Jesupa jarada Tachi Ak'õre te t'eedariit'ee
(Mateo 24.1-2; Lucas 21.5-6)
13
1 Jesús uchiak'ãri Tachi Ak'õre tedeepa chi k'õp'ãyoorã ome, abaapa maaji:—¡Tachi Jarateepari, ak'àji, acha bù mãu ta–pùa p'anù mãik'aapa Tachi Ak'õre te pi–ia oo k'obù!
2 Jesupa maaji:
—Wãara, acha p'anù te pi–ia p'anù. Mamîda ewari cherude mãu apida bee–e pait'ee awaraa mãu ârù. Na jõmaweda t'eek'oo chedait'ee.
Na p'ek'au eujã jõi naaweda, eperãarã miadait'ee
(Mateo 24.3-14; Lucas 17.22-24; 21.7-24)
3 T'êepai wãjida Olivo Eedee; Tachi Ak'õre te k'îrapite beepari. Jesús ituaba su–ak'ù beek'ãri, Pedro, Santiago, Juan mãik'aapa Andrés iru k'ait'a wãjida mãik'aapa iidijida:
4 —¿Sãapai p'asait'ee pùa jarada Tachi Ak'õre tedé? ¿Sãga taipa k'awadayama ajida, ma ewari k'ait'a pak'ãri p'asait'ee pùa jaradak'a?
5 Jesupa p'anauji:
—Tauk'a nipapatáatù apidaamaa k'ûrapiamaapa. 6 Mù jîak'a chok'ara chedait'ee. Seewata jaradait'ee: “Mùta Ak'õre Warra, Tachi Ak'õrepa pëida.” Mãga jara p'anùùpa eperãarã chok'ara k'ûradait'ee.
7 +Parãpa ûridak'ãri nama mãik'aapa awara ãi jura chõo jõnù, p'eranáatù. Ichita mãga p'asait'ee. Mamîda at'ãri na p'ek'au eujã jõ–e pait'ee. 8 Aù naaweda eperãarã awaraarã ome chõodait'ee. Jarra oodait'ee mãik'aapa awêrachai wãyaapariit'ee eujã awara–awaraade. Mamîda mãga p'asak'ãri, ewaapù na p'ek'au eujãdepemaarã miamaa p'aneedait'ee.
9 +¡Tauk'a nipapatáatù! Mù k'îra unuamaa iru p'anapataarãpa parã atapidait'ee judiorã poroorãmaa, mùde ijãapata k'aurepa. P'ua oodait'ee Ak'õre Ûraa jarateepata tede. Ateedait'ee ãchi poro waibùarãmaa mãik'aapa ãchi reyrãmaa. Mãùrã k'îrapite parãpa jaradai Tachi Ak'õrepa ooda parã–it'ee mù k'ap'ùa pari. 10 Mamîda na eujã jõi naaweda, Ak'õrepa ooda eperãarã k'aripait'ee ichita nepùrùdait'ee eperãarãmaa awara ãi t'ùmà na eujãde. 11 Mù k'îra unuamaa iru p'anapataarãpa parã charraarã k'îrapite ateedak'ãri, k'îsianáatù k'ãata jaradai. Maapai jarapatáatù Ak'õrepa jarapi bùk'a. Ak'õre Jaurépata k'awapipariit'ee k'ãata jaradai.
12 +Maapai âpemaarãpa peepidait'ee ãchi âpemaarã. Ak'õreerãpa peepidait'ee ãchi warrarã. Ichiaba warrarã k'îraudaridait'ee ãchi ak'õreerã ome peepirutamaa. 13 Jõmaarãpa parã k'îra unuamaa iru p'anapataadait'ee mùde ijãapata k'aurepa. Mamîda Tachi Ak'õrepa k'aripait'ee atuanaadamerã k'îra jîp'a nipapataarã Ak'õre ode jai–idaarutamaa.
Ak'õre ewari waibùa ewate jarada
(Mateo 24.15-28; Lucas 21.20-24)
14 —Ewari cherude abaapa ne–inaa audú k'achia ooit'ee Tachi Ak'õre te edupùara bù cuartode ichi baik'araa bùmãi. Mãgà Tachi Ak'õrepa yiaraa iru bapari, k'îra unuamaa iru bairã. Mãga unudak'ãri, Judea eujãde p'anùùrã p'ira mirudaipia bù ee nok'odee. (Acha bù pedee p'ãda leerupa pia k'awaipia bù, miapiamaapa.)a 15 Maapai eperã ichi terrazade bù pùrã, teedaa t'îuik'araa bù ichi ne–inaa p'e atade. 16 Eperã ne–uu k'ãide ni pùrã, teedaa cheik'araa bù ichi p'aru atade pida. Aramata wãipia bù. 17 ¡Aai, maapai chupùria jõneedait'ee wêraarã biak'oo bee maa–e pùrã warra chak'eerã jude iru bee! 18 Mãga wãyaai naaweda, chupùria iidítù Tachi Ak'õremaa ma ewari p'asapinaamerã k'oijara nâbùde. 19 Mãgà ewate jõmaarãta chupùria mia jõnadait'ee. Ak'õrepa na eujã oodak'ãriipa mãga ook'aa paji, ma awara t'êepai waa mãga oo–e pait'ee. 20 Mamîda Tachi Ak'õrepa k'îsiait'ee: “Mùa eperãarã taarã miapi–e pait'ee.” Mãga pada paara, eperã apida bee–e pak'aji. Ak'õrepa audú chaaree miapi–e pait'ee ichia jùrùt'eradaarã k'inia p'e iru bapari perã.
21 +Maapai apidaapa parãmaa jararuta pùrã: “¡Pùchá, ak'àtù! ¡Nama bù Cristo, Tachi Ak'õrepa pëida!” maa–e pùrã jararuta pùrã: “¡Ara bùta Cristo!” ijãanáatù. 22 Mù jîak'aarã mãik'aapa Tachi Ak'õre pedee jarapataarã jîak'aarã chok'ara chedait'ee. Mamîda mãùrãpa jara p'anù ijãanáatù, jîp'a seewa–idaa bee perã. Ne–inaa k'îra t'ãdoo eperãarãpa p'oyaa oodak'aa ãchi juadoopa oo p'anùùpa eperãarã k'ûradait'ee, perá Tachi Ak'õrepa jùrùt'eradaarã k'ûrarutamaa.
23 Jesupa ichi ome nipapataarãmaa waya maaji:
—¡Tauk'a p'anapatáatù! Mùa mãga jaraji parãpa k'awaadamerã mãga p'asai naaweda.
Eperã Ak'õre Truadepema waya chek'ãri
(Mateo 24.29-31; Lucas 21.25-28)
24 —Ichiaba maapai mia p'anadap'eda,
‘Ak'õrejîru p'ãriudariit'ee; atane waa âdaa–e pait'ee 25 mãik'aapa lucero baaik'oodaridait'ee pajãdeepa. Tachi Ak'õrepa pajã wërepiit'ee.’ (Isaías 13.10)
26 +Mãpai eperãarãpa unudait'ee mù, chi Eperã Ak'õre Truadepema jõmaarã k'ãyaara waibùara bù, k'îra wãree cheru jâararade. 27 Pëiit'ee mù angeleerã Ak'õre truadeepa mùa jùrùt'eradaarã chip'e atadamerã, jõmaweda ãchi p'anapatamãiipa. T'ùmà bee jida na p'ek'au eujãde, p'e atanadait'ee.
Higuerade jarateeda
(Mateo 24.32-35; Lucas 21.29-33)
28 —K'îsíatù higuera bùùrùde. Higuera k'iru t'u–k'ua uchia nâbeek'ãri mãik'aapa ewaa t'ono nâbeek'ãri, k'awaapata eujã wãsia wã. 29 Mãga pùk'a mùa et'ewa jaradak'a unudak'ãri, k'awa p'anù taarã–e mù, chi Eperã Ak'õre Truadepema cheru. 30 Mùa wãarata jararu. Ârapemaarã piudai naaweda, ma ne–inaa jõmaweda p'asait'ee. 31 Ewari cherude pajã na p'ek'au eujã ome jõdait'ee. Mamîda ichita p'asait'ee mùa pedee jaradak'a.
K'awada–e sãapai pait'ee Ak'õre ewari waibùa ewate
(Mateo 24.36-44; Lucas 17.26-30)
32 —Eperã apidaapa k'awada–e p'anù Eperã Ak'õre Truadepema cheit'ee ewate, chi hora jida. Ùt'aripema angeleerãpa pida k'awada–e p'anù; mùa ichiaba k'awa–e, Tachi Ak'õre Warra mîda. Mù Ak'õrepapaita k'awa bù.
33 +Maperã tauk'a p'anapatáatù, parãpa k'awada–e p'anadairã sãapai mù waya na eujãdee cheit'ee.
Mimiapari pia
(Mateo 24.45-51; Lucas 12.41-48)
34 —Oopatáatù te chiparipa oodak'a. Mãgà tedeepa awara ãyaa wãi naaweda, ichi mimiapataarãmaa jara bëiji te pia ak'ùdamerã. Ãchi chaachaa mimia teeji mãik'aapa chi te t'îupata ak'ùparimaa ûraaji tauk'a bamerã. 35 Chi mimiapataarãpa k'awada–e sãapaita chi te chipari waya cheit'ee ichi temaa. Mãga pùk'a bù parã ome. Tauk'a p'anapatáatù k'awada–e p'anadairã sãapai pãchi Chipari Waibùa waya cheit'ee. Chei p'ãriupodopa, esapùte, et'erre k'arik'ãri, maa–e pùrã tap'edapodopa. ¡Parãpa k'awada–epù! 36 Tachi Ak'õre–it'ee mimiapataarã, k'îrak'aupai k'awada–e p'anadairã pariatua mimia p'anù pùrã, k'îra nejasia p'anadait'ee Tachi Chipari Waibùa chek'ãri. 37 Mùa parãmaa ûraada, auk'a jõmaarãmaa jararu: ¡Tauk'a p'anapatáatù!