Jesupa jarateeda p'ek'au k'achiade baainaadamerã
(Mateo 18.6-7, 21-22; Marcos 9.42)
17
1 Jesupa mãgaji chi k'õp'ãyoorãmaa:—Na p'ek'au eujãde ichita p'ek'au k'achia paraait'ee. ¡Mamîda Tachi Ak'õrepa k'achiadee pëiit'eepù chi eperãpa p'ek'au k'achia oopi bù awaraarãmaa! 2 Piara bak'aji k'ûruma iru otaude jâ atadap'eda, p'usa jãde bat'at'aadait'ee, ichia na warrarãmaa p'ek'au k'achia oopii k'ãyaara. 3 ¡K'îrak'aupai parãpa mãga oodai!
+Awaraa ijãaparipa p'ek'au k'achia ooru pùrã, ùtràatù. Mamîda irua p'ek'au k'achia oo amaa bù pùrã, chupùria k'awáatù mãik'aapa ma k'achia ooda perdonáatù. 4 Ewari abaade pùmaa ne–inaa k'achia ooda siete ooru pùjida, jarada siete irua jara cheru pùrã mãga waa oo–e, ichita chupùria k'awáaji mãik'aapa ma k'achia ooda perdonáaji.
Ijãapataarãpa wãara ijãadak'ãri
5 Mãpai chi k'õp'ãyoorãpa Jesumaa iidijida:
—Taimaa waapùara ijãapíji Tachi Ak'õrede.
6 Jesupa p'anauji:
—Mostaza tau p'isi k'edee mîda, waibùadaipari pak'uruk'a. Mãga pùk'a ârá parãpa wãara ijãaruta pùrã, ma–ãri pida, ne–inaa oodai Ak'õrepa k'inia bùk'a. Waapùara ijãadak'ãri, ne–inaa waibùara oodai iru–it'ee. Mãga p'anadak'ãri, na nejõ bùùrùmaa jaradai: “Jãmãik'aapa ãyaa wåji mãik'aapa p'usa jãde baaináji.” Mãgá wãara ijãarutara, ma nejõ bùùrùpa ooi parãpa jararutak'a.
Ichita oodaipia bù Ak'õrepa oopi bùk'a
7 —Parãdepemapa chok'apari aba iru bù ne–uu k'ãide mimia bap'eda maa–e pùrã oveja ak'ùdeepa cheru pùrã, ¿nãga jarak'ajik'ã? “Su–ak'ù béeji mãik'aapa nek'óji.” 8 Mãga–e. Ma k'ãyaara nãga jarai: “Mù–it'ee nejóoji mãik'aapa mùa iidiruta anéeji, mù nek'omaa, ne–inaa tomaa bù misa. T'êepai pù nek'oi mãik'aapa ne–inaa toi.” 9 Ma awara pùa gracias jara–e pait'ee ma chok'aparipa ooda pari pùa jaradak'a. 10 Mãga pùk'a parãpa oodap'eda jõmaweda Ak'õrepa jaradak'a, irumaa nãga jaradaipia bù: “Pùata tai chok'apari. Jîp'a oojida pùa jaradak'a.”
Jesupa leprapa k'ayaa beerã diez jùpada
11 Jesús ode wãde Jerusalendee, wãyaaji Samaria eujãde mãik'aapa Galilea eujãde. 12 Panaji p'uuru chak'ede. Mama irumaa chejida diez ùmùk'îraarã leprapa k'ayaa p'anù. Mamîda t'ùmà p'aneejida mãgá k'ayaa p'anadap'edaa perã. 13 Mãga nùde biajida:
—Jesús, Tachi Jarateepari, ¡tai chupùria k'awáaji!
14 Jesupa ãchi unuk'ãri, mãgaji:
—P'aareerãmaa wåtù jarade Tachi Ak'õre juapa pãchi k'ap'ùa jùpak'ooda.
Mãgá wãrutade, jùpa p'aneejida. 15 Ma diezdepema abaapa unuk'ãri ichi k'ap'ùa jùpada, ãpùtee o–îa cheji. Tachi Ak'õremaa golpe pedee pia jara cheji. 16 Mãpai Jesús k'îrapite bedabaidachi ichi tau bùùrù eujãde t'õbairumaa. Mãga ooji gracias jarait'ee ichi jùpada perã. Ma eperã judio–e paji. Samaria eujãdepema paji. 17 Mãpai Jesupa mãgaji:
—¿Diez paji–ek'ã aji, jùpa p'aneedap'edaarã ãchi k'ayaadeepa? ¿Sãma p'anùma apemaarã nueve? 18 ¿Na k'îra tewaraa aupaita chejik'ã aji, gracias jarade Tachi Ak'õremaa?
19 Mãpai Jesupa mãgaji ma eperãmaa:
—P'irabáiji mãik'aapa wåji. Pùa wãara ijãada perã, jùpa beejida aji.
Sãga pait'ee Tachi Ak'õrepa eperãarã ichideerã papik'ãri
(Mateo 24.23-28, 36-41)
20 Fariseorãpa Jesumaa iidijida:
—¿Sãapaita Tachi Ak'õrepa ichia pëida rey papiit'ee na eujãde?
Jesupa p'anauji:
—Tachi Ak'õrepa pëida rey papi–e pait'ee eperãarã taide. 21 Eperãarãpa jarada–e pait'ee: “Iru nama bù” maa–e pùrã “Iru jãma bù”. Mãga p'oyaa jarada–e iru parã ome bapari perã, unuda–e p'anù mîda.
22 Mãpai Jesupa chi k'õp'ãyoorãmaa mãgaji:
—Ewari cherude parãpa mù, chi Eperã Ak'õre Truadepema, audú unu k'inia jõnadait'ee. Mamîda unuda–e pait'ee. 23 Eperãarã ûk'uruurãpa jaradait'ee: “Iru nama bù” maa–e pùrã “Iru jãma bù”. Mamîda wãnáatù ãchia jara p'anùmaa mãik'aapa ijãanáatù ãchi pedee. 24 Atu p'anùde pa tau p'orep'orek'ãri pajã jõmaweda âdaa ataparik'a, mãga pùk'a atu p'anùde mù, chi Eperã Ak'õre Truadepema, waya cheit'ee. 25 Mamîda mãga pai naaweda ârapemaarãpa mù chupùria papidait'ee mãik'aapa yiaraa iru p'anadait'ee. 26 Noé bada ewaride p'asadak'a, mãga pùk'a p'asait'ee mù, chi Eperã Ak'õre Truadepema waya chek'ãri. 27 Maapai eperãarã nek'opachida, ne–inaa topachida mãik'aapa miak'ãipachida Noé ichi barcode bataurumaa. Mãpai k'oi che nâbeeji, na p'ek'au eujã ûudachi mãik'aapa eperãarã jõmaweda k'iniidachida. 28 Mãga paji ichiaba Lot bapariik'ãri. Eperãarã nek'o para bapachi, to para bapachi, ne–inaa neto para bapachi, ne–uu para bapachi mãik'aapa te oo para bapachi. 29 Mamîda Lot Sodoma p'uurudeepa uchiak'ãri, ma ewate ùt'ariipa k'oi tau baaiparik'a, azufre mãuk'a baaiji t'ùpùtau ome ma p'uuru ârù. Mapa ma p'uurudepemaarã jõmaweda k'iniidachida. 30 Mãga pùk'a pait'ee Eperã Ak'õre Truadepema waya chek'ãri. Eperãarãpa Tachi Ak'õrede k'îsiada–e p'anadait'ee.
31 +Ma ewate eperã terrazade bù pùrã, mamãik'aapa ùrabaik'ãri, teedaa t'îuik'araa bù ichi net'aa p'e atade. Ma awara eperã ichi ne–uu k'ãide ni pùrã, teedaa cheik'araa bù ichi net'aa atade. 32 K'irãpátù Lot wêra p'asada. 33 Eperã piuamaa bù pùrã mùde ijãapari k'aurepa, mãgà piuk'ãri atuait'ee. Mamîda eperã piuru pùrã mùde ijãapari k'aurepa, mãgà eperã piuk'ãri, ùt'aa wãit'ee.
34 +Mùa jara bù: Ma ewate p'ãrik'ua mù waya cheit'ee. Omé araa p'aru abaade k'ãi p'anùde angeleerãpa aba ùt'aa ateedait'ee; chi apema atabëidait'ee. 35 Ichiaba wêraarã omé trigo bamaa p'anadait'ee k'ûrumade. Aba ùt'aa ateedait'ee; chi apema atabëidait'ee. 36 [Ichiaba ùmùk'îraarã omé ne–uu k'ãide mimiamaa p'anadait'ee. Aba ùt'aa ateedait'ee; chi apema atabëidait'ee.]
37 Mãpai Jesús k'õp'ãyoorãpa iidijida:
—Tachi Waibùa, ¿sãma mãga p'asait'eema? ajida.
P'anauji:
—Piuda k'ap'ùa bùmãi, ãkoso seedaipatada aji.