P'ek'au k'achia oo amaadaipia bù
13
1 Maapai eperãarã ûk'uru wãjida Jesús ak'ùde. Nepùrùjida Pilatopa Galilea eujãdepema ùmùk'îraarã peepida, ãrapa p'aareerãmaa ne–animalaarã peepidap'eda, paapidak'ãri. Mãgá ma eperãarã waa p'oira beeji ma ne–animalaarã waa ome. 2 Mãga ûrip'eda, Jesupa mãgaji:—¿Parãpa k'îsia p'anùk'ã aji, Tachi Ak'õrepa mãga p'asapiji ma Galilea eujãdepemaarãpa p'ek'au k'achiara oodap'edaa perã ma eujãdepemaarã awaraarã k'ãyaara? 3 Mãga–e. Mamîda pãchia p'ek'au k'achia oopata oo amaada–e pùrã, ichiaba piudait'ee. 4 Mãga–e pùrã ¿k'îsia p'anùk'ã dieciocho piudap'edaarã Siloé torre t'eek'ãri, mãgá piujida ne–inaa k'achiara oopachida perã awaraa Jerusalendepemaarã k'ãyaara? 5 Mãga–e. Mamîda pãchia p'ek'au k'achia oopata oo amaada–e pùrã, ichiaba piudait'ee.
Jesupa nepùrùda higuera bùùrùde
6 Mãpai Jesupa nãga nepùrùji jarateeit'ee:
—Eperãpa higuera bùùrù uu iru baji ichi uva k'ãide. Ewari aba ak'ùnaji, higojõ chau bù jîak'aapa. Mamîda chau–ee baji. 7 Mapa jaraji eperã chi ne–uu ak'ù baparimaa: “Año õpee iru bùda aji, higojõ jùrù che bù nama. Mamîda unuk'aada aji. T'ùap'et'aapáde aji. ¿K'ãare–it'ee ichi k'inia jãma bainâ bayama aji, eujã jâamaa?” 8 Mamîda ma eujã ak'ùparipa p'anauji: “Señor, ichiak'au bùpáde aji, na año aupai. Yooro p'oirait'ee uujãra ome mãik'aapa arii p'e bùnait'eeda aji. 9 Mãga ook'ãri, ¿chau–e paik'ã? aji. Mata chau–e pùrã, t'ùap'et'aait'eeda” aji.
Jesupa wêra eburuk'uk'ua bada jùpada
10 Ewari aba âipata ewate Jesupa jarateemaa baji Tachi Ak'õre Ûraa jarateepata tede. 11 Mama baji wêra dieciocho año k'ayaa bù. Netuarapa ma wêra eburuk'uk'uapiji. Mapa jîp'a p'oyaa bainâ beek'aa paji. 12 Jesupa ma wêra unu atak'ãri, t'â ataji mãik'aapa mãgaji:
—Wêra, pù jùpa bùda aji.
13 Mãpai ichi jua bùji ma wêra ek'arra ârù. Aramata jîp'a bainâ beeji mãik'aapa Ak'õremaa ùt'aa t'âmaa beeji o–îapa. 14 Mamîda ma Ak'õre Ûraa jarateepata tedepema poro waibùa k'îraudachi, âipata ewate Jesupa jùpada perã. Mapa eperãarãmaa mãgaji:
—Ewari seis paraada aji, mimiadait'ee. Chedapáde aji, mãgà ewate jùpapide. Âipata ewate chenaadapáde aji.
15 Mãpai Tachi Waibùapa p'anauji:
—¡Mamîda parãpa paara oodak'aa pãchia jarateepatak'a! ¡Âipata ewate ichiaba mimiapata! ¿Âipata ewate pãchi p'ak'a maa–e pùrã burro êrapata–ek'ã aji, pania topide ateedait'ee? 16 Na wêra Abrahamdeepa uchiada Satanapa dieciocho año k'ayaa iru baji. ¿Âipata ewate p'oyaa jùpaik'araa baji–ek'ã? aji.
17 Jesupa mãga jarak'ãri, ichi k'îra unuamaa iru p'anadap'edaarã k'îra nejasia p'aneejida eperãarã k'îrapite. Mamîda arii p'anadap'edaarã o–îa para baji Jesupa ne–inaa pia ooda k'aurepa.
Mostaza taude nepùrùda
(Mateo 13.31-32; Marcos 4.30-32)
18 Jesupa ichiaba awaraa nepùrùji jarateeit'ee:
—¿K'ãarek'a bùma aji, Tachi Ak'õrepa eperãarã ichi jua ek'ari bùk'ãri, ichideerã p'aneedamerã? ¿K'ãare ome auk'a bùma? aji. 19 Mostaza tau p'isi k'edéek'ata bùda aji, eperãpa uuda ichi te ãuk'idaa. Wari wãpachi pak'uruk'a nâbeerumaa. Waibùa nâbeek'ãri, chi jua t'aide ipanaarã chepata âidait'ee.
Levadurade nepùrùda
(Mateo 13.33)
20 Ichiaba Jesupa nãga nepùrùji jarateeit'ee:
—¿K'ãarek'a bùma aji, Tachi Ak'õrepa eperãarã ichi jua ek'ari bùk'ãri, ichideerã p'aneedamerã? 21 Wêrapa levadura p'oiraparik'a bù harina waibùa ome, pan masa pia warimerã.
Tachi Ak'õre truadee wãit'ee puerta p'îrup'ee pùk'a bù
(Mateo 7.13-14, 21-23)
22 Jerusalén ode wãdade Jesupa jarateeji p'uuru bee chaa mãik'aapa aù ik'aawa eperãarã p'anapatamãi. 23 Maapai eperãpa iidiji:
—Tachi Waibùa, ¿eperãarã chok'ara–ee Ak'õre eujãdee wãdait'eek'ã? aji.
Jesupa p'anauji:
24 —Tachi Ak'õre truadee wãit'ee puerta p'îrup'ee bùde t'îupaták'ata bù. Mùa jara bù: Eperãarã chok'ara wã k'inia p'anadait'ee Tachi Ak'õre truadee. Mamîda p'oyaa wãda–e pait'ee. 25 Te chipari p'irabaip'eda, ichi puerta jâa nâbùparik'a, mãga pùk'a ewari cherude mù, parã poro waibùapa Ak'õre truadepema puertak'a bù jâait'ee. Mãpai parã taawa p'anùùrãpa mãgadait'ee: “Tachi Waibùa, ewapáde adait'ee tai t'îudait'ee.” Mamîda mùa p'anauit'ee: “Mùa parã k'awa–e bù. Mapa parã t'îupi–e pait'ee. Parã mùchideerã–eda ait'ee.” 26 Mãpai parãpa jara p'aneedait'ee: “Tai pù ome nek'opachida mãik'aapa ne–inaa topachida. Tai p'uuru jãde pùa jaratee nipapachida” adait'ee. 27 Mamîda mùa p'anauit'ee: “¿Mùa jara–e pajik'ã parã mùchideerã–e? ¡Ãyaa wåtù mù ik'aawaapa, ne–inaa k'achia oopataarã!” 28 Parãpa unudak'ãri Abraham, Isaac, Jacob, jõmaweda Ak'õre pedee jarapataarã ome Tachi Ak'õre truade, k'awaadait'ee parã taawa p'anù. Mãpai jêedait'ee mãik'aapa pãchi k'ida kierrkierree para bait'ee p'uapa. 29 Eperãarã chedait'ee norte eereepa, sur eereepa, ak'õrejîru uchiapari eereepa mãik'aapa ak'õrejîru baaipari eereepa. Mãùrãta su–ak'ù p'ana chedait'ee nek'ode Tachi Ak'õre ome ichi truade. 30 Maapai chi ârapema ek'ariara beerã Tachi Ak'õrepa waibùara papiit'ee. Jõdee ârapema waibùara beerã irua ek'ariara papiit'ee.
Jesús jêeda Jerusalén p'uuru pidaarã pari
(Mateo 23.37-39)
31 Mãpai fariseorã ûk'uru chejida mãik'aapa mãgajida Jesumaa:
—Wåji namãik'aapa, Herodepa pù peet'aa k'inia bairã.
32 Irua p'anauji:
—Wåtù jarade jã ik'awaa bùmaa: “Idi mãik'aapa nu uchiapik'ooit'ee netuara merãtùa bee eperãarã k'ap'ùadeepa mãik'aapa k'ayaa beerã jùpak'ooit'ee. Maap'eda nunorema parumaa aupait'ee.” 33 Mamîda idi, nu mãik'aapa nunorema ichita wãit'ee mùchi ode, pia–e bairã Ak'õre pedee jarapari Jerusalén p'uurudeepa taawa piumerã.
34 +¡Jerusalén, Jerusalén, pùdepemaarãpa Tachi Ak'õre pedee jarapataarã peepata mãik'aapa irua pëida eperãarã mãupa bat'a peepata! At'apai mùa pùdepemaarã araa p'e k'inia bapachi, et'erre wêrapa chi chak'eerã p'e ataparik'a ichi isia ek'ari. Mamîda parãpa k'iniada–e paji. 35 ¡Ûrítù! ¡Pãchi te ituaba beeit'ee, Tachi Ak'õrepa parã waa ak'ù–e pait'ee perã! Mùa jara bù: Parãpa mù waa unuda–e pait'ee ewari cherude nãga jararutamaa:
‘¡Tachi Ak'õrepa ichia pëida ichita pia ak'ù bapariit'ee!’ (Salmos 118.26)