Jesupa Romadepema soldaorã poro waibùa esclavo jùpada
(Mateo 8.5-13; Juan 4.43-54)
7
1 Jesupa ma eperãarãmaa mãga jara aupap'eda, wãji Capernaum p'uurudee. 2 Mama bapachi Romadepema soldaorã poro waibùa. Ichi esclavo k'inia iru bapachi. Mamîda mãgà juak'aya nâbaji. 3 Ma soldaorã poro waibùapa ûrik'ãri Jesús mama ni, pëiji judiorã poro waibùarã Jesumaa chupùria iidide, ichi esclavo jùpa chemerã. 4 Ãra Jesumaa wãjida mãik'aapa chupùria iidijida:—Na capitán *tai ome t'ãri pia baparida ajida. Mapa pùa k'aripaipia bùda ajida. 5 Irua tachi judiorã k'inia iru bapari. Oopijida ajida, namapema Ak'õre Ûraa jarateepata te.
6 Mãpai Jesús wãji ãra ome. Mamîda ma soldaorã poro waibùa te k'ait'a panadak'ãri, irua jara pëiji chi k'õp'ãyoorã ome:
—Tachi Waibùa, mù temaa chenaapáde aji, mù pù k'ãyaara ek'ariara bairã. 7 Maperã mùchi itu wã–e paji pù jùrùde. Mamîda k'awa bù ne–inaa jõmaweda pù jua ek'ari nâbù. Jîp'a jarapáde aji, mù esclavo jùpa beemerã. 8 Mù jida waibùarã jua ek'ari bù. Ma awara mùa soldaorã iru bù mùchi jua ek'ari. Mùa abaamaa wãpáde ak'ãri, wãpari; awaraamaa chepáde ak'ãri, chepari. Ichiaba mù esclavomaa ne–inaa oopáde ak'ãri, oonapari. Mù jua ek'ari p'anùùrãpa mãga oopata perã, mùa k'awa bù pùa jararupapai mù esclavo jùpait'ee.
9 Mãga jaranadak'ãri, Jesús p'era pùk'a beeji. Mapa ichi ome nipapataarãmaa ak'ùji mãik'aapa mãgaji:
—Mãgara mù wã–eda aji. Mùa wãarata jararu. Tachi israelitaarã t'ãide mùa apida unu–e bùda aji, ma eperãk'a; Tachi Ak'õrede wãara ijãa bù.
10 Ma pëidap'edaarã capitán temaa pachedak'ãri, chi esclavo jùpa bùta unu chejida.
Jesupa p'êtrãa warra piuda chok'ai p'irabaipida
11 Ma t'êepai, Jesús wãji Naín p'uurudee. Chi k'õp'ãyoorã mãik'aapa awaraa eperãarã chok'ara wãjida iru ome. 12 P'uuru k'ait'a panadak'ãri, unujida eperãarãpa jai–idaada ùade atee wãda. Mãgà p'êtrãa warra apai iru bada paji. Aù ome chi p'uurudepemaarã chok'ara wã nipajida. 13 Jesupa mãgà p'êtrãa unuk'ãri, chupùria k'awaaji mãik'aapa mãgaji:
—Jêenaapáde aji.
14 Aramata araa wãp'eda, Jesupa t'õbait'aaji ma k'ap'ùa atee wãdap'edaa p'aru. Chi atee wã nipadap'edaarã ak'ùnâ p'aneedak'ãri, Jesupa mãgaji ma jai–idaa badamaa:
—K'ûtrãa, p'irabáiji.
15 Mãpai chi jai–idaa bada su–ak'ù beeji mãik'aapa pedeemaa beeji. Maap'eda, Jesupa chi nawemaa mãgaji:
—Acha bùda aji, pù warra.
16 Mãga unudak'ãri, arii p'anadap'edaarã jõmaweda p'era pùk'adachida mãik'aapa Tachi Ak'õrede pia pedee para beeji:
—Ak'õre pedee jarapari waibùa tachi t'ãide uchiajida ajida.
Ichiaba mãgajida:
—Tachi Ak'õre che bù tachi p'uuru pidaarã k'aripade.
17 Mãgá Jesupa ooda k'awaajida Judea eujãdepemaarãpa mãik'aapa ma ik'aawapemaarãpa.
Juan Bautistapa chi k'õp'ãyoorã pëida
(Mateo 11.2-19)
18 Juan Bautista ome nipapatap'edaarã wãjida iru badamãi carcelde ma jõma nepùrùde. Mãga ûrik'ãri, omé t'â pëiji wãdamerã Jesumaa. 19 Mãùrã pëiji Jesumaa iididamerã iru chi cheit'ee bada eperãarã k'aripait'ee maa–e pùrã awaraa nùdaipia bù. 20 Jesús k'ait'a panadap'eda, mãgajida:
—Juan Bautistapa tai pëijida ajida, iidide: “¿Pùk'ã tai k'aripapari chonaarãpa cheit'ee bùda adap'edaa? Maa–e pùrã, ¿awaraa nùdaipia bùk'ã?” ajida.
21 Mãga iidi p'anadak'ãri, Jesupa eperãarã chok'ara jùpaji: k'ayaa beerã; k'ap'ùa p'ira beerã; netuara k'ap'ùade merãtùa beerã mãik'aapa tau p'ãriu beerã. 22 Maap'eda ma Juanpa eperãarã pëidamaa p'anauji:
—Wåtù Juanmaa mãik'aapa nepùràtù parãpa nama unu p'anù mãik'aapa ûri p'anù. Jarátù tau p'ãriu beeda ârá unu p'anù; nùk'anùk'aa beeda t'ùa nîutee; leprapa k'ayaa beeda jùpa p'anù ãchi k'ayaadeepa; k'ùùrù k'î beeda ârá ûri p'anù; piudap'edaarã waya chok'ai p'anù mãik'aapa chupùria chedeerãmaa Ak'õrepa pedee pia jara pëida jarateemaa bù. 23 ¡T'ãri o–îa bùda aji, chi mùde ijãa bù, k'awa–e bù mîda mùa ne–inaa jõma oo bù!
24 Juanpa eperãarã pëida wãdap'edaa t'êepai, eperãarãmaa Jesupa pedee pia jaramaa beeji Juande:
—¿K'ãata parãpa ak'ùnajidama aji, eujã pania wêe bùmaa wãdak'ãri? ¿K'îsiajida–ek'ã ak'ùnadait'ee eperã pariatua k'îsia bù, p'ûajara nãupa pariatua nêunêuwaa p'uaparik'a? 25 Maa–e pùrã, ¿k'îsiajida–ek'ã ak'ùnadait'ee eperã p'aru pi–ia jâ bù? Parãpa pia k'awa p'anù eperã p'aru pi–ia jâ beerã rey tede p'anapata. 26 Mãga–e pùrã ¿k'îsiajida–ek'ã ak'ùnadait'ee Ak'õre pedee jarapari? Wãara, iru Ak'õre pedee jarapari k'ãyaara waibùara bù. 27 Na Juandeta Tachi Ak'õre Ûraa p'ãdade jara bù:
‘Mùa eperã chok'a pëiit'ee pù naa o pia oonamerã pù, eperãarã poro waibùa, chei naaweda.’ (Malaquías 3.1)
28 Mùa jara bù: Eperã apida Juan k'ãyaara waibùara bù–e. Mamîda chi ek'ariara bùta iru k'ãyaara waibùara pait'ee, Tachi Ak'õrepa ma eperã ichi jua ek'ari bùk'ãri, ichideerã ome beemerã.
29 +Jõmaweda Juan pedee ûridap'edaarã, Cesar–it'ee impuesto p'epataarã paara, irumaa poro choopijida. Mãga oodak'ãri, ak'ùpijida Tachi Ak'õre wãarata jara baji Juan k'ap'ùa pari. 30 Mamîda fariseorã Moisepa p'ãda jarateepataarã ome Juanmaa poro choopida–e pak'ãri, ak'ùpijida ãchia k'iniada–e p'anù Tachi Ak'õrepa ãchimaa pia oo k'inia bada.
31 +Mùa jarait'ee sãga p'anù parã, mùde ijãadak'aa beerã. 32 Warrarã su–ak'ù p'aneedap'eda, jemenemaa p'anàk'ata p'anù p'uuru jãde. Ãchi k'õp'ãyoorãmaa biapata:
“Taipa siru chaajida. Mamîda parã pëirada–e paji. K'ari k'îsia paraa k'arijida. Mamîda parã jêeda–e paji.”a
33 Juan Bautista chek'ãri, pan k'o–e paji eperãarã jîp'aarãk'a mãik'aapa vino tok'aa paji. Maperã parãpa jarajida: “Netuara iru k'ap'ùade merãtùa bùda” ajida. 34 T'êepai mù, chi Eperã Ak'õre Truadepema cheji mãik'aapa nek'oji, ne–inaa toji eperã jîp'aak'a. Maperã jara p'anù mù nek'oyaa, ne–inaa toyaa bapari. Ma awara mù k'õp'ãyo meraaparida a p'anù k'achia–idaa beerã ome mãik'aapa Cesar–it'ee impuesto p'epataarã ome. 35 Mamîda Tachi Ak'õrepa wãarata ak'ùpimaa bùda aji, mùa oo bù k'aurepa parã jõmaarã pari.
Jesús Simón tede
36 Fariseo t'âjarapatap'edaa Simonpa Jesús t'â pëiji nek'o chemerã ichi ome. Mãgá Jesús wãji iru temaa. Su–ak'ù beeji mesade. 37 Ma p'uurude wêra p'ek'au k'achia ooyaa bapachi. Mãgùpa k'awaak'ãri Jesús wãda nek'ode ma fariseo tede, ataji chok'o chak'ek'a mãu pi–ia alabastrodee ooda ipuru bù k'erapa mãik'aapa wãji irumaa. 38 Jêe wãpa su–ak'ù banaji Jesús bùùrùmãi mãik'aapa iru bùùrù sùùmaa beeji ichi taubapa. Maap'eda ichi pudapa p'ooji. Mãpai Jesús bùùrù wëre atap'eda, ât'aaji mãik'aapa ma k'era weet'aaji aù ârù ak'ùpiit'ee Jesús k'inia iru bù. 39 Simonpa mãga unuk'ãri, k'îsiaji: “Na eperã wãara Ak'õre pedee jarapari pada paara, k'awak'ajida aji, k'ãare eperãpa ichi t'õbaimaa bù mãik'aapa mãga oopi–e pak'aji, ma wêra p'ek'au k'achia ooyaa bairã.”
40 Mãpai Jesupa Simonmaa mãgaji:
—Simón, mùa pùmaa ne–inaa jara k'inia bùda aji.
Simonpa p'anauji:
—Tachi Jarateepari, jaráji.
41 Jesupa nepùrùji:
—Eperãarã omé p'arat'a paraa p'anajida p'arat'a prestapatamãi. Abaapa paraa baji quinientos denario; chi apemapa cincuenta denario. 42 P'oyaa p'aada–e pak'ãri, chi p'arat'a presta pëidapa ãra chupùria k'awaaji mãik'aapa omeerãmaa p'aapi–e paji. Ârá mùmaa jaráji: ¿chisãgùpa ma p'arat'a prestapari audú k'iniara iru bait'eema? aji.
43 Simonpa p'anauji:
—¿Chi p'arat'a waibùara paraa bada–ek'ã? aji.
Jesupa mãgaji:
—Wãarada aji.
44 Mãpai Jesupa ma wêramaa ak'ùji mãik'aapa Simonmaa mãgaji:
—¿Na wêra unu bùk'ã? aji. Mù t'îuk'ãri pù tede, pùa mù pia auteebai–e paji. Pania tee–e paji mù bùùrù sùùmerã. Jõdee na wêrapa mù bùùrù sùùji ichi taubapa mãik'aapa p'ooji ichi pudapa. 45 Mù t'îuk'ãri, pùa mù k'îra â–e paji. Mamîda mù nama t'îuruweda na wêrapa mù bùùrù âmaa bù. 46 Pùa mù poro ârù aceitepa p'uru–e paji. Mamîda irua k'era weeji mù bùùrù ârù. 47 Mapa mùa jara bù: Irua p'ek'au k'achia chok'ara oopata wêpapiji, mù audú k'inia iru bairã. Mamîda eperãpa k'îsia bù pùrã ichia mak'ùara p'ek'au k'achia oo–e bù, mãgara ma eperãpa mù mak'ùara k'inia–e bù.
48 T'êepai Jesupa mãgaji ma wêramaa:
—Pùa p'ek'au k'achia oopata wêpajida aji.
49 Mãpai apemaarã arii p'anadap'edaarãpa iidi para beeji:
—¿K'aima ajida, jãgà? ¿Eperãarãpa p'ek'au k'achia oopata paara wêpapi bùk'ã? ajida.
50 Mãpai Jesupa waya jaraji ma wêramaa:
—Pù wãara Ak'õrede ijãa bairã, irua pù o k'achiadeepa k'aripa ataji atuanaamerã. K'ãiwee wãpáde aji.