Jesupa ûraada fariseorãk'a p'ananaadamerã
12
1 Jesús at'ãri mama bùde eperãarã audupùara see nâba cheji iru badamãi. Audú cho–k'araa nâbada perã, awaraarã bùùrù ârù paara t'ùak'oo wãpachida. Mãpai Jesupa jarateemaa beeji chi k'õp'ãyoorãmaa:—K'îrak'aupai fariseorã levadura ome; pia jarait'eera, ãchia jarateepata ome. Jarateepatada apata Tachi Ak'õrepa k'inia bù eperãarãpa oodamerã. Mamîda ãchia mãga oodak'aa, t'ãri k'achia p'anadairã. 2 Tachi Ak'õrepa ãchi k'îsia t'ãridepai k'awaapiit'ee mãik'aapa ãchia ne–inaa merã oopata unupiit'ee. 3 Wãara ne–inaa jõmaweda parãpa merã jarapata irua tau taawa k'awaapiit'ee. Pãchi puerta jâadap'eda pedee merã jaradap'edaa paara tau taawa k'awaapiit'ee terraza ârùùpa biaruk'a.
K'aita waaweedaipia bù
(Mateo 10.26-31)
4 —Mùchi k'õp'ãyoorã, mùa nãga jara bù. Waaweenáatù parã jùrù p'anùùrã peedait'ee, ãrapa parã p'oyaa atuapida–e perã tok'arradee. 5 Jarait'ee k'aita waaweedaipia bù. Tachi Ak'õre waawéetù iruata tachi piupii perã mãik'aapa atuapii perã. Wãara iruta waaweedaipia bù.
6 +¿Netopata–ek'ã ipana chak'e joisomaa p'arat'a tau omé pari? Eperãarãpa mãga oopata ipana chak'e mak'ùara vale–e bù jîak'aapa. Mamîda Tachi Ak'õrepa ma ipana chak'eerã pia ak'ùpari. 7 Parã jida mãgá ak'ùpari. Parã puda paara irua juasia iru bù. Mapa waaweenáatù, Tachi Ak'õrepa parã k'iniara iru bapari perã ipanaarã k'ãyaara.
Jesucristode ijãapatada apataarã awaraarã k'îrapite
(Mateo 10.32-33; 10.19-20; 12.32)
8 —Mùa nãga jara bù. Eperãpa tau taawa jararu pùrã ichi Jesucristode ijãapari, mù, chi Eperã Ak'õre Truadepemapa pida jarait'ee: “Mãgà mëré” Tachi Ak'õre angeleerã k'îrapite. 9 Mamîda eperãpa meraru pùrã mùde ijãapari, mãgara mùa pida merait'ee. “Mãgà mëre–eda” ait'ee Tachi Ak'õre angeleerã k'îrapite.
10 +Tachi Ak'õrepa eperãarãpa p'ek'au k'achia oopata wêpapik'ãri, wêpapii ãchia ik'achia jarapata paara Eperã Ak'õre Truadepema ãpùte. Mamîda ik'achia jararuta pùrã iru Jaure ãpùte, mãgee p'ek'au k'achia wêpapi–e pait'ee.
11 +Parã mùde ijãapata k'aurepa eperãarãpa parã ateedak'ãri Ak'õre Ûraa jarateepata tede maa–e pùrã charraarãmaa mãik'aapa poro waibùarãmaa ùmùateedait'ee, k'îsianáatù sãga p'anaudait'ee maa–e pùrã k'ãata jaradait'ee. 12 Mãùrã k'îrapite panadak'ãri mãik'aapa pedeedait'ee pak'ãri, Tachi Ak'õre Jaurepa jarateeit'ee, p'anau k'awaadamerã.
Jesupa nepùrùda p'arat'a paraa bù, k'îsia k'awa–ee bùde
13 See nâbadadepema abaapa Jesumaa mãgaji:
—Tachi Jarateepari, jaráji mù âpemamaa tai ak'õrepa net'aa bëida t'oomerã mù ome.
14 Jesupa p'anauji:
—K'õp'ãyo, ¿k'aipa mù bùjima aji, parã charrak'a mãga jaramerã?
15 Ichiaba mãgaji:
—K'îrak'aupai net'aa k'âadai. Eperãarã t'ãri o–îa p'anadak'aa net'aara p'e iru p'anadairã.
16 Mãpai Jesupa nãga nepùrùji jarateeit'ee ma et'ewa jaradade:
+Eperã p'arat'ara bù bapachi. Ne–uu waibùa iru bada perã, net'a tau waibùa ewapachi. 17 Mapa k'îsia beeji: “¿K'ãata ooyama? aji. Te wêe bù mùchi net'a tau jõmaweda ùait'ee.” 18 Mãpai ma p'arat'ara bùpa k'îsia ataji. “K'awa bùda aji, k'ãata ooit'ee. Mù net'a tau ùapata te wãrait'ee mãik'aapa awaraa te waibùara oo atait'ee. Mãgá mùchi net'a tau net'aa iru bù ome, jõmaweda ùayada aji, ma tede. 19 Maapai mùa jarai mùchi t'ãridepai: ‘Mùa net'aara iru bù. Nãgà ome año chok'ara pia bapariit'ee. Ârá âiit'ee, nek'oit'ee, ne–inaa toit'ee mãik'aapa o–îa bapariit'eeda’ aji.” 20 Mamîda ma p'arat'ara bùpa mãga k'îsia bùde Tachi Ak'õrepa irumaa mãgaji: “¡Pù k'îsia k'awa–ee bù! Idiweda p'ãrik'ua pù piuit'ee. Maap'eda, ¿k'aipa atait'eema aji, pùa net'aara ùa iru bù?”
21 Ma nepùrù aupak'ãri, Jesupa mãgaji:
—Mãgá uchiait'eeda aji, eperãpa net'aara p'e atak'ãri ichi–it'ee, Tachi Ak'õrede ijãa–ee.
Tachi Ak'õrepa chi warrarã pia ak'ùpari
(Mateo 6.25-34)
22 Maap'eda Jesupa mãgaji chi k'õp'ãyoorãmaa:
—Mùa jara bù: K'îsia jõnanáatù k'ãata k'odait'ee mãgá chok'ai p'anadait'ee. Ichiaba k'îsianáatù sãga p'aru atadait'ee. 23 Tachi Ak'õrepa tachi chok'ai p'anapipari. Iruata tachimaa chik'o teeit'ee. Ma awara irua tachi k'ap'ùa ooda perã, tachimaa p'aru teeit'ee. 24 Pùchá, ak'àtù jã ipanaarã. Ãchia net'a tau uudak'aa, ewadak'aa mãik'aapa ùa bùdak'aa chi net'a tau ùapatamãi. Mamîda Tachi Ak'õrepa ne–inaa teepari k'odamerã. ¡Iru–it'ee parã pipùara p'anù ipanaarã k'ãyaara! 25 Eperã audú k'îsia nâbùpa hora aba pida waa chok'ai ba–e pai. 26 Ma ne–inaa ma–ãri p'oyaa oodak'aa pùrã, ¿sãap'eda k'îsia jõnùma awaraa ne–inaa p'oyaa ooda–e p'anadak'ãri?
27 +Ak'àtù sãga nep'ono waripata. Mimiadak'aa mãik'aapa p'aru k'adak'aa mãgá pi–ia p'anadait'ee. Mamîda mùa jara bù: Rey Salomonpa p'arat'ara, net'aa pia iru bapachi mîda, iru p'aru piara jâ bak'ãri, eperãarãpa iru pi–iara unuda–e paji nãgà nep'ono k'ãyaara. 28 Tachi Ak'õrepa na p'ûajara pia t'onopipari. Idi wari wã. Mamîda nu uratùdaik'ãri, t'ùpùtaude paa jõdariit'ee. Tachi Ak'õrepa mãgá pia ak'ù bù pùrã nep'ono p'ûajara t'ãide nâbù, audupùara parã ak'ù bapariit'ee, at'ãri irude mak'ùara ijãada–e p'anù mîda. 29 Tachi Ak'õrepa mãgá ichia ooda pia ak'ù bapari perã, k'îsia jõnanáatù jùrùdait'ee ne–inaa k'odait'ee maa–e pùrã ne–inaa todait'ee. 30 Mãga k'îsiapata na p'ek'au eujãdepema ijãadak'aa beerãpa. Mamîda paråpata ùt'aripema Ak'õre Waibùa iru p'anù. Irua k'awa bù ne–inaa parãpa falta p'anù. 31 Maperãpù jùràtù p'anapataadait'ee iru jua ek'ari. Mãga ooruta pùrã, ma ne–inaa jõma iru p'anadait'ee.
Ùt'aripema ne–inaa pia
(Mateo 6.19-21)
32 —K'õp'ãyoorã, parã mùchi ovejaarãk'a p'anù. Mapa waaweenáatù. Parã chok'ara–ee p'anù. Mamîda Tachi Ak'õrepa parã k'inia iru bù. Mapa parã bùji ichi jua ek'ari, ichideerã p'aneedamerã. 33 Maperã parãpa net'aa iru p'anù netok'óotù mãik'aapa chupùria beerãmaa téetù. Na p'ek'au eujãdepema muchila atadai k'ãyaara, óotù Tachi Ak'õrepa k'inia bùk'a. Mãgá atadai ùt'aripema ne–inaa, sore pak'aa. Ma ne–inaa pi–ia bùmãi nechùapataarã p'oyaa t'îudak'aa mãik'aapa polillapa p'oyaa ãridak'aa. 34 Na p'ek'au eujãdepema ne–inaa pia audú ata k'inia bak'ãri, pù t'ãri araa bait'ee ma ne–inaa ome. Jõdee ùt'aripema ne–inaa pia audú ata k'inia bak'ãri, pù t'ãri araa bait'ee mãgà ne–inaa ome.
Jesupa jarateeda<R>ijãapataarã poro waibùa waya cheit'ee ewatede
35 —Mù parã poro waibùa perã, mù waya cheit'ee nùdaipia bù, mimiapataarãpa p'aru jâdap'eda lámpara k'oopatak'a ãchi chipari cheru misa. 36 Mimiapataarãpa nùpatak'a chipari teedaa cheru misa miak'ãipata fiesta oop'eda, puerta ewadait'ee iru t'âk'ãri, mãga pùk'a parã nùdaipia bù parã poro waibùa cheit'ee ewate. 37 Ma mimiapataarã chiparipa ãra pia ak'ùpariit'ee, chok'ai p'anaruta pùrã iru pachek'ãri. Mùa jara bù: Irua ãra mãgá unuk'ãri, jarait'ee su–ak'ù p'aneedamerã mesade, ichia ãchimaa chik'o teeru misa. 38 Ichia ma mimiapataarã pia ak'ùpariit'ee mãgá chok'ai p'anadak'ãri, ichi esapùte maa–e pùrã âdatùpodopa cheru pùjida. 39 Mamîda nãga k'awáatù parãpa. Te chiparipa k'awa bada paara nechùapari cheit'ee hora ichi net'aa chùa atait'ee, chok'ai bak'aji ma nechùapari ichi tede t'îupiamaapa. 40 Mãgá parã jida chok'ai pùk'a p'anadaipia bù, atu p'anùde mù, chi Eperã Ak'õre Truadepema, cheit'ee perã.
Mimiapari pia mimiapari k'achia ome
(Mateo 24.45-51; Marcos 13.34-37)
41 Pedropa Jesumaa iidiji:
—Tachi Waibùa, ¿ma pedee nepùrùjik'ã aji, tai–it'ee aupai, wa jõmaarã–it'ee?
42 Jesupa nãga nepùrùji: ¿Sãgá baparima aji, mimiapataarã poro waibùa pia? Mãgùpa k'îsia k'awaa oopari chiparipa oopi bùk'a. Pia ak'ùpari chipari net'aa atabëida ichi juade mãik'aapa chiparimaa nek'opip'eda, mimiapataarãmaa chik'o tawapari. 43 O–îa bapari chipari pachek'ãri, ichi mimiamaa unu chepari perã. 44 Mùa wãarata jararu. Chiparipa mãga unu chek'ãri, jõma ichia net'aa iru bù bùit'ee ma mimiapari jua ek'ari ak'ù bamerã. 45 Mamîda ma mimiapari t'ãri k'achia bù pùrã, nãga k'îsiai: “Taarãit'ee mù chipari.” Mapa apemaarã mimiapataarã wùmaa beei mãik'aapa tomaa beei, nek'omaa beei toyaa beerã ome. 46 Mamîda ma mimiapari k'achia atu bùde, chi te chipari pacheit'ee. Mãpai irua ooda k'awaa atak'ãri, iru miapiit'ee mãik'aapa ãyaa pëit'aait'ee awaraa ijãadak'aa beerã chupùria chitoonùmaa.
47 +Mimiaparipa k'awaak'ãri chiparipa oopi bù, mamîda chipari nù–e mãik'aapa oo–e irua k'inia bùk'a, chiparipa ma mimiapari wùma chok'ara wùpiit'ee. 48 Mamîda mimiaparipa mãgee ne–inaa k'achia ooru pùrã k'awa–eeta, mak'ùara wùpi–e pait'ee. Tachi Ak'õrepa eperãmaa k'îsia k'awaapik'ãri ne–inaa oo k'awaamerã, k'inia bù ma eperãpa mãga oomerã, ma ne–inaa chaaree bù mîda. Ma awara eperãarã bùk'ãri ma eperã jua ek'ari, k'inia bù irua ãra pia ak'ù bapariimerã, chaaree bù mîda.
Jesús k'aurepa tachi ëreerã ome t'ãri auk'a p'anada–e pait'ee
(Mateo 10.34-36)
49 —Mù cheji na p'ek'au eujãdee t'ùpùtauk'a k'oode, aùde ijãadak'aa beerã miapiit'ee. ¡Mãga oo aupada paara, mù o–îa bak'aji! 50 Mamîda aù naaweda mùmaa ne–inaa k'achia p'asait'ee. Chupùria nâbait'ee mãga parumaa. 51 ¿Parãpa k'îsia p'anùk'ã mù cheji eperãarã k'ãiwee p'anapide? Mãga–e. K'îsia awara–awaraa papideta cheji. 52 Idideepa te pidaarã joisomaadepema õpeerãpa mùde ijãadait'ee; jõdee omeerãpa ijãada–e pait'ee. Maa–e pùrã omeerãpa ijãadait'ee; jõdee õpeerãpa ijãada–e pait'ee. Mù k'aurepa t'ãri auk'a p'anada–e pait'ee. 53 Ak'õre t'ãri auk'a ba–e pait'ee chi warra ome maa–e pùrã chi warra t'ãri auk'a ba–e pait'ee chi ak'õre ome. Nawe t'ãri auk'a ba–e pait'ee chi k'au ome maa–e pùrã chi k'au t'ãri auk'a ba–e pait'ee chi nawe ome. P'ãk'õre t'ãri auk'a ba–e pait'ee chi ãigu ome maa–e pùrã chi ãigu t'ãri auk'a ba–e pait'ee chi p'ãk'õre ome.
Ewari k'awa p'anùùrã
(Mateo 16.1-4; Marcos 8.11-13)
54 Jesupa ichiaba mãgaji eperãarã arii p'anadap'edaarãmaa:
—Parãpa unudak'ãri jâarara uchiaruta ak'õrejîru baaipari eere, jarapata k'oi cheit'ee. Mãga p'asapari parãpa jarapatak'a. 55 Ichiaba nãu p'uak'ãri sur eereepa, jarapata wãsia nâbait'ee. Mãga p'asapari. 56 ¡K'îsia atua p'anùùrã! Parãpa mãgá pajã mãik'aapa eujã ak'ù p'anùùpa eu k'achia wa eu pia k'awa p'anù pùrã, ¿sãap'eda ne–inaa mùa oomaa bù k'awada–e p'anùma? aji.
T'ãri auk'a p'anapataadaipia bù
(Mateo 5.25-26)
57 +Mùa oo bù mãik'aapa jaratee bù ak'àtù k'awaadait'ee Tachi Ak'õrepa oopi bù wa mãga–e. Mãpai parã t'ãri auk'a bàtù iru ome. 58 Eperã nepùra iru bù pùrã pù ome mãik'aapa pù charramaa atee k'inia bù pùrã, wãi naaweda t'ãri pia pedeeipia bù iru ome t'ãri auk'a bùdait'ee. Maa–e pùrã charra k'îrapite panadak'ãri, mãgùpa pù ata bùi jâapataarã juade carcelde t'ù nâbùnadamerã. 59 Mùa wãarata jararu. Mamãik'aapa uchia–e pai p'arat'a jõmaweda p'aa–emaa.