Jesupa eperãarã setenta y dos pëida jarateenadamerã
10
1 Maap'eda Jesupa chi k'õp'ãyoorã awara setenta y dos jùrùt'eraji ichi ome nipapataarãdepema. Ãra omee–omee pëiji ichi naa wãdamerã p'uuru bee chaa ichi wãit'ee badamaa. 2 Ãra pëik'ãri, mãgaji:—Eperãarã chok'ara mùde waide ijãada–e p'anù. Ne–uu audú chau bàk'apù p'anù. Mamîda mimiapataarã chok'ara–ee p'anù. Mapa iidipatáatù Tachi Ak'õre, ma ne–uu chiparimaa awaraa mimiapataarã pëimerã chi chau bù p'ede. 3 Wåtù eperãarãmaa jarateede. Mùa parã pëiru oveja chak'eerã pëik'ajik'a ne–animalaarã k'achia beerã t'ãide. 4 Na wãrutade ateenáatù muchila, p'arat'a maa–e pùrã awaraa chancla. Ichiaba taarã ak'ùnâ p'aneenáatù pedeedait'ee chi unurutaarã ome. 5 Eperã tede t'îudak'ãri, naapùara jarapatáatù: “Na te pidaarã pia p'anapatáatù.” 6 Mãgá eperã t'ãri pia paraa pùrã ma tede, iru k'ãiwee beeit'ee. Mamîda iru t'ãri pia–e bù pùrã parã ome, Tachi Ak'õrepa iru k'ãiwee bapi–e pait'ee. 7 Ma tede p'anéetù. Ãrapa teeruta k'ótù mãik'aapa tótù, parã, mù mimiapataarãpa mãga atadaipia bairã pãchi mimia pari. Te awara–awaraa nipanáatù; te abaadepai p'anéetù.
8 +P'uurude panadak'ãri, ma p'uurudepemaarãpa parã auteebairuta pùrã, k'ótù ãrapa teeruta. 9 Ma p'uurudepema k'ayaa beerã jùpak'óotù mãik'aapa mãùrãmaa jarátù: “Tachi Ak'õrepa parã bù k'inia bù ichi jua ek'ari ichideerã p'aneedamerã.” 10 Mamîda awaraa p'uurude panadak'ãri, ma p'uurudepemaarãpa parã auteebaida–e pùrã, calle jãde wãyaarutade nãga jarátù: 11 “¡Pãchi p'uurudepema yooro p'ora tai bùùrùde beeda paara nêep'eruta, parã t'ãri k'achia p'anadairã tai ome! K'awáatù Tachi Ak'õrepa parã bù k'inia bù ichi jua ek'ari ichideerã p'aneedamerã. Mamîda parãpa mãga k'iniada–e.” 12 Mùa jara bù: Ak'õre ewari waibùa ewate irua ma p'uurudepemaarã audupùara k'achia ooit'ee, chonaarãweda Sodoma pidaarã k'achia ooda k'ãyaara.
P'uuru pidaarãpa Ak'õre Ûraa ûridaamaa p'anadap'edaa
(Mateo 11.20-24)
13 —¡Aai, Corazín p'uurudepemaarã! ¡Aai, Betsaida p'uurudepemaarã! ¡Tachi Ak'õrepa parã k'achiadee pëiit'eepù! Tiro p'uurude, Sidón p'uurude eperãpa ooda paara ne–inaa eperãarãpa p'oyaa oodak'aa ãchi juadoopa, mùa parã p'uurude oodak'a, taarã–eweda ijãak'ajida. Ãrapa p'ek'au k'achia oopata oo amaa k'inia jõnùpa chupùria iidik'ajida Tachi Ak'õremaa. Ma p'ek'au k'achia oopata k'aurepa t'ãri p'uapa p'aru p'ãimaa jâk'ajida mãik'aapa it'abarre p'ora ùt'aa p'ok'ajida ãchi poro ârù. 14 Maperã mùa jara bù: Tachi Ak'õre ewari waibùa ewate irua parã k'achiara ooit'ee ma Tiro p'uurudepemaarã k'ãyaara mãik'aapa Sidón p'uurudepemaarã k'ãyaara. 15 Ichiaba parã Capernaum p'uurudepemaarã, ¿k'îsia p'anùk'ã parã p'uuruta awaraa p'uuru k'ãyaara waibùara pait'ee Ak'õre k'îrapite? ¡Ma k'ãyaara irua parã p'uuruta jõt'aait'ee!
16 +K'õp'ãyoorã, eperãpa parã pedee ûrik'ãri, mù pedeek'a ûriit'ee. Jõdee chi parã yiaraa iru bùpa mù jida yiaraa iru bù. Ma awara mù yiaraa iru bù pùrã, ichiaba mù Ak'õre, mù pëida, yiaraa iru bù.
Setenta y dos ãpùtee chedap'edaa
17 Ma setenta y dos pëida eperãarã ãpùtee chedak'ãri, t'ãri o–î–îa p'anajida. Mãgapachida:
—Tachi Waibùa, ¡taipa pù k'ap'ùa pari pedeedak'ãri, netuaraarãpa paara oopachida taipa jaradap'edaak'a!
18 Jesupa p'anauji:
—Wãara. Mùa Satanás unuji ùt'ariipa baaik'ãri pa baaiparik'a. 19 Mùa parã k'aripaji t'ùadamerã taamaarã ârù mãik'aapa tusõre ârù, parãmaa maarepida k'aada–ee. K'aripaji chõopataadamerã Netuara Poro Waibùa ome; irua parã p'ua oo–ee. 20 Maperã parã t'ãri o–îa p'anadaipia bù. Mamîda ma k'ãyaara o–îara p'anadaipia bù Tachi Ak'õrepa parã t'â p'ã iru bairã ùt'ari ichideerã t'â p'ã jêra bù librode.
Jesús t'ãri o–îa bada
(Mateo 11.25-27; 13.16-17)
21 Mãgá pedee bùde Tachi Ak'õre Jaurepa iru audú t'ãri o–îapiji. Mãpai irua mãgaji:
—Ak'õre Waibùa, pù jõmaarã k'ãyaara waibùara bù. Ne–inaa jõmaweda ùt'ari nâbù, na p'ek'au eujãde nâbù paara pù jua ek'ari bù. Mù t'ãri o–îa bù pùa eperãarã jîp'aarãmaa k'awapiru perã ne–inaa pùa waide k'awapi–e pada k'îsia k'awaa beerãmaa mãik'aapa poro wêsaa beerãmaa. Mãga ooji mãga oo k'inia bada perã.
22 +Mù Ak'õrepa ne–inaa jõma bùji mù jua ek'ari mùa ak'ùpariimerã. Tachi Ak'õrepapai wãara mù, ichi Warra k'awa bù. Mãgá ichiaba mù, chi Warrapapai wãara iru k'awa bù. Mamîda mùa iru k'awapii mùa k'awapi k'inia bù eperãarãmaa.
23 Mãpai Jesupa ak'ùji chi k'õp'ãyoorãmaa mãik'aapa mãgaji:
—Parã, chi na ne–inaa unu p'anùùrã, wãara t'ãri o–îa p'anù. 24 Mùa jara bù: Chonaarãweda Ak'õre pedee jarapataarãpa mãik'aapa reyrãpa unu k'inia p'anajida parãpa unu p'anù. Mamîda unuda–e paji. Ichiaba ûri k'inia p'anajida parãpa nama ûri p'anù. Mamîda ûrida–e paji, ewari ma–it'ee waide pa–e bada perã.
Jesupa nepùrùda Samariadepema t'ãri pia badade
25 Ewari aba Moisepa p'ãda jarateepari pedeenaji Jesús ome. K'awaait'ee Jesupa wãara Ak'õre Ûraa k'awa bù wa mãga–e, mãgùpa iidiji:
—Tachi Jarateepari, ¿k'ãata ooyama aji, mù ùt'aa wãit'ee?
26 Jesupa p'anauji:
—¿K'ãata jara bù Moisepa p'ãdade? ¿K'ãata unu bùma aji, aùde?
27 Ma Moisepa p'ãda jarateeparipa p'anauji:
—‘Tachi Ak'õre Waibùa k'inia iru baparíiji pùchi t'ãripa mãik'aapa ne–inaa jõmaa k'ãyaara iru k'inia iru baparíiji. Ewari chaa k'îsíaji irude pùchi t'ãripa;’ (Deuteronomio 6.5)
‘ma awara awaraarã k'inia iru baparíiji, pùchi k'ap'ùa k'inia iru baparik'a.’ (Levítico 19.18)
28 Mãpai Jesupa mãgaji:
—Pia p'anaujipù. Mãga ooru pùrã, ichita bapariit'ee Ak'õre eujãde.
29 Mamîda ma Moisepa p'ãda jarateeparipa waapùara k'awaa k'inia baji. Mapa iidiji:
—Pùa awaraarãda ak'ãri, ¿k'aita jara k'inia bùma? aji.
30 Mãpai Jesupa nãga nepùrùji jarateeit'ee:
—Eperã Jerusalén ode wãji Jericó p'uurudee. Mãgá ode wãde nechùapataarã uchiajida. Ma eperã p'ua oojida mãik'aapa iru p'aru paara chùa atajida. Perá peet'aajida. 31 Bùù–ap'eda, p'aare cheji ma ode. Mamîda ma eperã eujãde bù unuk'ãri, jîp'a wãyaaji ichi ode. 32 T'êepai Levideepa uchiadap'edaarã uchiada ichiaba ma ode chewãji. Mamîda ma eperã mãgá unuk'ãri, ichiaba jîp'a ichi ode wãyaaji. 33 Ma t'êepai Samariadepemaa ichiaba ma ode cheji. Mãgùpa ma eperã unuk'ãri, iru chupùria k'awaaji. 34 Iru k'ait'a wãp'eda, aceite vino ome p'uruji iru k'ap'ùa p'ua bùmãi mãik'aapa p'aru sorede beda ataji. Mãpai ma eperã su–ak'ù bùnaji ichi burrode mãik'aapa ateeji eperãarã temaa ak'ù p'anadamerã. 35 Aù norema ma Samariadepemapa p'arat'a tau oméb êt'a atap'eda, teeji ma te chiparimaa mãik'aapa mãgaji: “Jã eperã ak'ù baparíiji mù cheru misa. Na p'arat'a awara faltaru pùrã, mùa p'aait'eeda” aji.
36 Mãga nepùrùp'eda, Jesupa iidiji ma Moisepa p'ãda jarateeparimaa:
—¿K'ãata k'îsia bùma? aji. ¿Ma õpeedepema chisãgùpa ma eperã ak'ùjima ichi k'ap'ùa ak'ùparik'a?
37 Ma Moisepa p'ãda jarateeparipa p'anauji:
—Chi chupùria k'awaadapa pajida aji.
Mãpai Jesupa mãgaji:
—Pùa auk'a oopáde aji, chupùria chedeerãmaa.
Jesús Marta tede p'asianada
38 Maap'eda ma ode Jesús waya wã nipaji Jerusalendee. Panaji p'uuru k'aipeede. Mama wêra t'âjarapatap'edaa Martapa iru auteebaiji ichi tede. 39 Marta âpewêra María mama baji. Ichi Jesús bùùrù ik'aawa su–ak'ù beeji ûriit'ee irua jararu. 40 Mamîda Marta ne–inaa audú oomaa beeji nek'opiit'ee Jesumaa mãik'aapa chi k'õp'ãyoorãmaa. Mapa Jesús k'ait'a cheji mãik'aapa mãgaji:
—Tachi Waibùa, ¿pù–it'ee p'ua–e bùk'ã aji, mù âpewêrapa mù k'aripa–e bù? Mùa ne–inaa chok'ara iru bù ooit'ee. Mapa jaráji irua k'aripamerã.
41 Mamîda Jesupa p'anauji: