Mimiapataarã k'achia beerãdé nepùrùda
(Mateo 21.33-46; Lucas 20.9-19)
12
1 Jesupa nepùrùmaa beeji ãchimaa:—Eperãpa uva eujã uuji mãik'aapa t'ùak'auk'ooji. Ichiaba bõgo mãudee ooji uva piart'ùdait'ee.a Ma awara te ùt'ùa ooji ma ârùùpa ak'ùdait'ee. Mãga oop'eda, ne–uu eujã ak'ùpataarã jùrùji mimiadamerã ichi–it'ee. Maap'eda awara ãyaa wãji. 2 T'êepai uva oropata ewari pak'ãri, ma eujã chiparipa ichi mimiapari pëiji mimiapataarãmaa iidinamerã ichi eere bee bù chauda tee pëidamerã. 3 Mamîda ãchia iru jita atadak'ãri, sîk'oojida maap'eda jua arajãa pëit'aajida chiparimaa. 4 Mãpai chi eujã chiparipa waya awaraa mimiapari pëiji. Mamîda mãgà poro k'õop'et'aajida mãik'aapa waajarak'oojida. 5 Pëiji awaraa mimiapari; mãgà peet'aajida. Mãpai awaraarã chok'ara pëiji. Mãgùùrãdepema ûk'uru wùk'oojida, apemaarã peek'oojida.
6 +Mamîda at'ãri ichi ome iru baji ichi warra k'inia iru bada. K'îsiaji: “Mù mimiapataarã ome k'achia oojida. Mamîda acha bù mù warra perã, waaweedait'ee. Mapa mùa iru pëiit'ee.” 7 T'ùmùweda iru warra unudak'ãri, ma mimiapataarã pedee para beeji: “Jãgùpa ichi ak'õre net'aa jõmaweda atait'ee chi ak'õre piuk'ãri. Peet'aadáma ajida, tachi eujã chiparik'a p'aneedait'ee.” 8 Mãpai iru pachek'ãri, jita atajida mãik'aapa peet'aajida. Maap'eda chi k'ap'ùa ma uva eujãdeepa bat'at'aanajida. Mãgapai paji.
9 Mamîda, ma nepùrù aupak'ãri, iidiji:
—¡K'îsíatù! ¿K'ãata ooit'ee chiparipa? Mùa jarait'ee. Wãk'ãri, ma eujã ak'ùpataarã peek'oonait'ee mãik'aapa awaraa mimiapataarã jùrùnait'ee chi ne–uu eujã ak'ùpataadamerã.
10 +¿Parãpa Ak'õre Ûraa p'ãda leeda–e p'anùk'ã?
‘Te oopataarãpa mãu k'iniada–e padap'edaa pipùara padachi. 11 Tachi Ak'õrepa mãga ooji, tachia unudamerã mãik'aapa ak'ùtrua para beemerã.’ (Salmos 118.22-23)
Mãgara k'îsiadapáde aji, pia k'awaadait'ee mùa jarateeda.
12 Mãpai judiorã poroorãpa Jesús jita atapidait'ee paji, k'awadap'edaa perã irua ãchideta pedee baji. Mamîda eperãarã chok'ara paraaji Jesús eere. Ma k'aurepa waawee p'anajida jitapidait'ee. Mapa ichiak'au atabëijida; maap'eda wãjida.
P'arat'a p'aapatap'edaa reymaa impuesto–it'ee
(Mateo 22.15-22; Lucas 20.20-26)
13 T'êepai waya judiorã poroorãpa pëijida fariseorã mãik'aapa Rey Herodesb eere p'anadap'edaarã Jesús ùmùateedamerã mãik'aapa peepit'aadamerã. 14 Wãjida mãik'aapa iidijida:
—Tachi Jarateepari, taipa k'awa p'anù pùa wãarata jarapari. Ma awara pariatua ijãak'aa awaraarã k'îsiadeepa jara p'anù. Ichiaba pùa auk'a jarateepari eperãarã waibùarãmaa mãik'aapa chi chupùria beerãmaa. Pùa jarateepari tachi p'anapataadamerã Ak'õrepa k'inia bùk'a. Maperã taipa iidi k'inia p'anù: ¿Pia bùk'ã tachia impuesto p'aadait'ee Cesarmaa? ¿P'aadaipia bùk'ã irua jara bùk'a wa p'aadaik'araa bù?
15 Mamîda Jesupa k'awaji ãchia Tachi Ak'õrede ijãapatada apata mîda, wãara ijãadak'aa. Maperã mãgaji:
—¿Sãap'eda mù k'ûra k'inia p'anùma? aji. Denario p'arat'a tau anéetù mùa ak'ùit'ee.
16 Jesupa p'arat'a tau ak'ùk'ãri, iidiji:
—¿K'ai k'îrata nade bù, mãik'aapa k'ai t'âta p'ã bùma? aji.
P'anaujida:
—César k'îra mãik'aapa ichi t'âta p'ã bùda ajida.
17 Mãpai Jesupa mãgaji:
—Mãgara téetù Cesarmaa irua net'aa iidipari, mãik'aapa téetù Tachi Ak'õremaa irua iidipari.
Iru pedee ûridak'ãri, ak'ùtrua para beeji.
Iididap'edaa piudap'edaarã chok'ai p'irabaipatade
(Mateo 22.23-33; Lucas 20.27-40)
18 Mãpai saduceorã ûk'uru wãjida Jesumaa ne–inaa iidide iru k'ûradait'ee. Mãùrãpa jarateepata piudap'edaarã chok'ai p'irabaidak'aa. Maperã iidijida:
19 —Tachi Jarateepari, Moisepa nãga p'ã bëiji tachi–it'ee: Eperã miak'ãi bù warra wêe piuru pùrã, chi âpemapa iru wêra ataipia bù mãik'aapa aù ome warra ooipia bù chi âpema piuda k'ap'ùa pari.c 20 Mapa ¿pùa k'ãata k'îsia bù nãgùde? Âpemaarã siete p'anajida. Chi naapema miak'ãiji. Mamîda warra wêe piuji. 21 Mãpai araarepema âpema miak'ãiji ma p'êtrãa ome. Mamîda ichiaba warra wêe piuji. Ichiaba mãga p'asaji chi araarepema âpemaarã ome. 22 Jõmaweda miak'ãijida mîda ma wêra ome, warra ooda–e paji. Maap'eda ichiaba ma wêra piuji. 23 Mãpai wãara pùrã piudap'edaarã chok'ai p'irabaipata, waya chok'ai p'aneeruta ewate, ¿k'ai wêra pait'eema ajida, jõmaweda iru ome miak'ãi p'anadap'edaa perã?
24 Jesupa p'anauji:
—Ak'õre Ûraa pia k'awada–e p'anadairã, parãpa awara k'îsia iru p'anù. Ichiaba k'awada–e Tachi Ak'õrepa ne–inaa jõmaweda oopari. 25 Eperãarã piudap'eda chok'ai p'irabaidak'ãri, ùmùk'îraarã wêraarã ome waa miak'ãida–e pait'ee. Angeleerã ichi truade p'anùùråk'apù p'anadait'ee. 26 Ma awara parãpa k'achia k'îsia p'anapata jaradak'ãri piudap'edaarã chok'ai p'irabaidak'aa. ¿Waide parãpa Ak'õre Ûraade pia k'îsiada–e p'anùk'ã? Abraham, Isaac mãik'aapa Jacob jai–idaajida mîda, Tachi Ak'õrepa maaji Moisemaa pak'uru jep'eda urua jira bùdeepa t'ùpùtauk'a:
‘Mù pù chonaarã Ak'õre Waibùa; Abraham, Isaac, Jacob ijãadap'edaa Ak'õre Waibùa.’ (Éxodo 3.6)
27 Jara–e paji: “Mù ãra Ak'õre paji.” Mapa Tachi Ak'õredeerã jai–idaajida mîda, at'ãri chok'ai p'anù. ¡Iru piu beerã Ak'õre–epù! Ma k'ãyaara iru chok'ai beerã Ak'õrepù. Maperã parãpa ne–inaa awaraata k'îsia p'anù, Tachi Ak'õrepa jarada k'ãyaara.
Tachi Ak'õre Ûraa waibùara bù
(Mateo 22.34-40)
28 Mãgá pedee jõnù misa, cheji Moisepa p'ãda jarateepari. Ãchi pedee ûrii beeji. Jesupa apemaarãpa iididap'edaa pia p'anauk'ãri, mãgà jarateeparipa iidiji:
—Tachi Ak'õre Ûraa jõmaweda p'ãdadepema, ¿chisãgùta waibùara bùma aji, apemaarã k'ãyaara?
29 Jesupa p'anauji:
—Tachi Ak'õre Ûraa waibùara bùde jara bù:
‘Ûrítù israelitaarã. Tachi Ak'õre Waibùa apaita bù. Tachi Ak'õre awara wê–e. 30 Tachi Ak'õre Waibùa wãara k'inia iru baparíiji pùchi t'ãripa mãik'aapa ne–inaa jõmaa k'ãyaara iru k'inia iru baparíiji. Ewari chaa k'îsíaji t'ãripa irude. T'ãri o–îa ooparíiji irua jara bùk'a.’ (Deuteronomio 6.4-5)
31 Araare jara bù:
‘Awaraarã k'inia iru baparíiji pùchi k'ap'ùa k'inia iru baparik'a.’ (Levítico 19.18)
Ak'õre Ûraa waibùara wê–eda aji, mãgà omé jara aupada k'ãyaara.
32 Mãpai Moisepa p'ãda jarateeparipa mãgaji:
—Pia bù, Jesús. Wãarapù pùa jara bù:
‘Tachi Ak'õre Waibùa abapai bù. Awaraa wê–e iruk'a. 33 Tachi Ak'õre wãara k'inia iru baipia bù t'ãripa. Iru k'inia iru baipia bù ne–inaa jõma iru bù k'ãyaara. Ewari chaa k'îsiaipia bù t'ãripa irude mãik'aapa irua jara bùk'a ooipia bù t'ãri o–îa.’ (Deuteronomio 6.4-5)
‘Ichiaba awaraarã k'inia iru baparíiji pùchi k'ap'ùa k'inia iru baparik'a.’ (Levítico 19.18)
Mãgata oodaipia bù awaraa ne–inaa oodai k'ãyaara; net'a tau bùda altarde wa ne–animal peeda altarde paadai k'ãyaara Ak'õre–it'ee.
34 Mãgá Moisepa p'ãda jarateeparipa pia p'anauru ûrik'ãri, Jesupa maaji:
—Pùa Ak'õre Ûraade ewaa ijãa wãda aji, Ak'õrepa k'inia bùk'a ichi jua ek'ari o–îa nipamerã iru ode.d
Maadamãiipa waawee p'aneejida waa iididait'ee.
Tachi K'aripapari waibùara bù Rey David k'ãyaara
(Mateo 22.41-46; Lucas 20.41-44)
35 Jesupa jarateemaa bùde Tachi Ak'õre te ãuk'idaa, iidiji:
—¿K'ãata jara k'inia p'anù Moisepa p'ãda jarateepataarãpa jaradak'ãri Mesías David ëreerãdeepa uchiait'ee? ¿David poro waibùara bù–ek'ã, iru ëreerãdeepa uchiait'ee bù k'ãyaara? 36 ¡Pia k'îsíatù! Tachi Ak'õre Jaurepa p'ãpiji Rey David ëreerãdeepa uchiait'ee badade:
‘Tachi Ak'õrepa jaraji Tachi Waibùamaa: “Pù mù ome auk'a waibùa bairã, su–ak'ù beepáde aji, mù juaraare, mùa pù k'îra unuamaa iru p'anapataarã p'oyaaru misa.” ’e (Salmos 110.1)
37 Davidpa ichi ëreerãdeepa uchiait'ee bùmaa t'âjaraji “Tachi Waibùa”. ¿Mapa k'awada–ek'ã aji, Mesías waibùara bù chonaarãwedapema Rey David k'ãyaara?
Eperãarã chok'ara mama p'anadap'edaarãpa Jesús pedee ûridak'ãri, o–îadachida.
Jesupa jarada k'îrak'aupai Moisepa p'ãda jarateepataarã ome
(Mateo 23.1-36; Lucas 11.37-54; 20.45-47)
38 Jesupa jaratee bù misa, mãgaji:
—K'îrak'aupai p'anapataadai Moisepa p'ãda jarateepataarãk'a. Ãchi audua p'anadairã, p'aru teesoo jâi awaa p'anapata mãik'aapa k'inia p'anapata jõmaarãpa ãchimaa saludaadamerã plaza bee chaa, tachi poro waibùarã ome oopatak'a. 39 Ichiaba su–ak'ù p'aneepata su–ak'ù beepari pipùara bùde Tachi Ak'õre Ûraa jarateepata tede mãik'aapa nek'odak'ãri, chi su–ak'ù beepari pipùara bùde su–ak'ù p'aneepata. 40 Ma awara, p'êtrãa chupùria beerã te jãri atapata mãik'aapa seewata taarã ùt'aa t'âpata eperãarã k'îrapite. Tachi Ak'õre ewari waibùa ewate ichia ãchi audupùara miapiit'ee.
P'êtrãa chupùria k'ùrùpa p'arat'a tau teeda Tachi Ak'õremaa
(Lucas 21.1-4)
41 Ewari aba Jesús su–ak'ù baji primicia p'arat'a p'epata k'ait'a, ak'ùmaa eperãarãpa eda ata bùdak'ãri. P'arat'ara beerãpa waibùa ata bù chepachida. 42 Mãga nùde p'êtrãa chupùria k'ùrù pacheji. Ata bù cheji p'arat'a tau omé cobredee. Mãgà p'arat'a tau mak'ùara âpùa–e paji. 43 Mãga unuk'ãri, Jesupa chi k'õp'ãyoorãmaa maaji:
—Mùa wãarata jararu. Tachi Ak'õre k'îrapite na p'êtrãapa primicia waibùara teejida aji, apemaarã k'ãyaara. 44 Jõmaarãpa tee p'anù ãchi p'arat'a waibùa iru p'anadap'edaadepema beeda. Jõdee na p'êtrãa, chupùria k'ùrù mîda, ichia iru k'erada jõmaweda teeji Tachi Ak'õremaa. Teejida aji, chi p'arat'a iru bada paara chik'o netoit'ee.