãpachi ma charramaa irua ma nepùra ak'ùmerã. 4 Ewari chaa ma charrapa iru pedee ûripachi mîda, k'aripa k'iniak'aa paji. Mamîda t'êepai k'îsiaji: “Mùa Tachi Ak'õre waaweek'aa, eperãarã jida. 5 Mamîda na p'êtrãapa mù itu bù–e bairã, mù t'ãri k'achiadai naaweda, k'aripait'ee waa chenaamerã.”
6 Mãpai Jesupa ichiaba mãgaji:
—Ma charra k'achia bùpa mãga ooji pùrã ma p'êtrãa ome, 7 audupùara Tachi Ak'õrepa ichia jùrùt'eradaarã k'aripait'eeda aji, ãrapa ùt'aa iidipata perã ãstaawa, p'ãrik'ua pida. ¿Ãramaa taarã nùpiik'ã? 8 Mùa jara bù: Taarã–eweda ãra k'aripait'ee. Mamîda mù, chi Eperã Ak'õre Truadepema waya chek'ãri, ¿unu cheik'ã aji, na p'ek'au eujãde p'anù ijãapataarã at'ãri mùde wãara ijãapata?
Jesupa nepùrùda fariseode mãik'aapa impuesto p'eparide
9 Jesupa awaraa nepùrùji jarateeit'ee chi awaraarã ek'ariara ak'ù p'anùùrãmaa, ãchi t'ãri piara p'anù jîak'aapa:
10 —Ùmùk'îraarã omé wãjida Tachi Ak'õre tedee ùt'aa t'âde. Aba fariseo paji. Jõdee chi apemapa Cesar–it'ee impuesto p'epachi. 11 Ma fariseo ak'ùnâ beep'eda, nãga ùt'aa t'âpachi: “Aai, Ak'õre, pùmaa gracias jarapari, mù apemaarãk'a bak'aa perã. Mù nechùayaa bak'aa; k'achia ooyaa bak'aa; chîara wêra ome k'ãik'aa mãik'aapa ook'aa jã impuesto Cesar–it'ee p'eparipa ooparik'a. 12 Tomia chaa k'ãima omé nek'ok'aa ùt'aa t'âit'ee mãik'aapa mùa jitaru ne–inaa diezdepema chaa aba pùmaa teepari.” 13 Mamîda ma Cesar–it'ee impuesto p'epari t'ùmà bainâ baji, audú p'ek'au k'achia ooyaa bù jîak'aapa. Mapa ùt'aa pida ak'ùk'aa paji. Jîp'a t'ûa t'aap'e nâbapachi mãik'aapa ùt'aa t'âpachi: “Aai, Ak'õre, mù chupùria k'awáaji p'ek'au k'achia ooyaa bairã.” 14 Mùa jara bù: Ma impuesto p'epari k'ãiwee wãji ichi temaa, Tachi Ak'õrepa irua p'ek'au k'achia oopata wêpapida perã. Jõdee mãga–e paji ma fariseo ome. Tachi Ak'õrepa irua p'ek'au k'achia oopata wêpapi–e paji. Chi awaraarã k'ãyaara waibùara pa k'inia bù ek'ariara bait'ee Tachi Ak'õre k'îrapite. Jõdee chi audua–ee bù awaraarã k'ãyaara waibùara pait'ee Tachi Ak'õre k'îrapite.
Jesupa warrarã bendiciada
(Mateo 19.13-15; Marcos 10.13-16)
15 Ichiaba eperãarãpa warra chak'eerã aneejida Jesumaa iru jua bùmerã ãra ârù mãik'aapa bendiciamerã. Mamîda chi k'õp'ãyoorãpa mãga unudak'ãri, ma warrarã aneedap'edaarã ùtrùajida. 16 Mãpai Jesupa chi k'õp'ãyoorã t'â p'eji mãik'aapa mãgaji:
—Ichiak'au mùmaa warrarã chepítù, Tachi Ak'õrepa ãra jîak'aarã bùit'ee perã ichi jua ek'ari, ichideerã p'aneedamerã. 17 Mùa wãarata jararu. Warra chaipa t'ãripa wãara ijãapari. Eperãpa mãgá Tachi Ak'õrede ijãa–e pùrã, p'oyaa ba–e pai iru jua ek'ari ichideerã ome.
Eperã p'arat'ara bada Jesús ome pedeeda
(Mateo 19.16-30; Marcos 10.17-31)
18 Eperãarã poro waibùapa iidiji Jesumaa:
—Tachi Jarateepari t'ãri pia, ¿k'ãata mùa ooipia bùma aji, ùt'aa wãit'ee?
19 Jesupa p'anauji:
—¿Sãap'eda mùmaa t'ãri pia bùda a bùma? aji. T'ãri pia apaita bù: mãgà Tachi Ak'õre. 20 Pùa k'awa bù Tachi Ak'õrepa Moisemaa ûraa p'ãpida:
‘Eperã peenáaji; miak'ãi bù pùrã, awaraarã ome k'ãináaji; nechùanáaji; seewa jaranáaji chîara k'achiade baaipiit'ee; pùchi ak'õre mãik'aapa pùchi nawe k'inia iru baparíiji mãik'aapa ãra pedee ûriparíiji.’ (Éxodo 20.12-16)
21 Mãpai ma eperãpa mãgaji:
—Mùa ma jõma ooparida aji, k'ûtrãaweda.
22 Mãga ûrik'ãri, Jesupa p'anauji:
—Ne–inaa aba waide oo–e bù. Pùchi net'aa jõmaweda netok'oonáji mãik'aapa chupùria beerãmaa ma p'arat'a téeji. Mãga ooru pùrã, ne–inaa pipùara iru bait'ee Tachi Ak'õre eujãde. Mãga oop'eda, mù ome nipa chéji.
23 Mamîda mãga ûrik'ãri, ma eperã k'îra pia–ee wãji, p'arat'a audú k'inia bada perã. 24 Mãga unuk'ãri, Jesupa mãgaji:
—¡Chaaree bù p'arat'ara beerã p'aneedait'ee Tachi Ak'õre jua ek'ari ichideerã ome! 25 Chaareera bùda aji, p'arat'ara bù beeit'ee Tachi Ak'õre jua ek'ari, camello aguja taude wãyaai k'ãyaara.
26 Mãpai chi ûri p'anadap'edaarãpa iidijida:
—Mãgara, ¿k'aita p'oyaa ùt'aa wãyama? ajida.
27 Jesupa p'anauji:
—Eperãarã p'oyaa ùt'aa wãda–eda aji, ãchi k'îradoopa, audú chaaree bairã. Mamîda Tachi Ak'õre–it'ee ne–inaa chaaree wê–eda aji.
28 Mãpai Pedropa mãgaji:
—Tachi Waibùa, tai net'aa jõmaweda atabëijida pù ome nipapataadait'ee.
29 Jesupa p'anauji:
—Mùa wãarata jararu. Eperã mùde ijãa bù k'aurepa atabëiru pùrã ichi te, wêra, âpemaarã, ak'õreerã maa–e pùrã warrarã, 30 mãgà eperãpa waapùara atait'ee na p'ek'au eujãde bù misa, mãik'aapa piuk'ãri, ichita chok'ai bapariit'ee Tachi Ak'õre ome.
Jesupa jarada õpee jarada k'achia beerãpa ichi peedait'ee
(Mateo 20.17-19; Marcos 10.32-34)
31 T'êepai Jesupa chi k'õp'ãyoorã doce awara ãi t'â p'e ataji mãik'aapa mãgaji:
—Ârá tachi Jerusalendee wãdait'ee. Mama jõmaweda chonaarãwedapema Ak'õre pedee jarapataarãpa p'ãdap'edaak'a p'asait'ee mù, chi Eperã Ak'õre Truadepema ome. 32 K'achia beerãpa mù k'îra tewaraarãmaa teedait'ee. Mãgùùrãpa mù oo iru p'anadait'ee, ik'achia jaradait'ee mùmaa mãik'aapa k'îramaa idudait'ee. 33 Maap'eda mù wùdait'ee mãik'aapa peet'aadait'ee. Mamîda ewari õpeemaa mù waya chok'ai p'irabaiit'eeda aji.
34 Jesús k'õp'ãyoorãpa maarepida k'awada–e paji irua jarada. Ichiaba k'awada–e paji k'ãaredeta pedee baji. Irua jara k'inia bada p'oyaa k'awadak'aa paji.
Jesupa Jericó p'uurude tau p'ãriu bù jùpada
(Mateo 20.29-34; Marcos 10.46-52)
35 Jesús Jericó p'uuru k'ait'a pak'ãri, unuji tau p'ãriu bù o bi ik'aawa su–ak'ù bù. Mãgà chupùria chùpa chi wãyaarutaarãmaa p'arat'a iidimaa baji. 36 Ichi ik'aawa eperãarã chok'ara wãyaa wãda ûrik'ãri, iidiji:
—¿K'aita nama wãyaa wãdama? aji.
37 P'anaujida:
—Jesús Nazaret p'uurudepemata wãyaa wãda ajida.
38 Mãga ûrik'ãri, ma tau p'ãriu bùpa biaji:
—¡Jesús, Rey David Warra,a mù chupùria k'awáaji!
39 Chi naa wãdap'edaarãpa ùtrùat'aapachida k'îup'ee beemerã. Mamîda waapùara biapachi:
—Rey David Warra, mù chupùria k'awáaji.
40 Mãpai Jesús ak'ùnâ beeji mãik'aapa jaraji aneedamerã. K'ait'a pachek'ãri, Jesupa iidiji:
41 —¿K'ãata k'inia bùma aji, mùa pù ome oomerã?
Tau p'ãriu bùpa p'anauji:
—Tachi Waibùa, mùchi taupa pia unu k'inia bùda aji.
42 Mãpai Jesupa mãgaji:
—¡Unúji! Pùa ijãada perã, jùpa beejida aji.
43 Aramãgá ma tau p'ãriu badapa pia unu beeji mãik'aapa Jesús t'êe wãji. O–îapa pia pedeeji Tachi Ak'õremaa. Ichiaba Jesupa ooda unudap'edaarãpa o–îapa pia pedee p'aneejida Tachi Ak'õremaa.