Jesús Jerusalén p'uurude
(Mateo 21.1-11; Lucas 19.28-40; Juan 12.12-19)
11
1 Jesús Jerusalén p'uuru k'ait'a wãk'ãri, Olivo Ee k'îrapite panaji chi k'õp'ãyoorã ome. Mama p'anù Betfagé mãik'aapa Betania p'uuru. Jesupa chi k'õp'ãyoorã omé naa pëik'ãri, mãgaji:2 —Wåtù ara bù p'uuru tachi k'îrapite bùmaa. Ará panadak'ãri, ununadait'ee burro jâ bainâ bù, waide apida batauda–e p'anù iru ârù. Êra atátù mãik'aapa anéetù. 3 Apidaapa iidiruta pùrã, k'ãare–it'ee êramaa p'anù, jarátù: “Tachi Waibùapa arak'atùa atee k'inia bù. Waya tee chedait'eepù.”
4 Chi k'õp'ãyoorã wãdak'ãri, ununajida burro jâ bainâ bù o bi ik'aawa te ãuk'idaa. Mãpai êra atajida.
5 Mamîda arii p'anadap'edaarãpa iidijida:
—¿K'ãata oomaa p'anùma parãpa? ¿K'ãare–it'ee êra ataruta jã burro?
6 Mãpai Jesupa jaradak'a p'anaudak'ãri, ichiak'au pëijida.
7 Burro ateedap'eda Jesumaa, ãchi ârùpema p'aru jâpatap'edaa ata bùjida aù ârù mãik'aapa Jesús batauji.a 8 Jesús mãgá wãyaa wãk'ãri, chok'araarãpa ãchi p'aru t'õ jêra bùjida o jãde Jesús k'îrapite; ichiaba ûk'uruurãpa t'õ jêra bùjida k'iru t'ùap'edap'edaa, ãchi rey pai jîak'aapa. 9 Jesús naa wãdap'edaarãpa mãik'aapa t'êe chewãdap'edaarãpa o–îa biapachida:
—‘¡Hosana!b ¡K'îra wãree! ¡Tachi Ak'õrepa pia ak'ù bapari ichia pëida ichi pari nipamerã na eujãde! ¡K'îra wãree Ak'õre eujãde, Tachi K'aripapari cheru perã!’ (Salmos 118.25-26)
10 ¡Tachi Ak'õrepa pia ak'ù bapariit'ee ichia rey pëida! ¡David tachi rey padak'a waya rey iru p'anadait'ee! Tachi Ak'õrepa nãgà auk'a pia ak'ù bapariit'ee. ¡Hosana! ¡K'îra wãree Ak'õre eujãde, Tachi K'aripapari cheru perã!
11 Jesús Jerusalende pachek'ãri, wãji Tachi Ak'õre tedee. Aùde eperãarãpa oo para bù unup'eda, waya wãji Betania p'uurudee chi k'õp'ãyoorã ome, k'ewara bada perã.
Jesupa higuera bùùrùmaa ijâatù pedeeda
(Mateo 21.18-19)
12 Aù norema, Betania p'uurudeepa uchiadak'ãri, Jesús jarrapisia nâbeeji. 13 T'ùmùùpa unuji higuera bùùrù bainâ bù k'iru paraa. Mãpai araa ak'ùnaji chau bù jîak'aapa. Mamîda chau–ee baji. Chi k'iru aupaita unuji, chaujara–e pada perã.c 14 Mãpai ma higuera bùùrùmaa mãgaji:
—¡Pù waa chauk'aa pait'eeda! aji.
Chi k'õp'ãyoorãpa irua jarada ûrijida.
Jesupa ne–inaa netopataarã jërek'ooda Tachi Ak'õre tedeepa
(Mateo 21.12-17; Lucas 19.45-48; Juan 2.13-22)
15 Aù norema waya Jerusalende pachedak'ãri, Jesús Tachi Ak'õre tede t'îuji mãik'aapa net'aa netopataarã taawaa jërek'ooji. P'arat'a tau t'erabaipataarã mesa sîa bat'ak'oo wãji, paloma netopataarã banco paara. 16 Ma tedee wãyaapik'aa paji net'aa ateerutaarã. 17 Mãpai jarateemaa beeji:
—Tachi Ak'õre Ûraa p'ã jêra bùde jara bù:
‘Mù te ùt'aa t'âpata teda apataadait'ee, jõma na eujãdepemaarã–it'ee.’ (Isaías 56.7)
‘Mamîda parãpa nechùapataarã ték'ata oo iru p'anù.’ (Jeremías 7.11)
18 Mãga ûridak'ãri, p'aareerã poroorã Moisepa p'ãda jarateepataarã ome k'îsia p'aneejida Jesús peepit'aadait'ee. Iru waawee p'anajida, eperãarãpa ak'ùtrua para bada perã irua jaratee bù k'aurepa. 19 K'ewaraa Jesús chi k'õp'ãyoorã ome uchiajida p'uurudeepa.
Higuera bùùrù p'oodarida
(Mateo 21.20-22)
20 Aù norema tap'eda waya Jesús chi k'õp'ãyoorã ome wãyaajida higuera bùùrù badamãi. Unujida chi k'arra jõmaweda p'oo ak'ùnâ bù. 21 Mãpai Pedropa k'irãpaji Jesupa jarada mãik'aapa jaraji Jesumaa:
—¡Tachi Jarateepari, ak'àji! Pùa higuera bùùrùmaa ijâatù pedeeda p'oodachida aji.
22 Jesupa p'anauji:
—Ijãapatáatù Tachi Ak'õrede. 23 Mùa wãarata jararu. Eperã wãara Tachi Ak'õrede ijãa bù pùrã, iidiipia bù ne–inaa oomerã, ichi t'ãridepai k'îsia–ee: “¿Ooik'ã wa oo–e pai?” Mãgá Tachi Ak'õrepa irua jaradak'a ooit'ee. Jararu pùrã eemaa: “Jãmãik'aapa ãyaa wåji mãik'aapa p'usa jãde baaináji,” Tachi Ak'õrepa mãga ooit'ee. 24 Mãgá ùt'aa iididak'ãri, naapùara ijåatù Tachi Ak'õrepa ooru parãpa k'iniata, pãchi t'ãri auk'a p'anù perã iru ome. Mãgá p'anadairã irua ooit'ee parãpa ùt'aa iididap'edaa. 25 Parã ùt'aa t'âdak'ãri, k'îsianáatù apemapa k'achia ooda parãmaa. Ùt'aa t'âdai naaweda, iru chupùria k'awáatù mãik'aapa perdonáatù irua k'achia ooda. Mãga ooruta pùrã, Tachi Ak'õre ùt'ari bùpa perdonaait'ee parãpa p'ek'au k'achia oopata. 26 [Mamîda awaraarãpa k'achia oodap'edaa parãmaa perdonaada–e pùrã, mãgara Tachi Ak'õrepa ichiaba perdonaa–e parãpa ne–inaa k'achia oopata.]
Tachi Ak'õrepa Jesús pëida
(Mateo 21.23-27; Lucas 20.1-8)
27 Ma t'êepai waya chejida Jerusalendee. Jesús Tachi Ak'õre tede ni misa, irumaa chejida p'aareerã poroorã, Moisepa p'ãda jarateepataarã mãik'aapa judiorã poro waibùarã. 28 Iidijida:
—¿Tachi Ak'õrepa tai bùji–ek'ã ichi te ak'ùdamerã? ¿K'aipa pùmaa nãga oopi bùma? ajida.
29-30 Jesupa p'anauji:
—Mùa pida parãmaa iidiit'ee: ¿K'aipa pëijima aji, Juan Bautistapa poro choo chemerã; Tachi Ak'õrepa maa–e pùrã eperãarãpa? P'anauruta pùrã, mùa pida ichiaba jarait'ee k'ai juapa mùa nãgà ne–inaa oo bù. P'anaudapáde aji.
31 Mãpai ãchi pitapai pedee para beeji:
—Tachi Ak'õrepa pëidada aruta pùrã, irua iidiit'ee: “Mãgara, ¿sãap'eda Juan ûraa ijãada–e pajima?” Mapa mãga p'oyaa jarada–e. 32 Ma awara ¿tachia sãga jaradaima eperãarãpa Juan pëidap'edaa? Mãga jararuta pùrã eperãarã k'îraudaridait'ee tachi ome.
Ãchia waawee p'anapachida k'awa p'anadap'edaa perã jõmaarãpa ijãa p'anapachida Juan Tachi Ak'õre pedee jarapari paji. 33 Mapa p'anaujida:
—K'awada–e p'anùda ajida, k'aipa Juan pëiji.
Mãpai Jesupa mãgaji:
—Mãgara mùa pida jara–eda aji, k'aipa mùmaa nãga oopi bù.