Jesupa eperã k'ap'ùa ooro bada jùpada
14
1 Ewari aba âipata ewate Jesús wãji nek'ode fariseorã poro waibùa temaa. Mama bùde awaraa fariseorãpa iru ak'ù p'anajida, ùmùatee k'inia p'anadap'edaa perã. 2 Mama ichiaba baji eperã aba k'ap'ùa ooro bù k'ayaapa. Mãgà Jesús k'îrapite bainâ ba cheji. 3 Mãpai Jesupa iidiji Moisepa p'ãda jarateepataarãmaa mãik'aapa fariseorãmaa:—¿Âipata ewate k'ayaa bù jùpaipia bùk'ã aji, maa–e pùrã jùpaik'araa bù?
4 Mamîda ãchi k'îup'ee para beeji. Mãpai irua chi k'ayaa bù jita atap'eda, jùpat'aaji mãik'aapa jaraji wãmerã. 5 Mãpai fariseorãmaa mãgaji:
—Pùchi warra maa–e pùrã p'ak'a toidú padarida paara, ¿isapai jitana–e pak'ajik'ã aji, âipata ewate mîda?
6 Mamîda maarepida p'anauda–e paji.
Eperãarã miak'ãipata fiesta oode t'â pëida
7 Jesupa unuk'ãri ma fariseopa awaraarã t'â pëida su–ak'ù p'aneeruta su–ak'ù beepari piara bùde, nãga nepùrùji jarateeit'ee:
8 —Eperãpa pù t'â pëik'ãri miak'ãipata fiesta oode, su–ak'ù beenáaji su–ak'ù beepari piara bùde, eperã pù k'ãyaara waibùara bù t'êe chei perã. 9 Mãgara chi t'âdapa pùmaa mãgai: “Téeji pù su–ak'ù beepari na eperãmaa.” Mãpai pù k'îra nejasia bai mãik'aapa su–ak'ù banai su–ak'ù beepari t'ùmùpùara bùde. 10 Ma k'ãyaara pù t'â pëidak'ãri, su–ak'ù banáji su–ak'ù beepari t'ùmùara bùde, pù t'âdapa mãga chemerã: “K'õp'ãyo, su–ak'ù ba chéji su–ak'ù beepari piara bùde.” Mãgara pù o–îa su–ak'ù banai apemaarã waawí mesade. 11 Tachi Ak'õrepa chi waibùara pa k'inia bù ek'ariara papiit'ee. Jõdee chi audua–ee bù waibùara papiit'ee.
12 Ichiaba Jesupa mãgaji ma fariseorã poro waibùamaa:
—Eperãarã t'â pëik'ãri nek'o chedamerã pùchi temaa, t'â pëináaji pùchi k'õp'ãyoorã, âpemaarã, ëreerã, wa pù te k'ait'a p'anù p'arat'ara beerã, ma pari ãrapa ichiaba pù t'âdai perã nek'ode ãchi temaa. 13 Ma k'ãyaara fiesta ook'ãri, t'â pëiipia bù chupùria chedeerã, p'oyaa t'ùa–ee beerã, bùùrù nùk'anùk'aa beerã mãik'aapa tau p'ãriu beerã. 14 Mãgá o–îa bait'ee, ma pari ãrapa ne–inaa oodait'ee wêe p'anadairã. Ma awara ma pari Tachi Ak'õrepa pùmaa ne–inaa pia ooit'ee, ichia pia ak'ù bùùrã jai–idaadap'eda p'irabairuta ewate.
Nek'opata fiesta waibùade nepùrùda
(Mateo 22.1-10)
15 Mãga ûrik'ãri, ma mesade su–ak'ù p'anadap'edaadepema abaapa mãgaji Jesumaa:
—¡O–îa bait'eepù chi nek'oru nek'opata waibùade Ak'õre truade!
16 Mãpai Jesupa nãga nepùrùji jarateeit'ee:
—Eperãpa chik'o waibùa joopiji mãik'aapa eperãarã chok'ara t'â pëiji. 17 Chik'o aupa nâbak'ãri, pëiji chi chok'apari jarade ma t'â pëida eperãarãmaa: “Chétù, jõma aupa jêra bairã.” 18 Mamîda jõmaarãpa: “P'oyaa wãda–eda” ajida. Chi naapemapa mãgaji: “Et'ewapai mùa eujã neto ataji. Ichita wãit'ee ak'ùde. Mù chupùria k'awaapáde aji, p'oyaa wã–e perã.” 19 Awaraapa mãgaji: “Et'ewapai p'ak'a diez neto atajida aji, mimiapinait'ee mùchi eujãde. Mù chupùria k'awaapáde aji, p'oyaa wã–e perã.” 20 Jõdee awaraapa mãgaji: “Ewaa miak'ãiji. Mapa p'oyaa wã–eda” aji. 21 Chi chok'a pëida ãpùtee cheji chiparimaa jarade. Mãpai ma te chipari k'îraudachi mãik'aapa mãgaji chi chok'aparimaa: “Wåji p'uuru jãdee mãik'aapa p'e anéeji chupùria chedeerã, p'oyaa t'ùak'aa beerã, tau p'ãriu beerã mãik'aapa bùùrù nùk'anùk'aa beerã.” 22 Bùù–ap'eda, mãgaji chi chok'a pëidapa: “Señor, mùa ooji pùa jaradak'a. Mamîda su–ak'ù beepari at'ãri pari jêra bùda” aji. 23 Mãpai ma te chiparipa mãgaji chi chok'aparimaa: “Mãgara wåji o bee chaa eperãarã jùrùde, mù te p'îu nâba chemerã. 24 Mùa jara bù: Chi eperãarã naa t'â pëida apidaapa k'oda–e pait'ee mù chik'o.”
Cristo ome nipapataarã nãga p'asadait'ee
(Mateo 10.37-38)
25 Eperãarã chok'ara nipajida Jesús t'êe. Mapa irua ãpùtee ak'ùji mãik'aapa mãgaji:
26 —Mù ome niparupa mù k'iniara iru ba–e pùrã chi ak'õre, chi nawe, chi wêra, chi warrarã, chi âpemaarã, chi âpewêraarã, ichi paara k'inia bai k'ãyaara, mãgà p'oyaa mëré pa–e pai. 27 Ichiaba eperã piuamaa bù pùrã mùde ijãa bù k'aurepa, mãgà mëré pa–e pai. 28 Parãdepema abaapa te ùt'ùa oo k'inia bù pùrã, ¿naapùara juasia–e paik'ã k'awaait'ee jõmasaa p'arat'a falta bù ma te oo aupait'ee? 29 Mãga oo–e pùrã, ma te basa oop'eda, p'oyaa oo aupa–e pak'ãri, chi unurutaarãpa pù oomaa iru p'aneedai. 30 Jarapataadai: “Na eperãpa te oomaa beeji. Mamîda p'oyaa oo aupa–e paji.” 31 Maa–e pùrã, rey wã k'inia bak'ãri jura chõode awaraa rey ome, naapùara chi soldaorã juasiapari k'awaait'ee diez mil soldaorãpa p'oyaadai wa p'oyaada–e pai soldaorã veinte mil ãra ârù chõo cherutaarã. 32 P'oyaa–e paita bù pùrã, ¿chi apema rey t'ùmà cheruweda jara pëiit'ee–ek'ã k'îra jîp'a p'aneedait'ee chõoda–ee? 33 Mãga pùk'a parãdepemapa k'îsiap'eda mùde ijãait'ee, ma k'aurepa ichia ne–inaa jõmaweda iru bù atuaamaa beeru pùrã, mãgara p'oyaa mëré pa–e pai.
Jesupa jarateeda t'ã k'ùyaa–ee pùk'a p'anùùrãde
(Mateo 5.13; Marcos 9.50)