Jesupa chi k'õp'ãyoorã pëida jarateenadamerã
(Mateo 10.5-15; Marcos 6.7-13)
9
1 Jesupa chi k'õp'ãyoorã doce t'â p'e atap'eda, jaraji Tachi Ak'õre juapa netuara uchiapidamerã mãik'aapa k'ayaa k'îra t'ãdoo jùpadamerã. 2 Mãpai ãra pëiji k'ayaa beerã jùpadamerã mãik'aapa jarateedamerã Tachi Ak'õrepa eperãarã bùit'ee ichi jua ek'ari, ichideerã p'aneedamerã. 3 Mãgá pëirude Jesupa mãgaji:—Ode wãrutade ateenáatù pak'uru t'ùdùk'a wãdait'ee, muchila, pan, p'arat'a, maa–e pùrã awaraa p'aru jâdait'ee. 4 K'eudaik'ãri, parãpa unuruta tede p'anéetù, mamãik'aapa wãruta misa. 5 P'uuru abaade parã auteebaida–e pùrã mãik'aapa parãpa jarateepata ûridaamaa p'anù pùrã, uchíatù ma p'uurudeepa mãik'aapa bùùrùdepema yooro p'ora nêep'étù ak'ùpidait'ee Tachi Ak'õrepa ãra k'aripa–e pait'ee.
6 Mãpai chi k'õp'ãyoorã wãjida p'uuru bee chaa. Tachi Ak'õre pedee pia jara pëida jaratee wãpachida mãik'aapa k'ayaa beerã jùpapachida.
Rey Herodepa k'îsia bada
(Mateo 14.1-12; Marcos 6.14-29)
7 Rey Herodepa ûrik'ãri Jesupa mãgee ne–inaa jõmaweda oo bù, k'awa–e paji k'ãata k'îsiait'ee. Eperãarã ûk'uruurãpa jarapachida Juan Bautista, chi piuda chok'ai p'irabaijida apachida. 8 Ûk'uruurãpa jarapachida iru chonaarãwedapema Ak'õre pedee jarapari Elías. Jõdee awaraarãpa jarapachida awaraa chonaarãwedapema Ak'õre pedee jarapari, chok'ai p'irabaida. 9 Mamîda Herodepa mãgaji:
—Taarãru mùa jara pëida Juan Bautista otau t'ùap'et'aadamerã. ¿K'aipaa mãgà eperã? Mùa ûridoo irua oopari ne–inaa eperãarãpa p'oyaa oodak'aa ãchi juadoopa.
Mapa Herodepa Jesús k'îra unu k'inia baji.
Jesupa eperãarã cinco mil nek'opida
(Mateo 14.13-21; Marcos 6.30-44; Juan 6.1-14)
10 Jesús k'õp'ãyoorã pachedak'ãri ãchia jaratee nipadap'edaamaapa, irumaa nepùrùjida jõma ãchia oodap'edaa. Mãpai irua ãra ãyaa ateeji Betsaida p'uurudee. 11 Mamîda eperãarãpa k'awaadak'ãri, t'êe wãjida. Mãùrã pacheruta unuk'ãri, Jesupa ãra auteebaiji mãik'aapa jarateeji Ak'õrepa eperãarã bù k'inia bù ichi jua ek'ari ichideerã p'aneedamerã. Ma awara ãra k'ayaa beerã jùpaji.
12 K'eupodopa chi k'õp'ãyoorã Jesumaa chejida mãik'aapa mãgajida:
—Eperãarã pëipáde ajida, âinadamerã mãik'aapa chik'o jùrùnadamerã p'uuru beemaa maa–e pùrã aù ik'aawa eperãarã beemaa, nama wê–e perã nek'odait'ee.
13 Mãpai Jesupa mãgaji:
—Parãpa chik'o téetù k'odamerã.
Ãchia p'anaujida:
—Taipa iru p'anùda ajida, pan joisomaa mãik'aapa chik'o omé. Mãgà araa–e pait'ee wãda–e pùrã chik'o netode na eperãarã chok'ara para bùùrã–it'ee.
14 Ùmùk'îraarã cinco mil paji. Mamîda Jesupa mãgaji chi k'õp'ãyoorãmaa:
—Su–ak'ù p'aneepidapáde aji, cincuentacincuentaa.
15 Aramãgá jõmaarãta su–ak'ù p'aneepijida. 16 T'êepai, Jesupa jitaji ma pan joisomaa chik'o omé ome mãik'aapa ùt'aa ak'ùp'eda, gracias jaraji Tachi Ak'õremaa ma chik'o pari. Mãpai k'õrak'oop'eda, teeji chi k'õp'ãyoorãpa eperãarãmaa jedenadamerã. 17 Eperãarã nek'ojida bi jãwaa p'aneerutamaa. Maap'eda Jesús k'õp'ãyoorãpa p'ejida k'oraa docena aba, ma chik'o pan pite ome nâbeeda.
Pedropa jarada Jesús Tachi Ak'õrepa pëida
(Mateo 16.13-19; Marcos 8.27-29)
18 Ewari aba Jesús ùt'aa t'âmaa bak'ãri chi k'õp'ãyoorã ome, ãramaa iidiji:
—¿Mù k'aima a p'anùma aji, eperãarãpa?
19 P'anaujida:
—Ûk'uruurãpa jara p'anù pù Juan Bautista, piup'eda p'irabaida. Awaraarãpa jara p'anù pù chonaarãwedapema Elías. Jõdee awaraarãpa jara p'anù pù chonaarãwedapema Ak'õre pedee jarapari, chok'ai p'irabaida.
20 Mãpai Jesupa iidiji:
—Parãpárama, ¿mù k'aima adaima? aji.
Mãpai Pedropa p'anauji:
—Pù Cristo, Tachi Ak'õrepa pëida eperãarã rey pamerã.
Jesupa jarada ijãadak'aa beerãpa<R>ichi peedait'ee
(Mateo 16.20-28; Marcos 8.30--9.1)
—Mù, chi Eperã Ak'õre Truadepema ichita chupùria nâbait'ee. Judiorã poro waibùarãpa, p'aareerã poroorãpa, mãik'aapa Moisepa p'ãda jarateepataarãpa mù k'îra unuamaa iru p'anadait'ee mãik'aapa mù peepit'aadait'ee. Mamîda ewari õpeemaa mù chok'ai p'irabaiit'eeda aji.
Sãga eperãarã nipadaipia bù<R>Jesús ome
23 T'êepai Jesupa mãgaji jõmaweda ichi ome nipapataarãmaa:
—Eperã mù ome nipa k'inia bù pùrã, k'îsiaik'araa bù ichia ne–inaa oo k'inia bùdepai. Ichi kuruso ãp'aipia bù eperã peenadait'eek'a. Pia jarait'eera, ewari chaa ooipia bù mùa oopi bùk'a, ma k'aurepa miapiruta pùjida piurumaa. 24 Eperã piuamaa bù pùrã mùde ijãapari k'aurepa, mãgà piuk'ãri, atuait'ee. Mamîda eperã piuru pùrã mùde ijãapari k'aurepa, mãgà ùt'aa wãit'ee ichi piuk'ãri. 25 Ma awara ¿k'ãare piata baima eperãpa ne–inaa pia na p'ek'au eujãde nâbù jõmaweda ataru pùrã, mamîda piup'eda chok'ai p'irabai–e pùrã Ak'õre eujãde? Ichia net'aa iru bù atuait'ee mãik'aapa banait'ee tok'arradee. 26 Eperã k'îra nejasia bù pùrã jarait'ee mùde ijãa bù maa–e pùrã mù ûraa jarait'ee awaraarãmaa, mãgara mù, chi Eperã Ak'õre Truadepema jida k'îra nejasia bait'ee mëreda ait'ee, mù Ak'õre Waibùa k'îra wãreede chek'ãri iru angeleerã ome. 27 Mùa wãarata jararu. Nama p'anùùrã ûk'uru piudai naaweda, unudait'ee Tachi Ak'õrepa eperãarã bùru ichi jua ek'ari, ichideerã p'aneedamerã.
Jesús k'îra awaradaida
(Mateo 17.1-8; Marcos 9.2-8)
28 Tomiamaa mãga jarada t'êepai, Jesús wãji ee nok'odee. Ichi ome ateeji Pedro, Santiago mãik'aapa Juan. Mama iru ùt'aa t'âmaa beeji. 29 Mãgá ùt'aa t'âmaa bùde ichi k'îra awaradachi mãik'aapa chi p'aru t'o–t'oo uchiterreedachi. 30 Mãga nùde eperãarã jaure omé chejida mãik'aapa pedee p'aneejida iru ome. Chonaarãwedapemaarã Moisés Elías ome paji. 31 Ãchi ik'aawa âdaa pia urua nâbaji. Chejida Jesumaa jarade taarã–e nùde chupùria nâbait'ee mãik'aapa piuit'ee Jerusalende. 32 Mama ee nok'ode Pedro chi k'õp'ãyoorã ome tap'ok'ee jõnajida mîda, k'ãida–ee p'anajida. Maperã unujida Jesús mãgá k'îra wãree mãik'aapa ma eperãarã omé. 33 Ma eperãarã Jesús ik'aawaapa uchiarutade Pedropa mãgaji:
—Tachi Jarateepari, ¡pia bù nama p'anadait'ee pù ome! Oodait'eeda aji, te chak'eerã õpee, aba pù–it'ee, aba Moise–it'ee, chi apema Elia–it'ee.
Mamîda Pedropa k'îsia–ee mãga jaraji. 34 Iru pedee nâbùde jâararapa ãchi jõmaweda aneu ata cheji. Mãgá jâarara esajîak'a ãchi unudak'ãri, nejasiadachida. 35 Mãpai ma jâararadeepa Tachi Ak'õrepa pedeeji:
—Nãgùda aji, mù Warra k'inia, mùa jùrùt'erada. ¡Ûrítù iru pedee!
36 Ma pedee ûridap'eda, Jesús ituaba beeji ãra ome. Mãpai k'îup'ee p'aneejida. Ma t'êepai ãchia unuda ma ewate apidaamaa nepùrùda–e paji.
Jesupa warra k'ap'ùadeepa netuara uchiapida
(Mateo 17.14-21; Marcos 9.14-29)
37 Aù norema Jesús, Pedro, Santiago mãik'aapa Juan ee nok'odeepa edaa chedak'ãri, eperãarã chok'ara chejida Jesús ome unudait'ee. 38 Mãùrãdepema eperã abaapa golpe pedeeji:
—Tachi Jarateepari, mù chupùria k'awaapáde aji. Mù warra apai iru bù ak'ùnapáde aji. 39 Netuarapa iru jita atak'ãri, biapipari, wawapipari mãik'aapa iduba k'õp'ep'ee uchiapipari iru it'aideepa. Iru ichiak'au bùk'aa. Maperã piupiit'eeda aji. 40 Mùa pù k'õp'ãyoorãmaa chupùria iidiji ma netuara uchiapit'aadamerã. Mamîda p'oyaada–e paji.
41 Jesupa p'anauji:
—Aai, eperãarã, ¿at'ãrita mùde ijãada–e p'anùk'ã? ¡Ijãadak'aaråk'apù p'anù! ¿Jõmasaa taarãit'ee parã ome ijãarutamaa? Anéetù ma warra.
42 Ma warra Jesús k'ait'a chek'ãri, netuarapa eujãde bat'at'aaji mãik'aapa waya wawat'aaji. Mamîda Jesupa ma netuara ùtrùat'aaji mãik'aapa uchiapit'aaji. Ma warra mãgá jùpap'eda, teeji chi ak'õremaa. 43 Arii p'anadap'edaarã jõmaweda p'era pùk'a para beeji, Ak'õrepa ne–inaa pia ooda unudap'edaa perã.
Jesupa waya jarada ichi peedait'ee
(Mateo 17.22-23; Marcos 9.30-32)
Eperãarã ak'ùtrua para beeru misa Jesupa ooda k'aurepa, irua mãgaji chi k'õp'ãyoorãmaa:
44 —Na pedee pia ûrítù mãik'aapa k'îra atuanáatù: eperãpa mù, chi Eperã Ak'õre Truadepema baaipiit'ee k'achia beerã juade.
45 Mamîda ãchia k'awada–e paji irua jara k'inia bada. Tachi Ak'õrepa ãramaa at'ãri mãga k'awapi k'inia–e baji. Ma awara ãchia waawee p'anajida iididait'ee k'ãata jara k'inia baji.
Eperã waibùara bù Ak'õre k'îrapite
(Mateo 18.1-5; Marcos 9.33-37)
46 Maapai Jesús k'õp'ãyoorã aupedee p'aneejida k'awaadait'ee ãchidepema k'aita waibùara bù. 47 Jesupa k'awaak'ãri ãrapa k'îsia p'anù, warra chai ataji mãik'aapa ak'ùnâ bùji ichi ik'aawa 48 mãik'aapa mãgaji:
—Eperãpa mùde ijãa bù k'aurepa nãgà warra chaik'a auteebairu pùrã, mù jida auteebaipari. Ma awara chi mù auteebairupa mù pëida auk'a auteebaipari. Mapa chi parãdepema ek'ariara pùk'a bù audua–ee bairã, mãgùta waibùara pait'ee Ak'õre k'îrapite.
Jesús ome nipak'aa bùpa netuara uchiapida
(Marcos 9.38-40)
49 Mãpai Juanpa mãgaji:
—Tachi Jarateepari, taipa unujida eperãpa pù t'â jarap'eda, netuara uchiapi bù eperãarã k'ap'ùadeepa. Mãga unudak'ãri, taipa oonaapáde ajida, tachi ome nipak'aa perã.
50 Jesupa p'anauji:
—Ichiak'au oopítù. Tachi ome nipak'aa pùjida, tachi eere bùda aji.
Samaria eujãdepemaarãpa Jesús yiaraa iru p'anadap'edaa
51 Ewari k'ait'a pa wãk'ãri Jesús ùt'aa wãit'ee, sõcharra wãji Jerusalén ode. 52 Ichi naa eperãarã chok'a pëiji Samaria eujãdepema p'uuru k'aipee bùmaa, te jùrùdamerã aùde k'ãidait'ee. 53 Mamîda ma Samaria eujãdepemaarãpa iru auteebai k'iniada–e paji, k'awa p'anadap'edaa perã judiorã p'uuru Jerusalendee wãru. 54 Chi k'õp'ãyoorã Santiago Juan ome mãga k'awaa atadak'ãri, Jesumaa mãgajida:
—Tachi Waibùa, ¿k'inia bùk'ã ajida, taipa pa ùt'ùùpa baaipidamerã mãùrã ârù, jõdaidamerã?
55 Mamîda Jesupa ãra ùtrùak'ooji, mãgá k'achia k'îsiadap'edaa perã. 56 Mãpai wãjida awaraa p'uuru k'aipeedee.
Jesús ome nipa k'inia p'anadap'edaarã
(Mateo 8.19-22)
57 Ode wãdade eperãpa Jesumaa mãgaji:
—Tachi Waibùa, pù ome wã k'inia bùda aji, chi wãrumaa.
58 Jesupa p'anauji:
—Usap'å yooro te uria iru bee mãik'aapa ipanaarã te iru bee. Mamîda mù, chi Eperã Ak'õre Truadepema arajãgaa ni, k'ãipari wêe. Made k'îsíaji, jarai naaweda wãara mù ome nipa k'inia bù wa mãga–e.
59 Mãpai Jesupa mãgaji awaraa eperãmaa:
—Mù ome nipa chéji.
Irua p'anauji:
—Tachi Waibùa, mù jida pù ome nipaparii k'inia bù. Mamîda aù naaweda mù ak'õre ùapipáde aji, iru piuk'ãri.
60 Jesupa p'anauji:
—Ichiak'au bùpáde aji, atuadait'eerãpa ãchi piudap'edaarã ùadamerã. Pù, jõdee, nipa chéji mù ome mãik'aapa jaratéeji Tachi Ak'õrepa eperãarã bùit'ee ichi jua ek'ari ichideerã p'aneedamerã.
61 Mãpai awaraa eperãpa mãgaji:
—Tachi Waibùa, pù ome nipa k'inia bùda aji. Mamîda aù naaweda wãpíji mù tedepemaarã ak'ùde.
62 Jesupa p'anauji:
—Eperãpa eujã p'ëirat'ùmaa bù pùrã aradopa, jîp'a nok'ooree ak'ùipia bù. Ãpùtee ak'ùru pùrã, pia ba–e pait'ee Tachi Ak'õre jua ek'ari ichideerã ome.