Mimiapataarã poro waibùade nepùrùda
16
1 Jesupa ichiaba nãga nepùrùji chi k'õp'ãyoorãmaa jarateeit'ee:—Eperã p'arat'ara bù bapachi. Ichia iru baji mimiapataarã poro waibùa ichi jua ek'ari. Ewari aba mãgà ùmùateejida irua net'aa pariatua atuapi bada perã. 2 Mapa chi mimia chiparipa t'â atap'eda, mãgaji: “¿Wãarak'ã aji, pù ãpùte jara chedap'edaa? Âraweda p'ã téeji jõmaweda mù net'aa iru bù, pù waa mù mimiapataarã poro waibùa pa–e pait'ee perã.” 3 Mãga ûrik'ãri, ma mimiapataarã poro waibùapa k'îsiaji: “Ârá ¿sãgapù ooit'eema mù mimia chiparipa mù mimia wêe bùk'ãri? Juatau wêe bù mimia chaaree ooit'ee mãik'aapa k'îra nejasia bù ne–iidipariit'ee. 4 K'awa bùda aji, sãga ooit'ee eperãarãpa mù auteebaidamerã mimia wêe beek'ãri.” 5 Mãpai t'âpiji aba–abaa chedamerã chi paraa p'anadap'edaarã chi mimia chiparimaa. Chi naa chedamaa iidiji: “Pùa ¿jõmasaa paraa bùma aji, mùchi poro waibùamaa?” 6 P'anauji: “Aceite olivodee ooda ochocientos galones paraa bùda” aji. Mãpai ma mimiapataarã poro waibùapa mãgaji: “Acha bùda aji, pùa paraa bada p'ãda. Nãgà jêt'áaji mãik'aapa awaraata oo atapáde aji, cuatrocientos pari.” 7 Maap'eda iidiji awaraamaa: “¿Pùa jõmasaa paraa bùma?” aji. Ma eperãpa p'anauji: “Trigo bulto cien paraa bùda” aji. Mãpai mimiapataarã poro waibùapa mãgaji: “Acha bùda aji, pùa paraa bada p'ãda. Nãgà jêt'aap'eda, awaraata oo atapáde aji, ochenta bulto pari.” 8 Chi mimia chiparipa k'awaji ma mimiapataarã poro waibùa k'achia bada ik'awaa bù. Mapa ùtrùa–e paji. Ichiaba mãga pùk'a p'anù na p'ek'au eujãdepema ijãadak'aa beerã. Ik'awaara p'anapata Tachi Ak'õredeerã k'ãyaara.
9 +Maperã mùa parãmaa ûraait'ee. Na p'ek'au eujãdepema net'aa iru p'anù téetù k'õp'ãyoorã atadait'ee mù–it'ee. Mãga ooruta pùrã, ma net'aa jõdaik'ãri, Tachi Ak'õrepa parã auteebaiit'ee ichi truade.
Chisãgùta tachi chipari; Tachi Ak'õre wa p'arat'a
10 —Chi t'ãri jîp'a bùpa net'aa chok'ara–ee iru bù pùjida, awaraarãmaa teeru pùrã, auk'a teepariit'ee net'aa chok'ara iru bak'ãri. Jõdee chi k'ûrayaa bùpa teeamaa bù pùrã net'aa chok'ara–ee iru bùdepema, auk'a teeamaa bapariit'ee net'aara iru bak'ãri. 11 Mapa parã t'ãri jîp'a p'anada–e pùrã na p'ek'au eujãdepema net'aa, p'arat'a ome, ¿k'aipa ùt'aripema net'aa parã jua ek'ari bùima? 12 Ichiaba na p'ek'au eujãde p'anùde chîara net'aa t'ãri jîp'a ak'ùda–e pùrã, ¿k'aipa parãmaa ùt'aripema net'aa pia teeima?
13 +Eperã chipariirã omé jua ek'ari mimia baik'araa bù. Mãga bù pùrã, chipari aba k'îra unuamaa iru bai mãik'aapa chi apema k'inia iru bai, maa–e pùrã abaapa jara bùk'a ooi mãik'aapa chi apemapa jara bùk'a ooamaa bai. Mãga pùk'a apidaapa ooda–e pai Tachi Ak'õrepa jara bùk'a; p'arat'a, net'aa pia p'e bù misa.
Jesupa fariseorãmaa jarada
14 Fariseorãpa ma ûraa ûridak'ãri, Jesús oo iru p'aneejida, p'arat'a k'inia p'anadap'edaa perã. 15 Mapa Jesupa mãgaji:
—Parã t'ãri pia beerãk'a p'anapata eperãarã k'îrapite. Mamîda Tachi Ak'õrepa k'awa bù k'îsia k'achia parã t'ãride iru p'anù. Ne–inaa parãpa audupùara k'inia iru p'anù; ma ne–inaa Tachi Ak'õrepa unuamaa iru bapari.
Jesupa jarada Moisepa p'ãdade
16 —Moisepa ley p'ãdak'ãriipa mãik'aapa Tachi Ak'õre pedee jarapataarãpa ley p'ãdak'ãriipa Juan Bautistapa ûraa jarada parumaa, eperãarãpa jùrùpachida Tachi Ak'õredeerã p'aneedait'ee ma ûraade jara bùk'a oo p'anùùpa. Mamîda ma ûraa jõru. Juan badak'ãriipa mùa pedee pia jarateepari, eperãarãpa k'awaadamerã mù k'aurepa Tachi Ak'õrepa eperãarã bùit'ee ichi jua ek'ari, ichideerã p'aneedamerã.
17 +Pajã mãik'aapa na p'ek'au eujã jõdaridai, jõma Tachi Ak'õrepa ûraa p'ãpidade jara bùk'a p'asai naaweda.
Jesupa jarateeda miak'ãi p'anùùrã mia amaanaadamerã
(Mateo 19.1-12; Marcos 10.1-12)
18 —Eperãpa ichi wêra amaat'aaru pùrã mãik'aapa miak'ãiru pùrã awaraa ome, p'ek'au oomaa bù Tachi Ak'õre k'îrapite. Ichiaba eperã miak'ãiru pùrã wêra amaat'aada ome, p'ek'au oomaa bù Tachi Ak'õre k'îrapite.
P'arat'ara bada mãik'aapa Lázaro, chupùria chada
19 —Eperã p'arat'ara bù bapachi. Mãgà p'aru pi–ia jâpachi mãik'aapa ewari chaa fiesta waibùa oopachi. 20 Ichiaba mama bapachi eperã chupùria chù t'âjarapatap'edaa Lázaro. Mãgà k'ap'ùa jõma aida–idaa baji. Eujãde su–ak'ù beepachi ma p'arat'ara bù te t'îupatamãi. 21 Mãga oopachi ma p'arat'ara bù mesadeepa chik'o baaida k'o k'inia bada perã. Mama bùde usaarãpa iru aida senepachida. 22 Ewari aba ma chupùria chù jai–idaaji mãik'aapa angeleerãpa iru jaure ùt'aa ateejida Abraham ome bade. Ichiaba ma p'arat'ara bada piuji mãik'aapa ùajida.
23 +Ma p'arat'ara bada jaure chupùria nâbaji piudap'edaarãmãi. Mamãik'aapa ùt'aa ak'ùk'ãri, t'ùmùùpa unuji Abraham Lázaro ome. 24 Mãpai biaji: “Mùchi chonaarã ak'õchona Abraham, ¡mù chupùria k'awáaji! Lázaro jua k'â paniade beepíji mãik'aapa pïiji mù k'îrame k'urãtùpide, na t'ùpùtaude chupùria nâbairã.” 25 Mamîda Abrahampa p'anauji: “Warra, k'irãpáji pù pia bapachi chok'ai bak'ãri; jõdee Lázaro chupùria bapachi. Ârá iru âimaa bù nama; jõdee pù chupùria nâbù. 26 Ma awara tachi p'anù esajîak'a waibùa k'õot'ari jira bù. Mapa chi nãik'aapa wã k'inia p'anùùrã p'oyaa wãda–e jãmaa. Ichiaba chi jãik'aapa che k'inia p'anùùrã p'oyaa cheda–e namaa.”
27 +Mãpai ma p'arat'ara badapa mãgaji: “Mãgara ak'õchona Abraham, mù chupùria k'awáaji. Pïiji Lázaro mùchi ak'õre temaa. 28 Mama mùchi âpemaarã joisomaa p'anapata. Jara pïiji chenaadamerã namaa, mù mia nâbùmaa.” 29 Mamîda Abrahampa p'anauji: “Ãrapa iru p'anùda aji, Moisepa p'ãda mãik'aapa Tachi Ak'õre pedee jarapataarãpa p'ãdap'edaa. Mãgà ûraa ûridaipia bù mãik'aapa Ak'õrede ijãadaipia bù.” 30 Mamîda ma p'arat'ara badapa p'anauji: “Wãarada aji, ak'õchona Abraham. Mamîda piuda chok'ai p'irabaip'eda, wãru pùrã ãramaa, mãgara wãara ãchia p'ek'au k'achia oopata oo amaadait'ee mãik'aapa Ak'õrede ijãadait'ee.” 31 Mamîda Abrahampa mãgaji ma p'arat'ara badamaa: “Moisepa p'ãda mãik'aapa Ak'õre pedee jarapataarãpa p'ãdap'edaa ûri k'iniada–e p'anù pùrã, ichiaba ijãada–e pait'ee eperã piuda p'irabaip'eda, wãru pùjida ãramaa jarade.”