Wêraarãpa Jesús k'aripapatap'edaa
8
1 Ma t'êepai Jesús nipapachi p'uuru beede mãik'aapa aù ik'aawa p'uuru k'aipee beede. Jaratee nipapachi Ak'õrepa pedee pia jara pëida; irua eperãarã bù k'inia bù ichi jua ek'ari, ichideerã p'aneedamerã. Chi k'õp'ãyoorã doce auk'a nipapachida iru ome. 2 Ichiaba wêraarã nipapachida iru ome. Aù naaweda ma wêraarã ûk'uru netuara k'ap'ùade merãtùa p'anajida mãik'aapa ûk'uru k'ayaa p'anajida. Mamîda Jesupa ma jõmaweda jùpaji. Mãùrãdepema paji María, ichiaba t'âjarapatap'edaa Magdalena. Iru k'ap'ùadeepa Jesupa netuara siete uchiapiji. 3 Ichiaba baji Cuza wêra t'âjarapatap'edaa Juana. Ma Cuza Rey Herodes tedepema mimiapataarã poro waibùa paji. Ichiaba baji Susana, awaraa wêraarã chok'ara ome. Ma wêraarãpa Jesús chi k'õp'ãyoorã ome k'aripapachida; teepachida net'aa mãik'aapa p'arat'a.Net'a tau p'oparide nepùrùda
(Mateo 13.1-9; Marcos 4.1-9)
4 Maapai eperãarã chok'ara uchiajida p'uurudeepa Jesús ak'ùde. Mãgá eperãarã chok'ara chip'edachida. Mãga nùde Jesupa na pedee nepùrùji Ak'õre Ûraa jarateeit'ee:
5 —Eperã wãji net'a tau p'ode. Ma p'o wãk'ãri, ûk'uru baaijida o jãde. T'êepai mama eperãarã bùùrùpa t'ùak'oojida mãik'aapa ipanaarãpa k'ok'oo chejida. 6 Ûk'uru baaijida mãu–idaade mãik'aapa t'onojida mîda, taarã–eweda pùùk'oodachi, pania wêede baaidap'edaa perã. 7 Ûk'uru baaijida ne–ùùrù–idaade mãik'aapa auk'a t'onojida. Mamîda ne–ùùrù k'ap'ip'iara waripari perã, mãgà net'a tau t'ono wãdap'edaa piuk'oodachida. 8 Jõdee awaraa net'a tau baaijida eujã piade. Mãgà t'onojida, warijida mãik'aapa pia chaujida. Ûk'uru net'a tau abaadeepa tau cien uchiajida.
Nepùrùp'eda, Jesupa golpe pedeeji:
—¡Pia k'îsíatù parãpa et'ewa ûridap'edaade k'awaadamerã k'ãata jara k'inia bù!
Sãap'eda Jesupa nepùrùpachi jarateeit'ee
(Mateo 13.10-17; Marcos 4.10-12)
9 Ma t'êepai Jesús k'õp'ãyoorãpa iidijida:
—¿K'ãata jara k'inia bùma ajida, pùa nepùrù bada?
10 Jesupa p'anauji:
—Tachi Ak'õrepa parãmaa k'awapimaa bùda aji, ne–inaa naaweda k'awapik'aa pada awaraarãmaa: sãga ichideerã p'aneedai. Mamîda awaraarãmaa mùa nepùrùpari jarateeit'ee:
‘Ãrapa mùa oo bù ak'ù p'anù mîda, wãara unuda–e mãik'aapa mùa jara bù ûri p'anù mîda, k'awada–ee p'aneedamerã.’ (Isaías 6.9)
Jesupa k'awapida net'a tau p'oparide
(Mateo 13.18-23; Marcos 4.13-20)
11 Mãpai Jesupa mãgaji:
—Mùa nepùrùda net'a tau p'oparide nãga jara k'inia bù. Ma net'a tau p'oda jara k'inia bù Tachi Ak'õre Ûraa jara pëida. 12 Chi o jãde baaidap'edaa jara k'inia bù eperãarãpa ma jara pëida ûripata. Mamîda Netuara Poro Waibùa chepari ne–inaa ooit'ee, t'ãripa ma pedee ijãanaadamerã mãik'aapa wãnaadamerã Ak'õre eujãdee. 13 Jõdee chi net'a tau mãu–idaade baaidap'edaa jara k'inia bù eperãarãpa ma jara pëida o–îa ûri p'anù. Mamîda chi mãu–idaade t'onoda taarã–eweda pùùdaiparik'a, mãga pùk'a mãgùùrãpa ma jara pëida taarã–epai ijãapata. Ma ûraade ijãadap'edaa k'aurepa nepùrade baairuta pùrã, maa–e pùrã awaraarãpa ãchi jùrùruta pùrã miapidait'ee, ijãa amaapata. 14 Jõdee chi net'a tau ne–ùùrù–idaade baaidap'edaa jara k'inia bù eperãarãpa ma jara pëida pia ûri p'anù. Mamîda t'êepai k'îsia p'aneeruta piara bù p'arat'a atadait'ee maa–e pùrã ãchia ne–inaa audú oo k'inia p'anù oodait'ee, Ak'õrepa k'inia bùk'a oodai k'ãyaara. Mãgá p'aneepata ne–uu warip'eda chauk'aa bùk'a. 15 Mamîda chi net'a tau eujã piade baaidap'edaa jara k'inia bù eperãarãpa ma jara pëida wãara ijãapata ãchi t'ãride. Mãpai p'anapata ma ûraade jara bùk'a mãik'aapa choopata ãchi ijãa p'anùde. Mãgá p'aneepata ne–uu pia chauparik'a.
Jesupa lamparade nepùrùda
(Marcos 4.21-25)
16 Maap'eda Jesupa awaraa nepùrùji:
—Tachia lámpara k'oodak'aa ata bùdait'ee ne–inaa edajãde maa–e pùrã cama ek'ari. Ma k'ãyaara lámpara k'oodap'eda, ùt'à ata bùpata pia âdaamerã te jãde p'anùùrã–it'ee. 17 Mãga pùk'a Tachi Ak'õrepa oo bù merã pùk'a bù eperãarãpa k'awanaadamerã. Mamîda t'êepai irua jõmaarãmaa k'awaapiit'ee k'ãata jara k'inia bù. Ichiaba ârá irua oo bù jõmaarãmaa k'awapi–e. Mamîda t'êepai k'awaapiit'ee.
18 Maperã pia ûrítù. Chi k'awa bùmaa Tachi Ak'õrepa audupùara k'awaapiit'ee. Mamîda chi ne–inaa k'awaara k'îsia bùpa k'awa bù paara wêpapiit'ee.
María Jesús âpemaarã ome
(Mateo 12.46-50; Marcos 3.31-35)
19 Jesús nawe chi âpemaarã ome wãjida irumaa. Mamîda iru k'ait'a p'oyaa wãda–e paji eperãarã see nâbada perã. 20 Mãpai eperãpa jaranaji Jesumaa:
—Pù nawe pù âpemaarã ome taawa nùmaa p'anùda aji, pù ak'ùdait'ee.
21 Mãga ûrik'ãri, ichia mãgaji:
—Ak'õre Ûraa ûripataarã mãik'aapa oopataarã Ak'õrepa jara bùk'a, mãùrãta mù nawek'a bù mãik'aapa mù âpemaarãk'a.
Jesupa nãu p'usa ome t'umãtùpida
(Mateo 8.23-27; Marcos 4.35-41)
22 Ewari aba Jesupa mãgaji chi k'õp'ãyoorãmaa:
—Wãdáma aji, lago k'îraik'a eeree.
Mãpai barcode bataujida mãik'aapa wãjida. 23 Sîa wãdade Jesús k'ãidachi. Mãùmisa p'usara t'o nâbeeji. Mapa barco pirubaai wã nipaji. 24 Mapa Jesús ârùmat'aajida mãik'aapa mãgajida:
—¡Tachi Jarateepari, pirubaai wãdapù!
Jesús p'irabaidachi mãik'aapa pedeeji nãumaa mãik'aapa p'usamaa. Jõmaweda t'umãtùdachi mãik'aapa ip'ii ûu beeji. 25 Mãpai Jesupa chi k'õp'ãyoorãmaa iidiji:
—¿Sãap'eda parãpa ijãada–e p'anùma aji, mùa parã ak'ùit'ee?
Mamîda ãchi jõmaweda p'era jõnùpa ak'ùtrua para beeji mãik'aapa ãchi pitapai iidi para beeji:
—¿K'aima ajida, nãgà? Iru pedeepa nãu, p'usa paara t'umãtùpiparida ajida.
Eperã k'ap'ùade netuara merãtùa bada
(Mateo 8.28-34; Marcos 5.1-20)
26 T'êepai panajida Gerasa eujãde lago k'îraik'a eere, Galilea eujã k'îrapite. 27 Jesús batauk'ãri, eperã netuara merãtùa bù iru k'ait'a cheji. P'uurudepema paji mîda, taarã p'aru jâ–ee baji; ichiaba teeda bak'aa paji. Bapachi jãùra mãu te uriade. 28 Mãgà eperãpa Jesús unuk'ãri, iru k'îrapite sinapotepa bia baainaji:
—Jesús, Ak'õre Waibùa Warra, mù ome t'îunáaji. ¡Mù chupùria k'awáaji! ¡Mù ichiak'au bàji!
29 Mãga jaraji Jesupa jara bada perã uchiamerã ma eperã k'ap'ùadeepa. Taarã baji ma netuara merãtùa bù iru k'ap'ùade. At'apai ma netuarapa irumaa ne–inaa pariatua oopiji. Mãùmisa eperãarãpa iru jua bùùrù ome cadenapa jâ nâbùjida ãyaa wãnaamerã. Mamîda ma netuara juapa irua ma cadena t'ùùt'aapachi mãik'aapa jirabodoji t'ùmà eperãarã p'anadak'aamaa. 30 Mãpai Jesupa iidiji:
—¿Pù, k'asaa t'âjarapatama? aji.
Ichia p'anauji:
—Mù t'âjarapatada aji, Legión.a
Mãga jaraji netuara chok'ara ichi k'ap'ùade t'îu p'anadap'edaa perã. 31 Mãpai ma netuaraarãpa Jesumaa chupùria iidipachida ãchi pëinaamerã uria audú nãpùa bùdee. 32 Ma k'ait'a ee k'arraya sinaarã chok'ara nek'omaa p'anajida. Mapa netuaraarãpa chupùria iidijida ma sinaarã k'ap'ùade t'îupimerã. Mãpai Jesupa mãga ooji. 33 Aramãgá netuaraarã uchiajida eperã k'ap'ùadeepa mãik'aapa t'îujida ma sinaarã k'ap'ùade. Aramata sinaarã p'irak'oodachida ee k'õot'ari jira bùdee. Toida baainadap'eda, âyapa jâak'oodachida.
34 Ma sinaarã jâa p'anadap'edaarãpa mãga unudak'ãri, p'irak'oodachida p'uurudee nepùrùdait'ee p'uuru pidaarãmaa mãik'aapa ma p'uuru k'ait'a beerãmaa. 35 Mapa eperãarã uchiajida ak'ùde. Jesumãi pachedak'ãri, unujida ma eperã netuara k'ap'ùade merãtùa bada su–ak'ù bù Jesús bùùrù k'ait'a. P'aru jâp'eda, k'ãiwee su–ak'ù baji. Mãga unudak'ãri, ma eperãarã p'era para beeji. 36 Mãpai chi unudap'edaarãpa nepùrùjida sãgapù Jesupa jùpaji ma eperã netuara k'ap'ùade merãtùa bada. 37 Maap'eda ma Gerasa eujãdepemaarãpa Jesumaa chupùria iidijida ãyaa wãmerã mamãik'aapa, audú nejasia p'anadap'edaa perã. Mãpai Jesús barcode bataup'eda, wãji. 38 Wãi naaweda, ma eperã netuara k'ap'ùade merãtùa badapa chupùria iidiji Jesupa ichi ome auk'a wãpimerã. Mamîda Jesupa jaraji beemerã. Mãgaji:
39 —Wãpáde aji, pùchi temaa mãik'aapa nepùrùpáde aji, Tachi Ak'õrepa pù ome ooda.
Aramãgá ma eperã wãji ma p'uurudepema jõmaarãmaa nepùrùde Jesupa ichi ome ooda.
Jairo k'au mãik'aapa wêrapa Jesús p'aru i t'õbaida
(Mateo 9.18-26; Marcos 5.21-43)
40 Jesús lago k'îraik'a eere pachek'ãri, eperãarãpa iru o–îa auteebaijida, jõmaarãpa iru nù p'anadap'edaa perã. 41 Mãga nùde pacheji eperã t'âjarapatap'edaa Jairo. Ichi Ak'õre Ûraa jarateepata tedepema poro paji. Jesús bùùrùmãi bedabaidachi mãik'aapa chupùria iidiji ichi temaa wãmerã 42 chi k'au jùpade, juak'aya nâbada perã. K'au apai iru baji; mãgà doce año iru baji.
Jesús wãrude Jairo temaa, iru ome nipapataarã see nâbada k'aurepa p'îsua baji. 43 Ma eperãarã ome baji wêra bi k'ayaa bù. Doce año waamiapa k'ayaa baji. Ichi p'arat'a jõdai baji jùpapataarã juade nipa. Mamîda apidaapa p'oyaa jùpadak'aa paji. 44 Ma wêra Jesús ãpùteik'aapa k'ait'a wãji mãik'aapa iru ârùpema p'aru i t'õbait'aaji. Aramata ma waamia t'ùbaidachi. 45 Mãpai Jesupa iidiji:
—¿K'aipa mù t'õbaijima? aji.
Chi k'õp'ãyoorã jõmaarãpa ãchia–e pajida apachida.
Mãpai Pedropa mãgaji:
—Tachi Jarateepari, eperãarãpa pù t'ùsîa wãrutada aji.
46 Mamîda Jesupa mãgaji:
—Eperã k'ayaa bùpa mù t'õbaijida aji. Mùdeepa uchiajida aji, Ak'õre juapa ma eperã jùpait'ee.
47 Mãpai ma wêrapa unuk'ãri p'oyaa miru–e paji, bùùrù wërewëree wãji mãik'aapa bedabaidachi Jesús bùùrùmãi. Jõmaarã taide jaraji k'ãare–it'ee t'õbait'aaji mãik'aapa sãgá jùpa beeji. 48 Mãpai Jesupa irumaa mãgaji:
—Wêra, pùa mùde ijãa bairã, jùpa beejida aji. K'ãiwee wåji.
49 At'ãri Jesús pedeemaa bùde Jairo tedeepa pëida pacheji mãik'aapa mãgaji ma Ak'õre Ûraa jarateepata tedepema poromaa:
—Pù k'au jai–idaajipù. Tachi Jarateepari ichiak'au bùpáde aji.
50 Mamîda Jesupa mãga ûrik'ãri, Jairomaa mãgaji:
—Waaweenaapáde aji. Jîp'a ijãapáde aji. Pù k'au jùpa beeit'ee.
51 Temãi panadak'ãri, Jesupa chi k'õp'ãyoorã jõmaweda t'îupi–e paji. Aba t'îupiji Pedro, Santiago, Juan mãik'aapa chi k'ayaa nawe chi ak'õre ome. 52 Eperãarã taawa p'anadap'edaarã jõmaweda jêe para baji t'ãri p'uapa. Mamîda Jesupa mãgaji:
—Jêenáatù. Na wêra k'au jai–idaa–e bù. Jîp'a k'ãita bùda aji.
53 Mãga ûridak'ãri, jõmaarãta ëidachida iru–it'ee, k'awa p'anadap'edaa perã jai–idaata bù. 54 Mamîda Jesupa ma wêra k'au juade jita atap'eda, golpe pedeeji:
—Wêra chai, ¡p'irabáiji!