Oveja atua badade nepùrùda
(Mateo 18.10-14)
15
1 Ma t'êepai Cesar–it'ee impuesto p'epataarã mãik'aapa awaraa k'achia oopataarãda apatap'edaa k'ait'a chejida Jesús pedee ûride. 2 Mapa fariseorã Moisepa p'ãda jarateepataarã ome iru ãpùte ik'achia pedeejida:—Jãgùpa p'ek'au k'achia oopataarã auteebaipari mãik'aapa nek'opari ãra ome.
3 Mãpai Jesupa nãga nepùrùji jarateeit'ee:
4 —Parãdepema abaapa cien oveja iru bù pùrã mãik'aapa madepema aba atuadaru pùrã, ¿atabëi–e paik'ã aji, chi apemaarã noventa y nueve ãchi p'anapatamãi chi atuadaida jùrùnait'ee unu atarumaa? 5 Unu atak'ãri, o–îapa pù ik'ia ârù jira atap'eda, 6 aneeit'ee mãik'aapa pachek'ãri teeda, pùchi k'õp'ãyoorã t'â p'e atait'ee. Mãpai mãgait'ee: “O–îa p'anadáma mù oveja atua bada unu atada perã.” 7 Mùa jara bù: Ak'õre truade mãgá ichiaba audú o–îadaipata p'ek'au k'achia ooparipa ichia p'ek'au k'achia oopata oo amaak'ãri mãik'aapa Tachi Ak'õrede ijãa beek'ãri. O–îara p'anapata ma k'ap'ùa, o–îa p'anadai k'ãyaara noventa y nueve t'ãri pia beerã k'ap'ùa.
P'arat'a tau atua badade nepùrùda
8 —Wêrapa p'arat'a tau diez iru bùpa madepema aba atuadaru pùrã, ¿lámpara k'oo atap'eda, piak'ãa te jã barremaa bee–e paik'ã unu atarumaa? 9 Unu atak'ãri, chi k'õp'ãyoorã t'â p'e atait'ee mãik'aapa mãgait'ee: “O–îa p'anadáma mùa unu atada perã p'arat'a tau atuadaida.” 10 Mùa jara bù: Angeleerãpa ichiaba mãgá o–îadaipata p'ek'au k'achia ooparipa ichia p'ek'au k'achia oopata oo amaak'ãri mãik'aapa Tachi Ak'õrede ijãa beek'ãri.
Eperãpa chi warrapa k'achia ooda perdonaada
11 Jesupa ichiaba nãga nepùrùji jarateeit'ee:
—Eperãpa warrarã omé iru baji. 12 Ewari aba chi k'ûtrãara badapa mãgaji chi ak'õremaa: “Ak'õre, teepáde aji, mù eerepema net'aa pù piuk'ãri atabëiit'ee bùdepema.” Mãga ooji chi ak'õrepa. Ma k'ûtrãa eerepema net'aa teeji irumaa. 13 Maap'eda ma warra t'êepemapa ichi eerepema net'aa p'e atap'eda, netok'ooji mãik'aapa ma p'arat'apa t'ùmà wãji awaraa todee. Mama p'arat'a pariatua gasta wãpachi mãik'aapa jõt'aaji ichia oo k'iniata oo bùpa. 14 Ma awara p'arat'a jõma jõdaik'ãri, at'apai jarra oojida ma eujãde. Maperã jarra choomaa beeji. 15 Mapa wãji mimia jùrùde ma eujãdepema eperãmaa. Ma eperãpa pëiji sinaarã jâade. 16 Audú jarrapa bi jãwaa k'inia bapachi sinaarã chik'opa. Mamîda apidaapa nek'opidak'aa paji. 17 Mãpai k'îsia beeji: “Mù ak'õre tede mimiapataarã chok'araarãpa nek'odait'ee iru p'anùda aji. ¡Jõdee mù nama jarrapa piu wã! 18 Mù ak'õremaa wãit'eeda aji. Panak'ãri, nãga jarait'eeda aji: Ak'õre, mùa p'ek'au k'achiata ooji Tachi Ak'õre k'îrapite mãik'aapa pù ãpùte. 19 Waa pùchi warrak'a mù iru banáaji. Jîp'a pùchi mimiaparik'a iru báji anait'ee.” 20 Maap'eda cheji chi ak'õre temaa.
+At'ãri t'ùmà cheruweda, chi ak'õrepa unu ataji mãik'aapa chupùria k'awaaji. P'iraji chi warramaa mãik'aapa wëre atap'eda, k'îra ât'aaji. 21 Mãpai chi warrapa mãgaji: “Ak'õre, mùa p'ek'au k'achiata oojida aji, Tachi Ak'õre k'îrapite mãik'aapa pù ãpùte. Waa pùchi warrak'a iru banáaji. Jîp'a pùchi mimiaparík'ata iru báji.” 22 Mamîda chi ak'õre audú o–îa bada perã, mãgaji chi mimiapataarãmaa: “P'aru pipùara bùta atanátù mãik'aapa jâ bàtù. Ichiaba ichi juade sortija jâ bàtù mãik'aapa ichi bùùrùde chancla jâ bàtù. 23 Anéetù p'ak'a poreera bùta mãik'aapa peet'áatù. ¡K'odait'ee mãik'aapa pëiradait'ee! 24 ¡Mù warra piu pùk'a bada waya chok'ai bù! ¡Chi atua pùk'a bada unu atajidapù!” Mãpai fiesta oojida.
25 +Mãùmisa chi warra naapema ne–uu k'ãide baji. Teedaa chek'ãri, ûri cheji o–îa pëira para bù. 26 Mapa mimiapari aba t'â ataji mãik'aapa iidiji: “¿Sãga jõnùma?” aji. 27 Mãpai ma mimiaparipa mãgaji: “Pù âpema pachejida aji. Pù ak'õrepa p'ak'a poreera bùta peepiji, iru k'ap'ùa k'ayaa wêe pacheda perã.” 28 Mãga ûrik'ãri, chi âpema ne–uu k'ãideepa cheda k'îraudachi mãik'aapa teedaa t'îuamaa beeji. Maperã chi ak'õre taawaa uchiaji enenee pedeede t'îumerã. 29 Mamîda chi warrapa mãgaji chi ak'õremaa: “Pùa k'awa bùda aji, mù taarã mimiadoo. Ichita k'îra jîp'a oodoo pùa jaradak'a. Mamîda mùmaa tee–e paji cabra chak'e pida, o–îa nek'omerã mùchi k'õp'ãyoorã ome. 30 Jõdee pù warra pacheda–it'eeta peepiji p'ak'a poreera bù, jõma pùchi p'arat'a teeda jõt'aaji mîda prostitutaarã ome.”