Jesupa jarateeda ùt'aa t'â k'awaadamerã
(Mateo 6.9-15; 7.7-11)
11
1 Ewari aba Jesús ùt'aa t'â aupak'ãri, k'õp'ãyo abaapa mãgaji:—Tachi Waibùa, jaratéeji taipa ùt'aa t'â k'awaadamerã, Juan Bautistapa chi k'õp'ãyoorãmaa jarateedak'a.
2 Mãpai Jesupa mãgaji:
—Parã ùt'aa t'âdak'ãri, nãga jarátù:
Tachi Ak'õre ùt'ari bù,
pù t'â awaraa t'â k'ãyaara pipùara bù.
Eperãarã bàji pùchi jua ek'ari pùchideerã p'aneedamerã.
[Óoji pùchia k'inia bùk'a na p'ek'au eujãde, ùt'ari ooparik'a.]
3 Tai–it'ee chik'o téeji ewari chaa k'odait'ee.
4 Taipa p'ek'au k'achia oopata chupùria k'awáaji mãik'aapa perdonáaji
taipa perdonaapatak'a, awaraarãpa taimaa ne–inaa k'achia oodak'ãri.
Tai k'achiade baaipináaji.
Tai k'aripa atáji Netuara Poro Waibùa juadeepa.
5 Ichiaba Jesupa mãgaji:
—K'îsiadáma nãgùde. Parãdepemapa k'õp'ãyo iru bai. Esapùte pù wãi iru temaa mãik'aapa jarai: “K'õp'ãyo, mù–it'ee pan õpee téeji, 6 k'õp'ãyo aba et'ewapai t'ùmùùpa pacheda perã mù temãi. Maarepida wêe bù teeit'ee k'omerã.” 7 Mãga p'asada paara, irua jara–e pai: “Mù ichiak'au bàji. Puerta jâa iru bù. Mù warrarã mù ome nama k'ãi p'anùpù. Mapa p'irabai–eda a–e pai, pùmaa ne–inaa teede.” 8 Mùa jara bù: Mãgà k'õp'ãyo p'irabai–e pùrã ne–inaa teeit'ee pù ichi k'õp'ãyo perã, mãgara p'irabaiit'ee waa iidi nâbanaamerã. Teeit'ee ne–inaa jõma pùa falta bù. 9 Maperã mùa nãga jara bù. Iidipatáatù Tachi Ak'õremaa. Irua teeit'eepù. Jùrùpatáatù. Irua k'awapiit'eepù. Eperãpa puerta t'aide t'âparik'a, Ak'õremaa t'âpatáatù. Irua parã k'aripait'eepù. 10 Chi iidi bùmaa Tachi Ak'õrepa teepari; chi jùrù bùmaa Tachi Ak'õrepa k'awapipari mãik'aapa chi t'â bùmaa ewapari.
11 +¿Parãdepema ak'õrepa taama teeik'ã ichi warramaa, irua chik'o iidik'ãri? 12 Maa–e pùrã, ¿tusõre teeik'ã irumaa, ne–ùmù iidik'ãri? 13 ¡Mãga–epù! Parã, ne–inaa k'achia oopataarã mîda, pãchi warrarãmaa net'aa pia tee k'awa p'anù. Parãpa mãga ooruta pùrã, ¡audupùara pãchi ùt'aripema Ak'õre Waibùa ichi Jaure teeit'ee chi iidirutaarãmaa!
Jesús Netuara Poro Waibùa jua ek'ari bùda adap'edaa
(Mateo 12.22-30; Marcos 3.20-27)
14 Ewari aba Jesupa netuara uchiapimaa baji eperã pedee atua bù k'ap'ùadeepa. Ma netuara uchiak'ãri, ma eperã pedee beeji. Mãga unudak'ãri, arii p'anadap'edaarã ak'ùtrua para beeji. 15 Mamîda ûk'uruurãpa mãgajida:
—Beelzebú, Netuara Poro Waibùa júapata jãgá netuaraarã uchiapiparida ajida.
16 Mãpai awaraarãpa Jesús ùmùatee k'inia p'anadap'edaa perã, iidijida ne–inaa oomerã Tachi Ak'õrepapai oopari. Mãga ooru pùrã, k'awadayada ajida, Tachi Ak'õre juapa ooda. 17 Mamîda Jesupa k'awaji ãchia k'îsia p'anù. Mapa mãgaji:
—P'uuru pidaarãpa ãchi auk'aarã jëreruta pùrã, waa araa p'anapataada–e pai. Ãchi itu jõdaridait'ee mãik'aapa ãchi te ãri baibeeit'ee. 18 Mãga pùk'a Netuara Poro Waibùapa ichi auk'aarã jëreru pùrã, ãchi itu jõdaridai. Parãpa jara p'anùk'a mù Beelzebú eere bada paara, ichideerã jëre–e pak'aji. 19 Ma awara mãga pada paara ¿k'ai juapa parã eere p'anùùrãpa netuaraarã uchiapipatama? ¡Netuara juapa–epù! Ãchiata ak'ùpipata parã pia k'îsiada–e p'anù. 20 Jõdee mùa netuaraarã uchiapipari pùrã Tachi Ak'õre Waibùa juapa, jara k'inia bù ârá Tachi Ak'õredeerã poro waibùa nama bù.
21 +Eperã juataura bùpa ichi te jâak'ãri espada ome, k'îsia bù apida t'îuda–e pai ichi net'aa chùade. 22 Mamîda eperã iru k'ãyaara juataura bù cheru pùrã mãik'aapa iru p'oyaaru pùrã, iru espada jãri atai mãik'aapa iru net'aa p'e atadari. Mù waibùara bù Netuara Poro Waibùa k'ãyaara. Mapa netuaraarã mù jua choodak'aa.
23 +Eperã mù eere bù–e pùrã, mù k'îra unuamaa iru bù. Ichiaba mù k'aripa–e bù pùrã awaraarã Tachi Ak'õre jua ek'ari p'anapataadamerã, eperãarã ãyaa pëipari mù ik'aawaapa.
Netuara eperã k'ap'ùade waya merãtùa bada
(Mateo 12.43-45)
24 —Eperã k'ap'ùadeepa netuara uchiapidak'ãri, mãgùpa jùrù nipapari eujã p'ûasaa sãma âiit'ee. Mamîda unu–e pak'ãri, k'îsiapari: “Waya merãtùanait'ee ma eperã k'ap'ùade, mù naaweda badamãi.” 25 Chek'ãri, unu chepari ma eperã k'ap'ùa pi–ia bù; te barrep'eda, sùùp'eda pi–ia bùk'a. 26 Mãga unuk'ãri, jùrùnapari awaraa netuara siete k'achiara ichi k'ãyaara mãik'aapa ma eperã k'ap'ùade merãtùa chepata. Mãgá ma eperã audupùara k'achiade beeit'ee naaweda bada k'ãyaara.
Wãara t'ãri o–îa p'anùùrã
27 Jesupa mãgá pedeemaa bùde arii p'anadap'edaarãdepema wêrapa mãgaji:
—¡T'ãri o–îa bapari pù nawe, chi pù t'oda mãik'aapa warida!
28 Jesupa p'anauji:
—¡Ma k'ãyaara t'ãri o–îara bapari chi Tachi Ak'õre pedee ûrip'eda, ooparipa ma jara bùk'a!
Ne–inaa eperãarãpa p'oyaa oodak'aa unu k'inia p'anadap'edaa
(Mateo 12.38-42; Marcos 8.12)
29 Mãgá pedee bùde eperãarã cho–k'ara chepachida iru ik'aawa seedarutamaa. Mãpai ichia jaramaa beeji ãramaa:
—Parã ârapemaarã t'ãri k'achia–idaa p'anùda aji. Iidipata mùa oomerã ne–inaa eperãarãpa p'oyaa oodak'aa ãchi juadoopa. Mamîda Tachi Ak'õrepa ooit'ee chonaarãweda Jonás ome oodak'a. 30 Tachi Ak'õrepa Jonás pëidak'a Nínive p'uurudepemaarãmaa ichi pedee jaramerã, mãga pùk'a mù, chi Eperã Ak'õre Truadepema pëiji ichi pedee jaramerã parã ârapemaarãmaa. 31 Tachi Ak'õre ewari waibùa ewate irua parã ârapemaarãpa oopatap'edaa ak'ùk'ãri jarait'ee pia wa k'achia, Reina Sur Eerepemapa parã ùmùateeit'ee Tachi Ak'õrepa k'achiadee pëimerã. Chonaarãweda ma reina t'ùmùùpa cheji Rey Salomón k'îsia k'awaa bù pedee ûride. Mamîda nama bù aba waibùara bù Salomón k'ãyaara. 32 Ma ewate ichiaba Nínive p'uuru pidaarãpa parã ârapemaarã ùmùateedait'ee, Tachi Ak'õrepa parã k'achiadee pëimerã. Chonaarãweda Tachi Ak'õrepa Jonás pëik'ãri Nínive pidaarãmaa, ãrapa p'ek'au k'achia oopatap'edaa oo amaa wãjida. Mamîda parã ârapemaarãpa p'ek'au k'achia oopata oo amaada–e, aba Jonás k'ãyaara waibùara bùpa jara cheji mîda mãga oodamerã.
Jesupa tachi taude jarateeda
(Mateo 5.15; 6.22-23)
33 —Lámpara k'oodak'aa merã bùdait'ee ne–inaa ek'ari. Ma k'ãyaara k'oodak'ãri, ne–inaa ârù ùt'à ata bùpata, jõma te jãde p'anùùrãpa âdaa unudamerã. 34 Tachi tau lamparak'a âdaa pùk'a bù tachi k'ap'ùa–it'ee. Pùchi tau pia bak'ãri, k'ap'ùa jõmaweda âdaa pùk'a bùde bait'ee. Mamîda pùchi tau k'achia bù pùrã, k'ap'ùa jõmaweda p'ãriu pùk'a bùde bait'ee. 35 K'îrak'aupai pù âdaa pùk'a bù p'ãriu pùk'a padarii. Pia jarait'eera, k'îrak'aupai k'îsiai pùa Tachi Ak'õre wãara k'awa bù, mù ûraade ijãa–e bù mîda. 36 Mù ûraade ijãa bù k'aurepa pù k'ap'ùa jõmaweda âdaa pùk'a bùde bù pùrã, Tachi Ak'õre wãara k'await'ee, lámpara uruade ne–inaa pia unupatak'a.
Jesupa jarada fariseorãmaa<R>mãik'aapa Moisepa p'ãda jarateepataarãmaa
(Mateo 23.1-36; Marcos 12.38-40; Lucas 20.45-47)
37 Jesús pedee aupak'ãri, fariseo abaapa jaraji ichi ome wãmerã ichi temaa nek'ode. Ma tede t'îup'eda, Jesús mesade su–ak'ù beeji. 38 Ma fariseo p'era pùk'a baji Jesupa ichi jua sùù–e pada perã nek'oi naaweda, fariseorãpa oopatak'a. 39 Mamîda Jesupa mãgaji:
—Parã fariseorãpa vaso mãik'aapa p'arat'u taawaik'a eere pi–ia sùùpatada aji. Mamîda mãgà edajãde ipuru bù ne–inaa k'achiapa, parã t'ãri k'achia p'anadairã. Chîara net'aa chùapata mãik'aapa chîara k'ûrapata. 40 ¡Parã k'îsia k'awada–ee p'anù! ¿K'awada–e p'anùk'ã chi parã k'ap'ùa oodapa parã t'ãri ichiaba ooda? 41 Eperãarã chupùria k'awáatù mãik'aapa t'ãripa ãchimaa ne–inaa téetù. Mãpaipù Tachi Ak'õrepa parã pia ak'ùpariit'ee.
42 +¡Aai, Tachi Ak'õrepa parã fariseorã k'achiadee pëiit'ee! Tachi Ak'õre–it'ee nãgee aliño awara bùpata: menta, ruda, awaraa ne–inaa k'arra ome; mãgà diezdepema chaa, aba. Mamîda parã–it'ee p'ua–e bù ne–inaa oodait'ee Ak'õrepa oopi bùk'a, iru k'inia iru p'anadairã. Mãgata oodaipia bù parãpa ne–inaa oopata ome.
43 +¡Aai, Tachi Ak'õrepa parã fariseorã k'achiadee pëiit'ee! Tachi Ak'õre Ûraa jarateepata tede p'anadak'ãri, su–ak'ù beepari pipùara bùde su–ak'ù p'aneepata, k'inia p'anapata perã eperãarãpa parã ak'ùdamerã ãchi waibùarãk'a. Ma awara calle jãde nipadak'ãri, k'inia p'anapata jõmaarãpa parãmaa saludaadamerã, ãchi poro waibùarã ome oopatak'a.
44 +¡Aai, Tachi Ak'õrepa parã k'achiadee pëiit'ee! Eperãarã pariatua jãùra ârù t'ùapata, k'awada–ee aùde eperã piuda bù. Parã ma jãùrák'ata p'anù, pãchi t'ãride k'îsia k'achia iru p'anadairã.
45 Mãpai Moisepa p'ãda jarateeparipa mãgaji:
—Tachi Jarateepari, pùa ma pedee jarak'ãri, ichiaba taimaa ik'achia jara bùda aji.
46 Mamîda Jesupa mãgaji:
—¡Aai, Tachi Ak'õrepa parã Moisepa p'ãda jarateepataarã ichiaba k'achiadee pëiit'ee! Eperãarãmaa audú ne–inaa chok'ara oopipata tachi chonaarãpa chonaarãweda oopatap'edaak'a. Mamîda ãrapa ma jõma p'oyaa ooda–e pak'ãri parãpa jarapatak'a, maarepida k'aripada–e.
47 +¡Aai, Tachi Ak'õrepa parã k'achiadee pëiit'ee! Pi–ia oopata chonaarãwedapema Ak'õre pedee jarapataarã ùadap'edaamãi, eperãarãpa ãra k'irãpadamerã. ¡Mamîda parã chonaaråpata ãra peek'oojida! 48 Parãpa mãga oodak'ãri, ak'ùpipata auk'a ook'ajida pãchi chonaarãpa oodap'edaak'a, parã ârapemaarãpa auk'a ûridaamaa p'anapata perã Ak'õre pedee jarapataarãpa jara p'anù. Ãchia ma Ak'õre pedee jarapataarã peek'oojida mãik'aapa parãpa mãgùùrã ùadap'edaamãi pi–ia oopata.
49 +Mapa Tachi Ak'õrepa na k'îsia k'awaa pedee jaraji: “Mù pedee jarapataarã pëiit'eeda aji, mù ûraa jarateepataarã ome. Mamîda ûk'uru peedait'ee; jõdee awaraarã jùrùdait'ee miapidait'ee.” 50 Parã chonaarãpa mãga oopachida. Ak'õre pedee jarapataarã peepachida. Maperã ârá Tachi Ak'õrepa parã k'achia ooit'ee. 51 Na eujã oodak'ãriipa iru pedee jarapataarã peepata; Abeldeepa Zacarías parumaa. Ma Zacarías peejida Tachi Ak'õre tede, te t'îupata altarmãi esajîak'a. Maperãpù mùa jara bù: Tachi Ak'õrepa ârapemaarã k'achia ooit'ee ma oopatap'edaa pari.
52 +¡Aai, Tachi Ak'õrepa parã Moisepa p'ãda jarateepataarã k'achiadee pëiit'ee! Eperãarãpa llave iru p'anapatak'a puerta ewadait'ee, mãga pùk'a parãpa Tachi Ak'õre Ûraa iru p'anapata. Mamîda ma ûraade jara bù awaraarãmaa k'awapidaamaa p'anù. K'iniadak'aa awaraarãpa ma pedee ûridamerã mãik'aapa oodamerã irua jara bùk'a.
53-54 Jesupa ma jõma jarap'eda, ma Moisepa p'ãda jarateepataarã mãik'aapa fariseorã k'îraudachida. Iidida chok'ara iidi p'aneejida iru k'achiade baaipidai jîak'aapa irua p'anauda k'aurepa. Mamîda p'oyaa ùmùateeda–e paji.